ಮಲೆನಾಡಿನ ರೈತರ ತಂಟೆಗೆ ಬಂದರೆ ಉಗ್ರ ಹೋರಾಟ; ಕಸ್ತೂರಿರಂಗನ್ ವರದಿ ಜಾರಿಗೆ ಮುಂದಾದರೆ ಸರ್ಕಾರದ ವಿರುದ್ಧ ಸಮರ: ಹರಿಕೃಷ್ಣ

ಗಾಜನೂರು ಭಾಗದ ರೈತರ ಬದುಕಿನ ಜೊತೆ ಆಟವಾಡಿದರೆ ಸುಮ್ಮನಿರಲ್ಲ; ರೈತರ ಹಿತಕ್ಕಾಗಿ ಯಾವುದೇ ಹೋರಾಟಕ್ಕೂ ಬಿಜೆಪಿ ಸಿದ್ಧ: ಹರಿಕೃಷ್ಣ

ಮಲೆನಾಡ ಹೆಬ್ಬಾಗಿಲಿನಲ್ಲಿ ಕಸ್ತೂರಿರಂಗನ್ ವರದಿ ವಿರುದ್ಧ ಹೋರಾಟದ ಕಿಚ್ಚು: ಶಿವಮೊಗ್ಗ ಜಿಲ್ಲಾ ಬಿಜೆಪಿ ನೇತೃತ್ವದಲ್ಲಿ ಗಾಜನೂರು ಭಾಗದ ರೈತರ ಪರ ಬೃಹತ್ ಪಾದಯಾತ್ರೆ – ಪತ್ರಿಕಾಗೋಷ್ಠಿಯಲ್ಲಿ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಹರಿಕೃಷ್ಣ ಆಕ್ರೋಶ

ಶಿವಮೊಗ್ಗ: ಮಲೆನಾಡ ಹೆಬ್ಬಾಗಿಲು ಎಂದೇ ಪ್ರಸಿದ್ಧಿಯಾಗಿರುವ ಶಿವಮೊಗ್ಗ ಜಿಲ್ಲೆಯಲ್ಲಿ, ಪಶ್ಚಿಮ ಘಟ್ಟಗಳ ಸಂರಕ್ಷಣೆ ಹೆಸರಿನಲ್ಲಿ ಕಸ್ತೂರಿರಂಗನ್ ವರದಿಯ 7ನೇ ಅಧಿಸೂಚನೆ ಜಾರಿಗೆ ತರಲು ಹೊರಟಿರುವ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ನಡೆಗೆ ಸ್ಥಳೀಯ ಮಟ್ಟದಲ್ಲಿ ವಿರೋಧ ವ್ಯಕ್ತವಾಗಿದೆ. ವರದಿಯ ವ್ಯಾಪ್ತಿಗೆ ಬರುವ ಗ್ರಾಮಗಳ ರೈತರು ಹಾಗೂ ಶ್ರಮಿಕ ವರ್ಗದಲ್ಲಿ ಆವರಿಸಿರುವ ಆತಂಕದ ಕಾರ್ಮೋಡವನ್ನು ಹೋಗಲಾಡಿಸಲು ಹಾಗೂ ಅವರ ಪರವಾಗಿ ಧ್ವನಿ ಎತ್ತಲು ಶಿವಮೊಗ್ಗ ಜಿಲ್ಲಾ ಬಿಜೆಪಿ ನೇತೃತ್ವದಲ್ಲಿ ಬೃಹತ್ ಪಾದಯಾತ್ರೆಯನ್ನು ಆಯೋಜಿಸಲಾಗಿದೆ.

ಈ ಹೋರಾಟದ ಪೂರ್ಣ ರೂಪುರೇಷೆಗಳ ಬಗ್ಗೆ ಇಂದು ಶಿವಮೊಗ್ಗದ ಬಿಜೆಪಿ ಜಿಲ್ಲಾ ಕಛೇರಿಯಲ್ಲಿ ಕರೆಯಲಾಗಿದ್ದ ಪತ್ರಿಕಾಗೋಷ್ಠಿಯಲ್ಲಿ ಬಿಜೆಪಿ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಹರಿಕೃಷ್ಣ ಅವರು ಮಾತನಾಡಿ, ಮಲೆನಾಡಿನ ಜನರ ಒಡಲ ಉರಿಯನ್ನು ಸುದೀರ್ಘವಾಗಿ ಹಂಚಿಕೊಂಡರು.

