ಬೆಂಗಳೂರು: ಸರ್ಕಾರಿ ಉದ್ಯೋಗ ಕನಸು ಕಂಡು ಹಲವು ವರ್ಷಗಳಿಂದ ಕಾಯುತ್ತಿರುವ ಅಭ್ಯರ್ಥಿಗಳಿಗೆ ರಾಜ್ಯ ಸರ್ಕಾರದಿಂದ ಗುಡ್ ನ್ಯೂಸ್ ಸಿಕ್ಕಿದೆ. ನೇರ ನೇಮಕಾತಿ ಪ್ರಕ್ರಿಯೆಗಳಲ್ಲಿ ಗರಿಷ್ಠ ವಯೋಮಿತಿಯಲ್ಲಿ ಒಂದು ಬಾರಿಯ ಕ್ರಮವಾಗಿ ಮೂರು ವರ್ಷಗಳ ಸಡಿಲಿಕೆ ನೀಡಲು ಸರ್ಕಾರ ಅಧಿಕೃತ ಆದೇಶ ಹೊರಡಿಸಿದೆ. ಈ ಸಡಿಲಿಕೆ 2027ರ ಡಿಸೆಂಬರ್ 31ರವರೆಗೆ ಅನ್ವಯವಾಗಲಿದೆ.
ಇತ್ತೀಚಿನ ವರ್ಷಗಳಲ್ಲಿ ಅನೇಕ ಇಲಾಖೆಗಳಲ್ಲಿ ನೇಮಕಾತಿ ಪ್ರಕ್ರಿಯೆಗಳು ಸ್ಥಗಿತಗೊಂಡಿದ್ದರಿಂದ ಸಾವಿರಾರು ಅಭ್ಯರ್ಥಿಗಳು ವಯೋಮಿತಿ ಮೀರಿದ್ದರು. ವಿಶೇಷವಾಗಿ ಕಾನ್ಸ್ಟೇಬಲ್, ಪಿಎಸ್ಐ, SDA, FDA, ಶಿಕ್ಷಕ ಮತ್ತು ಗ್ರೂಪ್ ಸಿ ಹುದ್ದೆಗಳಿಗೆ ನೇಮಕಾತಿ ವರ್ಷಗಳಿಂದ ನಡೆದಿರಲಿಲ್ಲ. ಎಂಟು ದಶಕಗಳಿಂದ ಕೂಡ ಕೆಲವು ಹುದ್ದೆಗಳ ಪ್ರಕ್ರಿಯೆ ಆರಂಭವಾಗದೇ ಇರುವುದರಿಂದ ಅಸಮಾಧಾನ ಹೆಚ್ಚುತ್ತಿತ್ತು.
ಹಲವಾರು ಜನಪ್ರತಿನಿಧಿಗಳು ಹಾಗೂ ಸಂಘಟನೆಗಳು ಸರ್ಕಾರಕ್ಕೆ ಮನವಿ ಸಲ್ಲಿಸಿ ಕನಿಷ್ಠ ಐದು ವರ್ಷಗಳ ಸಡಿಲಿಕೆ ನೀಡಲು ಒತ್ತಾಯಿಸಿದ್ದವು. ಧಾರವಾಡದಲ್ಲಿ ಇತ್ತೀಚೆಗೆ ಉದ್ಯೋಗಾಕಾಂಕ್ಷಿಗಳು ಪ್ರತಿಭಟನೆ ನಡೆಸಿ ನೇಮಕಾತಿ ಆರಂಭಿಸಬೇಕೆಂದು ಆಗ್ರಹಿಸಿದ್ದರು. ಈ ಮನವಿಗಳನ್ನು ಪರಿಶೀಲಿಸಿದ ಸರ್ಕಾರ, ಐದು ವರ್ಷ ಬದಲು 3 ವರ್ಷಗಳ ವಯೋಮಿತಿ ಸಡಿಲಿಕೆ ನೀಡಲು ತೀರ್ಮಾನಿಸಿದೆ.
ಸರ್ಕಾರದ ಆದೇಶದ ಪ್ರಕಾರ ಎಲ್ಲಾ ಪ್ರವರ್ಗಗಳ ಅಭ್ಯರ್ಥಿಗಳಿಗೆ ವಯೋಮಿತಿಯಲ್ಲಿ ಈ ಕೆಳಗಿನಂತೆ ಸಡಿಲಿಕೆ ಅನ್ವಯವಾಗುತ್ತದೆ: ಸಾಮಾನ್ಯ ವರ್ಗದವರಿಗೆ 35 ರಿಂದ 38 ವರ್ಷ, ಒಬಿಸಿ ಪ್ರವರ್ಗದವರಿಗೆ 38 ರಿಂದ 41 ವರ್ಷ, ಹಾಗೂ ಎಸ್ಸಿ, ಎಸ್ಟಿ ಮತ್ತು ಪ್ರವರ್ಗ-1 ಅಭ್ಯರ್ಥಿಗಳಿಗೆ 40 ರಿಂದ 43 ವರ್ಷ ವರೆಗೂ ಅವಕಾಶ ಸಿಕ್ಕಿದೆ. ಇದರಿಂದ ಹಲವು ಸಾವಿರ ಯುವಕರು ಮತ್ತು ಮಧ್ಯವಯಸ್ಸಿನ ಅಭ್ಯರ್ಥಿಗಳಿಗೆ ಮತ್ತೆ ಸರ್ಕಾರಿ ಉದ್ಯೋಗದ ಅವಕಾಶ ದೊರೆತಂತಾಗಿದೆ.
