ಶಿವಮೊಗ್ಗ: ಈಗಾಗಲೇ ಕಾನೂನುಬದ್ಧವಾಗಿ ನೋಂದಾಯಿತವಾಗಿರುವ ‘ಜೇಸಿಸ್ ಸ್ಪೋರ್ಟ್ಸ್ ಅಂಡ್ ಕಲ್ಚರಲ್ ಕ್ಲಬ್ ಫೌಂಡೇಶನ್’ ಹೆಸರನ್ನು ಹೋಲುವ ಅಥವಾ ಸಾರ್ವಜನಿಕರಲ್ಲಿ ಗೊಂದಲ ಸೃಷ್ಟಿಸುವ ರೀತಿಯ ಸಮಾನಾರ್ಥಕ ಹೆಸರಿನಲ್ಲಿ ಮತ್ತೊಂದು ಸಂಸ್ಥೆಯನ್ನು ಯಾವುದೇ ಕಾರಣಕ್ಕೂ ನೋಂದಾಯಿಸಬಾರದು. ಅಂತಹ ಯಾವುದೇ ಯತ್ನ ಕಂಡುಬಂದರೆ ಅದನ್ನು ಕಾನೂನುಬದ್ಧವಾಗಿ ಪ್ರಶ್ನಿಸಿ, ಸಂಬಂಧಪಟ್ಟ ವ್ಯಕ್ತಿಗಳು ಹಾಗೂ ಅಧಿಕಾರಿಗಳ ವಿರುದ್ಧ ನ್ಯಾಯಾಲಯ ಸೇರಿದಂತೆ ಎಲ್ಲ ಕಾನೂನು ವೇದಿಕೆಗಳಲ್ಲಿ ಹೋರಾಟ ನಡೆಸಲಾಗುವುದು ಎಂದು ಸಂಸ್ಥೆಯ ವ್ಯವಸ್ಥಾಪಕ ಟ್ರಸ್ಟಿ ಪರಮೇಶ್ವರ ಎಲ್.ಕೆ. ತಿಳಿಸಿದ್ದಾರೆ.
ಈ ಸಂಬಂಧ ಸಹಕಾರ ಸಂಘಗಳ ಉಪನಿಬಂಧಕರು, ಉಪ ನೋಂದಣಾಧಿಕಾರಿಗಳು ಹಾಗೂ ಕಾರ್ಮಿಕ ಇಲಾಖೆಯ ಮುಖ್ಯ ಅಧಿಕಾರಿಗಳಿಗೆ ವ್ಯವಸ್ಥಾಪಕ ಟ್ರಸ್ಟಿ ಪರಮೇಶ್ವರ್ ಎಲ್.ಕೆ. ಅಧಿಕೃತ ಮನವಿಪತ್ರ ಸಲ್ಲಿಸಿದ್ದು, ಈಗಾಗಲೇ ನೋಂದಾಯಿತವಾಗಿರುವ ಸಂಸ್ಥೆಯ ಹೆಸರಿನ ದುರುಪಯೋಗವನ್ನು ಯಾವುದೇ ಕಾರಣಕ್ಕೂ ಸಹಿಸುವುದಿಲ್ಲ ಎಂದು ಪರಮೇಶ್ವರ ಎಲ್. ಕೆ ಹೇಳಿದ್ದಾರೆ.
ಕ್ರೀಡೆ–ಸಂಸ್ಕೃತಿ ಬೆಳವಣಿಗೆಗೆ ಕಾನೂನುಬದ್ಧ ಸಮಾಜಮುಖಿ ವೇದಿಕೆ
ಸಂಸ್ಥೆಯು ಭಾರತೀಯ ಟ್ರಸ್ಟ್ ಕಾಯ್ದೆ–1882ರ ಅಡಿಯಲ್ಲಿ ಕಾನೂನುಬದ್ಧವಾಗಿ ನೋಂದಾಯಿತವಾಗಿದ್ದು, ಕ್ರೀಡೆ, ಸಾಂಸ್ಕೃತಿಕ ಚಟುವಟಿಕೆಗಳು, ಯುವಜನರ ವ್ಯಕ್ತಿತ್ವ ವಿಕಾಸ, ಅಧ್ಯಯನ ಪ್ರವಾಸಗಳು ಹಾಗೂ ಸಮಾಜಮುಖಿ ಕಾರ್ಯಕ್ರಮಗಳನ್ನು ನಡೆಸುವ ಉದ್ದೇಶದಿಂದ ಕಾರ್ಯನಿರ್ವಹಿಸುತ್ತಿದೆ. ಯಾವುದೇ ರಾಜಕೀಯ, ಜಾತಿ, ಧರ್ಮ ಅಥವಾ ವೈಯಕ್ತಿಕ ಹಿತಾಸಕ್ತಿಗಳಿಗೆ ಸಂಸ್ಥೆಯಲ್ಲಿ ಅವಕಾಶವಿಲ್ಲ ಎಂದು ಮನವಿಯಲ್ಲಿ ಸ್ಪಷ್ಟಪಡಿಸಲಾಗಿದೆ.