ಕಸ್ತೂರಿರಂಗನ್ ವರದಿ ಮತ್ತು ನಿರಂತರ ಆತಂಕದ ವಾತಾವರಣ: ಹರಿಕೃಷ್ಣ

ಸುದ್ದಿಗೋಷ್ಠಿಯಲ್ಲಿ ವಿಸ್ತಾರವಾಗಿ ಮಾತನಾಡಿದ ಬಿಜೆಪಿ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಹರಿಕೃಷ್ಣ ಅವರು, “2014ರಲ್ಲಿ ಕಸ್ತೂರಿರಂಗನ್ ವರದಿ ಹೊರಬಿದ್ದ ದಿನದಿಂದಲೂ ಮಲೆನಾಡಿನ ಭಾಗದಲ್ಲಿ ನಿರಂತರವಾಗಿ ಗೊಂದಲ ಮತ್ತು ಅಭದ್ರತೆಯ ವಾತಾವರಣ ನೆಲೆಸಿದೆ. ಸರ್ಕಾರಗಳು ಪ್ರತಿಸಾರಿ ಹೊಸ ಅಧಿಸೂಚನೆ ಹೊರಡಿಸಿದಾಗಲೂ ಇಲ್ಲಿನ ಸಾಮಾನ್ಯ ಜನರು ತಮ್ಮ ಮನೆ, ಮಠ, ಕೃಷಿ ಜಮೀನುಗಳನ್ನು ಕಳೆದುಕೊಳ್ಳಬೇಕಾಗುತ್ತದೋ ಎನ್ನುವ ಭೀತಿಯಲ್ಲಿ ದಿನದೂಡುವಂತಾಗಿದೆ” ಎಂದು ಬೇಸರ ವ್ಯಕ್ತಪಡಿಸಿದರು.

ವಿಶೇಷವಾಗಿ ಗಾಜನೂರು ಜಿಲ್ಲಾ ಪಂಚಾಯಿತಿ ಕ್ಷೇತ್ರದ ವ್ಯಾಪ್ತಿಗೆ ಬರುವ ತೀರ್ಥಹಳ್ಳಿ ಭಾಗದ ಸುಮಾರು 10 ರಿಂದ 15 ಗ್ರಾಮಗಳು ಪರಿಸರ ಸೂಕ್ಷ್ಮ ವಲಯದ (Eco-Sensitive Area – ESA) ವ್ಯಾಪ್ತಿಗೆ ಸೇರ್ಪಡೆಯಾಗುತ್ತಿವೆ. ಈ 7ನೇ ಅಧಿಸೂಚನೆ ಏನಾದರೂ ಕಾನೂನಾಗಿ ಮಾರ್ಪಟ್ಟರೆ, ಈ 15 ಹಳ್ಳಿಗಳ ಸಾವಿರಾರು ಕೃಷಿಕ ಕುಟುಂಬಗಳು, ಶ್ರಮಿಕರು ಮತ್ತು ಬಡವರ ಬದುಕು ಅತ್ಯಂತ ದುಸ್ತರವಾಗಲಿದೆ. ಅವರ ದೈನಂದಿನ ಕೃಷಿ ಚಟುವಟಿಕೆ, ಮನೆ ದುರಸ್ತಿ ಹಾಗೂ ಮೂಲಸೌಕರ್ಯ ಅಭಿವೃದ್ಧಿಗೂ ಗ್ರಹಣ ಹಿಡಿಯಲಿದೆ ಎಂದು ಕಳವಳ ವ್ಯಕ್ತಪಡಿಸಿದರು.

