ಲಿಂಗಧಾರಣೆಯೇ ವೀರಶೈವ ಧರ್ಮದ ಜೀವಾಳ: ಶ್ರೀಶೈಲ ಜಗದ್ಗುರು ಡಾ. ಚನ್ನಸಿದ್ದರಾಮ ಪಂಡಿತಾರಾಧ್ಯ ಶಿವಾಚಾರ್ಯ
ಶಿವಮೊಗ್ಗ: ಒಂದೆಡೆ ಭಕ್ತಿಯ ಬೆಳಕು… ಮತ್ತೊಂದೆಡೆ ಇಷ್ಟಲಿಂಗ ಮಹಾಪೂಜೆಯ ಭಕ್ತಿ ಕಂಪನ… ಧರ್ಮದ ವಿಚಾರಗಳ ಕುರಿತು ಮೊಳಗಿದ ಜಾಗೃತಿಯ ಮಾತುಗಳು… ನೂರಾರು ಭಕ್ತರ ಸಮ್ಮುಖದಲ್ಲಿ ಲಿಂಗದೀಕ್ಷೆ ಸ್ವೀಕರಿಸಿದ ಭಕ್ತರು… ವೀರಭದ್ರೇಶ್ವರನ ಜಯಘೋಷದ ನಡುವೆ ಧರ್ಮ, ಸಂಸ್ಕಾರ ಮತ್ತು ಸಮಾಜದ ಒಗ್ಗಟ್ಟಿನ ಸಂದೇಶ ಸಾರಿದ ಜಗದ್ಗುರುಗಳ ಆಶೀರ್ವಚನ… ಹೀಗೆ ಶಿವಮೊಗ್ಗದ ಕುವೆಂಪು ರಂಗಮಂದಿರದಲ್ಲಿ ನಡೆದ ಶ್ರೀ ವೀರಭದ್ರೇಶ್ವರ ಜಯಂತೋತ್ಸವ ಮತ್ತು ಆಧ್ಯಾತ್ಮಿಕ ಜನಜಾಗೃತಿ ಸಮಾರಂಭ ಧಾರ್ಮಿಕ ಶ್ರದ್ಧೆಯ ಜತೆಗೆ ಸಮಾಜಮುಖಿ ಚಿಂತನೆಗಳಿಗೂ ವೇದಿಕೆಯಾಯಿತು.
ವೀರಶೈವ ಲಿಂಗಾಯತ ಸಂಘಟನಾ ವೇದಿಕೆ ಶಿವಮೊಗ್ಗ ಜಿಲ್ಲಾ ಘಟಕದ ವತಿಯಿಂದ ಆಯೋಜಿಸಿದ್ದ ಸಮಾರಂಭದಲ್ಲಿ ಶ್ರೀಶೈಲ ಪೀಠದ ಜಗದ್ಗುರು ಡಾ. ಚನ್ನಸಿದ್ದರಾಮ ಪಂಡಿತಾರಾಧ್ಯ ಶಿವಾಚಾರ್ಯ ಭಗವತ್ಪಾದರು ದಿವ್ಯ ಸಾನಿಧ್ಯ ವಹಿಸಿ, ಲಿಂಗಧಾರಣೆ, ಇಷ್ಟಲಿಂಗ ಪೂಜೆ, ಧರ್ಮಜಾಗೃತಿ, ಸಮಾಜದ ಒಗ್ಗಟ್ಟು ಹಾಗೂ ವೀರಭದ್ರೇಶ್ವರ ತತ್ವದ ಕುರಿತು ಸುದೀರ್ಘವಾಗಿ ಮಾತನಾಡಿದರು.
ವೀರಭದ್ರೇಶ್ವರ ಜಯಂತಿಯ ಅಂಗವಾಗಿ ಬೆಳಗಿನ ಜಾವ ನಡೆದ ಇಷ್ಟಲಿಂಗ ಮಹಾಪೂಜೆ ಹಾಗೂ ಸಂಜೆ ನಡೆದ ಆಧ್ಯಾತ್ಮಿಕ ಜನಜಾಗೃತಿ ಸಮಾರಂಭಕ್ಕೆ ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿದ್ದರು. ಕಾರ್ಯಕ್ರಮದ ಪ್ರಮುಖ ಘಟ್ಟವಾಗಿ 150ಕ್ಕೂ ಹೆಚ್ಚು ಭಕ್ತರು ಲಿಂಗದೀಕ್ಷೆ ಪಡೆದು ಇಷ್ಟಲಿಂಗ ಧಾರಣೆ ಮಾಡಿದ್ದು, ಇಡೀ ಸಮಾರಂಭಕ್ಕೆ ವಿಶೇಷ ಧಾರ್ಮಿಕ ಮಹತ್ವ ತಂದಿತು ಎಂದು ಜಗದ್ಗುರುಗಳು ಹೇಳಿದರು.
ಲಿಂಗದೀಕ್ಷೆಯೇ ಜಯಂತೋತ್ಸವಕ್ಕೆ ಕಳಸ: ಶ್ರೀಶೈಲ ಜಗದ್ಗುರುಗಳು
ವೀರಭದ್ರೇಶ್ವರನಿಗೆ ಪೂಜೆ, ಅಭಿಷೇಕ, ಆರತಿ, ಇಷ್ಟಲಿಂಗ ಮಹಾಪೂಜೆ ಹಾಗೂ ಧರ್ಮ ಸಮಾರಂಭ ನಡೆಯುವುದು ಸಾಮಾನ್ಯ ಆಚರಣೆಯ ಭಾಗವಾಗಬಹುದು. ಆದರೆ ಈ ಎಲ್ಲ ಕಾರ್ಯಕ್ರಮಗಳಿಗೆ ಶಾಶ್ವತವಾದ ಅರ್ಥ ಮತ್ತು ನೆಲೆ ನೀಡಿದ್ದು 150ಕ್ಕೂ ಹೆಚ್ಚು ಮಂದಿ ಲಿಂಗದೀಕ್ಷೆ ಪಡೆದಿರುವುದು ಎಂದು ಜಗದ್ಗುರು ಡಾ. ಚನ್ನಸಿದ್ದರಾಮ ಪಂಡಿತಾರಾಧ್ಯ ಶಿವಾಚಾರ್ಯರು ಅಭಿಪ್ರಾಯಪಟ್ಟರು.
ವೀರಶೈವ ಲಿಂಗಾಯತ ಧರ್ಮದ ಪ್ರಮುಖ ಆಚರಣೆಗಳಲ್ಲಿ ಲಿಂಗಧಾರಣೆ ಮತ್ತು ಲಿಂಗಪೂಜೆಗೆ ಅಗ್ರಸ್ಥಾನ ಇದೆ. ಸಿದ್ಧಾಂತ ಶಿಖಾಮಣಿಯಲ್ಲಿ ಜಗದ್ಗುರು ರೇಣುಕ ಭಗವತ್ಪಾದರು ‘ಧರ್ಮೋ ಲಿಂಗಾರ್ಚನಾತ್ಮಕಃ’ ಎಂದು ಧರ್ಮದ ಲಕ್ಷಣವನ್ನು ವಿವರಿಸಿದ್ದಾರೆ. ಅಂಗದ ಮೇಲೆ ಇಷ್ಟಲಿಂಗ ಧರಿಸಿ ಅದನ್ನು ಪೂಜಿಸುವುದು ವೀರಶೈವ ಧರ್ಮದ ಆಚರಣಾತ್ಮಕ ಸ್ವರೂಪವಾಗಿದೆ ಎಂದು ಅವರು ವಿವರಿಸಿದರು.
