ಗುರುಪರಂಪರೆಯ ಬೆಳಕು, ಆಧ್ಯಾತ್ಮಿಕ ಪರಂಪರೆಯ ಅನಾವರಣ: ಧರ್ಮ, ಸಂಸ್ಕಾರ ಮತ್ತು ಸಮನ್ವಯದ ಸಂದೇಶ ಸಾರುವ ಶ್ರೀ ರಂಭಾಪುರಿ ದಸರಾ

On: October 20, 2026 8:43 PM

ಲೇಖಕರು: ಡಾ. ಗುರುಪಾದಯ್ಯ ವಿ. ಸಾಲಿಮಠ, ಸಾಹಿತಿಗಳು, ಸವಣೂರು

ಧರ್ಮವಿಜಯದ ಸಂಕೇತ, ಗುರುಪರಂಪರೆಯ ಮಹಿಮೆ ಸಾರುವ ರಂಭಾಪುರಿ ದಸರಾ

ಭಾರತೀಯ ಸಂಸ್ಕೃತಿಯ ವಿಶಾಲ ಆಕಾಶದಲ್ಲಿ ದಸರಾ ಹಬ್ಬವು ಕೇವಲ ಸಂಭ್ರಮದ ಆಚರಣೆಯಾಗಿ ಉಳಿದಿಲ್ಲ, ಅದು ಧರ್ಮದ ವಿಜಯದ ಸಂಕೇತ, ಶಕ್ತಿಯ ಆರಾಧನೆಯ ಪ್ರತೀಕ, ಗುರುಪರಂಪರೆಯ ಮಹಿಮೆಯ ಪ್ರತಿಬಿಂಬ ಹಾಗೂ ಮಾನವೀಯ ಮೌಲ್ಯಗಳ ಬೆಳಕನ್ನು ಸಮಾಜಕ್ಕೆ ಹರಡುವ ಪವಿತ್ರ ಉತ್ಸವವಾಗಿದೆ. ಶತಮಾನಗಳ ಇತಿಹಾಸದ ಹೆಜ್ಜೆಗುರುತುಗಳನ್ನು ಹೊತ್ತು, ರಾಜವೈಭವದ ನೆನಪುಗಳನ್ನು ಮೈಗೂಡಿಸಿಕೊಂಡು, ಭಕ್ತಿ-ಭಾವದ ಹೊನಲಿನಲ್ಲಿ ಜನಮನಗಳನ್ನು ಬೆಸೆಯುವ ದಸರಾ, ಕಾಲ ಬದಲಾದರೂ ತನ್ನ ಸಾಂಸ್ಕೃತಿಕ ಶ್ರೀಮಂತಿಕೆಯನ್ನು ಕಳೆದುಕೊಳ್ಳದ ಅಪೂರ್ವ ಪರಂಪರೆ. ಅರಮನೆಗಳ ಅಂಗಳದಲ್ಲಿ ವೈಭವದಿಂದ ಕಂಗೊಳಿಸಿದ ಈ ಉತ್ಸವ, ಇಂದು ಜನಸಾಮಾನ್ಯರ ಹೃದಯದಲ್ಲಿ ಧಾರ್ಮಿಕ ಶ್ರದ್ಧೆ, ಸಾಮಾಜಿಕ ಸಾಮರಸ್ಯ ಮತ್ತು ಸಾಂಸ್ಕೃತಿಕ ಅಭಿಮಾನವನ್ನು ಬೆಳಗಿಸುವ ನಾಡಹಬ್ಬವಾಗಿ ಬೆಳೆದಿದೆ. ಇದೇ ಪರಂಪರೆಯ ದಿವ್ಯ ಪ್ರಭೆಯಲ್ಲಿ, ವೀರಶೈವ ಧರ್ಮದ ಆದಿ ಪಂಚಪೀಠಗಳಲ್ಲಿ ಮೊದಲ ಸ್ಥಾನ ಪಡೆದಿರುವ ಬಾಳೆಹೊನ್ನೂರು ಶ್ರೀಮದ್ ರಂಭಾಪುರಿ ವೀರಸಿಂಹಾಸನ ಮಹಾಪೀಠದಲ್ಲಿ ನಡೆಯುವ ಶರನ್ನವರಾತ್ರಿ ದಸರಾ ದರ್ಬಾರ್ ಮಹೋತ್ಸವವು ಗುರುಕೃಪೆ, ಧರ್ಮಬೋಧನೆ, ಸಂಸ್ಕಾರ ಮತ್ತು ಮಾನವೀಯತೆಯ ಸಂದೇಶವನ್ನು ಸಾರುವ ವಿಶಿಷ್ಟ ಧಾರ್ಮಿಕ ಉತ್ಸವವಾಗಿ ಗಮನ ಸೆಳೆಯುತ್ತದೆ. ಗುರುಗಳ ದಿವ್ಯ ಸಾನ್ನಿಧ್ಯ, ಇಷ್ಟಲಿಂಗ ಮಹಾಪೂಜೆ, ಧರ್ಮೋಪನ್ಯಾಸ, ಸಾಂಸ್ಕೃತಿಕ ಕಾರ್ಯಕ್ರಮಗಳು ಹಾಗೂ ವಿಜಯದಶಮಿಯ ಪವಿತ್ರ ಆಚರಣೆಗಳ ಮೂಲಕ ಭಕ್ತರ ಮನದಲ್ಲಿ ಧರ್ಮನಿಷ್ಠೆಯ ದೀಪ ಬೆಳಗಿಸುವ ರಂಭಾಪುರಿ ದಸರಾ, ಪ್ರಾಚೀನ ಗುರುಪರಂಪರೆಯ ಘನತೆಯನ್ನು ಇಂದಿನ ಬದುಕಿನ ಮೌಲ್ಯಗಳೊಂದಿಗೆ ಬೆಸೆಯುವ ಅಪೂರ್ವ ವೇದಿಕೆಯಾಗಿದೆ.

