ನ್ಯಾಯಮೂರ್ತಿ ಜಿ.ಆರ್. ಸ್ವಾಮಿನಾಥನ್ ವಿರುದ್ಧದ ದೋಷಾರೋಪಣೆ ನಿರ್ಣಯಕ್ಕೆ ದೇಶವ್ಯಾಪಿ ಖಂಡನೆ

ಚೆನ್ನೈ/ಬೆಂಗಳೂರು: ಮದ್ರಾಸ್ ಹೈಕೋರ್ಟ್‌ನ ನ್ಯಾಯಮೂರ್ತಿ ಜಿ.ಆರ್. ಸ್ವಾಮಿನಾಥನ್ ಅವರನ್ನು ಗುರಿಯಾಗಿಸಿಕೊಂಡು ಸಂಸದರು ಮಂಡಿಸಿದ ಮಹಾಭಿಯೋಗ ನಿರ್ಣಯದ ವಿರುದ್ಧ ದೇಶದಾದ್ಯಂತ ಆಕ್ರೋಶ ವ್ಯಕ್ತವಾಗಿದೆ. 100 ಕ್ಕೂ ಹೆಚ್ಚು ಸಂಸದರು ಸಲ್ಲಿಸಿದ ದೋಷಾರೋಪಣೆ ಮನವಿಗೆ ಪ್ರತಿಯಾಗಿ, 50 ಕ್ಕೂ ಹೆಚ್ಚು ಮಾಜಿ ನ್ಯಾಯಮೂರ್ತಿಗಳು ಶುಕ್ರವಾರ ತೀಕ್ಷ್ಣ ಪ್ರತಿಕ್ರಿಯೆಯೊಂದಿಗೆ ಖಂಡನಾ ಪತ್ರವನ್ನು ಬಿಡುಗಡೆ ಮಾಡಿದ್ದಾರೆ.

ಮಾಜಿ ಸುಪ್ರೀಂ ಕೋರ್ಟ್ ನ್ಯಾಯಾಧೀಶರು ಹಾಗೂ ಹಲವಾರು ಹೈಕೋರ್ಟ್‌ಗಳ ಮಾಜಿ ಮುಖ್ಯ ನ್ಯಾಯಮೂರ್ತಿಗಳ ಸಹಿಯನ್ನು ಒಳಗೊಂಡ ಈ ಪತ್ರದಲ್ಲಿ, ನ್ಯಾಯಮೂರ್ತಿ ಸ್ವಾಮಿನಾಥನ್ ಅವರನ್ನು ಗುರಿ ಮಾಡಿರುವುದು “ನ್ಯಾಯಾಧೀಶರನ್ನು ದೂಷಿಸಲು ಮಾಡಿದ ನಿರ್ಲಜ್ಜ ಪ್ರಯತ್ನ” ಎಂದು ಆರೋಪಿಸಲಾಗಿದೆ. ಕಾರ್ತಿಗೈ ದೀಪಂ ದೀಪ ಬೆಳಗಲು ಅವಕಾಶ ನೀಡಿದ ತೀರ್ಪೇ ಈ ವಿವಾದಕ್ಕೆ ಕಾರಣ.

ಮಾಜಿ ನ್ಯಾಯಾಧೀಶರು ತಮ್ಮ ಹೇಳಿಕೆಯಲ್ಲಿ, ದೋಷಾರೋಪಣೆಯ ಮನವಿ “ನಮ್ಮ ಪ್ರಜಾಪ್ರಭುತ್ವದ ಬೇರುಗಳನ್ನು ಕತ್ತರಿಸುವ ಅಪಾಯಕಾರಿ ಪ್ರವೃತ್ತಿ” ಎಂದು ಹೇಳಿದ್ದಾರೆ.
ಸಂಸದರು ಉಲ್ಲೇಖಿಸಿರುವ ಆರೋಪಗಳು ‘ಸಾಂವಿಧಾನಿಕವಾಗಿ ಗಂಭೀರವಾದ ಕ್ರಮಕ್ಕೆ ತಕ್ಕವು ಅಲ್ಲ’ ಎಂದು ಅವರು ಹೇಳಿದ್ದಾರೆ.

ತುರ್ತು ಪರಿಸ್ಥಿತಿಯ ಕಾಲದಲ್ಲಿ ನ್ಯಾಯಾಂಗವನ್ನು ದುರ್ಬಲಗೊಳಿಸುವ ಪ್ರಯತ್ನಗಳು ನಡೆದ ಘಟನೆಗಳಿಗೆ ಇದು ಸಮಾನಾಂತರವಾಗಿ ನಡೆದು ಬರುತ್ತಿರುವ ರಾಜಕೀಯ ಒತ್ತಡದ ಮಾದರಿ ಎಂದು ಮಾಜಿ ನ್ಯಾಯಮೂರ್ತಿಗಳು ಎಚ್ಚರಿಸಿದ್ದಾರೆ. ಅವರು ಕೇಶವಾನಂದ ಭಾರತಿ ಪ್ರಕರಣದ ನಂತರ ನಡೆದ ನ್ಯಾಯಮೂರ್ತಿಗಳ ಪದಚ್ಯುತಿಯ ಉದಾಹರಣೆಗಳನ್ನು, ನ್ಯಾಯಮೂರ್ತಿ ಎಚ್.ಆರ್. ಖನ್ನಾ ಅವರ ಕಡೆಗಣಿಸಿದ ಘಟನೆಗಳನ್ನು ಮತ್ತು ಇತ್ತೀಚಿನ ವರ್ಷಗಳಲ್ಲಿ ಸುಪ್ರೀಂ ಕೋರ್ಟ್ ಮುಖ್ಯ ನ್ಯಾಯಮೂರ್ತಿಗಳ ವಿರುದ್ಧ ನಡೆದ ಅಭಿಯಾನಗಳನ್ನು ಉಲ್ಲೇಖಿಸಿದ್ದಾರೆ.