ಗಾಜನೂರು ಭಾಗದ ಜನರ ಮನೆಬಾಗಿಲಿಗೆ ಜಾಗೃತಿ ಪಾದಯಾತ್ರೆ

ರೈತರ ಹಿತರಕ್ಷಣೆಯೇ ತಮ್ಮ ಪ್ರಮುಖ ಆದ್ಯತೆ ಎಂದು ಸ್ಪಷ್ಟಪಡಿಸಿದ ಅವರು, ತೀರ್ಥಹಳ್ಳಿ ಕ್ಷೇತ್ರದ ಶಾಸಕರೂ ಹಾಗೂ ಮಾಜಿ ಸಚಿವರಾದ ಆರಗ ಜ್ಞಾನೇಂದ್ರ ಅವರ ಮಾರ್ಗದರ್ಶನದಲ್ಲಿ, ಶಿವಮೊಗ್ಗ ಲೋಕಸಭಾ ಕ್ಷೇತ್ರದ ಸಂಸದರಾದ ಬಿ. ವೈ. ರಾಘವೇಂದ್ರ ಅವರ ನೇತೃತ್ವದಲ್ಲಿ ಹಾಗೂ ಬಿಜೆಪಿ ಜಿಲ್ಲಾಧ್ಯಕ್ಷರ ಸೂಚನೆ ಮತ್ತು ಸಲಹೆಯಂತೆ ಗಾಜನೂರು ಜಿಲ್ಲಾ ಪಂಚಾಯಿತಿ ವ್ಯಾಪ್ತಿಯಲ್ಲಿ ಬೃಹತ್ ಪಾದಯಾತ್ರೆಯನ್ನು ಹಮ್ಮಿಕೊಳ್ಳಲಾಗಿದೆ ಎಂದರು.

ನಾವು ನಾಳೆಯಿಂದ ಹಾಲ ಲಕ್ಕವಳ್ಳಿ ಗ್ರಾಮದಿಂದ ಈ ಪಾದಯಾತ್ರೆಯನ್ನು ಪ್ರಾರಂಭಿಸಿ, ಇಕೋ ಸೆನ್ಸಿಟಿವ್ ಏರಿಯಾಗೆ ಸೇರ್ಪಡೆಯಾಗಿರುವ ಪ್ರತಿಯೊಂದು 15 ಹಳ್ಳಿಗಳ ಜನರ ಮನೆಬಾಗಿಲಿಗೆ ತೆರಳಲಿದ್ದೇವೆ. ಅಲ್ಲಿನ ಪ್ರತಿಯೊಬ್ಬ ರೈತನ, ಬಡವನ ಹಾಗೂ ಶ್ರಮಿಕನ ಅಭಿಪ್ರಾಯವನ್ನು ಸಂಗ್ರಹಿಸಿ, ಆ ಕಳವಳವನ್ನು ರಾಜ್ಯ ಹಾಗೂ ಕೇಂದ್ರ ಸರ್ಕಾರಗಳಿಗೆ ತಲುಪಿಸುವ ಬಲವಾದ ಮಾಧ್ಯಮವಾಗಿ ಜಿಲ್ಲಾ ಬಿಜೆಪಿ ಕಾರ್ಯನಿರ್ವಹಿಸಲಿದೆ. ಈ ವರದಿ ವಿರುದ್ಧದ ಹೋರಾಟದ ಕಿಚ್ಚು ಪ್ರತಿಯೊಂದು ಹಳ್ಳಿಯಲ್ಲೂ ಜಾಗೃತಗೊಳ್ಳಲಿದೆ ಎಂದು ಘೋಷಿಸಿದರು.