ಮಠಾಧೀಶರು ಮಠ, ಶಾಲೆ, ಕಾಲೇಜು, ವಿದ್ಯಾರ್ಥಿನಿಲಯ, ಸಮುದಾಯ ಭವನ, ಕಲ್ಯಾಣ ಮಂಟಪ ಸೇರಿದಂತೆ ಹಲವು ಸಮಾಜಮುಖಿ ಕಾರ್ಯಗಳನ್ನು ಕೈಗೊಳ್ಳುವುದು ಅಗತ್ಯ. ಆದರೆ ಇವೆಲ್ಲದರ ಜತೆಗೆ ಭಕ್ತರ ಕೊರಳಿಗೆ ಇಷ್ಟಲಿಂಗ ಕಟ್ಟಿಸುವುದು, ಲಿಂಗಪೂಜೆಯ ಮಹತ್ವವನ್ನು ತಿಳಿಸುವುದು ಮತ್ತು ಧರ್ಮಜಾಗೃತಿ ಮೂಡಿಸುವುದು ಕೂಡ ಮಠಾಧೀಶರ ಆದ್ಯ ಕರ್ತವ್ಯವಾಗಬೇಕು ಎಂದು ಅವರು ಹೇಳಿದರು.
ಲಿಂಗಧಾರಣೆಯ ಚಳವಳಿ ಅಗತ್ಯ
ಇಂದು ಲಿಂಗಧಾರಣೆ ಮಾಡದವರ ಸಂಖ್ಯೆ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಮಠಾಧೀಶರು, ಧಾರ್ಮಿಕ ಮುಖಂಡರು ಮತ್ತು ಸಂಘಟನೆಗಳು ಮನೆ ಮನೆಗೆ ತೆರಳಿ ಲಿಂಗಧಾರಣೆಯ ಮಹತ್ವವನ್ನು ತಿಳಿಸುವ ಕಾರ್ಯಕ್ಕೆ ಮುಂದಾಗಬೇಕು. ಎಲ್ಲ ಭಕ್ತರಿಗೂ ಲಿಂಗಧಾರಣೆಯ ಮಹತ್ವವನ್ನು ಮನವರಿಕೆ ಮಾಡಿಕೊಡುವಂತಹ ಚಳವಳಿ ನಡೆಯಬೇಕು. ಅದೇ ನಿಜವಾದ ಅರ್ಥದಲ್ಲಿ ವೀರಭದ್ರೇಶ್ವರ ಜಯಂತಿಯ ಆಚರಣೆಯಾಗುತ್ತದೆ ಎಂದು ಜಗದ್ಗುರುಗಳು ಕರೆ ನೀಡಿದರು.
ಶಿವಮೊಗ್ಗ ಜಿಲ್ಲೆಯಲ್ಲಿ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳಲ್ಲಿ ಭಕ್ತರು ಇಷ್ಟಲಿಂಗದೊಂದಿಗೆ ಪಾಲ್ಗೊಂಡು ಅಭಿಷೇಕ, ಪೂಜೆ ಹಾಗೂ ಪಾದೋದಕ ಪ್ರಸಾದ ಸ್ವೀಕರಿಸಲು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸುತ್ತಿರುವುದು ಸಂತಸದ ಸಂಗತಿ ಎಂದರು.
ವೀರಭದ್ರ ಎಂದರೆ ವೀರತ್ವವೂ, ಭದ್ರತೆಯೂ
ವೀರಭದ್ರೇಶ್ವರನ ಸ್ವರೂಪವನ್ನು ವಿವರಿಸಿದ ಜಗದ್ಗುರುಗಳು, ‘ವೀರ’ ಮತ್ತು ‘ಭದ್ರ’ ಎಂಬ ಎರಡು ಶಬ್ದಗಳಲ್ಲಿಯೇ ಆತನ ಮಹತ್ವ ಅಡಗಿದೆ ಎಂದರು.
ಶರಣಾಗತರಾಗಿ ಬರುವವರಿಗೆ ರಕ್ಷಣೆ, ಭದ್ರತೆ ಮತ್ತು ಸಂರಕ್ಷಣೆ ನೀಡುವವನು ‘ಭದ್ರ’. ಅಹಂಕಾರದಿಂದ, ಸೊಕ್ಕಿನಿಂದ ಬರುವವರ ಅಹಂಕಾರವನ್ನು ಮೆಟ್ಟಿ ನಿಲ್ಲುವ ಶಕ್ತಿ ಹೊಂದಿರುವವನು ‘ವೀರ’. ಹೀಗಾಗಿ ವೀರಭದ್ರನಲ್ಲಿ ರಕ್ಷಣೆ ನೀಡುವ ಭದ್ರತೆಯೂ ಇದೆ, ತಪ್ಪಿಗೆ ಶಿಕ್ಷೆ ನೀಡುವ ವೀರತ್ವವೂ ಇದೆ ಎಂದು ವಿವರಿಸಿದರು.
ವೀರಭದ್ರ ಮತ್ತು ವೀರಶೈವ ಎಂಬ ಎರಡೂ ಪದಗಳಲ್ಲೂ ‘ವೀರ’ ಎಂಬ ಶಬ್ದವಿದೆ. ಈ ಎರಡು ಪರಂಪರೆಗಳ ನಡುವೆ ಅನಾದಿಕಾಲದಿಂದಲೂ ಅವಿನಾಭಾವ ಸಂಬಂಧವಿದೆ ಎಂಬುದನ್ನು ಗಮನಿಸಬೇಕು ಎಂದು ಹೇಳಿದರು.
ನಿಜವಾದ ವೀರ ಯಾರು?
ವೀರತ್ವ ಎಂದರೆ ಕೇವಲ ದೈಹಿಕ ಬಲವಲ್ಲ. ನಾಲ್ಕು ಜನರೊಂದಿಗೆ ಹೋರಾಡಿ ಅವರನ್ನು ಸೋಲಿಸುವುದೇ ವೀರತ್ವವಲ್ಲ. ತನ್ನದೇ ಇಂದ್ರಿಯಗಳನ್ನು ಗೆಲ್ಲುವವನೇ ನಿಜವಾದ ವೀರ ಎಂದು ಜಗದ್ಗುರುಗಳು ಹೇಳಿದರು.
ಇದಕ್ಕೆ ಪೂರಕವಾಗಿ ಸುಭಾಷಿತಕಾರನ ಮಾತನ್ನು ಉಲ್ಲೇಖಿಸಿದ ಅವರು, ‘ಇಂದ್ರಿಯಾಣಾಂ ವಿಜಯೇ ಶೂರಃ’ ಎಂಬ ಸಂದೇಶವನ್ನು ವಿವರಿಸಿದರು. ರಣಾಂಗಣದಲ್ಲಿ ಶತ್ರುಗಳನ್ನು ಸೋಲಿಸುವುದಕ್ಕಿಂತ ತನ್ನ ಇಂದ್ರಿಯಗಳ ಮೇಲೆ ವಿಜಯ ಸಾಧಿಸುವುದು ದೊಡ್ಡ ವೀರತ್ವ. ಮನುಷ್ಯನ ನಿಜವಾದ ಹೋರಾಟ ಹೊರಗಿನ ಶತ್ರುಗಳೊಂದಿಗೆ ಅಲ್ಲ; ತನ್ನೊಳಗಿನ ಕಾಮ, ಕ್ರೋಧ, ಲೋಭ, ಮೋಹ, ಮದ ಮತ್ತು ಮತ್ಸರಗಳೊಂದಿಗೆ ಎಂದು ಹೇಳಿದರು.