ಕಾರ್ತಿಗೈ ದೀಪಂ ವಿವಾದ: ತಮಿಳುನಾಡಿನಿಂದ ಆರಂಭವಾದ ರಾಜಕೀಯ ಉದ್ವಿಗ್ನತೆ

ವಿವಾದದ ಮೂಲ ತಮಿಳುನಾಡಿನ ತಿರುಪರನ್‌ಕುಂಡ್ರಂ ಸುಬ್ರಹ್ಮಣ್ಯ ದೇವಾಲಯದ ದೀಪಸ್ತಂಭದ ಮೇಲೆ ಕಾರ್ತಿಗೈ ದೀಪ ಬೆಳಗಲು ನ್ಯಾ. ಸ್ವಾಮಿನಾಥನ್ ಅನುಮತಿ ನೀಡಿದ್ದ ತೀರ್ಪು.
ಡಿಎಂಕೆ ಈ ನಿರ್ಧಾರದ ವಿರುದ್ಧ ಆಕ್ಷೇಪ ವ್ಯಕ್ತಪಡಿಸಿತ್ತು ಮತ್ತು ಇದು “ಮುಸ್ಲಿಂ ಸಮುದಾಯದ ಭಾವನೆಗೆ ಧಕ್ಕೆಯಾಗಿದೆ” ಎಂದು ವಾದಿಸಿತ್ತು.

ನ್ಯಾಯಮೂರ್ತಿಯವರು ಈ ನಿರ್ಬಂಧವನ್ನು ತೆರವುಗೊಳಿಸಿದ ನಂತರ, ಡಿಎಂಕೆ ಮತ್ತು ಇಂಡಿಯಾ ಒಕ್ಕೂಟದ ಸಂಸದರ ಬಹುಪಾಲು ಅವರುಗಳ ವಿರುದ್ಧ ಮಹಾಭಿಯೋಗ ಕ್ರಮಕ್ಕೆ ಸಹಿ ಹಾಕಿದ್ದರು.

ಕರ್ನಾಟಕದ ಮೂರು ಕಾಂಗ್ರೆಸ್ ಸಂಸದರ ಹೆಸರು ಬಹಿರಂಗ: ಬಿಜೆಪಿ ಕಿಡಿ

ಈ ಮನವಿಗೆ ಸಹಿ ಹಾಕಿದವರ ಪಟ್ಟಿಯಲ್ಲಿ ಕರ್ನಾಟಕದ ಮೂರು ಕಾಂಗ್ರೆಸ್ ಸಂಸದರು ಇದ್ದಾರೆ ಎಂದು ಬಿಜೆಪಿ ಆರೋಪಿಸಿದೆ. ಸಹಿ ಹಾಕಿದವರಾಗಿ ಪ್ರಭಾ ಮಲ್ಲಿಕಾರ್ಜುನ್, ಶ್ರೇಯಸ್ ಪಟೇಲ್ ಮತ್ತು ಕುಮಾರ್ ನಾಯಕ್‌ರ ಹೆಸರುಗಳನ್ನು ಬಿಜೆಪಿ ಬಹಿರಂಗಪಡಿಸಿದೆ.

ಬಿಜೆಪಿಯವರು ಈ ಕ್ರಮವನ್ನು ತೀವ್ರವಾಗಿ ಟೀಕಿಸಿ,
“ಇಂದು ತಮಿಳುನಾಡಿನ ದೇವಾಲಯದ ದೀಪವನ್ನು ಆರಿಸಲು ಪ್ರಯತ್ನಿಸಿದ್ದಾರೆ, ನಾಳೆ ನಮ್ಮೂರಿನ ದೇವಾಲಯದ ದೀಪವನ್ನೂ ಕಾಂಗ್ರೆಸ್ ಆರಿಸಲಿದೆ” ಎಂದು ಆರೋಪಿಸಿದ್ದಾರೆ.

ರಾಜಕೀಯ–ನ್ಯಾಯಾಂಗ ಉದ್ವಿಗ್ನತೆಗೆ ಹೊಸ ತಿರುವು

ಈ ಘಟನೆ ತಮಿಳುನಾಡು ಮಾತ್ರವಲ್ಲದೆ ರಾಷ್ಟ್ರ ರಾಜಕೀಯಕ್ಕೂ ಮಹತ್ವದ ವಿಷಯವಾಗಿ ಪರಿಣಮಿಸಿದೆ. ಸ್ವಾಮಿನಾಥನ್ ತೀರ್ಪನ್ನು ಗುರಿ ಮಾಡಿರುವುದು ನ್ಯಾಯಾಂಗದ ಸ್ವತಂತ್ರತೆಗೆ ಹಾನಿ ಎನ್ನುವ ಆರೋಪ ಮತ್ತು ಧಾರ್ಮಿಕ–ರಾಜಕೀಯ ವ್ಯಾಜ್ಯಗಳ ನಡುವೆ ಈ ವಿವಾದ ಮುಂದುವರೆದಿದೆ.