ಮುಂಬೈ, ನ. 24: ಭಾರತೀಯ ಚಿತ್ರರಂಗದ ಹೀ–ಮ್ಯಾನ್ ಎಂದು ಖ್ಯಾತಿ ಪಡೆದ ಹಿರಿಯ ನಟ ಧರ್ಮೇಂದ್ರ ಇಹಲೋಕ ತ್ಯಜಿಸಿದ್ದಾರೆ. ವಯೋಸಹಜ ಕಾಯಿಲೆಯಿಂದ ಬಳಲುತ್ತಿದ್ದ ಅವರು ಕೆಲವು ದಿನಗಳ ಹಿಂದೆ ಆರೋಗ್ಯ ಹದಗೆಟ್ಟ ಹಿನ್ನೆಲೆಯಲ್ಲಿ ಮುಂಬೈಯ ಬ್ರೀಜ್ ಕ್ಯಾಂಡಿ ಆಸ್ಪತ್ರೆಗೆ ದಾಖಲಾಗಿದ್ದರು. ಚೇತರಿಸಿಕೊಂಡ ನಂತರ ಡಿಸ್ಚಾರ್ಜ್ ಮಾಡಲಾಗಿದ್ದರೂ, ಇಂದು ಮತ್ತೆ ಆರೋಗ್ಯ ಹದಗೆಟ್ಟು ಅವರು ನಿಧನರಾದರು ಎಂಬ ಮಾಹಿತಿ ಮೂಲಗಳಿಂದ ಲಭಿಸಿದೆ. ಅವರ ಅಗಲಿಕೆಯಿಂದ ಬಾಲಿವುಡ್ ಚಿತ್ರರಂಗವೇ ಬಡವಾಗಿದೆ.
ಆರು ದಶಕಗಳ ಅದ್ಭುತ ಸಿನಿ ಪ್ರವಾಸ
1935ರ ಡಿಸೆಂಬರ್ 8ರಂದು ಪಂಜಾಬಿನ ನಸ್ರಾಲಿಯಲ್ಲಿ ಜನಿಸಿದ ಧರ್ಮೇಂದ್ರ, 1960ರಲ್ಲಿ ‘ದಿಲ್ ಬಿ ತೇರಾ ಹಮ್ ಬಿ ತೇರೇ’ ಚಿತ್ರದ ಮೂಲಕ ಬಾಲಿವುಡ್ ಪ್ರವೇಶಿಸಿದರು. ಬಳಿಕ 60–80ರ ದಶಕದಲ್ಲಿ ಅವರು ಅತ್ಯಂತ ಬೇಡಿಕೆಯ ನಟರಲ್ಲೊಬ್ಬರಾಗಿದ್ದು, ಆಂಖೇನ್, ಶಿಕಾರ್, ಯಾಕೀನ್, ಪ್ಯಾರ್ ಹೀ ಪ್ಯಾರ್, ಮೇರಾ ಗಾಂವ್ ಮೇರಾ ದೇಶ್, ಶೋಲೆ ಸೇರಿದಂತೆ 300ಕ್ಕೂ ಹೆಚ್ಚು ಚಿತ್ರಗಳಲ್ಲಿ ಪೌರಾಣಿಕ ಪಾತ್ರಗಳನ್ನು ನಿರ್ವಹಿಸಿ ಅಭಿಮಾನಿಗಳ ಮನ ಗೆದ್ದಿದ್ದರು.
ಬಾಲಿವುಡ್ನ ಹೀರೋ ಆಗಬೇಕೆಂದಿದ್ದ ಅನೇಕ ಕಲಾವಿದರಿಗೆ ಅವರು ರೋಲ್ ಮಾಡೆಲ್ ಆಗಿದ್ದರು. ಸದಾ ಚೈತನ್ಯಭರಿತರಾಗಿದ್ದ ಧರ್ಮೇಂದ್ರ ಜೀವಂತ ಅಭಿನಯದ ಪ್ರತಿರೂಪವಾಗಿದ್ದರು.
