ಶಿವಮೊಗ್ಗ: ಸರಳ ಸಜ್ಜನಿಕೆಯ ವ್ಯಕ್ತಿತ್ವ, ನುಡಿದಂತೆ ನಡೆಯುವ ನೈತಿಕತೆ, ಕಾಯಕವೇ ಕೈಲಾಸ ಎಂಬ ಬಸವತತ್ವದ ಜೀವಂತ ಅನುಯಾಯಿ ಹಾಗೂ ಸಾವಿರಾರು ಕುಟುಂಬಗಳ ಜೀವನಕ್ಕೆ ಬೆಳಕಾದ ಕೊಡುಗೈ ದಾನಿ ಎಂದೇ ಖ್ಯಾತಿ ಪಡೆದಿರುವ ನಮ್ಮ ಸಮಾಜದ ಹೆಮ್ಮೆಯ ನಾಯಕ ಶ್ರೀಯುತ ರುದ್ರೇಗೌಡರು ಇಂದು ತಮ್ಮ ಹುಟ್ಟು ದಿನವನ್ನು ಆಚರಿಸಿಕೊಳ್ಳುತ್ತಿದ್ದಾರೆ.
ಸಾರ್ವಜನಿಕ ಜೀವನದಲ್ಲಿ ಅಪರೂಪದ ಶಿಸ್ತಿನಿಂದ ನಡೆದು, ಯಾವುದೇ ಹುದ್ದೆಗಿಂತಲೂ ಸೇವೆಯೇ ಶ್ರೇಷ್ಠ ಎಂಬ ನಂಬಿಕೆಯನ್ನು ಜೀವನಪೂರ್ತಿ ಪಾಲಿಸಿಕೊಂಡು ಬಂದಿರುವ ರುದ್ರೇಗೌಡರು, ಸಾವಿರಾರು ಜನರಿಗೆ ಉದ್ಯೋಗ ಕಲ್ಪಿಸಿ ಅವರ ಬದುಕಿಗೆ ಸ್ಥಿರತೆ ನೀಡಿರುವುದು ಸಮಾಜದಲ್ಲಿ ಅವರ ಸ್ಥಾನವನ್ನು ಮತ್ತಷ್ಟು ಎತ್ತರಕ್ಕೆ ಕೊಂಡೊಯ್ದಿದೆ. ಉದ್ಯೋಗ ಸೃಷ್ಟಿಯ ಮೂಲಕ ಆತ್ಮಗೌರವದ ಬದುಕಿಗೆ ದಾರಿ ತೋರಿಸಿರುವ ಅವರು, ನಿಜಾರ್ಥದಲ್ಲಿ “ಕಾಯಕ ಯೋಗಿ”ಯೆಂಬ ಬಿರುದಿಗೆ ಅರ್ಹರಾಗಿದ್ದಾರೆ.
ವಿಧಾನ ಪರಿಷತ್ ಸದಸ್ಯರಾಗಿ ಕಾರ್ಯನಿರ್ವಹಿಸಿದ ಅವಧಿಯಲ್ಲಿ, ಶಿವಮೊಗ್ಗ ಜಿಲ್ಲೆಯ ಸಮಗ್ರ ಅಭಿವೃದ್ಧಿಗೆ ಅಪಾರ ಕೊಡುಗೆ ನೀಡಿದವರು ರುದ್ರೇಗೌಡ್ರು. ಮಾಜಿ ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪನವರೊಂದಿಗೆ ನಿಕಟವಾಗಿ ಕೆಲಸ ಮಾಡಿ, ಮೂಲಸೌಕರ್ಯ, ಶಿಕ್ಷಣ, ಆರೋಗ್ಯ, ಕುಡಿಯುವ ನೀರು, ಗ್ರಾಮೀಣ ಅಭಿವೃದ್ಧಿ ಸೇರಿದಂತೆ ಅನೇಕ ಕ್ಷೇತ್ರಗಳಲ್ಲಿ ಜನೋಪಯೋಗಿ ಯೋಜನೆಗಳು ಅನುಷ್ಠಾನಗೊಳ್ಳಲು ಶ್ರಮಿಸಿದ ಕೀರ್ತಿ ಇವರಿಗೆ ಸಲ್ಲುತ್ತದೆ. ಪಕ್ಷಾತೀತವಾಗಿ, ಎಲ್ಲಾ ಸಮಾಜಗಳ ಹಿತವನ್ನು ಗಮನದಲ್ಲಿಟ್ಟುಕೊಂಡು ನ್ಯಾಯಬದ್ಧ ಸೇವೆ ಸಲ್ಲಿಸಿದವರು ಎಂಬ ಹೆಗ್ಗಳಿಕೆ ಇವರದ್ದಾಗಿದೆ.