ರೈತರಿಗೆ ಮೊದಲ ಹಕ್ಕು ನೀಡಿ: ಕಾನೂನು ಜಾರಿಗೆ ಮುನ್ನ ಜನರ ಹಕ್ಕುಗಳನ್ನು ರಕ್ಷಿಸಿ

ಮಲೆನಾಡಿನ ಜನರ ವಾಸ್ತವ ಸ್ಥಿತಿಯನ್ನು ಎಳೆಎಳೆಯಾಗಿ ಬಿಚ್ಚಿಟ್ಟ ಹರಿಕೃಷ್ಣ ಅವರು, ಹೊರಗಿನ ಪ್ರಪಂಚಕ್ಕೆ ಅಥವಾ ತಟಸ್ಥವಾಗಿ ನೋಡುವವರಿಗೆ ಪಶ್ಚಿಮ ಘಟ್ಟ ಮತ್ತು ಸಹ್ಯಾದ್ರಿ ಪರ್ವತ ಶ್ರೇಣಿ ಕೇವಲ ಭಾವನಾತ್ಮಕ ವಿಚಾರವಾಗಿರಬಹುದು, ಆದರೆ ಇಲ್ಲಿನ ಕೃಷಿಕರಿಗೆ ಇದು ರಕ್ತಗತವಾದ ಬದುಕು. ಇಲ್ಲಿನ ಜನ ಶತಮಾನಗಳಿಂದಲೂ ಪರಿಸರವನ್ನು ಪೂಜಿಸುತ್ತಾ, ಪರಿಸರದ ಜೊತೆಯಲ್ಲೇ ಜೀವಿಸುತ್ತಿದ್ದಾರೆ. ನಮಗೆ ಯಾರೂ ಪರಿಸರ ಸಂರಕ್ಷಣೆಯ ಬಗ್ಗೆ ಬೋಧನೆ ಮಾಡುವ ಅಗತ್ಯವಿಲ್ಲ ಎಂದು ಆಕ್ರೋಶ ಹೊರಹಾಕಿದರು.

ಇಲ್ಲಿನ ಜನರ ಮೇಲೆ ಈಗಾಗಲೇ ಬ್ರಿಟಿಷರ ಕಾಲದ 1927ರ ಹಳೆಯ ಅರಣ್ಯ ಕಾಯ್ದೆ, ಆನೆ ಕಾರಿಡಾರ್, ಟೈಗರ್ ಕಾರಿಡಾರ್ ಹಾಗೂ ವನ್ಯಜೀವಿ ಧಾಮಗಳ ಹೆಸರಿನಲ್ಲಿ ನೂರಾರು ಕಾನೂನುಗಳನ್ನು ಹೇರಲಾಗಿದೆ. ಶರಾವತಿ, ಚಕ್ರ, ವಾರಾಹಿ ಯೋಜನೆಗಳಿಗಾಗಿ ಭೂಮಿ ತ್ಯಾಗ ಮಾಡಿದ ಮುಳುಗಡೆ ಸಂತ್ರಸ್ತರನ್ನು ತಂದು ಹಾಲಕ್ಕೊಳ್ಳಿಯಂತಹ ಹಳ್ಳಿಗಳಲ್ಲಿ ಪುನರ್ವಸತಿ ಕಲ್ಪಿಸಲಾಯಿತು. ಈಗ ಸರ್ಕಾರವೇ ಅವರನ್ನು ‘ನೀವು ಅರಣ್ಯ ವ್ಯಾಪ್ತಿಯಲ್ಲಿದ್ದೀರಿ’ ಎಂದರೆ ಇದು ಯಾವ ರೀತಿಯ ನ್ಯಾಯ? ಸರ್ಕಾರ ಯಾವುದೇ ಕಾಯ್ದೆ ಅಥವಾ ಕರ್ತವ್ಯವನ್ನು ವಿಧಿಸುವ ಮೊದಲು, ಸಂವಿಧಾನಬದ್ಧವಾಗಿ ಅಲ್ಲಿನ ರೈತರಿಗೆ ಅವರ ಜಮೀನಿನ ಹಕ್ಕುಪತ್ರ ನೀಡಬೇಕು, ತೋಟ-ಗದ್ದೆಗಳಿಗೆ ಪೋಡಿ ಮಾಡಿಕೊಡಬೇಕು. ಅವರ ಹಕ್ಕನ್ನು ಮೊದಲು ಪ್ರತಿಷ್ಠಾಪಿಸಲಿ, ಆಮೇಲೆ ಕಾನೂನಿನ ಮಾತಾಡಲಿ ಎಂದು ಸವಾಲು ಹಾಕಿದರು.