ಭಾರತೀಯ ಸಂಸ್ಕೃತಿಯ ಜೀವಾಳ, ಪರಂಪರೆಯ ಬೇರುಗಳಲ್ಲಿ ಹಬ್ಬಗಳ ವೈಶಿಷ್ಟ್ಯ

ಭಾರತೀಯ ಸಂಸ್ಕೃತಿಯ ಜೀವಾಳವಾಗಿರುವ ಹಬ್ಬಗಳು ಕೇವಲ ಸಂಭ್ರಮದ ಆಚರಣೆಗಳಲ್ಲ; ಅವು ಧಾರ್ಮಿಕ ನಂಬಿಕೆ, ಸಾಂಸ್ಕೃತಿಕ ಪರಂಪರೆ, ಮಾನವೀಯ ಮೌಲ್ಯ ಹಾಗೂ ಸಾಮಾಜಿಕ ಸಾಮರಸ್ಯವನ್ನು ಬೆಸೆಯುವ ಪವಿತ್ರ ಸೇತುವೆಗಳಾಗಿವೆ. ಹಳೆ ಬೇರು ಹೊಸ ಚಿಗುರು ಕೂಡಿರಲು ಮರ ಸೊಬಗು ಎಂಬ ಕವಿವಾಣಿಯಂತೆ, ಪ್ರಾಚೀನ ಪರಂಪರೆಯ ಬೇರುಗಳನ್ನು ಗಟ್ಟಿಗೊಳಿಸಿಕೊಂಡು, ವರ್ತಮಾನದ ಬದುಕಿಗೆ ಮೌಲ್ಯಗಳ ಬೆಳಕು ನೀಡುವುದೇ ಭಾರತೀಯ ಹಬ್ಬಗಳ ವೈಶಿಷ್ಟ್ಯ. ಸತ್ಯದ ವಿಜಯ, ದುಷ್ಟಶಕ್ತಿಗಳ ದಮನ, ಸಜ್ಜನರ ರಕ್ಷಣೆ ಮತ್ತು ಧರ್ಮದ ಪುನರುತ್ಥಾನದ ಸಂಕೇತವಾಗಿ ಆಚರಿಸಲ್ಪಡುವ ಹಬ್ಬಗಳಲ್ಲಿ ದಸರೆಯು ವಿಶಿಷ್ಟ ಸ್ಥಾನವನ್ನು ಪಡೆದಿದೆ.