ಹುದ್ದೆಯ ಪ್ರಕಾರವೂ ವಯೋಮಿತಿಯಲ್ಲಿನ ಬದಲಾವಣೆಗಳನ್ನು ಸರ್ಕಾರ ಸ್ಪಷ್ಟಪಡಿಸಿದೆ. ಶಿಕ್ಷಕರ ಆಯ್ಕೆ ಪ್ರಕ್ರಿಯೆಯಲ್ಲಿ ಸಾಮಾನ್ಯ ಅಭ್ಯರ್ಥಿಗಳಿಗೆ 40 ರಿಂದ 43 ವರ್ಷ ಮತ್ತು SC/ST/OBC ಅಭ್ಯರ್ಥಿಗಳಿಗೆ 42ರಿಂದ 45 ವರ್ಷ ವಯೋಮಿತಿ ಅನ್ವಯವಾಗಲಿದೆ. SDA, FDA ಮತ್ತು ಇತರೆ ಗ್ರೂಪ್ C ಹುದ್ದೆಗಳಿಗಾಗಿ ಸಾಮಾನ್ಯ ವರ್ಗದವರಿಗೆ 37 ರಿಂದ 40 ವರ್ಷ, ಹಾಗೂ ಮೀಸಲು ವರ್ಗದವರಿಗೆ 35 ರಿಂದ 38 ವರ್ಷ ಮಿತಿ ನಿಗದಿಯಾಗಿದೆ.
ಪೊಲೀಸ್ ಇಲಾಖೆಯ ನೇಮಕಾತಿಯಲ್ಲೂ ಪ್ರಮುಖ ಬದಲಾವಣೆ ಕಂಡುಬಂದಿದೆ. ಕಾನ್ಸ್ಟೇಬಲ್ ಹುದ್ದೆಗೆ ಸಾಮಾನ್ಯ ಅಭ್ಯರ್ಥಿಗಳಿಗೆ 25 ರಿಂದ 28 ವರ್ಷ ಮತ್ತು SC/ST/OBC ಅಭ್ಯರ್ಥಿಗಳಿಗೆ 27 ರಿಂದ 30 ವರ್ಷ ವಯೋಮಿತಿ ಅನ್ವಯವಾಗಲಿದೆ. ಪಿಎಸ್ಐ (PSI) ಹುದ್ದೆಗೆ ಮುಂಚೆ ಸಾಮಾನ್ಯ ವರ್ಗಕ್ಕೆ 30 ವರ್ಷವಿದ್ದರೆ, ಈಗ 33 ವರ್ಷ ಮತ್ತು ಮೀಸಲು ವರ್ಗಕ್ಕೆ 32 ರಿಂದ 35 ವರ್ಷ ವಯೋಮಿತಿ ಅನ್ವಯವಾಗುತ್ತದೆ.
KAS ಸೇರಿದಂತೆ ರಾಜ್ಯ ಸಿವಿಲ್ ಸೇವಾ ಹುದ್ದೆಗಳಿಗೆ ಸಹ ವಯೋಮಿತಿ ಸಡಿಲಿಕೆ ನೀಡಲಾಗಿದೆ. ಸಾಮಾನ್ಯ ಅಭ್ಯರ್ಥಿಗಳು ಈಗ 40 ವರ್ಷ ವರೆಗೆ ಅರ್ಜಿ ಸಲ್ಲಿಸಬಹುದು (ಹಿಂದಿನ ಮಿತಿ 37). SC/ST ಮತ್ತು OBC ಅಭ್ಯರ್ಥಿಗಳು 43ವರ್ಷ ವರೆಗೂ ಅವಕಾಶ ಪಡೆಯಲಿದ್ದಾರೆ.
ಈ ನಿರ್ಧಾರವು ದೀರ್ಘಕಾಲದಿಂದ ಕಾಯುತ್ತಿದ್ದ ಸರ್ಕಾರಿ ಉದ್ಯೋಗಾಕಾಂಕ್ಷಿಗಳಿಗೆ ಪುನಃ ಆಶಾಕಿರಣವಾಗಿ ಪರಿಣಮಿಸಿದೆ. ಸರ್ಕಾರದ ಪ್ರಕಾರ, ಇದು ಒಂದು ಬಾರಿಗೆ ಮಾತ್ರ ಜಾರಿಯಲ್ಲಿರುವ ವಿಶೇಷ ಕ್ರಮವಾಗಿದ್ದು, ಮುಂದಿನ ಮೂರು ವರ್ಷಗಳಲ್ಲಿ ನಡೆಯುವ ಎಲ್ಲಾ ನೇರ ನೇಮಕಾತಿಗಳಿಗೆ ಅನ್ವಯವಾಗುತ್ತದೆ.
ನೇಮಕಾತಿ ಪ್ರಕ್ರಿಯೆ ಶೀಘ್ರದಲ್ಲೇ ಆರಂಭವಾಗುವ ನಿರೀಕ್ಷೆಯಿದ್ದು, ವಿವಿಧ ಇಲಾಖೆಗಳಿಂದ ಹೊಸ ಅಧಿಸೂಚನೆಗಳನ್ನು ಹೊರಡಿಸಲು ಸಿದ್ಧತೆ ನಡೆಯುತ್ತಿದೆ. ಈ ಕ್ರಮದಿಂದ ಸಾವಿರಾರು ಅಭ್ಯರ್ಥಿಗಳ ಭವಿಷ್ಯಕ್ಕೆ ಹೊಸ ದಾರಿ ತೆರೆಯುವ ನಿರೀಕ್ಷೆ ವ್ಯಕ್ತವಾಗಿದೆ.
