ಗುಬ್ಬಿ: “ದೇಹದ ಸಂರಕ್ಷಣೆಗಾಗಿ ಜೀವಸತ್ವಗಳು ಎಷ್ಟು ಅವಶ್ಯಕವೋ, ಹಾಗೆಯೇ ಆತ್ಮ ಸಂಶೋಧನೆಗಾಗಿ ಧಾರ್ಮಿಕ ತತ್ವಗಳೇ ಜೀವನದ ಸಂಜೀವಿನಿಯಾಗಿವೆ. ಮಾನವ ಜೀವನದ ಮೌಲ್ಯಗಳು ಶಾಶ್ವತವಾದವುಗಳು. ಇವುಗಳು ಎಂದಾದರೂ ಅಂತ್ಯಗೊಂಡರೆ, ಅದು ಮಾನವೀಯತೆಯೇ ಅಂತ್ಯಗೊಂಡಂತೆ,” ಎಂದು ಬಾಳೆಹೊನ್ನೂರು ಶ್ರೀ ರಂಭಾಪುರಿ ಡಾ. ವೀರಸೋಮೇಶ್ವರ ಜಗದ್ಗುರುಗಳು ಅಭಿಪ್ರಾಯಪಟ್ಟರು.
ಅವರು ಮಂಗಳವಾರ ತಾಲೂಕಿನ ನಿಟ್ಟೂರು ಬಾಲಾಜಿ ಬಡಾವಣೆಯಲ್ಲಿ ಜರುಗಿದ ‘ಜನ ಜಾಗೃತಿ ಧರ್ಮ ಸಮಾರಂಭ’ದ ದಿವ್ಯ ಸಾನ್ನಿಧ್ಯ ವಹಿಸಿ ಆಶೀರ್ವಚನ ನೀಡಿದರು.
ಧಾರ್ಮಿಕ ಮೌಲ್ಯಗಳಿಂದ ಅಜ್ಞಾನದ ನಾಶ: ರಂಭಾಪುರಿ ಶ್ರೀಗಳು
ಬದುಕಿನ ಚಟುವಟಿಕೆಗಳು ಸಂಪೂರ್ಣ ಸಾಕಾರಗೊಳ್ಳಬೇಕಾದರೆ ಧಾರ್ಮಿಕ ಮೌಲ್ಯಗಳ ಪರಿಪಾಲನೆಯ ಅಗತ್ಯವಿದೆ ಎಂದು ನುಡಿದ ಶ್ರೀಗಳು, “ಧರ್ಮವೆಂಬ ದೀಪದ ಬೆಳಕಿನಿಂದ ಮಾತ್ರ ಸಮಾಜದಲ್ಲಿನ ಅಜ್ಞಾನವನ್ನು ದೂರ ಮಾಡಲು ಸಾಧ್ಯ. ನಾವು ಮಾಡುವ ಕೆಲಸ ದೊಡ್ಡದಿರಲಿ ಅಥವಾ ಸಣ್ಣದಿರಲಿ, ಅದನ್ನು ಶುದ್ಧ ಮನಸ್ಸಿನಿಂದ ಮಾಡಿದಾಗ ಅದರ ಪರಿಣಾಮ ಮಾತ್ರ ಅತ್ಯಂತ ದೊಡ್ಡದಾಗಿರುತ್ತದೆ. ಪುಟ್ಟ ಬೀಜವೇ ಮುಂದೆ ಹೆಮ್ಮರಕ್ಕೆ ಮೂಲವಾಗುತ್ತದೆ. ಕರ್ತವ್ಯದ ಕಾಲುದಾರಿ ಮುಂದೆ ಕೀರ್ತಿಯ ಹೆದ್ದಾರಿಯಾಗುತ್ತದೆ,” ಎಂದರು.