ಯುವಜನರನ್ನು ವ್ಯಸನದಿಂದ ದೂರವಿಟ್ಟು ಕ್ರೀಡೆ–ಸಂಸ್ಕೃತಿಯತ್ತ ಸೆಳೆಯುವ ಸಂಕಲ್ಪ
ಪ್ರಸ್ತುತ ಯುವ ಪೀಳಿಗೆಯನ್ನು ಮೊಬೈಲ್ ಹಾಗೂ ವ್ಯಸನ ಮುಕ್ತವಾಗಿಸಿ, ವಿವಿಧ ಕ್ರೀಡಾ ಚಟುವಟಿಕೆಗಳತ್ತ ಆಕರ್ಷಿಸುವುದು ಮತ್ತು ಅವರನ್ನು ಪ್ರೋತ್ಸಾಹಿಸುವುದು ಸಂಸ್ಥೆಯ ಪ್ರಮುಖ ಆದ್ಯತೆಯಾಗಿದೆ. ಇದರೊಂದಿಗೆ ಸಾಂಸ್ಕೃತಿಕ ಚಟುವಟಿಕೆಗಳನ್ನು ಗ್ರಾಮೀಣ ಮಟ್ಟದಿಂದ ವಿಸ್ತರಿಸಿ, ಸಮಾಜದ ಎಲ್ಲಾ ವರ್ಗದ ಜನರನ್ನು ಒಳಗೊಳ್ಳುವಂತಹ ‘ಬಹುತ್ವದ ವೇದಿಕೆ’ಗಳನ್ನು ರೂಪಿಸಲು ಸಂಸ್ಥೆ ನಿರ್ಧರಿಸಿದೆ. ಯುವಕರಲ್ಲಿ ಜ್ಞಾನಾರ್ಜನೆ ಮತ್ತು ಇತಿಹಾಸದ ಅರಿವು ಮೂಡಿಸಲು ವಿಶೇಷ ಅಧ್ಯಯನಶೀಲ ಪ್ರವಾಸ ಕಾರ್ಯಕ್ರಮಗಳನ್ನು ಸಹ ಹಮ್ಮಿಕೊಳ್ಳಲಾಗುವುದು ಎಂದು ಸಂಸ್ಥೆ ಪ್ರಕಟಣೆಯಲ್ಲಿ ತಿಳಿಸಿದೆ.
ಸಂಸ್ಥೆಯ ವಿಸ್ತರಣೆಗೆ ಸಿದ್ಧತೆ; ಇನ್ನಷ್ಟು ಟ್ರಸ್ಟಿಗಳ ಸೇರ್ಪಡೆಗೆ ನಿರ್ಧಾರ
ಕಳೆದ ಒಂದು ತಿಂಗಳಿನಿಂದ ನಿರಂತರ ಸಭೆ-ಚರ್ಚೆಗಳನ್ನು ನಡೆಸಿ, ಸಭಾ ನಡಾವಳಿಯ ತೀರ್ಮಾನದಂತೆ ಮೊದಲ ಹಂತದಲ್ಲಿ ಮೂರು ಜನ ಟ್ರಸ್ಟಿಗಳ ಮೂಲಕ ಈ ಸಂಸ್ಥೆಯನ್ನು ಸ್ಥಾಪಿಸಲಾಗಿದೆ. ಬರುವ ವಾರದಲ್ಲಿ ಮತ್ತಷ್ಟು ಗಣ್ಯರನ್ನು ಟ್ರಸ್ಟಿಗಳಾಗಿ ಸೇರ್ಪಡೆಗೊಳಿಸಿಕೊಂಡು, ಸಂಸ್ಥೆಯ ಮೂಲೋದ್ದೇಶಗಳ ಬಲವರ್ಧನೆಗೆ ಮತ್ತು ವ್ಯಾಪಕ ಸಮಾಜ ಸೇವೆಗೆ ಚಾಲನೆ ನೀಡಲಾಗುವುದು ಎಂದು ಸಂಸ್ಥೆಯ ಪರಮೇಶ್ವರ ಎಲ್.ಕೆ ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
⚠️ ಸಮಾನ ಹೆಸರಿನ ನೋಂದಣಿಗೆ ಬ್ರೇಕ್: ಕಾನೂನು ಹೋರಾಟದ ಎಚ್ಚರಿಕೆ
ಸಂಸ್ಥೆಯ ಹೆಸರನ್ನು ದುರುಪಯೋಗಪಡಿಸಿಕೊಳ್ಳುವ ಸಾಧ್ಯತೆಗಳಿರುವುದರಿಂದ, ‘ಜೇಸಿಸ್ ಸ್ಪೋರ್ಟ್ಸ್ ಅಂಡ್ ಕಲ್ಚರಲ್ ಕ್ಲಬ್’ ಫೌಂಡೇಶನ್ ತೀವ್ರ ಜಾಗ್ರತೆ ವಹಿಸಿದೆ. ಈ ಕುರಿತು ಈಗಾಗಲೇ ಶಿವಮೊಗ್ಗ ಜಿಲ್ಲಾಧಿಕಾರಿಗಳ ಕಛೇರಿ ಆವರಣದಲ್ಲಿರುವ ಸಹಕಾರ ಸಂಘಗಳ ಉಪನಿಬಂಧಕರು, ಸಾಗರ ರಸ್ತೆಯ ಉಪನೋಂದಣಾಧಿಕಾರಿಗಳು ಹಾಗೂ ವಿನೋಬಾನಗರದ ಕಾರ್ಮಿಕ ಇಲಾಖೆಯ ಮುಖ್ಯ ಅಧಿಕಾರಿಗಳಿಗೆ ಸಂಸ್ಥೆಯ ವತಿಯಿಂದ ಅಧಿಕೃತ ಮನವಿ ನೀಡಲಾಗಿದೆ.