ದುಷ್ಟಶಕ್ತಿಯ ಸಂಹಾರ, ಧರ್ಮದ ವಿಜಯ ಸಾರುವ ವಿಜಯದಶಮಿ

ಆಶ್ವೀಜ ಶುದ್ಧ ಪಾಡ್ಯದಿಂದ ವಿಜಯದಶಮಿಯವರೆಗೆ ಹತ್ತು ದಿನಗಳ ಕಾಲ ಆಚರಿಸುವ ದಸರೆಯು ಶಕ್ತಿ, ಶೌರ್ಯ, ಭಕ್ತಿ ಮತ್ತು ವಿಜಯದ ಪ್ರತೀಕವಾಗಿದೆ. ಮಹಿಷಾಸುರನನ್ನು ಸಂಹರಿಸಿ ಲೋಕಕಲ್ಯಾಣ ಸಾಧಿಸಿದ ಶಕ್ತಿಸ್ವರೂಪಿಣಿ ದುರ್ಗಾದೇವಿಯ ವಿಜಯವನ್ನು ಸ್ಮರಿಸುವ ಈ ಹಬ್ಬವು ಅಧರ್ಮದ ವಿರುದ್ಧ ಧರ್ಮದ ವಿಜಯವನ್ನು ಸಾರುತ್ತದೆ. ವನವಾಸದ ಬಳಿಕ ಪಾಂಡವರು ಶಮೀವೃಕ್ಷದಲ್ಲಿ ಇರಿಸಿದ್ದ ಆಯುಧಗಳನ್ನು ಮರಳಿ ಪಡೆದ ಪೌರಾಣಿಕ ಪ್ರಸಂಗವೂ ವಿಜಯದಶಮಿಯ ಮಹತ್ವವನ್ನು ಹೆಚ್ಚಿಸಿದೆ. ಬನ್ನಿಯನ್ನು ಬಂಗಾರವೆಂದು ಭಾವಿಸಿ ಪರಸ್ಪರ ವಿನಿಮಯ ಮಾಡಿಕೊಳ್ಳುವುದು, ಹಿರಿಯರ ಆಶೀರ್ವಾದ ಪಡೆಯುವುದು ಹಾಗೂ ಸೌಹಾರ್ದದಿಂದ ಬದುಕುವ ಸಂಕಲ್ಪ ಕೈಗೊಳ್ಳುವುದು ಈ ಹಬ್ಬದ ಸಾಂಸ್ಕೃತಿಕ ಮೌಲ್ಯಗಳಾಗಿವೆ.

ವಿಜಯನಗರದಿಂದ ಮೈಸೂರಿನವರೆಗೆ ದಸರೆಯ ವೈಭವದ ಇತಿಹಾಸ

ಭಾರತದ ರಾಜಮನೆತನಗಳು ದಸರೆಯನ್ನು ವೈಭವದಿಂದ ಆಚರಿಸಿದ ಇತಿಹಾಸವಿದೆ. ವಿಜಯನಗರ ಸಾಮ್ರಾಜ್ಯದ ಅರಸರು ದಸರಾ ಉತ್ಸವಕ್ಕೆ ವಿಶೇಷ ಮಹತ್ವ ನೀಡಿದ್ದರು. ವಿಜಯನಗರ ಸಾಮ್ರಾಜ್ಯದ ಪತನದ ನಂತರ ಮೈಸೂರು ಅರಸರು ಈ ಉತ್ಸವವನ್ನು ಮತ್ತಷ್ಟು ವಿಜೃಂಭಣೆಯಿಂದ ಆಚರಿಸಿ, ಕಲೆ, ಸಾಹಿತ್ಯ, ಸಂಗೀತ ಹಾಗೂ ಸಾಂಸ್ಕೃತಿಕ ಪರಂಪರೆಯ ಅಭಿವ್ಯಕ್ತಿಗೆ ವೇದಿಕೆಯನ್ನಾಗಿಸಿದರು. ಕಾಲಕ್ರಮೇಣ ಅರಮನೆಗಳ ಆಚರಣೆಯಾಗಿದ್ದ ದಸರೆಯು ಜನಸಾಮಾನ್ಯರ ಉತ್ಸವವಾಗಿ ರೂಪುಗೊಂಡು, ಜಾತಿ-ಮತಗಳ ಭೇದವಿಲ್ಲದೆ ಜನರನ್ನು ಒಗ್ಗೂಡಿಸುವ ನಾಡಹಬ್ಬದ ಸ್ವರೂಪವನ್ನು ಪಡೆದುಕೊಂಡಿತು.

