ಕನ್ನಡ ಸಾಹಿತ್ಯ ಲೋಕಕ್ಕೆ ಅಪಾರ ನಷ್ಟ: ಪದ್ಮಭೂಷಣ ಸಾಹಿತಿ ಎಸ್.ಎಲ್. ಭೈರಪ್ಪ ನಿಧನ

ಬೆಂಗಳೂರು, ಸೆಪ್ಟೆಂಬರ್ 24: ಕನ್ನಡ ಸಾಹಿತ್ಯ ಲೋಕದ ಮಹತ್ವದ ಶಕ್ತಿ, ರಾಷ್ಟ್ರ ಮಟ್ಟದಲ್ಲಿ ಕಾದಂಬರಿ ಸಾಹಿತ್ಯಕ್ಕೆ ವಿಶಿಷ್ಟ ಸ್ಥಾನ ನೀಡಿದ ಹಿರಿಯ ಸಾಹಿತಿ, ಪದ್ಮಭೂಷಣ ಪುರಸ್ಕೃತ ಡಾ. ಎಸ್.ಎಲ್. ಭೈರಪ್ಪ (94) ಇಂದು ಬೆಳಿಗ್ಗೆ ಬೆಂಗಳೂರಿನಲ್ಲಿ ಇಹಲೋಕ ತ್ಯಜಿಸಿದ್ದಾರೆ. ರಾಜರಾಜೇಶ್ವರಿನಗರದಲ್ಲಿನ ಖಾಸಗಿ ಆಸ್ಪತ್ರೆಯಲ್ಲಿ ಅವರು ಕೊನೆಯುಸಿರೆಳೆದರು. ಕಳೆದ ಕೆಲ ತಿಂಗಳಿನಿಂದ ವಯೋಸಹಜ ಅಸ್ವಸ್ಥತೆ ಹಾಗೂ ಮರುವು ಕಾಯಿಲೆಯಿಂದ ಬಳಲುತ್ತಿದ್ದ ಅವರು ಚಿಕಿತ್ಸೆಗೆ ಮೈಸೂರಿನಿಂದ ಬೆಂಗಳೂರಿಗೆ ವಾಸಸ್ಥಳ ಬದಲಿಸಿದ್ದರು.

ಸಂತೇಶಿವರ ಲಿಂಗಣ್ಣಯ್ಯ ಭೈರಪ್ಪ ಎಂದೇ ಸಂಪೂರ್ಣ ಹೆಸರುಳ್ಳ ಎಸ್.ಎಲ್. ಭೈರಪ್ಪ, ಆರು ದಶಕಗಳ ಕಾಲ ಕನ್ನಡ ಸಾಹಿತ್ಯಕ್ಕೆ ಅಪಾರ ಸೇವೆ ಸಲ್ಲಿಸಿದರು. ಅವರ ಕಾದಂಬರಿಗಳು ಕೇವಲ ಕಲ್ಪನೆಯ ಕಥೆಗಳಲ್ಲ, ಬದಲಿಗೆ ತತ್ವ, ಇತಿಹಾಸ, ಸಮಾಜ, ಧರ್ಮ, ನೀತಿ–ಅನೀತಿ, ನೈತಿಕ ಗೊಂದಲಗಳು ಹಾಗೂ ಮಾನವ ಸಂಬಂಧಗಳ ಸುತ್ತ ವಿಸ್ತಾರವಾಗಿದ್ದವು. ಇದರಿಂದ ಅವರ ಕೃತಿಗಳು ಓದುಗರಲ್ಲಿ ಆಳವಾದ ಚಿಂತನ-ಮನನಕ್ಕೆ ಕಾರಣವಾಗಿವೆ.

ಪ್ರಮುಖ ಕೃತಿಗಳು

ಭೀಮಕಾಯ (1952) ಮೂಲಕ ಕಾದಂಬರಿಕಾರರಾಗಿ ಪ್ರವೇಶಿಸಿದ ಭೈರಪ್ಪ ಅವರು ವಂಶವೃಕ್ಷ, ಗೃಹಭಂಗ, ದಾಟು, ಅನ್ವೇಷಣ, ಪರ್ವ, ಅಂಚು, ತಂತು, ಮಂದ್ರ, ಸಾರ್ಥ, ಆವರಣ, ಕವಲು, ಉತ್ತರಕಾಂಡ ಮುಂತಾದ ಶ್ರೇಷ್ಠ ಕೃತಿಗಳನ್ನು ಕನ್ನಡ ಸಾಹಿತ್ಯಕ್ಕೆ ನೀಡಿದರು. “ಪರ್ವ” ಅವರನ್ನು ರಾಷ್ಟ್ರೀಯ ಮಟ್ಟದ ಸಾಹಿತ್ಯದ ಚರ್ಚೆಯ ಕೇಂದ್ರಬಿಂದುಗೊಳಿಸಿತು. “ಆವರಣ” ಕಾದಂಬರಿಯು ಧರ್ಮ–ಸಾಮಾಜಿಕ ಬದುಕಿನ ಕುರಿತಾದ ಗಹನ ಚಿಂತನೆಗೆ ಕಾರಣವಾಯಿತು.