ವೀರಭದ್ರನು ದಕ್ಷಬ್ರಹ್ಮ ಹಾಗೂ ಅವನೊಂದಿಗೆ ಬಂದವರನ್ನು ಸೋಲಿಸಿದ ಕಾರಣಕ್ಕೆ ಮಾತ್ರ ವೀರನಾಗಲಿಲ್ಲ. ತನ್ನ ಅಂತರಂಗದ ಮೇಲೆ ನಿಯಂತ್ರಣ ಹೊಂದಿದ್ದ ಕಾರಣಕ್ಕೂ ವೀರಭದ್ರನಾಗಿ ಪೂಜಿಸಲ್ಪಡುತ್ತಾನೆ ಎಂಬ ಸಂದೇಶವನ್ನು ಪ್ರತಿಯೊಬ್ಬರೂ ಅರ್ಥಮಾಡಿಕೊಳ್ಳಬೇಕು ಎಂದರು.
‘ಇಂದ್ರವಿಜಯಿಗಿಂ ಇಂದ್ರಿಯವಿಜಯಿ ಮೇಲ್’
ಕುವೆಂಪು ಅವರ ರಾಮಾಯಣ ದರ್ಶನಂನ ‘ಇಂದ್ರವಿಜಯಿಗಿಂ ಇಂದ್ರಿಯವಿಜಯಿ ಮೇಲ್’ ಎಂಬ ಸಾಲನ್ನು ಉಲ್ಲೇಖಿಸಿದ ಜಗದ್ಗುರುಗಳು, ಹೊರಗಿನ ವಿಜಯಕ್ಕಿಂತ ಒಳಗಿನ ವಿಜಯವೇ ಶ್ರೇಷ್ಠ ಎಂಬ ವಿಚಾರವನ್ನು ಪ್ರತಿಪಾದಿಸಿದರು.
ನಮ್ಮ ಜೀವನದಲ್ಲಿ ನಿಜವಾದ ವೀರತ್ವ ಬರಬೇಕಾದರೆ ಮೊದಲು ನಮ್ಮ ಮನಸ್ಸು ಮತ್ತು ಇಂದ್ರಿಯಗಳ ಮೇಲೆ ಹಿಡಿತ ಸಾಧಿಸಬೇಕು. ಹೊರಗಿನ ಗೆಲುವು ಕ್ಷಣಿಕವಾಗಬಹುದು. ಆದರೆ ಅಂತರಂಗದ ವೈರಿಗಳಾದ ಕಾಮ-ಕ್ರೋಧಾದಿಗಳನ್ನು ಗೆದ್ದರೆ ಮಾತ್ರ ಆ ವಿಜಯ ಶಾಶ್ವತವಾಗುತ್ತದೆ ಎಂದರು.
ಪಂಡಿತ ಎಂದರೆ ಎಲ್ಲರನ್ನೂ ಸಮಾನವಾಗಿ ನೋಡುವವನು
ಕೇವಲ ಶಾಸ್ತ್ರಗಳನ್ನು ಓದುವುದರಿಂದ ಪಂಡಿತನಾಗಲು ಸಾಧ್ಯವಿಲ್ಲ. ತಾನು ತಿಳಿದುಕೊಂಡ ಜ್ಞಾನವನ್ನು ಬದುಕಿನಲ್ಲಿ ಅಳವಡಿಸಿಕೊಂಡು ಎಲ್ಲರನ್ನೂ ಸಮಾನ ದೃಷ್ಟಿಯಿಂದ ನೋಡುವವನೇ ನಿಜವಾದ ಪಂಡಿತ ಎಂದು ಅವರು ಹೇಳಿದರು.
ಭಗವದ್ಗೀತೆಯ ‘ವಿದ್ಯಾವಿನಯಸಂಪನ್ನೇ ಬ್ರಾಹ್ಮಣೇ ಗವಿ ಹಸ್ತಿನಿ… ಪಂಡಿತಾಃ ಸಮದರ್ಶಿನಃ’ ಎಂಬ ಸಂದೇಶವನ್ನು ಉಲ್ಲೇಖಿಸಿದ ಅವರು, ಜೀವಿಗಳಲ್ಲಿ ಸಮಾನತೆಯನ್ನು ಕಾಣುವ ದೃಷ್ಟಿ ಬೆಳೆಸಿಕೊಳ್ಳಬೇಕು ಎಂದರು.
ಅದೇ ರೀತಿ ಸಭೆಯಲ್ಲಿ ಚಪ್ಪಾಳೆ ಪಡೆಯುವಂತೆ ಮಾತನಾಡುವವನೇ ವಕ್ತಾರನಲ್ಲ. ಕೇಳುಗರಿಗೆ ಇಷ್ಟವಾಗದಿದ್ದರೂ ಅವರ ಹಿತಕ್ಕಾಗಿ ಮಾತನಾಡುವವನೇ ನಿಜವಾದ ವಕ್ತಾರ. ದಾನ ಮಾಡುವವನು ಹಣ ಅಥವಾ ವಸ್ತು ನೀಡುವುದಷ್ಟೇ ಅಲ್ಲ, ಗೌರವ ಮತ್ತು ಮಾನವನ್ನೂ ನೀಡಬೇಕು. ಗೌರವದೊಂದಿಗೆ ನೀಡುವ ದಾನವೇ ನಿಜವಾದ ದಾನ ಎಂದು ಅವರು ವಿವರಿಸಿದರು.
ಶ್ರೀ ವೀರಭದ್ರನಿಂದ ಲಿಂಗದೀಕ್ಷೆ ಪಡೆದ ಹನುಮಂತ
ವೀರಭದ್ರೇಶ್ವರನ ಮಹತ್ವವನ್ನು ವಿವರಿಸಿದ ಜಗದ್ಗುರುಗಳು, ಸಂಕಟ ಬಂದಾಗ ಭಕ್ತರು ಹನುಮಂತನನ್ನು ನೆನೆಯುತ್ತಾರೆ. ಸಂಕಟಮೋಚನನಾದ ಹನುಮಂತನಿಗೆ ಲಿಂಗದೀಕ್ಷೆ ನೀಡಿದವರು ವೀರಭದ್ರೇಶ್ವರ ಎಂಬ ಧಾರ್ಮಿಕ ಪರಂಪರೆಯ ವಿಚಾರವನ್ನು ಸ್ಮರಿಸಿದರು.
ವೀರಭದ್ರೇಶ್ವರನು ಶಿವಭಕ್ತರ ರಕ್ಷಕನಾಗಿಯೂ, ಅಹಂಕಾರವನ್ನು ಮೆಟ್ಟಿ ನಿಲ್ಲಿಸುವ ಶಕ್ತಿಯಾಗಿಯೂ ಪರಿಗಣಿಸಲ್ಪಟ್ಟಿದ್ದಾನೆ. ಅಂತಹ ವೀರಭದ್ರೇಶ್ವರನ ಜಯಂತಿಯನ್ನು ಆಚರಿಸುವ ಸಂದರ್ಭದಲ್ಲಿ ಅವರ ತತ್ವವನ್ನು ಬದುಕಿನಲ್ಲಿ ಅಳವಡಿಸಿಕೊಳ್ಳುವುದು ಮುಖ್ಯ ಎಂದರು.