ಶಿವಾದ್ವೈತ ತತ್ತ್ವದ ಬೆಳಕು, ಧರ್ಮ-ಸಂಸ್ಕಾರಗಳ ಪ್ರಸಾರದಲ್ಲಿ ರಂಭಾಪುರಿ ಪೀಠದ ಪಾತ್ರ

ಇಂತಹ ಸಾಂಸ್ಕೃತಿಕ ವೈಭವದ ಹಿನ್ನೆಲೆಯಲ್ಲೇ, ವೀರಶೈವ ಧರ್ಮದ ಆದಿ ಪಂಚಪೀಠಗಳಲ್ಲಿ ಪ್ರಥಮ ಸ್ಥಾನ ಪಡೆದಿರುವ ಬಾಳೆಹೊನ್ನೂರು ಶ್ರೀಮದ್ ರಂಭಾಪುರಿ ಜಗದ್ಗುರು ವೀರಸಿಂಹಾಸನ ಮಹಾಸಂಸ್ಥಾನ ಪೀಠದ ಶರನ್ನವರಾತ್ರಿ ದಸರಾ ದರ್ಬಾರ್ ಮಹೋತ್ಸವವು ಧಾರ್ಮಿಕ ಮತ್ತು ಸಾಮಾಜಿಕ ಕ್ಷೇತ್ರಗಳಲ್ಲಿ ವಿಶಿಷ್ಟ ಮಹತ್ವ ಹೊಂದಿದೆ. ಶಿವಾದ್ವೈತ ಸಿದ್ಧಾಂತದ ತತ್ತ್ವಗಳನ್ನು ಪ್ರತಿಪಾದಿಸುತ್ತ, ಧರ್ಮ, ಸಂಸ್ಕಾರ, ಮಾನವೀಯತೆ ಮತ್ತು ಸಮನ್ವಯದ ಮೌಲ್ಯಗಳನ್ನು ಜನಸಮುದಾಯಕ್ಕೆ ತಲುಪಿಸುವಲ್ಲಿ ಈ ಪೀಠವು ಐತಿಹಾಸಿಕ ಪಾತ್ರ ವಹಿಸಿದೆ. ಧರ್ಮವೆಂದರೆ ಕೇವಲ ಆಚರಣೆಗಳಲ್ಲ; ಅದು ಸತ್ಯ, ನೀತಿ, ಕರ್ತವ್ಯಪ್ರಜ್ಞೆ ಮತ್ತು ಪರಸ್ಪರ ಗೌರವದಿಂದ ಕೂಡಿದ ಸಾರ್ಥಕ ಬದುಕಿನ ಮಾರ್ಗ ಎಂಬ ಸಂದೇಶವನ್ನು ಪೀಠದ ಪರಂಪರೆ ಸಾರುತ್ತದೆ.

1925ರಿಂದ ಜನಸಂಪರ್ಕದ ಹೊಸ ಆಯಾಮ, ಜಗದ್ಗುರುಗಳ ಕೊಡುಗೆಯಿಂದ ದಸರಾ ಪರಂಪರೆಯ ವಿಸ್ತರಣೆ

ಶ್ರೀ ರಂಭಾಪುರಿ ಪೀಠದಲ್ಲಿ ಪ್ರಾಚೀನ ಕಾಲದಿಂದಲೂ ಆಚರಿಸಿಕೊಂಡು ಬಂದ ದಸರಾ ಮಹೋತ್ಸವಕ್ಕೆ 1925ರಿಂದ ವ್ಯಾಪಕ ಜನಸಂಪರ್ಕದ ಆಯಾಮ ದೊರೆಯಿತು. 118ನೇ ಪೀಠಾಚಾರ್ಯರಾದ ಶ್ರೀ ಶಿವಾನಂದ ಜಗದ್ಗುರುಗಳು ಪೀಠದ ಪರಿಸರದಲ್ಲಿ ನಡೆಯುತ್ತಿದ್ದ ಈ ಆಚರಣೆಯನ್ನು ನಾಡಿನ ಜನಸಮುದಾಯದವರೆಗೆ ವಿಸ್ತರಿಸಿದ ಕೀರ್ತಿಗೆ ಪಾತ್ರರಾದರು. ನಂತರ ವೀರತಪಸ್ವಿ ಶ್ರೀ ವೀರಗಂಗಾಧರ ಜಗದ್ಗುರುಗಳು ಹಾಗೂ ಶಾಂತತಪಸ್ವಿ ಶ್ರೀ ವೀರರುದ್ರಮುನಿದೇವ ಜಗದ್ಗುರುಗಳು ಈ ಪರಂಪರೆಯನ್ನು ಮುಂದುವರಿಸಿ, ಧರ್ಮ ಮತ್ತು ಸಂಸ್ಕೃತಿಯ ಪುನರುಜ್ಜೀವನಕ್ಕೆ ಮಹತ್ವದ ಕೊಡುಗೆ ನೀಡಿದರು.