ರಾಜ್ಯ ಸರ್ಕಾರಕ್ಕೆ ಆಗ್ರಹ ಮತ್ತು ನೇರ ಎಚ್ಚರಿಕೆ ನೀಡಿದ ಹರಿಕೃಷ್ಣ

ರಾಜ್ಯ ಸರ್ಕಾರದ ಮೃದು ಧೋರಣೆಯನ್ನು ಖಂಡಿಸಿದ ಅವರು, ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರಿಗೆ ನೇರವಾಗಿ ಆಗ್ರಹಿಸಿದರು. ಕಷ್ಟದ ಪರಿಸ್ಥಿತಿಯನ್ನು ಹಾಗೂ ಬಿಕ್ಕಟ್ಟನ್ನು ಒಂದು ಅವಕಾಶವಾಗಿ ಪರಿವರ್ತಿಸಿಕೊಳ್ಳುವ ಪಾಠವನ್ನು ಪ್ರಧಾನಿ ನರೇಂದ್ರ ಮೋದಿ ಅವರ ಸರ್ಕಾರದಿಂದ ಕಲಿಯಿರಿ. ಕೇವಲ ರಾಜಕೀಯ ಹೇಳಿಕೆಗಳಿಗೆ ಸೀಮಿತವಾಗದೆ, ಮಲೆನಾಡಿನ ರೈತರ ಜಮೀನು ಹಾಗೂ ಹಕ್ಕುಗಳಿಗೆ ಸಂಬಂಧಿಸಿದ ಸಮಸ್ಯೆಗಳಿಗೆ ಶಾಶ್ವತ ಪರಿಹಾರ ಕಲ್ಪಿಸಲು ಈ ಬಿಕ್ಕಟ್ಟನ್ನು ಸದವಕಾಶವಾಗಿ ಬಳಸಿಕೊಳ್ಳಿ. ರೈತರ ಮೇಲೆ ಬಲವಂತವಾಗಿ ಕಾನೂನುಗಳನ್ನು ಹೇರಿಸುವ ಬದಲು, ಸ್ಥಳೀಯ ಜನರ ಅಭಿಪ್ರಾಯಕ್ಕೆ ಮನ್ನಣೆ ನೀಡಿ, ಅವರ ಹಕ್ಕು ಮತ್ತು ಬದುಕನ್ನು ರಕ್ಷಿಸುವ ರೀತಿಯಲ್ಲಿ ನಿರ್ಧಾರ ಕೈಗೊಳ್ಳಿ, ಎಂದು ಅವರು ಆಗ್ರಹಿಸಿದರು.

ಈ ವಿಚಾರದಲ್ಲಿ ರಾಜ್ಯ ಸರ್ಕಾರ ಗಮನಾರ್ಹ ಕೆಲಸ ಮಾಡಬೇಕು. ಅಗತ್ಯವಿದ್ದರೆ ಕೇಂದ್ರ ಸರ್ಕಾರಕ್ಕೆ ಮನವರಿಕೆ ಮಾಡಲು ಸರ್ವಪಕ್ಷ ನಿಯೋಗವನ್ನು ದೆಹಲಿಗೆ ಕೊಂಡೊಯ್ಯಲಿ. ಬಿಜೆಪಿ ಸಂಪೂರ್ಣವಾಗಿ ಈ ಭಾಗದ ರೈತರ ಪರವಾಗಿ ಗಟ್ಟಿಯಾಗಿ ನಿಲ್ಲಲಿದೆ. ಜಮೀನು ಮತ್ತು ಬದುಕಿನ ರಕ್ಷಣೆಗಾಗಿ ನಡೆಯುವ ಈ ಹೋರಾಟದಲ್ಲಿ ಯಾವುದೇ ಕಾರಣಕ್ಕೂ ಹಿಂದೆ ಸರಿಯುವ ಪ್ರಶ್ನೆಯೇ ಇಲ್ಲ ಎಂದು ಎಚ್ಚರಿಸಿದರು.

ಪಾದಯಾತ್ರೆಗೆ ಮಾಧ್ಯಮ, ಸಾರ್ವಜನಿಕರ ಸಹಕಾರಕ್ಕೆ ಹರಿಕೃಷ್ಣ ಮನವಿ

ಪಾದಯಾತ್ರೆಯಲ್ಲಿ ಮಾಧ್ಯಮ ಮಿತ್ರರು ಕೂಡ ಭಾಗವಹಿಸಿ ಮಲೆನಾಡಿನ ಗ್ರಾಮಗಳ ವಾಸ್ತವ ಸ್ಥಿತಿಯನ್ನು ಕಣ್ಣಾರೆ ಗಮನಿಸಬೇಕು ಎಂದು ಹರಿಕೃಷ್ಣ ಮನವಿ ಮಾಡಿದರು.