ಕೊನೆಯ ಸಿನಿಮಾ
ಧರ್ಮೇಂದ್ರ ಅವರು ನಟಿಸಿದ ‘ಇಕ್ಕೀಸ್’ ಹಿನ್ನಲೆ ಹೊಂದಿದ ಇತ್ತೀಚಿನ ಹಿಂದಿ ಚಿತ್ರ ಬಿಡುಗಡೆಯಿಗೆ ಸಿದ್ಧವಾಗಿದೆ. ಶ್ರೀರಾಮ್ ರಾಘವನ್ ನಿರ್ದೇಶನದ ಈ ಚಿತ್ರವು 1971ರ ಭಾರತ–ಪಾಕಿಸ್ತಾನ ಯುದ್ಧವನ್ನು ಆಧರಿಸಿದೆ.
ಗೌರವ ಮತ್ತು ಸಾಧನೆ
ಅಭಿನಯಕ್ಕಾಗಿ ಅವರಿಗೆ ಅನೇಕ ಪ್ರಶಸ್ತಿಗಳು ಲಭಿಸಿವೆ. ‘ಆಯಿ ಮಿಲನ್ ಕಿ ಬೆಲಾ’ಗೆ ಉತ್ತಮ ಪೋಷಕ ನಟ ಪ್ರಶಸ್ತಿ, ‘ಮೇರಾ ಗಾಂವ್ ಮೇರಾ ದೇಶ್’ಗೆ ಉತ್ತಮ ನಟ ಪ್ರಶಸ್ತಿ, 1997ರಲ್ಲಿ ಜೀವಮಾನ ಸಾಧನೆ ಗೌರವ, ಜೊತೆಗೆ ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಚಲನಚಿತ್ರೋತ್ಸವಗಳಲ್ಲಿಯೂ ಪುರಸ್ಕಾರ.
2012ರಲ್ಲಿ ಭಾರತ ಸರ್ಕಾರ ಪದ್ಮಭೂಷಣ ನೀಡಿ ಧರ್ಮೇಂದ್ರ ಅವರನ್ನು ಗೌರವಿಸಿತು.
ಕುಟುಂಬ ಮತ್ತು ವೈಯಕ್ತಿಕ ಬದುಕು
1954ರಲ್ಲಿ 19ನೇ ವಯಸ್ಸಿನಲ್ಲಿ ಧರ್ಮೇಂದ್ರ ಪ್ರಕಾಶ್ ಕೌರ್ ಅವರನ್ನು ವಿವಾಹವಾಗಿದ್ದು, ಈ ದಂಪತಿಗೆ ನಾಲ್ವರು ಮಕ್ಕಳು—ಸನ್ನಿ ಡಿಯೋಲ್, ಬಾಬಿ ಡಿಯೋಲ್, ವಿಜೇತಾ ಮತ್ತು ಅಜೀತಾ. ನಂತರ ಅವರು ನಟಿ ಹೇಮಾ ಮಾಲಿನಿಯನ್ನು ಮದುವೆಯಾಗಿದ್ದು, ಇವರಿಬ್ಬರಿಗೂ ಇಶಾ ಮತ್ತು ಅಹಾನಾ ಎಂಬ ಪುತ್ರಿಯರು. ಧರ್ಮೇಂದ್ರ–ಹೇಮಾ ಮಾಲಿನಿ ಜೋಡಿಯ ವಿವಾಹ ಆ ವೇಳೆಯಲ್ಲಿ ಸಾಕಷ್ಟು ವಿವಾದಕ್ಕೂ ಕಾರಣವಾಗಿತ್ತು. ಪ್ರಕಾಶ್ ಕೌರ್ ವಿಚ್ಛೇದನ ನೀಡದ ಕಾರಣ ಧರ್ಮೇಂದ್ರ ಇಸ್ಲಾಂಗೆ ಮತಾಂತರಗೊಂಡು ಹೇಮಾಳನ್ನು ವಿವಾಹವಾಗಿದರು ಎಂಬ ಮಾಹಿತಿ ಸಿನಿ ವಲಯದಲ್ಲಿ ಹರಿದಾಡಿತ್ತು.
ಇತ್ತೀಚೆಗೆ ಅವರು ಮೊದಲ ಪತ್ನಿ ಪ್ರಕಾಶ್ ಕೌರ್ ಅವರೊಂದಿಗೆ ತೋಟದ ಮನೆಯಲ್ಲಿ ವಾಸಿಸುತ್ತಿದ್ದರು. ತಮ್ಮ ಪುತ್ರರಾದ ಸನ್ನಿ ಮತ್ತು ಬಾಬಿ ಡಿಯೋಲ್ರೊಂದಿಗೆ ಅವರಿಗೆ ಗಾಢ ಬಾಂಧವ್ಯವಿತ್ತು.