6 ವರ್ಷಗಳಿಂದ ವೀರಭದ್ರೇಶ್ವರ ಜಯಂತಿಗೆ ಹೊಸ ಮೆರುಗು: ಪ್ರದೀಪ್ ಕಂಕನವಾಡಿ ಅವರ ನೇತೃತ್ವದಲ್ಲಿ ವೀರಭದ್ರ ಮಾಲೆ ವಿತರಣೆ
ವೀರಶೈವ ಲಿಂಗಾಯತ ಸಂಘಟನಾ ವೇದಿಕೆಯ ರಾಷ್ಟ್ರೀಯ ಅಧ್ಯಕ್ಷರಾದ ಪ್ರದೀಪ್ ಕಂಕನವಾಡಿ ಅವರು ಕಳೆದ 6 ವರ್ಷಗಳಿಂದ ನಿರಂತರವಾಗಿ ಶ್ರೀ ವೀರಭದ್ರೇಶ್ವರ ಜಯಂತಿಯನ್ನು ಆಯೋಜಿಸುವ ಮೂಲಕ ಸಮಾಜದಲ್ಲಿ ಧರ್ಮಜಾಗೃತಿ, ಸಂಘಟನೆ ಮತ್ತು ವೀರಭದ್ರೇಶ್ವರ ತತ್ವಗಳ ಅರಿವು ಮೂಡಿಸುವ ಕಾರ್ಯಕ್ಕೆ ಭದ್ರ ಬುನಾದಿ ಹಾಕಿದ್ದಾರೆ ಎಂದು ಜಗದ್ಗುರು ಡಾ. ಚನ್ನಸಿದ್ದರಾಮ ಪಂಡಿತಾರಾಧ್ಯ ಶಿವಾಚಾರ್ಯರು ಶ್ಲಾಘಿಸಿದರು. ಪ್ರತಿವರ್ಷ ಸಮಾಜದ ವಿವಿಧ ಕ್ಷೇತ್ರಗಳಲ್ಲಿ ಗಣನೀಯ ಸೇವೆ ಸಲ್ಲಿಸಿದ ಒಬ್ಬ ಸಾಧಕರನ್ನು ಗುರುತಿಸಿ ವೀರಭದ್ರೇಶ್ವರ ಪ್ರಶಸ್ತಿ ನೀಡಿ ಗೌರವಿಸುವ ಮೂಲಕ ಸಮಾಜಕ್ಕಾಗಿ ದುಡಿಯುವವರನ್ನು ಪ್ರೋತ್ಸಾಹಿಸುತ್ತಿರುವುದು ವಿಶೇಷ ಕಾರ್ಯವಾಗಿದೆ. ಈ ವರ್ಷದ ಪ್ರಶಸ್ತಿಗೆ ಜ್ಯೋತಿ ಪ್ರಕಾಶ್ ಅವರನ್ನು ಆಯ್ಕೆ ಮಾಡಿರುವುದು ಸಹ ಸೂಕ್ತ ಹಾಗೂ ಅಭಿನಂದನೀಯ ನಿರ್ಧಾರವಾಗಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.
ಅದೇ ರೀತಿ ವೀರಭದ್ರೇಶ್ವರನ ಆರಾಧನೆಯನ್ನು ಕೇವಲ ಜಯಂತಿ, ಪೂಜೆ ಹಾಗೂ ಜಾತ್ರೆಗೆ ಸೀಮಿತಗೊಳಿಸದೆ, ಭಕ್ತರ ಜೀವನದಲ್ಲಿ ವೀರಭದ್ರನ ತತ್ವಗಳು ಪ್ರತಿಫಲಿಸುವಂತೆ ಮಾಡುವ ಉದ್ದೇಶದಿಂದ ವೀರಭದ್ರ ಮಾಲೆ ಧರಿಸುವ ಪರಂಪರೆಗೆ ಚಾಲನೆ ನೀಡಿರುವುದು ಧರ್ಮಜಾಗೃತಿಯ ದೃಷ್ಟಿಯಿಂದ ಮಹತ್ವದ ಹೆಜ್ಜೆ ಎಂದರು. ಬೆಳಗಾವಿ ಜಿಲ್ಲೆಯ ಚಿಕ್ಕೋಡಿ ತಾಲೂಕಿನ ವೀರಭದ್ರೇಶ್ವರ ಕ್ಷೇತ್ರದಲ್ಲಿ ನಡೆಯುವ ಜಾತ್ರಾ ಮಹೋತ್ಸವದ ಸಂದರ್ಭದಲ್ಲಿ ಈ ವರ್ಷದಿಂದ ವೀರಭದ್ರ ಮಾಲೆ ಧರಿಸಿ ವೀರಭದ್ರೋತ್ಸವ ಆಚರಿಸಲು ನೀಡಿರುವ ಚಾಲನೆ ಅನುಕರಣೀಯವಾಗಿದೆ. ಈ ಮಾಲೆ ವಿತರಣೆ ಕೇವಲ ಧಾರ್ಮಿಕ ಆಚರಣೆಯಾಗದೆ, ವೀರಭದ್ರನ ತತ್ವ, ಶಿಸ್ತು, ಭಕ್ತಿ ಮತ್ತು ಧರ್ಮನಿಷ್ಠೆಯನ್ನು ಬದುಕಿನಲ್ಲಿ ಅಳವಡಿಸಿಕೊಳ್ಳುವ ಸಂಕಲ್ಪವಾಗಬೇಕು. ಪ್ರದೀಪ್ ಕಂಕನವಾಡಿ ಹಾಗೂ ಸಂಘಟನೆಯವರು ಆರಂಭಿಸಿರುವ ಈ ಕಾರ್ಯ ಮುಂದಿನ ದಿನಗಳಲ್ಲಿ ಶಿವಮೊಗ್ಗ ಜಿಲ್ಲೆ ಸೇರಿದಂತೆ ರಾಜ್ಯದಾದ್ಯಂತ ಇನ್ನಷ್ಟು ವ್ಯಾಪಕವಾಗಿ ಬೆಳೆಯಲಿ ಎಂದು ಜಗದ್ಗುರುಗಳು ಆಶಿಸಿದರು.
ಸಂಸದ ಬಿ.ವೈ. ರಾಘವೇಂದ್ರ ಅವರ ಸೇವೆಗೆ ಮೆಚ್ಚುಗೆ
ಎಡೆಯೂರು ವೀರಭದ್ರೇಶ್ವರ ದೇವಾಲಯದಲ್ಲಿ ಮೂರು ರಾಜಗೋಪುರಗಳ ಲೋಕಾರ್ಪಣೆ ಸೇರಿದಂತೆ ನಡೆದ ಬೃಹತ್ ಧಾರ್ಮಿಕ ಕಾರ್ಯಕ್ರಮವನ್ನು ಸ್ಮರಿಸಿದ ಜಗದ್ಗುರುಗಳು, ದೇಶದ ಉಪರಾಷ್ಟ್ರಪತಿಗಳು ಕಾರ್ಯಕ್ರಮಕ್ಕೆ ಆಗಮಿಸಿ ರಾಜಗೋಪುರಗಳನ್ನು ಲೋಕಾರ್ಪಣೆ ಮಾಡಿದ್ದನ್ನು ಉಲ್ಲೇಖಿಸಿದರು.