ಮುಂದುವರಿದು ಮಾತನಾಡಿದ ಅವರು, “ಗುರಿಯೆಡೆಗೆ ಸಾಗುವಾಗ ಜೀವನದಲ್ಲಿ ಸಾವಿರಾರು ಸಂಕಷ್ಟಗಳು ಎದುರಾಗುತ್ತವೆ. ಆದರೆ ಆ ಸವಾಲುಗಳಿಗೆ ಅಂಜದೇ, ಅಳುಕದೇ ಗಟ್ಟಿ ಹೆಜ್ಜೆಯನ್ನಿಟ್ಟರೆ ಜೀವನ ಉಜ್ವಲಗೊಳ್ಳುತ್ತದೆ. ಚತುರ್ವಿಧ ಪುರುಷಾರ್ಥಗಳಲ್ಲಿ ಒಂದನ್ನಾದರೂ ಮನುಷ್ಯ ಸಾಧಿಸದಿದ್ದರೆ ಆತನ ಜೀವನ ಸಮೃದ್ಧಗೊಳ್ಳದು. ಮನುಷ್ಯನ ಮನಸ್ಸು ಇಂದು ಮಲಿನಗೊಂಡ ಬಟ್ಟೆಯಂತಾಗಿದೆ. ಮನದ ಕನ್ನಡಿಯ ಮೇಲೆ ಅಂಟಿದ ಧೂಳನ್ನು ಜಾಡಿಸಿ ಪರಿಶುದ್ಧಗೊಳಿಸಲು ಶ್ರೀ ಗುರುವಿನ ಮಾರ್ಗದರ್ಶನ ಮತ್ತು ಬೋಧಾಮೃತ ಅತ್ಯಗತ್ಯ ಎಂದು ಶ್ರೀ ಜಗದ್ಗುರು ರೇಣುಕಾಚಾರ್ಯರು ಸಿದ್ಧಾಂತ ಶಿಖಾಮಣಿಯಲ್ಲಿ ಪ್ರತಿಪಾದಿಸಿದ್ದಾರೆ,” ಎಂದು ವಿವರಿಸಿದರು.
ಆದರ್ಶ ದಂಪತಿಗಳಿಗೆ ಶುಭ ಹಾರೈಕೆ
ಇದೇ ಸಂದರ್ಭದಲ್ಲಿ ಸಮಾರಂಭದ ಯಜಮಾನರಾದ ಶ್ರೀಮತಿ ಉಷಾ ಮತ್ತು ಚಂದ್ರಶೇಖರ್ ದಂಪತಿಗಳನ್ನು ಶ್ಲಾಘಿಸಿದ ಶ್ರೀ ರಂಭಾಪುರಿ ಜಗದ್ಗುರುಗಳು, “ದೇಹವನ್ನು ದುಡಿಮೆಗೆ ಮತ್ತು ಮನಸ್ಸನ್ನು ದೇವರಿಗೆ ಸಮರ್ಪಿಸಿದರೆ ಬದುಕು ಸಾರ್ಥಕಗೊಳ್ಳುತ್ತದೆ ಎಂದು ನಂಬಿ ನಡೆದ ಆದರ್ಶ ದಂಪತಿಗಳು ಇವರು. ಇವರ ವೈವಾಹಿಕ ಜೀವನದ 40ನೇ ವರ್ಷದ ವಾರ್ಷಿಕೋತ್ಸವ ಮತ್ತು ಷಷ್ಟ್ಯಬ್ದಿ ಸಮಾರಂಭವು ಈ ಧರ್ಮ ಸಭೆಯೊಂದಿಗೆ ಜರುಗುತ್ತಿರುವುದು ಅತ್ಯಂತ ಸಂತೋಷ ತಂದಿದೆ,” ಎಂದು ಆಶೀರ್ವದಿಸಿದರು.
ಧರ್ಮ ವೀರಶೈವ ಸಕಲ ಜೀವಾತ್ಮರಿಗೆ ಒಳಿತನ್ನು ಬಯಸುತ್ತದೆ: ದೊಡ್ಡಗುಣಿ ಹಿರೇಮಠದ ಶ್ರೀಗಳು
ಸಮಾರಂಭವನ್ನು ಉದ್ಘಾಟಿಸಿ ಮಾತನಾಡಿದ ದೊಡ್ಡಗುಣಿ ಹಿರೇಮಠದ ರೇವಣಸಿದ್ದೇಶ್ವರ ಶಿವಾಚಾರ್ಯ ಸ್ವಾಮೀಜಿ, “ಮನುಷ್ಯ ಹುಟ್ಟಿ ಬರುವಾಗ ಪವಿತ್ರ ಹೃದಯದವನಾಗಿರುತ್ತಾನೆ. ಆದರೆ ಲೌಕಿಕ ಜಗತ್ತಿನಲ್ಲಿ ಬೆಳೆದಂತೆಲ್ಲಾ ಆತನ ಮನಸ್ಸು ಮಲಿನಗೊಳ್ಳುತ್ತದೆ. ಸಕಲ ಜೀವಾತ್ಮರಿಗೂ ಒಳಿತನ್ನೇ ಉಣಬಡಿಸಿದ ಧರ್ಮ ವೀರಶೈವ ಧರ್ಮವಾಗಿದೆ. ಶ್ರೀ ಜಗದ್ಗುರು ರೇಣುಕಾಚಾರ್ಯರ ಧಾರ್ಮಿಕ ಮತ್ತು ಸಾಮಾಜಿಕ ಮೌಲ್ಯಗಳನ್ನು ಇಂದಿನ ಸಮಾಜದಲ್ಲಿ ಪ್ರಬುದ್ಧಗೊಳಿಸಲು ನಾವೆಲ್ಲರೂ ಪ್ರಾಮಾಣಿಕ ಪ್ರಯತ್ನ ಮಾಡಬೇಕಾಗಿದೆ,” ಎಂದು ಕರೆ ನೀಡಿದರು.
