ಜನ್ಮಭೂಮಿಯ ಋಣ ತೀರಿಸಿದ ಶ್ರೀ ತರಳಬಾಳು ಜಗದ್ಗುರುಗಳು: ಸೂಗೂರಿನಲ್ಲಿ ಧಾರ್ಮಿಕ ಮತ್ತು ಅಭಿವೃದ್ಧಿ ಪರ್ವದ ಸಂಭ್ರಮ

ಶಿವಮೊಗ್ಗ: ಮನುಷ್ಯ ಎಷ್ಟೇ ಎತ್ತರಕ್ಕೆ ಏರಿದರೂ ತನ್ನ ಅಸ್ತಿತ್ವಕ್ಕೆ ಕಾರಣವಾದ ಜನ್ಮಭೂಮಿಯ ಋಣವನ್ನು ಮರೆಯಬಾರದು. ‘ಜನನಿ ಜನ್ಮಭೂಮಿಶ್ಚ ಸ್ವರ್ಗಾದಪಿ ಗರೀಯಸಿ’ ಎಂಬಂತೆ ಹೆತ್ತ ತಾಯಿ ಮತ್ತು ಹುಟ್ಟಿದ ನಾಡು ಸ್ವರ್ಗಕ್ಕಿಂತಲೂ ಮಿಗಿಲು ಎಂಬ ಸತ್ಯಕ್ಕೆ ಜೀವಂತ ಸಾಕ್ಷಿಯಾಗಿರುವವರು ಸಿರಿಗೆರೆ ಬೃಹನ್ಮಠದ ಶ್ರೀ ತರಳಬಾಳು ಜಗದ್ಗುರು ಡಾ. ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳು. ತಮ್ಮ ಜನ್ಮಸ್ಥಳವಾದ ಸೂಗೂರಿಗೆ ಭೇಟಿ ನೀಡಿದ ಅವರು, ತಾವು ಬೆಳೆದ ಮಣ್ಣಿನ ಮೇಲಿನ ಅಪಾರ ಅಭಿಮಾನ ಹಾಗೂ ಹೆತ್ತವರ ಮೇಲಿನ ಅಚಲ ಭಕ್ತಿಯನ್ನು ಮರುಸ್ಮರಿಸಿದರು. ಬಾಲ್ಯದಲ್ಲಿ ತಂದೆ ಕಲಿಸಿದ ಶಿಸ್ತು ಮತ್ತು ತಾಯಿ ತೋರಿದ ಮಮತೆಯ ಋಣವನ್ನು ಪ್ರತಿ ಉಸಿರಿನಲ್ಲೂ ನೆನಪಿಸಿಕೊಂಡು, ತಾವು ಪಡೆದ ಜ್ಞಾನದ ಬೆಳಕನ್ನು ತಮ್ಮ ಗ್ರಾಮದ ಅಭಿವೃದ್ಧಿಯ ಮೂಲಕ ಹರಿಸುವ ಮಹೋನ್ನತ ಸಂಕಲ್ಪವನ್ನು ವ್ಯಕ್ತಪಡಿಸಿದರು.