ಈ ಕಾರ್ಯಕ್ರಮ ಯಶಸ್ವಿಯಾಗಲು ಶಿವಮೊಗ್ಗ ಸಂಸದ ಬಿ.ವೈ. ರಾಘವೇಂದ್ರ ಅವರು ಪ್ರಮುಖ ಪಾತ್ರ ವಹಿಸಿದ್ದರು ಎಂದು ಅವರು ಹೇಳಿದರು. ಮಠಗಳು, ಧಾರ್ಮಿಕ ಕ್ಷೇತ್ರಗಳು ಹಾಗೂ ಸಮಾಜಮುಖಿ ಕಾರ್ಯಗಳಿಗೆ ಸಹಕಾರ ನೀಡುತ್ತಿರುವ ರಾಘವೇಂದ್ರ ಅವರ ಸೇವೆಯನ್ನು ಶ್ಲಾಘಿಸಿದರು.
ಒಗ್ಗಟ್ಟೇ ಸಮಾಜದ ಶಕ್ತಿ
ಕೆಲ ವರ್ಷಗಳ ಹಿಂದೆ ಸಮಾಜವನ್ನು ವಿಭಜಿಸುವಂತಹ ವಾತಾವರಣ ನಿರ್ಮಾಣವಾಗಿದ್ದರೂ ವೀರಶೈವ-ಲಿಂಗಾಯತ ಸಮಾಜ ವಿಭಜನೆಯಾಗದೆ ತನ್ನ ಒಗ್ಗಟ್ಟನ್ನು ಉಳಿಸಿಕೊಂಡಿದೆ ಎಂದು ಜಗದ್ಗುರುಗಳು ಹೇಳಿದರು.
ಸಮಾಜದ ಒಳಪಂಗಡಗಳು ಸಾಮಾಜಿಕ ಮತ್ತು ಸಾಂಸ್ಥಿಕ ಅಗತ್ಯಗಳಿಗೆ ತಮ್ಮದೇ ಆದ ಮಹತ್ವ ಹೊಂದಿರಬಹುದು. ಆದರೆ ಅಂತಿಮವಾಗಿ ಇಷ್ಟಲಿಂಗ ಧರಿಸುವವರು, ವಿಭೂತಿ ಧರಿಸುವವರು, ಲಿಂಗಪೂಜೆ ಮಾಡುವವರು, ಅಷ್ಟಾವರಣ, ಪಂಚಾಚಾರ ಹಾಗೂ ಷಟ್ಸ್ಥಲ ತತ್ವಗಳಲ್ಲಿ ನಂಬಿಕೆ ಹೊಂದಿರುವವರೆಲ್ಲರೂ ಒಂದೇ ಸಮಾಜದವರು ಎಂಬ ಭಾವನೆ ಬೆಳೆಸಿಕೊಳ್ಳಬೇಕು ಎಂದರು.
ಒಳಪಂಗಡಗಳ ಮಿತಿಯನ್ನು ಮೀರಿ ಪರಸ್ಪರ ಸಂಬಂಧ, ವೈವಾಹಿಕ ಸಂಬಂಧ ಹಾಗೂ ಸಾಮಾಜಿಕ ಬಾಂಧವ್ಯವನ್ನು ಬೆಳೆಸಿದಾಗ ಮಾತ್ರ ಸಮಾಜ ಮತ್ತಷ್ಟು ಗಟ್ಟಿಯಾಗುತ್ತದೆ ಎಂದು ಕರೆ ನೀಡಿದರು.
48 ದಿನಗಳ ಧರ್ಮಜಾಗೃತಿ; 28 ಸಾವಿರ ಮಂದಿಗೆ ಲಿಂಗದೀಕ್ಷೆ
ಬೆಳಗಾವಿ ಜಿಲ್ಲೆಯಲ್ಲಿ ನಡೆದ ಧರ್ಮಜಾಗೃತಿ ಪ್ರವಾಸದ ಅನುಭವ ಹಂಚಿಕೊಂಡ ಜಗದ್ಗುರುಗಳು, ಸುಮಾರು 48 ದಿನಗಳ ಕಾಲ ಜಿಲ್ಲೆಯಾದ್ಯಂತ ಸಂಚರಿಸಿ 28 ಸಾವಿರಕ್ಕೂ ಹೆಚ್ಚು ಮಂದಿಗೆ ಲಿಂಗದೀಕ್ಷೆ ನೀಡಲಾಗಿದೆ ಎಂದು ಹೇಳಿದರು.
ಹಳ್ಳಿ, ಪಟ್ಟಣ, ತಾಲೂಕು ಎಂಬ ಭೇದವಿಲ್ಲದೆ ಧರ್ಮಜಾಗೃತಿ ಕಾರ್ಯಕ್ರಮಗಳನ್ನು ನಡೆಸಿ, ಲಿಂಗಧಾರಣೆಯ ಮಹತ್ವದ ಕುರಿತು ಪ್ರವಚನಗಳನ್ನು ಆಯೋಜಿಸಿ, ಬಳಿಕ ಲಿಂಗದೀಕ್ಷೆ ನೀಡಲಾಯಿತು. ಜನರಿಗೆ ತಲುಪುವ ಪ್ರಯತ್ನ ಮಾಡಿದರೆ ಭಕ್ತರು ಖಂಡಿತ ಸ್ಪಂದಿಸುತ್ತಾರೆ ಎಂಬುದಕ್ಕೆ ಈ ಧರ್ಮಜಾಗೃತಿ ಪ್ರವಾಸ ಸಾಕ್ಷಿಯಾಗಿದೆ ಎಂದರು.
ಅದೇ ಮಾದರಿಯಲ್ಲಿ ಪ್ರತಿ ವರ್ಷ ಒಂದು ಜಿಲ್ಲೆಯನ್ನು ಆಯ್ಕೆ ಮಾಡಿಕೊಂಡು ಒಂದು ತಿಂಗಳ ಕಾಲ ಧರ್ಮಜಾಗೃತಿ ಕಾರ್ಯಕ್ರಮ ನಡೆಸುವ ಚಿಂತನೆಯೂ ಇದೆ. ಶಿವಮೊಗ್ಗ ಜಿಲ್ಲೆಯ ಮಠಾಧೀಶರು ಮುಂದಾಗಿ ಬಂದರೆ ಒಂದು ತಿಂಗಳ ಕಾಲ ಜಿಲ್ಲೆಯಲ್ಲಿ ಧರ್ಮಜಾಗೃತಿ ಕಾರ್ಯ ನಡೆಸಲು ಜಗದ್ಗುರುಗಳು ಸಿದ್ಧರಾಗಿದ್ದಾರೆ ಎಂದು ತಿಳಿಸಿದರು.