ಶ್ರೀ ರಂಭಾಪುರಿ ಡಾ. ವೀರಸೋಮೇಶ್ವರ ಜಗದ್ಗುರುಗಳ ಮಾರ್ಗದರ್ಶನದಲ್ಲಿ ಪರಂಪರೆಗೆ ಹೊಸ ಚೈತನ್ಯ

ದಿನಾಂಕ 06-02-1992ರಂದು ಶ್ರೀಮದ್ ಜಗದ್ಗುರು ರಂಭಾಪುರಿ ವೀರಸಿಂಹಾಸನ ಮಹಾಪೀಠವನ್ನು ಅಲಂಕರಿಸಿದ ಪ್ರಸ್ತುತ ಪರಮಾಚಾರ್ಯರಾದ ಶ್ರೀಮದ್ ರಂಭಾಪುರಿ ಜಗದ್ಗುರು ಪ್ರಸನ್ನ ರೇಣುಕ ಡಾ. ವೀರಸೋಮೇಶ್ವರ ರಾಜದೇಶಿಕೇಂದ್ರ ಶಿವಾಚಾರ್ಯ ಭಗವತ್ಪಾದರು ಪರಂಪರಾಗತ ಧಾರ್ಮಿಕ ಆಚರಣೆಗಳಿಗೆ ಹೊಸ ಚೈತನ್ಯ ತುಂಬಿದ್ದಾರೆ. ಶರನ್ನವರಾತ್ರಿ ದಸರಾ ದರ್ಬಾರ್ ಮಹೋತ್ಸವದೊಂದಿಗೆ ಇಷ್ಟಲಿಂಗ ಮಹಾಪೂಜೆ, ಶ್ರೀ ಜಗದ್ಗುರು ರೇಣುಕಾಚಾರ್ಯ ಜಯಂತಿ ಯುಗಮಾನೋತ್ಸವ, ಕ್ಷೇತ್ರನಾಥ ಶ್ರೀ ವೀರಭದ್ರಸ್ವಾಮಿ ಜಾತ್ರೆ ಮುಂತಾದ ಧಾರ್ಮಿಕ ಕಾರ್ಯಕ್ರಮಗಳ ಮೂಲಕ ಭಕ್ತರಲ್ಲಿ ಧರ್ಮನಿಷ್ಠೆ ಮತ್ತು ಸಂಸ್ಕಾರಪ್ರಜ್ಞೆಯನ್ನು ಬೆಳೆಸುತ್ತಿದ್ದಾರೆ.

ಮೈಸೂರು ದಸರೆಯ ರಾಜವೈಭವ, ರಂಭಾಪುರಿ ದಸರೆಯ ಆಧ್ಯಾತ್ಮಿಕ ವೈಭವ

ಮೈಸೂರು ದಸರೆ ಅರಮನೆಯ ಪರಂಪರೆ ಮತ್ತು ನಾಡಿನ ಸಾಂಸ್ಕೃತಿಕ ವೈಭವವನ್ನು ಪ್ರತಿಬಿಂಬಿಸಿದರೆ, ರಂಭಾಪುರಿ ದಸರೆಯು ಗುರುಮನೆಯ ಆಧ್ಯಾತ್ಮಿಕ ಪರಂಪರೆ, ಧರ್ಮಬೋಧನೆ ಮತ್ತು ಸಾಮಾಜಿಕ ಸಾಮರಸ್ಯವನ್ನು ಪ್ರತಿಪಾದಿಸುತ್ತದೆ. ರಾಜಮನೆತನಗಳ ಆಡಳಿತ ಅಂತ್ಯಗೊಂಡರೂ ಗುರುಮನೆಗಳಲ್ಲಿ ಪರಂಪರೆಯ ದೀಪ ನಿರಂತರವಾಗಿ ಬೆಳಗುತ್ತಿರುವುದು ಭಾರತೀಯ ಸಂಸ್ಕೃತಿಯ ಜೀವಂತಿಕೆಗೆ ಸಾಕ್ಷಿಯಾಗಿದೆ.