ಸೂಗೂರಿನಲ್ಲಿ ಭಕ್ತಿ–ಅಭಿವೃದ್ಧಿಯ ಮಹೋತ್ಸವ: ಶ್ರೀ ತರಳಬಾಳು ಜಗದ್ಗುರುಗಳ ಪ್ರೇರಣಾದಾಯಕ ಸಂದೇಶ

ಶಿವಮೊಗ್ಗ ತಾಲ್ಲೂಕಿನ ಸೂಗೂರು ಗ್ರಾಮದಲ್ಲಿ ಶ್ರೀ ಮೃಡಬಸವೇಶ್ವರ ಸ್ವಾಮಿ ದೇವಸ್ಥಾನದ ಗೃಹಪ್ರವೇಶ, ಮೂರ್ತಿ ಪ್ರಾಣ ಪ್ರತಿಷ್ಠಾಪನೆ, ಕಳಸಾರೋಹಣ ಹಾಗೂ ನೂತನವಾಗಿ ನಿರ್ಮಿಸಲಾದ ಶ್ರೀ ವೇ. ಈಶ್ವರಯ್ಯ ಗಂಗಮ್ಮ ಸಮುದಾಯ ಭವನದ ಉದ್ಘಾಟನಾ ಸಮಾರಂಭ ಭಕ್ತಿಭಾವದಿಂದ ಮತ್ತು ಅದ್ದೂರಿಯಾಗಿ ನೆರವೇರಿತು. ಈ ಪವಿತ್ರ ಕಾರ್ಯಕ್ರಮಕ್ಕೆ ಸಿರಿಗೆರೆ ಬೃಹನ್ಮಠದ ಶ್ರೀ ತರಳಬಾಳು ಜಗದ್ಗುರು ಡಾ. ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳವರು ಉಪಸ್ಥಿತರಾಗಿ ಆಶೀರ್ವಚನ ನೀಡಿದರು.

ಬಾಲ್ಯದ ಸವಿನೆನಪುಗಳು ಜೀವಂತವಾದ ಕ್ಷಣಗಳು

ತಮ್ಮ ಜನ್ಮಸ್ಥಳವಾದ ಸೂಗೂರಿಗೆ ಭೇಟಿ ನೀಡಿದ ಶ್ರೀಗಳು, ಬಾಲ್ಯದ ಅನೇಕ ನೆನಪುಗಳನ್ನು ಹಂಚಿಕೊಂಡರು. ‘ಮಡಕೆ ಹೊಡೆಯುವ ಆಟ’ದಿಂದ ಆರಂಭಿಸಿ, ತಮ್ಮ ಬಾಲ್ಯದ ಓದು, ಗ್ರಾಮದ ಹಳೆಯ ರೂಪ—ಇವೆಲ್ಲವನ್ನೂ ಸ್ಮರಿಸಿದರು. ಇಂದಿನ ಅಭಿವೃದ್ಧಿಯನ್ನು ಕಂಡು “ಕಣ್ಣು ಮುಚ್ಚಿ ಇಲ್ಲಿಗೆ ಕರೆತಂದರೂ” ಇದು ನನ್ನ ಊರು ಎಂದು ಗುರುತಿಸಲು ಸಾಧ್ಯವಾಗದಷ್ಟು ಬದಲಾವಣೆ ಆಗಿದೆ” ಎಂದು ಹೇಳಿದರು.

ಮೃಡಬಸವೇಶ್ವರ ದೇವಸ್ಥಾನದ ಹಳೆಯ ರೂಪವನ್ನು ಚಿತ್ರ ಬಿಡಿಸುತ್ತಾ ಓದುತ್ತಿದ್ದ ದಿನಗಳು ಹಾಗೂ ತಾಯಿ ಗಂಗಮ್ಮನವರ ಮಮತೆಯ ಮಾತುಗಳನ್ನು ಸ್ಮರಿಸಿದ ಕ್ಷಣಗಳು ಭಾವನಾತ್ಮಕವಾಗಿದ್ದವು.

