​ಆರ್‌ಸಿಬಿ ಕಪ್ ಗೆದ್ದಿತು… ಆದರೆ ನೀವು ಏನನ್ನು ಗೆದ್ದಿರಿ?

ವರ್ಷಗಳ ಸುದೀರ್ಘ ನಿರೀಕ್ಷೆ, ಕೋಟ್ಯಂತರ ಅಭಿಮಾನಿಗಳ ಅಚಲ ಬೆಂಬಲ ಹಾಗೂ ಆಟಗಾರರ ನಿರಂತರ ಪರಿಶ್ರಮದ ಪ್ರತಿಫಲವಾಗಿ ಕೊನೆಗೂ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡ ಚಾಂಪಿಯನ್ ಕಿರೀಟವನ್ನು ತನ್ನದಾಗಿಸಿಕೊಂಡಿದೆ. ಈ ಐತಿಹಾಸಿಕ ವಿಜಯವು ಕೇವಲ ಒಂದು ಟ್ರೋಫಿಯ ಗೆಲುವಲ್ಲ; ಹಲವು ಸೋಲು, ಟೀಕೆ ಮತ್ತು ನಿರಾಸೆಗಳ ನಡುವೆಯೂ ಹೋರಾಟದ ಮನೋಭಾವವನ್ನು ಕೈಬಿಡದ ತಂಡದ ಆತ್ಮವಿಶ್ವಾಸಕ್ಕೆ ಸಿಕ್ಕ ಅತ್ಯುನ್ನತ ಗೌರವವಾಗಿದೆ. ಇದೀಗ ಮೊದಲ ಟ್ರೋಫಿಯ ಸಂಭ್ರಮದ ಬೆನ್ನಲ್ಲೇ ಆರ್‌ಸಿಬಿ ತನ್ನ ಎರಡನೇ ಟ್ರೋಫಿಯನ್ನೂ ಗೆದ್ದು ಹೊಸ ಇತಿಹಾಸ ನಿರ್ಮಿಸಿದ್ದು, ಅಭಿಮಾನಿಗಳ ಹಲವು ವರ್ಷಗಳ ಕನಸು ಮತ್ತೊಮ್ಮೆ ನನಸಾಗಿದೆ. ಈ ಸಾಧನೆ ತಂಡದ ಸ್ಥಿರತೆ, ಆತ್ಮವಿಶ್ವಾಸ ಮತ್ತು ಗೆಲುವಿನ ಸಾಕ್ಷಿಯಾಗಿದೆ.

ಆದರೆ, ಈ ಅದ್ಭುತ ಗೆಲುವಿನ ಸಂಭ್ರಮದ ಹೊಸ್ತಿಲಿನಲ್ಲಿ ನಿಂತು ನಾವೆಲ್ಲರೂ ನಾವೇ ಕೇಳಿಕೊಳ್ಳಬೇಕಾದ ಒಂದು ಯಕ್ಷಪ್ರಶ್ನೆ ಇದೆ.

“ಆಟಗಾರರು ತಮ್ಮ ಕನಸಿನ ಕಪ್ ಗೆದ್ದರು ಸರಿ, ಆದರೆ ಕ್ರೀಡಾಭಿಮಾನಿಗಳಾದ ನೀವು ನಿಮ್ಮ ಜೀವನದಲ್ಲಿ ಏನನ್ನು ಸಾಧಿಸಿದಿರಿ?”