ಶ್ರೀಶೈಲ–ಶಿವಮೊಗ್ಗದ ಸಂಬಂಧ ಅವಿನಾಭಾವ
ಶಿವಮೊಗ್ಗ ಜಿಲ್ಲೆ ಮತ್ತು ಶ್ರೀಶೈಲ ಕ್ಷೇತ್ರದ ಸಂಬಂಧವನ್ನು ವಿವರಿಸಿದ ಜಗದ್ಗುರುಗಳು, ಶಿಕಾರಿಪುರ ತಾಲೂಕಿನ ಉಡುತಡಿಯ ಅಕ್ಕಮಹಾದೇವಿ ಕಲ್ಯಾಣಕ್ಕೆ ತೆರಳಿ ಬಳಿಕ ಶ್ರೀಶೈಲದ ಕದಳಿವನದಲ್ಲಿ ಐಕ್ಯವಾದ ಮಹತ್ವವನ್ನು ಸ್ಮರಿಸಿದರು.
ಅಲ್ಲಮಪ್ರಭುದೇವರೂ ಶ್ರೀಶೈಲದಲ್ಲಿ ಐಕ್ಯವಾದ ಪರಂಪರೆಯನ್ನು ಉಲ್ಲೇಖಿಸಿದ ಅವರು, ಅಕ್ಕಮಹಾದೇವಿ ಮತ್ತು ಅಲ್ಲಮಪ್ರಭುದೇವರ ಮೂಲಕ ಶಿವಮೊಗ್ಗ ಜಿಲ್ಲೆ ಹಾಗೂ ಶ್ರೀಶೈಲದ ನಡುವೆ ಗಾಢವಾದ ಆಧ್ಯಾತ್ಮಿಕ ಸಂಬಂಧ ನಿರ್ಮಾಣವಾಗಿದೆ ಎಂದರು.
ಶ್ರೀಶೈಲದಲ್ಲಿ ₹100–150 ಕೋಟಿ ಅಭಿವೃದ್ಧಿ ಯೋಜನೆ
ಶ್ರೀಶೈಲದಲ್ಲಿ ಭಕ್ತರಿಗೆ ಹೆಚ್ಚಿನ ಮೂಲಸೌಕರ್ಯ ಒದಗಿಸುವ ಉದ್ದೇಶದಿಂದ ಅಭಿವೃದ್ಧಿ ಕಾರ್ಯಗಳನ್ನು ಕೈಗೆತ್ತಿಕೊಳ್ಳಲಾಗಿದೆ ಎಂದು ಜಗದ್ಗುರುಗಳು ವಿವರಿಸಿದರು.
ಆಂಧ್ರಪ್ರದೇಶ ಸರ್ಕಾರದಿಂದ ಪೀಠಕ್ಕೆ 10 ಎಕರೆ ಜಾಗ ಮಂಜೂರಾಗಿದ್ದು, ಮೊದಲ ಹಂತದಲ್ಲಿ 5 ಎಕರೆ ಜಾಗವನ್ನು ಹಸ್ತಾಂತರಿಸಲಾಗಿದೆ. ಈ ಜಾಗದಲ್ಲಿ ಸುಮಾರು 360 ಕೊಠಡಿಗಳ ಯಾತ್ರಾನಿವಾಸ, ಭಕ್ತರು ತರುವ ಕಂಬಿಗಳನ್ನು ಇರಿಸಲು ಸುಮಾರು 500 ಕಂಬಿಗಳ ವ್ಯವಸ್ಥೆ ಹೊಂದಿರುವ ಆರು ಬೃಹತ್ ಕಂಬಿ ಮಂಟಪಗಳು ಹಾಗೂ ಮಲ್ಟಿ ಸ್ಪೆಷಾಲಿಟಿ ಆಸ್ಪತ್ರೆ ನಿರ್ಮಿಸುವ ಯೋಜನೆ ಇದೆ ಎಂದು ತಿಳಿಸಿದರು.
ಒಟ್ಟಾರೆ ₹100–150 ಕೋಟಿ ಮೊತ್ತದ ಬೃಹತ್ ಅಭಿವೃದ್ಧಿ ಯೋಜನೆ ರೂಪಿಸಲಾಗಿದ್ದು, ಕರ್ನಾಟಕದ ಭಕ್ತರು ಈ ಕಾರ್ಯಕ್ಕೆ ಕೈಜೋಡಿಸಬೇಕು ಎಂದು ಮನವಿ ಮಾಡಿದರು.
ಶ್ರೀಶೈಲ ಭೌಗೋಳಿಕವಾಗಿ ಆಂಧ್ರಪ್ರದೇಶದಲ್ಲಿದ್ದರೂ, ಕರ್ನಾಟಕದ ಭಕ್ತರೊಂದಿಗೆ ಅದಕ್ಕೆ ಆಳವಾದ ಭಾವನಾತ್ಮಕ ಸಂಬಂಧವಿದೆ. ಹೀಗಾಗಿ ಸಣ್ಣವರು, ದೊಡ್ಡವರು ಎಂಬ ಭೇದವಿಲ್ಲದೆ ಎಲ್ಲರೂ ತಮ್ಮ ಕೈಲಾದ ಸಹಕಾರ ನೀಡಬೇಕು ಎಂದರು.
ಈ ಸಂದರ್ಭದಲ್ಲಿ ರುದ್ರೇಶ್ ಗೌಡ, ಗಣೇಶ್ ಶರಾವರ್, ವೇದಿಕೆಯ ಅಧ್ಯಕ್ಷ ಪ್ರದೀಪ್ ಕಂಕಣವಾಡಿ ಸೇರಿದಂತೆ ಹಲವು ಭಕ್ತರು ಶ್ರೀಶೈಲದ ಅಭಿವೃದ್ಧಿ ಕಾರ್ಯಗಳಿಗೆ ನೆರವು ನೀಡುವ ಭರವಸೆ ನೀಡಿದ್ದಾರೆ ಎಂದು ತಿಳಿಸಿದರು. ಎಡೆಯೂರು ಶ್ರೀಗಳು ಶ್ರೀಶೈಲದಲ್ಲಿ ನಿರ್ಮಾಣವಾಗಲಿರುವ ಒಂದು ಕೊಠಡಿಗೆ ₹8 ಲಕ್ಷ ನೆರವು ನೀಡುವುದಾಗಿ ಘೋಷಿಸಿರುವುದನ್ನೂ ಅವರು ಉಲ್ಲೇಖಿಸಿದರು.
ಜ್ಯೋತಿ ಪ್ರಕಾಶ್ ಅವರಿಗೆ ವೀರಭದ್ರೇಶ್ವರ ಪ್ರಶಸ್ತಿ
ಸಮಾಜದಲ್ಲಿ ಜಾಗೃತಿ, ಸಂಘಟನೆ ಮತ್ತು ಒಗ್ಗಟ್ಟಿಗಾಗಿ ಕಳೆದ ಆರು ವರ್ಷಗಳಿಂದ ವೀರಶೈವ ಲಿಂಗಾಯತ ಸಂಘಟನಾ ವೇದಿಕೆ ನಡೆಸುತ್ತಿರುವ ಕಾರ್ಯವನ್ನು ಜಗದ್ಗುರುಗಳು ಶ್ಲಾಘಿಸಿದರು.