ಆನೆ-ಅಂಬಾರಿ, ಧರ್ಮಪತಾಕೆ, ವಾದ್ಯವೈಭವ: ರಂಭಾಪುರಿ ದಸರೆಯ ಭವ್ಯ ಮೆರವಣಿಗೆ

ರಂಭಾಪುರಿ ದಸರೆಯ ಆರಂಭವು ಜಗದ್ಗುರುಗಳ ಭವ್ಯ ಪುರಪ್ರವೇಶ ಹಾಗೂ ಮೆರವಣಿಗೆಯೊಂದಿಗೆ ನಡೆಯುತ್ತದೆ. ಆನೆ, ಅಂಬಾರಿ, ಕುದುರೆ, ಪಲ್ಲಕ್ಕಿ, ಧರ್ಮಪತಾಕೆ, ಛತ್ರಿ-ಚಾಮರ, ನಗಾರಿ, ಕಹಳೆ ಮತ್ತು ವಿವಿಧ ವಾದ್ಯಗಳೊಂದಿಗೆ ಸಾಗುವ ಮೆರವಣಿಗೆಯು ಪರಂಪರೆಯ ಗಾಂಭೀರ್ಯವನ್ನು ಅನಾವರಣಗೊಳಿಸುತ್ತದೆ. ಭವ್ಯ ಧರ್ಮವೇದಿಕೆಯಲ್ಲಿ ವೀರಸಿಂಹಾಸನಾಧೀಶ್ವರರಾದ ಶ್ರೀ ಜಗದ್ಗುರುಗಳ ದಿವ್ಯ ಸಾನ್ನಿಧ್ಯವು ಉತ್ಸವಕ್ಕೆ ಆಧ್ಯಾತ್ಮಿಕ ಘನತೆಯನ್ನು ನೀಡುತ್ತದೆ. ನಾಡಿನ ಶಿವಾಚಾರ್ಯರು, ಧಾರ್ಮಿಕ ಮುಖಂಡರು, ರಾಜಕೀಯ ಗಣ್ಯರು, ಸಾಹಿತಿಗಳು, ವಿದ್ವಾಂಸರು ಹಾಗೂ ಭಕ್ತರು ಪಾಲ್ಗೊಳ್ಳುವುದರಿಂದ ಈ ಮಹೋತ್ಸವವು ಧರ್ಮ ಮತ್ತು ಸಮಾಜದ ನಡುವಿನ ಸಂಬಂಧವನ್ನು ಮತ್ತಷ್ಟು ಗಟ್ಟಿಗೊಳಿಸುತ್ತದೆ.

ಧರ್ಮೋಪನ್ಯಾಸ, ಸಾಹಿತ್ಯ ಚರ್ಚೆ, ಸಾಂಸ್ಕೃತಿಕ ಕಾರ್ಯಕ್ರಮ: ಜ್ಞಾನ ಮತ್ತು ಸಂಸ್ಕಾರದ ಸಂಗಮ

ಹತ್ತು ದಿನಗಳ ಉತ್ಸವದಲ್ಲಿ ಪ್ರತಿದಿನ ಇಷ್ಟಲಿಂಗ ಪೂಜಾನುಷ್ಠಾನ, ಧರ್ಮೋಪನ್ಯಾಸ, ಸಾಹಿತ್ಯಿಕ ಚರ್ಚೆ, ಸಾಂಸ್ಕೃತಿಕ ಕಾರ್ಯಕ್ರಮ, ಸಂಗೀತ ಹಾಗೂ ಸಾಧಕರಿಗೆ ಸನ್ಮಾನ ಮುಂತಾದ ಕಾರ್ಯಕ್ರಮಗಳು ಜರುಗುತ್ತವೆ. ಧರ್ಮ, ಶಿಕ್ಷಣ, ಸಾಹಿತ್ಯ, ಕಲೆ, ಸಂಸ್ಕೃತಿ ಮತ್ತು ಸಮಾಜದ ವಿವಿಧ ಆಯಾಮಗಳ ಕುರಿತು ನಡೆಯುವ ವಿಚಾರಮಂಥನವು ಜನರಲ್ಲಿ ಜಾಗೃತಿ ಮೂಡಿಸುತ್ತದೆ. ಜ್ಞಾನ, ಅನುಭವ ಮತ್ತು ಆದರ್ಶಗಳ ಸಂಗಮವಾಗುವ ಈ ವೇದಿಕೆಯು ಯುವಪೀಳಿಗೆಗೆ ಪರಂಪರೆಯ ಅರಿವು ಮೂಡಿಸುವುದರೊಂದಿಗೆ ಸಮಾಜಮುಖಿ ಚಿಂತನೆಗೆ ಪ್ರೇರಣೆ ನೀಡುತ್ತದೆ. ಶ್ರೀ ಜಗದ್ಗುರುಗಳ ಶುಭಾಶೀರ್ವಚನವು ಭಕ್ತರಿಗೆ ಧರ್ಮನಿಷ್ಠೆ, ಸೌಹಾರ್ದ ಮತ್ತು ಸದಾಚಾರದ ಮಾರ್ಗವನ್ನು ಬೋಧಿಸುತ್ತದೆ.