ಜನ್ಮಭೂಮಿಯ ಋಣವನ್ನು ಸ್ಮರಿಸಿದ ಶ್ರೀಗಳು

ತಮ್ಮ ಪೂರ್ವಾಶ್ರಮದ ದಿನಗಳನ್ನು ಭಾವಪೂರ್ಣವಾಗಿ ಸ್ಮರಿಸಿದರು. ಬಾಲ್ಯದಲ್ಲಿ ಬೆಳೆದ ಆ ಮಣ್ಣಿನ ಸುವಾಸನೆ, ತಂದೆ-ತಾಯಿ ನೀಡಿದ ಮೌಲ್ಯಗಳು ಹಾಗೂ ಗ್ರಾಮದಲ್ಲಿ ಕಳೆದ ಸರಳ ಬದುಕಿನ ಸವಿನೆನಪುಗಳು ಅವರ ಮಾತುಗಳಲ್ಲಿ ಜೀವಂತವಾಗಿ ಹೊರಹೊಮ್ಮಿದವು. ತಾವು ಪಡೆದ ಶಿಕ್ಷಣ, ಶಿಸ್ತು ಮತ್ತು ಜೀವನಕ್ಕೆ ದಿಕ್ಕು ತೋರಿದ ಅನುಭವಗಳು ಎಲ್ಲವೂ ಇದೇ ಗ್ರಾಮದಿಂದಲೇ ರೂಪುಗೊಂಡವು ಎಂದು ಅವರು ಹೇಳುತ್ತಾ, ಈ ನೆಲದ ಋಣವನ್ನು ಎಂದಿಗೂ ಮರೆಯಲು ಸಾಧ್ಯವಿಲ್ಲ ಎಂಬ ಭಾವವನ್ನು ವ್ಯಕ್ತಪಡಿಸಿದರು. ತಮ್ಮ ಜೀವನದ ಮೂಲ ಬೇರುಗಳಾದ ಸೂಗೂರು ಗ್ರಾಮವು ಇಂದಿಗೂ ತಮ್ಮ ಹೃದಯದಲ್ಲಿ ವಿಶೇಷ ಸ್ಥಾನವನ್ನು ಹೊಂದಿದೆ ಎಂದು ಅವರು ಭಾವಪೂರ್ಣವಾಗಿ ಹೇಳಿದರು.

ಶಿಸ್ತು ಮತ್ತು ಜೀವನ ಮೌಲ್ಯಗಳ ಪಾಠ

ಶಿವಮೊಗ್ಗದ ಶಾಲಾ ದಿನಗಳನ್ನು ನೆನೆಸಿಕೊಂಡ ಶ್ರೀಗಳು, ತಮ್ಮ ತಂದೆಯ ಶಿಸ್ತಿನ ಬಗ್ಗೆ ಮನಮುಟ್ಟುವ ಘಟನೆ ವಿವರಿಸಿದರು. ಸಂಗೀತ ಪಾಠಕ್ಕೆ ಗೈರಾಗಿದ್ದ ಕಾರಣಕ್ಕೆ ತಂದೆ ಸೈಕಲ್ ವಾಪಸ್ ತೆಗೆದುಕೊಂಡ ಘಟನೆ, ಜೀವನದಲ್ಲಿ ಸಮಯಪಾಲನೆ ಮತ್ತು ಜವಾಬ್ದಾರಿತನದ ಮಹತ್ವವನ್ನು ಕಲಿಸಿತು ಎಂದು ಹೇಳಿದರು.

ಅದೇ ರೀತಿ, ಪ್ರಾಮಾಣಿಕತೆಯ ಮಹತ್ವವನ್ನು ವಿವರಿಸುವಾಗ ತಮ್ಮ ಕುಟುಂಬದ ಘಟನೆಯನ್ನು ಉದಾಹರಿಸಿ, “ಮೊದಲ ಗುರುಗಳಿಂದ ಕಲಿತ ಪಾಠವೇ ಜೀವನದ ದಾರಿ ತೋರಿಸುತ್ತದೆ” ಎಂದು ಅಭಿಪ್ರಾಯಪಟ್ಟರು.

“ಸಮುದಾಯ ಭವನ ಬಡವರಿಗೆ ಕೈಗೆಟುಕುವ ದರದಲ್ಲಿ ಲಭ್ಯವಾಗಬೇಕು: ಶ್ರೀ ಜಗದ್ಗುರುಗಳ ಸಂದೇಶ”