ಸಮಾಜ ಸೇವೆಯಲ್ಲಿ ತೊಡಗಿಸಿಕೊಂಡಿರುವ ಸಾಧಕರನ್ನು ಗುರುತಿಸಿ ವೀರಭದ್ರೇಶ್ವರನ ಹೆಸರಿನಲ್ಲಿ ಪ್ರಶಸ್ತಿ ನೀಡುತ್ತಿರುವುದು ಉತ್ತಮ ಕಾರ್ಯ ಎಂದ ಅವರು, ಈ ವರ್ಷದ ಪ್ರಶಸ್ತಿಗೆ ಆಯ್ಕೆಯಾಗಿರುವ ಎಸ್. ಎಸ್. ಜ್ಯೋತಿ ಪ್ರಕಾಶ್ ಅವರನ್ನು ಅಭಿನಂದಿಸಿದರು.
ಚಿಕ್ಕ ವಯಸ್ಸಿನಿಂದಲೇ ಸಮಾಜಮುಖಿ ಚಟುವಟಿಕೆಗಳಲ್ಲಿ ತೊಡಗಿಸಿಕೊಂಡಿರುವ ಜ್ಯೋತಿ ಪ್ರಕಾಶ್ ಅವರು ವೈಯಕ್ತಿಕ ಬೆಳವಣಿಗೆಯ ಜತೆಗೆ ಸಮಾಜದ ಬೆಳವಣಿಗೆಯನ್ನೂ ಬಯಸುವ ಮನೋಭಾವ ಹೊಂದಿದ್ದಾರೆ. ಹೀಗಾಗಿ ಅವರ ಆಯ್ಕೆ ಸೂಕ್ತವಾಗಿದೆ ಎಂದು ಹೇಳಿದರು.
ಪ್ರದೀಪ್ ಎಲಿ ನೇತೃತ್ವದ ತಂಡದ ಧಾರ್ಮಿಕ ಸೇವೆ; ಸಂಘಟನೆ ಮೂಲಕ ಧರ್ಮಜಾಗೃತಿ ಮೂಡಿಸುತ್ತಿರುವ ಕಾರ್ಯಕ್ಕೆ ಶ್ರೀಶೈಲ ಜಗದ್ಗುರುಗಳ ಶ್ಲಾಘನೆ
ಕಾರ್ಯಕ್ರಮದ ರೂವಾರಿ ಹಾಗೂ ವೀರಶೈವ ಲಿಂಗಾಯತ ಸಂಘಟನಾ ವೇದಿಕೆಯ ಅಧ್ಯಕ್ಷರಾದ ಪ್ರದೀಪ್ ಎಲಿ ಮತ್ತು ಅವರ ತಂಡದ ಕಾರ್ಯಚಟುವಟಿಕೆಗಳನ್ನು ಶ್ರೀಶೈಲ ಜಗದ್ಗುರುಗಳು ವಿಶೇಷವಾಗಿ ಶ್ಲಾಘಿಸಿದರು. ವೀರಭದ್ರೇಶ್ವರ ಜಯಂತಿ, ಆಧ್ಯಾತ್ಮಿಕ ಜನಜಾಗೃತಿ ಸಮಾವೇಶ ಸೇರಿದಂತೆ ಧಾರ್ಮಿಕ ಹಾಗೂ ಸಾಮಾಜಿಕ ಕಾರ್ಯಕ್ರಮಗಳನ್ನು ನಿರಂತರವಾಗಿ ಆಯೋಜಿಸುವ ಮೂಲಕ ಸಮಾಜದಲ್ಲಿ ಧರ್ಮಜಾಗೃತಿ ಮೂಡಿಸುವ ಕಾರ್ಯವನ್ನು ವೇದಿಕೆ ಮಾಡುತ್ತಿದೆ. ಕೇವಲ ಕಾರ್ಯಕ್ರಮ ಆಯೋಜಿಸುವುದಕ್ಕೆ ಸೀಮಿತವಾಗದೆ, ಭಕ್ತರನ್ನು ಒಗ್ಗೂಡಿಸುವುದು, ಇಷ್ಟಲಿಂಗ ಧಾರಣೆ ಮತ್ತು ಲಿಂಗಪೂಜೆಯ ಮಹತ್ವವನ್ನು ಜನರಿಗೆ ತಿಳಿಸುವುದು, ಯುವಜನರಲ್ಲಿ ಧಾರ್ಮಿಕ ಸಂಸ್ಕಾರ ಬೆಳೆಸುವುದು ಸೇರಿದಂತೆ ಹಲವು ಕ್ಷೇತ್ರಗಳಲ್ಲಿ ವೇದಿಕೆ ಮುನ್ನಡೆಯುತ್ತಿರುವುದು ಅಭಿನಂದನೀಯ ಎಂದು ಜಗದ್ಗುರುಗಳು ಮೆಚ್ಚುಗೆ ವ್ಯಕ್ತಪಡಿಸಿದರು.
ಪ್ರದೀಪ್ ಎಲಿ ಅವರ ನೇತೃತ್ವದಲ್ಲಿ ತಂಡದ ಸದಸ್ಯರು ತೋರಿಸುತ್ತಿರುವ ಶ್ರದ್ಧೆ, ಸಂಘಟನಾ ಸಾಮರ್ಥ್ಯ ಹಾಗೂ ನಿರಂತರ ಸೇವಾ ಮನೋಭಾವ ಇಂತಹ ಧಾರ್ಮಿಕ ಕಾರ್ಯಕ್ರಮಗಳಿಗೆ ಮತ್ತಷ್ಟು ಬಲ ನೀಡುತ್ತಿದೆ ಎಂದು ಅವರು ಪ್ರಶಂಸಿಸಿದರು.
ಶಿವಮೊಗ್ಗ ಜಿಲ್ಲೆಯಲ್ಲಿ ಲಿಂಗಧಾರಣೆಯ ಕಾರ್ಯ ವಿಸ್ತರಿಸಲಿ
ವೀರಶೈವ ಲಿಂಗಾಯತ ಸಂಘಟನಾ ವೇದಿಕೆ ಈ ವರ್ಷ ಲಿಂಗಧಾರಣೆಗೆ ಚಾಲನೆ ನೀಡಿರುವುದು ಉತ್ತಮ ಬೆಳವಣಿಗೆ. ಈ ಕಾರ್ಯವನ್ನು ಶಿವಮೊಗ್ಗ ನಗರಕ್ಕೆ ಮಾತ್ರ ಸೀಮಿತಗೊಳಿಸದೆ ಜಿಲ್ಲೆಯಾದ್ಯಂತ ವಿಸ್ತರಿಸಬೇಕು. ಜಿಲ್ಲೆಯ ಎಲ್ಲ ಮಠಾಧೀಶರು ಈ ಕಾರ್ಯಕ್ಕೆ ಕೈಜೋಡಿಸಬೇಕು ಎಂದು ಜಗದ್ಗುರುಗಳು ಕರೆ ನೀಡಿದರು.
ಧರ್ಮಜಾಗೃತಿ, ಲಿಂಗಧಾರಣೆ ಮತ್ತು ಇಷ್ಟಲಿಂಗ ಪೂಜೆಯ ಮಹತ್ವವನ್ನು ಜನರಿಗೆ ತಿಳಿಸುವ ಕಾರ್ಯ ನಿರಂತರವಾಗಿ ನಡೆಯಬೇಕು. ಇದರಿಂದ ಸಮಾಜದಲ್ಲಿ ಧಾರ್ಮಿಕ ಜಾಗೃತಿಯ ಜತೆಗೆ ಸಂಘಟನೆಯೂ ಮತ್ತಷ್ಟು ಬಲಗೊಳ್ಳುತ್ತದೆ ಎಂದು ಹೇಳಿದರು.
