ಬೆಂಗಳೂರು: ದೈವಭಕ್ತಿ, ದಾರ್ಶನಿಕ ಚಿಂತನೆ ಮತ್ತು ಮಾನವೀಯತೆಗೂ ಪ್ರತೀಕವಾಗಿದ್ದ ದಾಸಶ್ರೇಷ್ಠ ಕನಕದಾಸರ 538ನೇ ಜಯಂತಿಯನ್ನು ರಾಜ್ಯಾದ್ಯಂತ ಭಕ್ತಿಭಾವದಿಂದ ಆಚರಿಸಲಾಯಿತು. ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಬೆಂಗಳೂರಿನ ಶಾಸಕರ ಭವನ ಆವರಣದಲ್ಲಿ ಕನಕದಾಸರ ಪ್ರತಿಮೆ ಮತ್ತು ಭಾವಚಿತ್ರಕ್ಕೆ ಮಾಲಾರ್ಪಣೆ ಮಾಡಿ ಪುಷ್ಪನಮನ ಸಲ್ಲಿಸಿದರು.
ಈ ಸಂದರ್ಭದಲ್ಲಿ ಮಾತನಾಡಿದ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು, “ಕನಕದಾಸರು ಕೇವಲ ಭಕ್ತರಾಗಿರದೆ ಒಬ್ಬ ಮಹಾನ್ ದಾರ್ಶನಿಕರು. ಅವರು ತಮ್ಮ ಕೀರ್ತನೆಗಳ ಮೂಲಕ ಸಮಾಜದಲ್ಲಿ ಸಮಾನತೆ, ನೈತಿಕತೆ ಹಾಗೂ ಮಾನವೀಯತೆಯ ಕಿಡಿಯನ್ನು ಹಚ್ಚಿದರು,” ಎಂದು ಹೇಳಿದರು.
ಕನಕದಾಸರು ಜಾತಿ, ಧರ್ಮ, ಮತ, ಪಂಥಗಳನ್ನು ಮೀರಿ ಮನುಷ್ಯತ್ವದ ಮಹತ್ವವನ್ನು ಸಾರಿದವರಾಗಿದ್ದು, ‘ಕುಲಕುಲವೆಂದು ಹೊಡೆದಾಡದಿರಿ, ನಿಮ್ಮ ಕುಲದ ನೆಲೆಯನೇನಾದರೂ ಬಲ್ಲಿರಾ?’ ಎಂಬ ಕೀರ್ತನೆಯ ಮೂಲಕ ಸಮಾಜಕ್ಕೆ ಅಸಮಾನತೆ ವಿರುದ್ಧದ ಸಂದೇಶ ನೀಡಿದರು ಎಂದು ಸಿಎಂ ಹೇಳಿದರು.
“ಜಾತಿ ಆಧಾರಿತ ಅನ್ಯಾಯಗಳಿಂದ ನಲುಗಿದ್ದ ಕಾಲದಲ್ಲಿ ಕನಕದಾಸರು ಸಮಾನತೆಯ ಸಂದೇಶ ಸಾರಿದರು. ಇಂದಿನ ಪೀಳಿಗೆಯು ಅವರ ತತ್ವ, ಮೌಲ್ಯಗಳನ್ನು ಅರಿತು, ಅದರಂತೆ ಬದುಕಬೇಕು,” ಎಂದು ಸಿಎಂ ಸಿದ್ದರಾಮಯ್ಯ ಅವರು ಕರೆ ನೀಡಿದರು.
ಕನಕದಾಸರ ಸಂದೇಶಗಳನ್ನು ಜನಮಾನಸದಲ್ಲಿ ಬಿತ್ತುವ ಉದ್ದೇಶದಿಂದ ಸರ್ಕಾರ ರಾಜ್ಯಾದ್ಯಂತ ಕನಕ ಜಯಂತಿಯನ್ನು ಶ್ರದ್ಧಾಭಕ್ತಿಯಿಂದ ಆಚರಿಸುತ್ತಿದೆ.
ಅವರು ಕುರುಬ ಜನಾಂಗದಲ್ಲಿ ಜನಿಸಿದರೂ ತಮ್ಮ ಭಕ್ತಿ, ಕೀರ್ತನೆಗಳ ಮೂಲಕ ವಿಶ್ವಮಾನವರಾದರು. ಉಡುಪಿ ಶ್ರೀಕೃಷ್ಣನ ಭಕ್ತಿಯಲ್ಲಿ ಲೀನರಾದ ಕನಕದಾಸರು “ಕನಕನ ಕಿಂಡಿ” ಮೂಲಕ ಸಾಮಾಜಿಕ ಸಮಾನತೆಯ ಹೊಸ ಅಧ್ಯಾಯವನ್ನು ಬರೆದವರು.
ಸಮಾಜದಲ್ಲಿ ಮಾನವೀಯತೆ ಮತ್ತು ಸಮಾನತೆಯ ಬೆಳಕನ್ನು ಹರಡಿದ ಕನಕದಾಸರ ಜಯಂತಿಯಂದು ನಾಡಿನ ಜನತೆಗೆ ಶುಭಾಶಯ ಕೋರಿ, ಅವರ ಜೀವನ ಆದರ್ಶಗಳನ್ನು ಅನುಸರಿಸೋಣ ಎಂದು ಸಿಎಂ ಸಿದ್ದರಾಮಯ್ಯ ಹೇಳಿದರು.