ನೂತನವಾಗಿ ನಿರ್ಮಿಸಲಾದ ಸಮುದಾಯ ಭವನವು ಕೇವಲ ಇಟ್ಟಿಗೆ-ಸಿಮೆಂಟ್‌ನ ಕಟ್ಟಡವಾಗದೆ, ಗ್ರಾಮದ ಜನರ ಸಾಮಾಜಿಕ ಬದುಕಿನ ಹೃದಯವಾಗಬೇಕು ಎಂದು ಶ್ರೀಗಳು ಹೇಳಿದರು. ಈ ಭವನವು ಎಲ್ಲ ವರ್ಗದ ಜನರಿಗೆ, ವಿಶೇಷವಾಗಿ ಬಡವರಿಗೆ ಸಹ ಕೈಗೆಟುಕುವ ದರದಲ್ಲಿ ಲಭ್ಯವಾಗಬೇಕು ಎಂಬುದನ್ನು ಅವರು ಒತ್ತಿ ಹೇಳಿದರು. ಇದರ ಸ್ವಚ್ಛತೆ ಮತ್ತು ಸಮರ್ಪಕ ನಿರ್ವಹಣೆ ಪ್ರತಿಯೊಬ್ಬ ಗ್ರಾಮಸ್ಥರ ಜವಾಬ್ದಾರಿಯಾಗಿದ್ದು, ಕಾರ್ಯಕ್ರಮಗಳ ಬಳಿಕ ಭವನವನ್ನು ಅಚ್ಚುಕಟ್ಟಾಗಿ ಉಳಿಸುವ ಸಂಸ್ಕೃತಿ ಬೆಳೆಸಿಕೊಳ್ಳಬೇಕೆಂದು ಸಲಹೆ ನೀಡಿದರು. ಜೊತೆಗೆ, ಗ್ರಾಮದ ಅಭಿವೃದ್ಧಿಗೆ ಮೂಲವಾದ ಒಗ್ಗಟ್ಟು ಸದಾ ಉಳಿಯಬೇಕು, ಪರಸ್ಪರ ಸಹಕಾರದ ಮನೋಭಾವ ಇನ್ನಷ್ಟು ಬಲವಾಗಬೇಕು ಎಂದು ಅವರು ಹೃತ್ಪೂರ್ವಕವಾಗಿ ಕರೆ ನೀಡಿದರು.

ದೇವಸ್ಥಾನಕ್ಕಿಂತ ವಿದ್ಯಾಲಯವೇ ಬೆಳಕಿನ ದೀಪ

ಸಮಾಜದ ನಿಜವಾದ ಅಭಿವೃದ್ಧಿಗೆ ಶಿಕ್ಷಣವೇ ಮೂಲಶಕ್ತಿ ಎಂದು ಜಗದ್ಗುರುಗಳು ಒತ್ತಿ ಹೇಳಿದರು. “ದೇವಸ್ಥಾನಕ್ಕಿಂತ ವಿದ್ಯಾಲಯವೇ ನಮ್ಮನ್ನು ಈ ಮಟ್ಟಕ್ಕೆ ತಂದಿದೆ” ಎಂಬ ಅವರ ಮಾತುಗಳು ಶಿಕ್ಷಣದ ಮಹತ್ವವನ್ನು ಸ್ಪಷ್ಟಪಡಿಸಿದವು. ಇದೇ ಧ್ಯೇಯದೊಂದಿಗೆ ಗ್ರಾಮದಲ್ಲಿ ದೇವಸ್ಥಾನದ ಪಕ್ಕದಲ್ಲೇ ನರ್ಸರಿ, ಪ್ರಾಥಮಿಕ ಹಾಗೂ ಹೈಸ್ಕೂಲ್ ಕಟ್ಟಡಗಳನ್ನು ನಿರ್ಮಿಸಿರುವುದು ಕೇವಲ ಸೌಕರ್ಯವಲ್ಲ, ಅದು ಭವಿಷ್ಯದ ಪೀಳಿಗೆಯನ್ನು ರೂಪಿಸುವ ದೂರದೃಷ್ಟಿಯ ಸಂಕೇತವಾಗಿದೆ. ಈ ಮೂಲಕ ಜ್ಞಾನವೇ ಜೀವನವನ್ನು ಉದ್ಧರಿಸುವ ಶಕ್ತಿ ಎಂಬ ಸಂದೇಶವನ್ನು ಅವರು ಸ್ಪಷ್ಟವಾಗಿ ಸಾರಿದರು.