ವೀರಭದ್ರೇಶ್ವರ ಜಯಂತಿ ಕೇವಲ ಒಂದು ಜಯಂತಿ ಆಚರಣೆಯಾಗದೆ, ಲಿಂಗಧಾರಣೆ, ಧರ್ಮಜಾಗೃತಿ, ಸಮಾಜದ ಒಗ್ಗಟ್ಟು ಮತ್ತು ಮಾನವೀಯ ಸೇವೆಯ ಸಂಕಲ್ಪಕ್ಕೆ ವೇದಿಕೆಯಾಗಬೇಕು. ವೀರಭದ್ರನ ವೀರತ್ವವನ್ನು ಹೊರಗಿನ ಹೋರಾಟದಲ್ಲಿ ಹುಡುಕದೆ, ನಮ್ಮೊಳಗಿನ ಕಾಮ, ಕ್ರೋಧ, ಲೋಭ, ಮೋಹ, ಮದ, ಮತ್ಸರಗಳನ್ನು ಗೆಲ್ಲುವ ಮೂಲಕ ಬದುಕಿನಲ್ಲಿ ಅಳವಡಿಸಿಕೊಳ್ಳಬೇಕು ಎಂಬ ಸಂದೇಶದೊಂದಿಗೆ ಜಗದ್ಗುರುಗಳು ಆಶೀರ್ವಚನ ನೀಡಿದರು.
ಸಮಾರಂಭದಲ್ಲಿ ಬೆಳಗಿನ ಇಷ್ಟಲಿಂಗ ಮಹಾಪೂಜೆ, ಲಿಂಗದೀಕ್ಷೆ, ಪಾದೋದಕ-ಪ್ರಸಾದ ವಿತರಣೆ ಸೇರಿದಂತೆ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳು ನಡೆದವು. ಸಂಜೆ ನಡೆದ ಧರ್ಮ ಸಮಾರಂಭದಲ್ಲಿಯೂ ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಂಡು ಜಗದ್ಗುರುಗಳ ಆಶೀರ್ವಚನ ಪಡೆದರು. ಕಾರ್ಯಕ್ರಮದ ಯಶಸ್ಸಿಗೆ ಶ್ರಮಿಸಿದ ಸಂಘಟಕರು, ಮಠಾಧೀಶರು, ಭಕ್ತರು ಹಾಗೂ ವಿವಿಧ ಕ್ಷೇತ್ರಗಳ ಗಣ್ಯರಿಗೆ ಜಗದ್ಗುರುಗಳು ಅಭಿನಂದನೆ ಸಲ್ಲಿಸಿದರು.
ವಿವಿಧ ಮಠಗಳ ಶ್ರೀಗಳ ಸಮ್ಮುಖದಿಂದ ಕಾರ್ಯಕ್ರಮಕ್ಕೆ ವಿಶೇಷ ಮೆರುಗು
ಕಾರ್ಯಕ್ರಮದಲ್ಲಿ ಶ್ರೀ ಮಹಾಂತದೇಶಿಕೇಂದ್ರ ಶಿವಾಚಾರ್ಯ ಮಹಾಸ್ವಾಮಿಗಳು, ಮಳೆಮಠ, ತೊಗರ್ಸಿ; ಶ್ರೀ ರೇಣುಕ ಶಿವಾಚಾರ್ಯ ಸ್ವಾಮಿಗಳು, ಬಾಳೆಹೊನ್ನೂರುಮಠ, ಎಡೆಯೂರು ಕ್ಷೇತ್ರ; ಶ್ರೀ ರಾಚೋಟೇಶ್ವರ ಶಿವಾಚಾರ್ಯ ಸ್ವಾಮಿಗಳು, ಹಿರೇಮಠ, ಬಿಳಕಿ; ಶ್ರೀ ಚನ್ನವೀರ ದೇಶಿಕೇಂದ್ರ ಶಿವಾಚಾರ್ಯ ಸ್ವಾಮಿಗಳು, ಪಂಚವಣ್ಣಗಿ ಮಠ, ತೊಗರ್ಸಿ; ಶ್ರೀ ಗುರುನಾಗಭೂಷಣ ಶಿವಾಚಾರ್ಯ ಸ್ವಾಮಿಗಳು, ಶ್ರೀಮದ್ ರಂಭಾಪುರಿ ಖಾಸಾ ಶಾಖಾ ಶ್ರೀಮನ್ ಮಹಾಸಂಸ್ಥಾನ ಮಳಲಿಮಠ; ಶ್ರೀ ಪಂಡಿತಾರಾಧ್ಯ ಶಿವಾಚಾರ್ಯ ಸ್ವಾಮಿಗಳು, ಬೃಹನ್ಮಠ, ಕೋಣಂದೂರು; ಶ್ರೀ ಪಶುಪತಿ ಶಿವಾನಂದ ಶಿವಾಚಾರ್ಯ ಸ್ವಾಮಿಗಳು, ದಿಂಡದಹಳ್ಳಿ ಮಠ; ಡಾ. ಶ್ರೀ ಅಭಿನವ ಸಿದ್ದಲಿಂಗ ಶಿವಾಚಾರ್ಯ ಸ್ವಾಮಿಗಳು, ಶಿಲಾಮಠ, ತಾವರೆಕೆರೆ; ಶ್ರೀ ಗುರುಬಸವ ಪಂಡಿತಾರಾಧ್ಯ ಶಿವಾಚಾರ್ಯ ಸ್ವಾಮಿಗಳು, ತೊಗರ್ಸಿ ಹಾಗೂ ಕ್ಯಾಸನೂರು ಮಠ; ಶ್ರೀ ರುದ್ರಮುನಿ ಶಿವಾಚಾರ್ಯ ಸ್ವಾಮಿಗಳು, ಬಿರೂರು ಮಠ ಸೇರಿದಂತೆ ಶ್ರೀಗಳು ಸಮ್ಮುಖ ವಹಿಸಿದ್ದರು.
ಕಾರ್ಯಕ್ರಮದಲ್ಲಿ ಬಿ.ವೈ. ರಾಘವೇಂದ್ರ, ಪ್ರದೀಪ್ ಎಲಿ, ಪ್ರದೀಪ್ ಕಂಕನವಾಡಿ, ಎಸ್.ಎಸ್. ಜ್ಯೋತಿಪ್ರಕಾಶ್, ಎಸ್. ರುದ್ರೇಗೌಡ, ಆಯನೂರು ಮಂಜುನಾಥ್, ಎಸ್.ಪಿ. ದಿನೇಶ್, ಸಿ.ಎಸ್. ಷಡಾಕ್ಷರಿ, ಹೆಚ್.ಸಿ. ಯೋಗೇಶ್, ರುದ್ರಮುನಿ ಎನ್. ಸಜ್ಜನ್, ಬಳ್ಳೇಕೆರೆ ಸಂತೋಷ್, ಬಿ.ಕೆ. ಶಿವಕುಮಾರ್, ಟಿ.ಬಿ. ಜಗದೀಶ್ ಹಾಗೂ ಇ. ವಿಶ್ವಾಸ್ ಸೇರಿದಂತೆ ಗಣ್ಯರು ಉಪಸ್ಥಿತರಿದ್ದರು.