ಸಿದ್ದರಬೆಟ್ಟ ಕ್ಷೇತ್ರದ ವೀರಭದ್ರ ಶಿವಾಚಾರ್ಯ ಸ್ವಾಮೀಜಿ ಕಾರ್ಯಕ್ರಮದ ಪ್ರಾಸ್ತಾವಿಕ ನುಡಿಗಳನ್ನಾಡಿದರು. ತಿಪಟೂರು ಷಡಕ್ಷರಮಠದ ರುದ್ರಮುನಿ ಸ್ವಾಮೀಜಿ, ಎಲೆರಾಂಪುರ ಡಾ. ಹನುಮಂತನಾಥ ಸ್ವಾಮೀಜಿ ಹಾಗೂ ಎಡೆಯೂರು ರೇಣುಕ ಶಿವಾಚಾರ್ಯ ಸ್ವಾಮೀಜಿಗಳು ಸಭೆಗೆ ಉಪದೇಶಾಮೃತ ನೀಡಿದರು.
ಶ್ರದ್ಧಾ ಭಕ್ತಿಯಿಂದ ಜರುಗಿದ ಧರ್ಮ ಸಭೆ
ಸಮಾರಂಭದಲ್ಲಿ ತೇವಡಹಳ್ಳಿ, ಬೆಳ್ಳಾವಿ ಕಾಡಸಿದ್ದೇಶ್ವರಮಠ, ತಾವರೆಕೆರೆ ಡಾ. ಅಭಿನವ ಸಿದ್ದಲಿಂಗ ಶಿವಾಚಾರ್ಯರು, ಚನ್ನಗಿರಿ ಕೇದಾರ ಶಿವಶಾಂತವೀರ ಶಿವಾಚಾರ್ಯರು, ಬಿಳಕಿ ಹಿರೇಮಠದ ರಾಚೋಟೇಶ್ವರ ಶಿವಾಚಾರ್ಯರು, ನಾಗಲಾಪುರ ತೇಜೇಶಲಿಂಗ ಶಿವಾಚಾರ್ಯರು, ಸಂಗೊಳ್ಳಿ ಗುರುಲಿಂಗ ಶಿವಾಚಾರ್ಯರು, ಮಳಲಿಮಠದ ಡಾ. ನಾಗಭೂಷಣ ಶಿವಾಚಾರ್ಯರು ಸೇರಿದಂತೆ ಸುಮಾರು 20ಕ್ಕೂ ಹೆಚ್ಚು ಮಠಾಧೀಶರು ಮತ್ತು ಪೀಠಾಧ್ಯಕ್ಷರು ಉಪಸ್ಥಿತರಿದ್ದರು.
ಇದೇ ಸಂದರ್ಭದಲ್ಲಿ ಹಲವು ಗಣ್ಯರಿಗೆ ಶ್ರೀ ರಂಭಾಪುರಿ ಜಗದ್ಗುರುಗಳು ಗುರುರಕ್ಷೆ ನೀಡಿ ಶುಭ ಹಾರೈಸಿದರು. ಕಾರ್ಯಕ್ರಮದಲ್ಲಿ ತೇವಡಹಳ್ಳಿ ಪ್ರಸನ್ನಕುಮಾರ್ ಮತ್ತು ದಕ್ಷಿಣಾಮೂರ್ತಿ ಅವರು ಮುಖ್ಯ ಅತಿಥಿಗಳಾಗಿ ಪಾಲ್ಗೊಂಡಿದ್ದರು.