ನೀವು ನಮ್ಮೊಂದಿಗೆ ಹೆಜ್ಜೆ ಹಾಕಿದಾಗ ಮಾತ್ರ ಗ್ರಾಮದಿಂದ ಗ್ರಾಮಕ್ಕೆ ಸಮಸ್ಯೆಗಳು ಹೇಗೆ ಬದಲಾಗುತ್ತವೆ ಎಂಬುದು ನಿಮಗೆ ಅರ್ಥವಾಗುತ್ತದೆ. ಇದು ಕೇವಲ ರಾಜಕೀಯ ವೇದಿಕೆಯಲ್ಲ. ಜನರ ಬದುಕಿನ ಪ್ರಶ್ನೆ. ಆದ್ದರಿಂದ ಮಾಧ್ಯಮ ಮಿತ್ರರು ಈ ಹೋರಾಟವನ್ನು ಜನರ ಧ್ವನಿಯಾಗಿ ರಾಜ್ಯ ಮತ್ತು ಕೇಂದ್ರ ಸರ್ಕಾರದ ಗಮನಕ್ಕೆ ತರಬೇಕು, ಎಂದು ಹೇಳಿದರು.

ಮಲೆನಾಡಿನ ರೈತರ ಹಕ್ಕು, ಬದುಕು ಮತ್ತು ಭವಿಷ್ಯವನ್ನು ರಕ್ಷಿಸುವ ಉದ್ದೇಶದಿಂದ ನಡೆಯಲಿರುವ ಈ ಪಾದಯಾತ್ರೆಯ ಮೂಲಕ ಕಸ್ತೂರಿರಂಗನ್ ವರದಿಯ 7ನೇ ಅಧಿಸೂಚನೆ ಕುರಿತು ಸ್ಥಳೀಯ ಜನರ ಅಭಿಪ್ರಾಯವನ್ನು ಸಂಗ್ರಹಿಸಿ, ಅದನ್ನು ಸರ್ಕಾರಗಳ ಮುಂದಿಡಲಾಗುವುದು. ಅಧಿಸೂಚನೆಯನ್ನು ಜಾರಿಗೊಳಿಸುವ ಮುನ್ನ ಮಲೆನಾಡಿನ ಜನರ ಧ್ವನಿಯನ್ನು ಆಲಿಸಬೇಕು, ಜನರ ಹಕ್ಕನ್ನು ಖಾತ್ರಿಪಡಿಸಿದ ಬಳಿಕವೇ ಕರ್ತವ್ಯದ ಬಗ್ಗೆ ಮಾತನಾಡಬೇಕು ಎಂಬುದು ಬಿಜೆಪಿಯ ಸ್ಪಷ್ಟ ನಿಲುವು ಎಂದು ಹರಿಕೃಷ್ಣ ಪುನರುಚ್ಚರಿಸಿದರು.

ಈ ಪತ್ರಿಕಾಗೋಷ್ಠಿಯಲ್ಲಿ ಕೃಷಿ ಪತ್ತಿನ ಸಹಕಾರ ಸಂಘದ ಅಧ್ಯಕ್ಷರು ಹಾಗೂ ಎಪಿಎಂಸಿ ಮಾಜಿ ಸದಸ್ಯರಾದ ಶಿವಾನಂಜಪ್ಪ, ಗಾಜನೂರು ಮಹಾಶಕ್ತಿಕೇಂದ್ರದ ಅಧ್ಯಕ್ಷರಾದ ಕುಮಾರ್ ಬಿ. ಗೌಡ, ಜಿಲ್ಲಾ ರೈತ ಮೋರ್ಚಾ ಪ್ರಧಾನ ಕಾರ್ಯದರ್ಶಿ ಗಣೇಶ್ ಬಿಳಿಕಿ, ಗಾಜನೂರು ಮಹಾಶಕ್ತಿಕೇಂದ್ರದ ಯುವ ಮೋರ್ಚಾ ಅಧ್ಯಕ್ಷರಾದ ರಾಜೇಶ್ ಕುಮಾರ್ ಗಾಜನೂರು, ಜಿಲ್ಲಾ ಮಾಧ್ಯಮ ಪ್ರಮುಖರಾದ ಚಂದ್ರಶೇಖರ್ ಎಸ್. ಹಾಗೂ ಮಂಜುನಾಥ್ ಎನ್. ಉಪಸ್ಥಿತರಿದ್ದರು.