ಮಹಾನವಮಿ ಆಯುಧಪೂಜೆ, ವಿಜಯದಶಮಿ ಇಷ್ಟಲಿಂಗ ಮಹಾಪೂಜೆ: ಪರಂಪರೆಯ ಪವಿತ್ರ ಆಚರಣೆಗಳು

ಮಹಾನವಮಿಯಂದು ಶ್ರೀ ಪೀಠದ ಪರಂಪರಾನುಗತ ಆಯುಧಗಳು, ಪೂಜಾಸಾಮಗ್ರಿಗಳು ಹಾಗೂ ಐತಿಹಾಸಿಕ ಮಹತ್ವವುಳ್ಳ ಆಭರಣಗಳಿಗೆ ಪೂಜೆ ಸಲ್ಲಿಸಲಾಗುತ್ತದೆ. ವಿಜಯದಶಮಿಯಂದು ಇಷ್ಟಲಿಂಗ ಮಹಾಪೂಜೆ, ತೀರ್ಥಪ್ರಸಾದ ವಿನಿಯೋಗ, ಅಡ್ಡಪಲ್ಲಕ್ಕಿ ಮಹೋತ್ಸವ ಹಾಗೂ ಶಮೀಸೀಮೋಲ್ಲಂಘನ ಮುಂತಾದ ಆಚರಣೆಗಳು ವೈಭವದಿಂದ ನೆರವೇರುತ್ತವೆ. ಬನ್ನಿಯನ್ನು ಬಂಗಾರವೆಂದು ಪರಿಗಣಿಸಿ ಸಮರ್ಪಿಸುವುದು, ಶ್ರೀ ಜಗದ್ಗುರುಗಳಿಂದ ಆಶೀರ್ವಾದ ಪಡೆಯುವುದು ಹಾಗೂ ಶಾಂತಿ ಸಂದೇಶವನ್ನು ಆಲಿಸುವುದು ಉತ್ಸವದ ಪ್ರಮುಖ ಆಕರ್ಷಣೆಗಳಾಗಿವೆ. ಈ ಆಚರಣೆಗಳು ಕೇವಲ ಸಂಪ್ರದಾಯದ ಪುನರಾವರ್ತನೆಯಲ್ಲ; ಅವು ಧರ್ಮವಿಜಯ, ಪರಸ್ಪರ ಪ್ರೀತಿ ಮತ್ತು ಲೋಕಕಲ್ಯಾಣದ ಆಶಯಗಳನ್ನು ನೆನಪಿಸುವ ಸಾಂಕೇತಿಕ ಅಭಿವ್ಯಕ್ತಿಗಳಾಗಿವೆ.