“ನೈಜ ಭಗೀರಥ ಯಡಿಯೂರಪ್ಪ: ರೈತಪರ ಯೋಜನೆಗಳ ದಿಟ್ಟ ನಾಯಕ”

​ವೇದಿಕೆಯಲ್ಲಿದ್ದ ಮಾಜಿ ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪನವರನ್ನು ಶ್ರೀಗಳು ‘ನೈಜ ಭಗೀರಥ’ ಎಂದು ಬಣ್ಣಿಸಿದರು. ಅಧಿಕಾರಿಗಳ ವಿರೋಧದ ನಡುವೆಯೂ ಶ್ರೀಗಳ ಆಶಯದಂತೆ ಸುತ್ತಮುತ್ತಲಿನ 60-70 ಹಳ್ಳಿಗಳ ಕುಡಿಯುವ ನೀರಿಗಾಗಿ ಯಡಿಯೂರಪ್ಪನವರು 25 ಕೋಟಿ ರೂ.ಗಳ ಅನುದಾನ ನೀಡಿದ್ದನ್ನು ಸ್ಮರಿಸಿದರು. ಭದ್ರಾ ಮೇಲ್ದಂಡೆ ಯೋಜನೆಯ ವೆಚ್ಚವು 16,000 ಕೋಟಿ ರೂ.ಗಳಿಂದ 21,800 ಕೋಟಿ ರೂ.ಗಳಿಗೆ ಏರಿಕೆಯಾಗಿದ್ದು, ತಾಂತ್ರಿಕ ಸಮಿತಿಯ ಅನುಮೋದನೆ ದೊರೆತದ್ದು ತಮಗೆ ‘ಚಂದ್ರದರ್ಶನ’ವಾದಷ್ಟು ಸಂತೋಷ ನೀಡಿದೆ ಎಂದರು. ಈ ಯೋಜನೆ ಪೂರ್ಣಗೊಂಡರೆ 12 ತಾಲ್ಲೂಕುಗಳ ಸುಮಾರು 75 ಲಕ್ಷ ರೈತರಿಗೆ ನೀರಾವರಿ ಸೌಲಭ್ಯ ದೊರೆಯಲಿದೆ ಎಂದು ಅವರು ತಿಳಿಸಿದರು.

“ತಂದೆಗೆ ತಕ್ಕ ಮಗ ರಾಘವೇಂದ್ರ: ಸೂಗೂರು ಗ್ರಾಮದಲ್ಲಿ ಅಭಿವೃದ್ಧಿಯ ಹೆಜ್ಜೆ”

ಸೂಗೂರು ಗ್ರಾಮದಲ್ಲಿ ನಡೆದ ಅಭಿವೃದ್ಧಿ ಕಾರ್ಯಗಳನ್ನು ಉಲ್ಲೇಖಿಸುತ್ತಾ, ಶ್ರೀ ತರಳಬಾಳು ಜಗದ್ಗುರುಗಳು ಮಾಜಿ ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪನವರನ್ನು “ನೈಜ ಭಗೀರಥ” ಎಂದು ಕೊಂಡಾಡಿದಂತೆಯೇ, ಅವರ ಪುತ್ರ ಹಾಗೂ ಶಿವಮೊಗ್ಗ ಸಂಸದರಾದ ಬಿ.ವೈ. ರಾಘವೇಂದ್ರ ಅವರನ್ನು “ತಂದೆಗೆ ತಕ್ಕ ಮಗ” ಎಂದು ಬಣ್ಣಿಸಿದರು. ಗ್ರಾಮದ ಅಭಿವೃದ್ಧಿ ಕಾರ್ಯಗಳಲ್ಲಿ ಸಕ್ರಿಯವಾಗಿ ಪಾಲ್ಗೊಂಡು, ಜನಪರ ಯೋಜನೆಗಳ ಅನುಷ್ಠಾನದಲ್ಲಿ ಮುಂಚೂಣಿಯಲ್ಲಿ ನಿಂತಿರುವ ರಾಘವೇಂದ್ರ ಅವರು, ಸೂಗೂರು ಗ್ರಾಮದ ರೂಪಾಂತರಕ್ಕೆ ಮಹತ್ವದ ಪಾತ್ರ ವಹಿಸಿದ ಹರಿಕಾರರಂತೆ ಕಾರ್ಯನಿರ್ವಹಿಸಿದ್ದಾರೆ ಎಂದು ಶ್ರೀಗಳು ಶ್ಲಾಘಿಸಿದರು. ತಂದೆಯವರ ಸೇವಾ ಮನೋಭಾವವನ್ನು ಮುಂದುವರೆಸಿಕೊಂಡು, ಜನರ ಸಂಕಷ್ಟಗಳಿಗೆ ಸ್ಪಂದಿಸುವ ಅವರ ಕಾರ್ಯಶೈಲಿ ಗ್ರಾಮಸ್ಥರ ಮೆಚ್ಚುಗೆಗೆ ಪಾತ್ರವಾಗಿದೆ ಎಂದು ಅವರು ಹೇಳಿದರು.