ಪ್ರೇಕ್ಷಕರಾಗಬೇಡಿ, ನಿಮ್ಮ ಬದುಕಿನ ಆಟಗಾರರಾಗಿ

​ಯಾವ ವ್ಯಕ್ತಿ ತನ್ನ ಸ್ವಂತ ಕನಸುಗಳ ಬೆನ್ನು ಹತ್ತುತ್ತಾನೋ, ಅವನು ಎಂದಿಗೂ ಇತರರ ಮೇಲೆ ಅವಲಂಬಿತನಾಗುವುದಿಲ್ಲ. ಅವನ ಗಮನವೆಲ್ಲವೂ ಕೇವಲ ತನ್ನ ಗುರಿಯ ಮೇಲಿರುತ್ತದೆ. ಸಾಧಕನಿಗೆ ಚಪ್ಪಾಳೆ ತಟ್ಟುವ ಕೈಗಳಿಗಿಂತ, ಸಾಧನೆ ಮಾಡುವ ತನ್ನ ಕೈಗಳ ಮೇಲೆಯೇ ನಂಬಿಕೆ ಹೆಚ್ಚು. ಆಟಗಾರರು ಕಪ್ ಗೆದ್ದಿದ್ದು ಇದೇ ಕಾರಣಕ್ಕೆ; ಅವರು ಕನಸನ್ನು ಕೇವಲ ಕಾಣಲಿಲ್ಲ, ಅದಕ್ಕಾಗಿ ಹೋರಾಡಿದರು.

​ಬೆಂಗಳೂರು ತಂಡದ ಗೆಲುವಿಗೆ ಖಂಡಿತವಾಗಿಯೂ ಸಂತೋಷ ಪಡಿ, ಆಚರಿಸಿ. ಆದರೆ ಆ ಸಂತೋಷ ಕೇವಲ ಕ್ರೀಡಾಂಗಣದ ಸಂಭ್ರಮವಾಗಬಾರದು; ಅದು ನಿಮ್ಮ ಬದುಕಿನ ದಿಕ್ಸೂಚಿಯಾಗಬೇಕು. ಇನ್ನೊಬ್ಬರ ಗೆಲುವಿನ ನೆರಳಿನಲ್ಲಿ ನಮ್ಮ ಇಡೀ ಜೀವನವನ್ನು ಕಳೆಯುವುದಕ್ಕಿಂತ, ನಮ್ಮ ಸ್ವಂತ ಬದುಕಿನಲ್ಲಿ ಒಂದು ಸಣ್ಣ ಗೆಲುವನ್ನು ಸಾಧಿಸುವುದು ಕೋಟಿ ಪಟ್ಟು ಮೌಲ್ಯಯುತವಾದದ್ದು.

​ನಿಮ್ಮ ಹೆತ್ತವರು ನಿಮ್ಮ ಯಶಸ್ಸಿನ ಟ್ರೋಫಿಗಾಗಿ ಚಾತಕ ಪಕ್ಷಿಯಂತೆ ಕಾಯುತ್ತಿದ್ದಾರೆ. ನಿಮ್ಮ ಸಾಧನೆಯೇ ಅವರಿಗೆ ನಿಜವಾದ ಹೆಮ್ಮೆ, ನಿಮ್ಮ ಗೆಲುವೇ ಸಮಾಜಕ್ಕೆ ನೀವು ನೀಡಬಹುದಾದ ಅತ್ಯುತ್ತಮ ಮಾದರಿ.

ಮೈದಾನಕ್ಕಿಳಿಯುವ ಸಮಯ ಬಂದಿದೆ

​ಕ್ರಿಕೆಟ್ ಎನ್ನುವುದು ಕೇವಲ ಮೂರು-ನಾಲ್ಕು ಗಂಟೆಗಳ ಆಟ, ಆದರೆ ಜೀವನ ಎನ್ನುವುದು ಸುದೀರ್ಘವಾದ ಅಸಲಿ ಪಂದ್ಯ. ಈ ಜೀವನದ ಮಹಾ ಮೈದಾನದಲ್ಲಿ ಪ್ರೇಕ್ಷಕರ ಗ್ಯಾಲರಿಯಲ್ಲಿ ಕುಳಿತು ಕೇವಲ ಶಿಳ್ಳೆ, ಚಪ್ಪಾಳೆ ಹೊಡೆಯುವ ಪ್ರೇಕ್ಷಕರಾಗಬೇಡಿ. ಬದಲಿಗೆ, ಬ್ಯಾಟ್ ಹಿಡಿದು ಮೈದಾನಕ್ಕಿಳಿಯುವ ಅಸಲಿ ಆಟಗಾರರಾಗಿ.

ಲೇಖನ​- ಕೆ. ಯರೆಪ್ಪ, ಶಿಕ್ಷಕರು