ಆಧುನಿಕ ಯುಗಕ್ಕೂ ಅಗತ್ಯ ಧರ್ಮದ ಮೌಲ್ಯ, ಮಾನವೀಯತೆ ಮತ್ತು ಸಾಮಾಜಿಕ ಸಾಮರಸ್ಯ

ವೈಜ್ಞಾನಿಕ ಮತ್ತು ವೈಚಾರಿಕ ಯುಗದಲ್ಲಿಯೂ ಇಂತಹ ಪರಂಪರೆಗಳು ಸಮಾಜಕ್ಕೆ ನೈತಿಕ ಬಲ ಮತ್ತು ಸಾಂಸ್ಕೃತಿಕ ಗುರುತನ್ನು ನೀಡುತ್ತವೆ. ಧರ್ಮದ ಹೆಸರಿನಲ್ಲಿ ಭೇದಭಾವ ಬೆಳೆಸುವುದಕ್ಕಿಂತ ಮಾನವೀಯತೆಯನ್ನು ಪೋಷಿಸುವುದು, ಸಂಪ್ರದಾಯದ ಹೆಸರಿನಲ್ಲಿ ಮೂಢನಂಬಿಕೆಗೆ ಅವಕಾಶ ನೀಡುವುದಕ್ಕಿಂತ ಅದರಲ್ಲಿರುವ ಉದಾತ್ತ ಮೌಲ್ಯಗಳನ್ನು ಅರಿಯುವುದು ಇಂದಿನ ಅಗತ್ಯವಾಗಿದೆ. ಈ ನಿಟ್ಟಿನಲ್ಲಿ ರಂಭಾಪುರಿ ದಸರೆಯು ಧಾರ್ಮಿಕ ಆಚರಣೆಯ ಜೊತೆಗೆ ಸಾಮಾಜಿಕ ಜವಾಬ್ದಾರಿ, ಸಾಂಸ್ಕೃತಿಕ ಜಾಗೃತಿ ಮತ್ತು ಸಾಮರಸ್ಯದ ಸಂದೇಶವನ್ನು ಸಾರುವ ಮಹತ್ವದ ಉತ್ಸವವಾಗಿದೆ.

ಜಮಖಂಡಿಯಲ್ಲಿ 35ನೇ ದಸರಾ ದರ್ಬಾರ್ ಮಹೋತ್ಸವ: ಧರ್ಮ-ಸಂಸ್ಕೃತಿಯ ಪುನಶ್ಚೇತನಕ್ಕೆ ಭವ್ಯ ವೇದಿಕೆ

ಪ್ರಸ್ತುತ ಶ್ರೀ ರಂಭಾಪುರಿ ಜಗದ್ಗುರುಗಳ ಸಾನ್ನಿಧ್ಯದಲ್ಲಿ ಬಾಗಲಕೋಟೆ ಜಿಲ್ಲೆಯ ಐತಿಹಾಸಿಕ ಜಮಖಂಡಿ ನಗರದಲ್ಲಿ ಅಕ್ಟೋಬರ್ 11ರಿಂದ 20ರವರೆಗೆ ನಡೆದ 35ನೇ ದಸರಾ ದರ್ಬಾರ್ ಮಹೋತ್ಸವವು ಯಶಸ್ವಿಯಾಗಿ ಸಂಪನ್ನಗೊಂಡಿದೆ. ಧಾರ್ಮಿಕ ವಿಧಿವಿಧಾನಗಳು, ಆಧ್ಯಾತ್ಮಿಕ ಪ್ರವಚನಗಳು ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳ ಮೂಲಕ ಧರ್ಮ ಮತ್ತು ಸಂಸ್ಕೃತಿಯ ಮಹತ್ವವನ್ನು ಸಾರಿದ ಈ ಮಹೋತ್ಸವವು ಸರ್ವ ಸಮುದಾಯಗಳ ನಡುವೆ ಪ್ರೀತಿ, ವಿಶ್ವಾಸ ಮತ್ತು ಏಕತೆಯನ್ನು ಬಲಪಡಿಸುವ ವೇದಿಕೆಯಾಗಿದೆ.

ಮಹೋತ್ಸವದ ಪ್ರಮುಖ ಆಕರ್ಷಣೆಯಾದ ಅಡ್ಡಪಲ್ಲಕ್ಕಿ ಮಹೋತ್ಸವವು ನಾಳೆ ಸಾವಿರಾರು ಭಕ್ತರ ಸಮ್ಮುಖದಲ್ಲಿ ಭಕ್ತಿಭಾವ ಮತ್ತು ಸಂಭ್ರಮದಿಂದ ನಡೆಯಲಿದೆ. ಗುರುಪರಂಪರೆಯ ಪಾವಿತ್ರ್ಯ, ಧಾರ್ಮಿಕ ನಂಬಿಕೆ ಹಾಗೂ ಶತಮಾನಗಳ ಸಂಸ್ಕೃತಿಯ ವೈಭವವನ್ನು ಸಾರುವ ಈ ಪವಿತ್ರ ಉತ್ಸವದಲ್ಲಿ ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಂಡು, ಗುರುಗಳ ಆಶೀರ್ವಾದ ಪಡೆದು ಧರ್ಮ, ಸಂಸ್ಕಾರ, ಶಾಂತಿ, ಸಮನ್ವಯ ಮತ್ತು ಮಾನವೀಯತೆಯ ಮೌಲ್ಯಗಳನ್ನು ಜೀವನದಲ್ಲಿ ಅಳವಡಿಸಿಕೊಳ್ಳೋಣ.