ಜನಪರ ಸೇವೆಗೆ ಮೆಚ್ಚುಗೆ ಪಡೆದ ಎಂ.ಜಿ. ಪ್ರಸನ್ನ: ಗ್ರಾಮದ ಹೆಮ್ಮೆಯ ಪುತ್ರನಿಗೆ ಶ್ರೀ ಜಗದ್ಗುರುಗಳ ಪ್ರಶಂಸೆ

ಕರ್ನಾಟಕ ನೀರಾವರಿ ನಿಗಮದಲ್ಲಿ ಅಭಿಯಂತರರಾಗಿ ರಾಜ್ಯಕ್ಕೆ ಸೇವೆ ಸಲ್ಲಿಸುತ್ತಿರುವ ಸೂಗೂರು ಗ್ರಾಮದ ಹೆಮ್ಮೆಯ ಪುತ್ರ ಎಂ.ಜಿ. ಪ್ರಸನ್ನ ಅವರು, ತಮ್ಮ ಊರಿನ ಅಭಿವೃದ್ಧಿ ಹಾಗೂ ದೇವಸ್ಥಾನದ ಜೀರ್ಣೋದ್ಧಾರ ಕಾರ್ಯದಲ್ಲಿ ತೋರಿದ ನಿಸ್ವಾರ್ಥ ಕಾಳಜಿ ಅತ್ಯಂತ ಶ್ಲಾಘನೀಯ ಎಂದು ಶ್ರೀ ತರಳಬಾಳು ಜಗದ್ಗುರು ಡಾ. ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳು ಮೆಚ್ಚುಗೆ ವ್ಯಕ್ತಪಡಿಸಿದರು. ಅವರ ಜನಪರ ಸೇವಾ ಮನೋಭಾವವು ಗ್ರಾಮದ ಅಭಿವೃದ್ಧಿಗೆ ಪ್ರೇರಣೆಯಾಗಿರುವುದಾಗಿ ಶ್ರೀಗಳು ಹೇಳಿದರು.

ಧಾರ್ಮಿಕ ಕಾರ್ಯಗಳ ಸಾರ್ಥಕತೆ

ಮೃಡಬಸವೇಶ್ವರ ಸ್ವಾಮಿ ದೇವಸ್ಥಾನದ ನೂತನ ರೂಪ, ಕಳಸಕ್ಕೆ ಚಿನ್ನದ ಲೇಪನ ಮತ್ತು ಭಕ್ತಿಭಾವದಿಂದ ನಡೆದ ಪ್ರಾಣ ಪ್ರತಿಷ್ಠಾಪನೆ ಕಾರ್ಯಕ್ರಮವನ್ನು ಶ್ರೀಗಳು ಸಂತಸದಿಂದ ಕೊಂಡಾಡಿದರು. ಈ ಕಾರ್ಯದಲ್ಲಿ ಗ್ರಾಮಸ್ಥರ ಒಗ್ಗಟ್ಟು ಮತ್ತು ಶ್ರಮವೇ ಪ್ರಮುಖ ಕಾರಣ ಎಂದು ಹೇಳಿದರು.

ಗ್ರಾಮಾಭಿವೃದ್ಧಿಗೆ ಒಗ್ಗಟ್ಟು ಅಗತ್ಯ

ಗ್ರಾಮದ ಮುಖಂಡರು, ಯುವಕರು ಮತ್ತು ಸಮಿತಿಯ ಸದಸ್ಯರ ಸೇವೆಯನ್ನು ಮೆಚ್ಚಿದ ಶ್ರೀಗಳು, ಈ ಒಗ್ಗಟ್ಟು ಮುಂದುವರಿದರೆ ಸೂಗೂರು ಗ್ರಾಮ ಇನ್ನಷ್ಟು ಅಭಿವೃದ್ಧಿ ಹೊಂದಲಿದೆ ಎಂದು ಆಶೀರ್ವದಿಸಿದರು.