ಕಾನೂನು ಕ್ರಮ ಮತ್ತು ಲೋಕಾಯುಕ್ತ ದೂರಿನ ಎಚ್ಚರಿಕೆ
ತಮ್ಮ ಸಂಸ್ಥೆಯ ಹೆಸರನ್ನೇ ಹೋಲುವ (ಸಮನಾರ್ಥಕ ಅಥವಾ ಸಮಾನಾಂತರ) ಶೀರ್ಷಿಕೆಯಲ್ಲಿ ಬೇರೆ ಯಾವುದೇ ನಕಲಿ ಸಂಸ್ಥೆಗಳನ್ನು ಈ ಇಲಾಖೆಗಳಲ್ಲಿ ನೋಂದಣಿ ಮಾಡಬಾರದು ಎಂದು ಮನವಿ ಮಾಡಲಾಗಿದೆ. ಒಂದು ವೇಳೆ ನಿಯಮ ಉಲ್ಲಂಘಿಸಿ ಯಾರಾದರೂ ಇಂತಹ ಪ್ರಯತ್ನಕ್ಕೆ ಕೈಹಾಕಿದರೆ ಅಥವಾ ಸಮನಾಂತರ ಹೆಸರಿನಲ್ಲಿ ಸಂಸ್ಥೆ ಸ್ಥಾಪಿಸಲು ಮುಂದಾದರೆ, ಅಂತವರ ವಿರುದ್ಧ ದೂರು, ಸಿವಿಲ್ ದಾವೆ ಹೂಡುವುದರ ಜೊತೆಗೆ ಲೋಕಾಯುಕ್ತದಲ್ಲಿಯೂ ದೂರು ದಾಖಲಿಸಿ ಕಠಿಣ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಸಂಸ್ಥೆಯು ಪ್ರಕಟಣೆಯ ಮೂಲಕ ಸ್ಪಷ್ಟ ಎಚ್ಚರಿಕೆ ನೀಡಿದೆ.
ಈ ಮನವಿ ಸಲ್ಲಿಸುವ ಸಂದರ್ಭದಲ್ಲಿ ಜೇಸಿಸ್ ಸ್ಪೋರ್ಟ್ಸ್ ಅಂಡ್ ಕಲ್ಚರಲ್ ಕ್ಲಬ್ ಫೌಂಡೇಶನ್ನ ವ್ಯವಸ್ಥಾಪಕ ಟ್ರಸ್ಟಿ ಪರಮೇಶ್ವರ್ ಎಲ್.ಕೆ. ಅವರೊಂದಿಗೆ ಟ್ರಸ್ಟಿಗಳಾದ ಗಾರಾ ಶ್ರೀನಿವಾಸ್ ಹಾಗೂ ನವೀನ್ ಕುಮಾರ್ ಎನ್.ವಿ. ಉಪಸ್ಥಿತರಿದ್ದು, ಸಂಸ್ಥೆಯ ಹೆಸರು, ಗೌರವ ಮತ್ತು ಕಾನೂನುಬದ್ಧ ಹಕ್ಕುಗಳ ರಕ್ಷಣೆಗೆ ಸಂಬಂಧಿಸಿದಂತೆ ಅಧಿಕಾರಿಗಳ ಗಮನಕ್ಕೆ ತಂದರು. ಯಾವುದೇ ವ್ಯಕ್ತಿ ಅಥವಾ ಸಂಘಟನೆ ಸಂಸ್ಥೆಯ ಹೆಸರನ್ನು ಹೋಲುವ ರೀತಿಯಲ್ಲಿ ದುರುಪಯೋಗಪಡಿಸಿಕೊಳ್ಳಲು ಅವಕಾಶ ನೀಡಬಾರದು ಎಂದು ಅವರು ಒತ್ತಾಯಿಸಿದರು.