ಜೀವನ ಹೋರಾಟದಿಂದ ಸಾಹಿತ್ಯ ಸಾಧನೆ

ಹಾಸನ ಜಿಲ್ಲೆಯ ಸಂತೇಶಿವಾರ ಗ್ರಾಮದಲ್ಲಿ ಜನಿಸಿದ ಭೈರಪ್ಪ, ಬಾಲ್ಯದಲ್ಲಿಯೇ ತಂದೆಯನ್ನು ಕಳೆದುಕೊಂಡು ದುಸ್ತರ ಪರಿಸ್ಥಿತಿಯಲ್ಲಿ ವಿದ್ಯಾಭ್ಯಾಸ ಮುಂದುವರಿಸಿದರು. ಶಿಕ್ಷಣ ಮತ್ತು ಶ್ರಮದ ಬಲದಿಂದ ಪ್ರಾಧ್ಯಾಪಕರಾದ ಅವರು ನಂತರ ಸಂಪೂರ್ಣವಾಗಿ ಸಾಹಿತ್ಯ ಸೇವೆಗೆ ತೊಡಗಿದರು. ತಮ್ಮ ಸ್ವಗ್ರಾಮದ ಅಭಿವೃದ್ಧಿಗೆ, ವಿಶೇಷವಾಗಿ ಕೆರೆಗಳಿಗೆ ನೀರು ತುಂಬಿಸಲು ಶ್ರಮಿಸಿದ ಸಮಾಜಸೇವಕರೂ ಆಗಿದ್ದರು.

ಪ್ರಶಸ್ತಿಗಳು ಮತ್ತು ಗೌರವಗಳು

• ಸರಸ್ವತಿ ಸಮ್ಮಾನ್ (2010)
• ಸಾಹಿತ್ಯ ಅಕಾಡೆಮಿ ಫೆಲೋಶಿಪ್ (2015)
• ಪದ್ಮಶ್ರೀ (2016)
• ಪದ್ಮಭೂಷಣ (2023)

ಭೈರಪ್ಪ ಅವರ ಅಭಿಮಾನಿಗಳು ಅವರಿಗೆ ಜ್ಞಾನಪೀಠ ಪ್ರಶಸ್ತಿ ನೀಡಬೇಕೆಂದು ಆಗಾಗ ಒತ್ತಾಯಿಸಿದ್ದರೂ, ಅವರಿಗೆ ಅದು ದೊರಕಲಿಲ್ಲ. ಆದರೆ ಅವರ ಕೃತಿಗಳು ಜ್ಞಾನಪೀಠಕ್ಕಿಂತಲೂ ಹೆಚ್ಚಿನ ಓದುಗರ ಪ್ರೀತಿ ಮತ್ತು ಗೌರವವನ್ನು ಗಳಿಸಿವೆ.

ಓದುಗರ ಹೃದಯದಲ್ಲಿ ಚಿರಸ್ಥಾಯಿ

ಪ್ರಧಾನಮಂತ್ರಿ ನರೇಂದ್ರ ಮೋದಿ ಸೇರಿದಂತೆ ಅನೇಕರು ಭೈರಪ್ಪ ಅವರ ಅಭಿಮಾನಿಗಳಾಗಿದ್ದರು. ಅವರ ಬರಹಗಳು ಸಾಮಾನ್ಯ ಓದುಗರಿಂದ ಹಿಡಿದು ಪಂಡಿತರವರೆಗೂ ಆಳವಾದ ಪ್ರಭಾವ ಬೀರಿದ್ದವು.

ಕನ್ನಡ ಸಾಹಿತ್ಯ ಲೋಕದಲ್ಲಿ ಅಪಾರ ಕೀರ್ತಿ ಪಡೆದ ಭೈರಪ್ಪ ಅವರಿಗೆ ಜ್ಞಾನಪೀಠ ಪ್ರಶಸ್ತಿ ನೀಡಬೇಕೆಂದು ಓದುಗರ ಒತ್ತಾಯ ಇತ್ತು. ಅವರ ಅಗಲಿಕೆಯಿಂದ ಕನ್ನಡ ಸಾಹಿತ್ಯ ಕ್ಷೇತ್ರವು ಮಹಾನ್ ಕಾದಂಬರಿಕಾರನನ್ನು ಕಳೆದುಕೊಂಡಿದೆ.