ಸೂಗೂರಿನಲ್ಲಿ ನಡೆದ ಈ ಮಹತ್ವದ ಸಮಾರಂಭವು ಕೇವಲ ಧಾರ್ಮಿಕ ಆಚರಣೆಯಷ್ಟೇ ಅಲ್ಲ, ಅದು ಗ್ರಾಮದ ಸಾಮಾಜಿಕ, ಸಾಂಸ್ಕೃತಿಕ ಮತ್ತು ಆರ್ಥಿಕ ಪ್ರಗತಿಯ ಸಂಕೇತವಾಗಿದೆ. ಜಗದ್ಗುರುಗಳ ಸದುದ್ದೇಶದ ಸಂದೇಶಗಳು ಗ್ರಾಮಸ್ಥರಿಗೆ ದಿಕ್ಕು ತೋರಿಸುವಂತಿವೆ. ಭಕ್ತಿ, ಶಿಸ್ತು, ಶಿಕ್ಷಣ ಮತ್ತು ಒಗ್ಗಟ್ಟು ಈ ನಾಲ್ಕು ಮೌಲ್ಯಗಳನ್ನು ಅಳವಡಿಸಿಕೊಂಡರೆ ಗ್ರಾಮವು ಮತ್ತಷ್ಟು ಅಭಿವೃದ್ಧಿಯತ್ತ ಸಾಗಲಿದೆ ಎಂಬುದು ಈ ಕಾರ್ಯಕ್ರಮದ ಸಾರವಾಗಿದೆ.

ಈ ಸಂದರ್ಭದಲ್ಲಿ ಶಾಸಕಿ ಶಾರದಾ ಪೂರ್ಯಾನಾಯ್ಕ್, ವಿಧಾನ ಪರಿಷತ್ ಸದಸ್ಯರಾದ ಡಾ. ಧನಂಜಯ ಸರ್ಜಿ, ಸಾಧು ವೀರಶೈವ ಸಮಾಜದ ಅಧ್ಯಕ್ಷರು ಹಾಗೂ ಕರ್ನಾಟಕ ರಾಜ್ಯ ರೈತ ಸಂಘದ ರಾಜ್ಯಾಧ್ಯಕ್ಷರಾದ ಹೆಚ್.ಆರ್. ಬಸವರಾಜಪ್ಪ, ಬಿಜೆಪಿ ಜಿಲ್ಲಾಧ್ಯಕ್ಷರಾದ ಎನ್.ಕೆ. ಜಗದೀಶ್, ಸುಡಾ ಮಾಜಿ ಅಧ್ಯಕ್ಷರಾದ ಎಸ್.ಎಸ್. ಜ್ಯೋತಿಪ್ರಕಾಶ್, ದೇವಸ್ಥಾನ ಸಮಿತಿ ಅಧ್ಯಕ್ಷರಾದ ಪ್ರಕಾಶ್, ಕಟ್ಟಡ ಸಮಿತಿ ಅಧ್ಯಕ್ಷರಾದ ಪಾಲಕ್ಷಪ್ಪ, ನೀರಾವರಿ ಇಲಾಖೆಯ ಎಂ.ಜಿ. ಪ್ರಸನ್ನ, ಟಿ.ಬಿ. ಜಗದೀಶ್, ಸೋಮಿನಕೊಪ್ಪದ ಷಣ್ಮುಖಪ್ಪ, ಮಹೇಶ್ವರಪ್ಪ, ಶಿವಕುಮಾರ್, ಮಲ್ಲಿಕಾರ್ಜುನ್, ನವಲಯ್ಯ, ಶಿವಣ್ಣ, ಕೇಶವ, ಮಂಜುನಾಥ್, ಯೋಗೀಶ್, ಕುಮಾರ್, ನವೀನ್ ಸೇರಿದಂತೆ ಉಪಸ್ಥಿತರಿದ್ದರು.