ವಿಶ್ವಗುರು ಬಸವೇಶ್ವರರ ತತ್ವಗಳನ್ನು ಕೇವಲ ಭಾಷಣಗಳಲ್ಲಿ ಅಲ್ಲ, ತಮ್ಮ ದೈನಂದಿನ ಬದುಕಿನಲ್ಲಿ ಅಳವಡಿಸಿಕೊಂಡಿರುವ ರುದ್ರೇಗೌಡ್ರು, ವೀರಶೈವ ಲಿಂಗಾಯತ ಸಮಾಜದ ಗುರುಪರಂಪರೆಯನ್ನು ಗೌರವದಿಂದ ಒಪ್ಪಿಕೊಂಡು, ಸಮಾಜಕ್ಕೆ ಸಂಬಂಧಿಸಿದ ಧಾರ್ಮಿಕ, ಸಾಮಾಜಿಕ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳಲ್ಲಿ ಸದಾ ಮುಂಚೂಣಿಯಲ್ಲಿ ನಿಂತಿದ್ದಾರೆ. ರಾಜ್ಯದ ವಿವಿಧ ಮಠಗಳ ಜಗದ್ಗುರುಗಳೊಂದಿಗೆ ನಿಕಟ ಸಂಪರ್ಕ ಹೊಂದಿರುವ ಅವರು, ಸಮಾಜದಲ್ಲಿ ಸಾಮರಸ್ಯ, ಭಾವೈಕ್ಯ ಮತ್ತು ನೈತಿಕ ಮೌಲ್ಯಗಳ ಬಿತ್ತನೆಗೆ ಶ್ರಮಿಸುತ್ತಿದ್ದಾರೆ.
ಯುವಕರಿಗೆ ಮಾರ್ಗದರ್ಶನ ನೀಡುವ ಮನೋಭಾವ ಇವರ ಇನ್ನೊಂದು ದೊಡ್ಡ ಶಕ್ತಿ. ಶಿಕ್ಷಣ, ಉದ್ಯೋಗ, ಸ್ವಾವಲಂಬನೆ ಮತ್ತು ಮೌಲ್ಯಾಧಾರಿತ ಬದುಕಿನ ಕುರಿತು ಯುವಜನತೆಗೆ ಸದಾ ಪ್ರೇರಣೆಯಾಗಿ ನಿಂತಿರುವ ಅವರು, ಅನೇಕ ಯುವಕರಿಗೆ ದಿಕ್ಕು ತೋರಿದ ಮಾರ್ಗದರ್ಶಕರಾಗಿದ್ದಾರೆ. ವಯಸ್ಸು ಕೇವಲ ಸಂಖ್ಯೆಯೆಂಬಂತೆ, ಚಿರ ಯುವಕನಂತೆ ಸದಾ ಚುರುಕಾಗಿ ಕಾರ್ಯನಿರ್ವಹಿಸುವ ರುದ್ರೇಗೌಡ್ರು, ಯಾವುದಾದರೂ ಸಮಾಜಮುಖಿ ಕೆಲಸಕ್ಕೆ ಕೈ ಹಾಕಿದರೆ ಅದನ್ನು ನಮ್ಮ ಮನೆಯ ಕೆಲಸವೆಂದು ಭಾವಿಸಿ, ಮುಗಿಯುವವರೆಗೂ ಶ್ರಮಿಸುವ ಅಪರೂಪದ ಗುಣವನ್ನು ಹೊಂದಿದ್ದಾರೆ.
ಸಮಾಜ ಸೇವೆ, ಸಾರ್ವಜನಿಕ ಬದುಕು ಹಾಗೂ ಮಾನವೀಯ ಕಾಳಜಿಗೆ ನೀಡಿದ ಅಮೂಲ್ಯ ಕೊಡುಗೆಗಾಗಿ ಅವರಿಗೆ ಅನೇಕ ಪ್ರತಿಷ್ಠಿತ ಪ್ರಶಸ್ತಿಗಳು ಲಭಿಸಿರುವುದು ಅವರ ಸೇವೆಯ ಸಾಕ್ಷಿಯಾಗಿದೆ. ಆದರೆ ಪ್ರಶಸ್ತಿಗಳಿಗಿಂತ ಜನರ ಪ್ರೀತಿ ಮತ್ತು ನಂಬಿಕೆಯೇ ತಮ್ಮ ದೊಡ್ಡ ಸಂಪತ್ತು ಎಂದು ನಂಬುವ ಸರಳತೆ ಇವರನ್ನು ಇನ್ನಷ್ಟು ಎತ್ತರಕ್ಕೆ ಕೊಂಡೊಯ್ಯುತ್ತದೆ.
ಇಂತಹ ಸೇವಾಮನೋಭಾವದ ನಾಯಕ ಶ್ರೀಯುತ ರುದ್ರೇಗೌಡ ಅವರಿಗೆ ಅವರ ಹುಟ್ಟು ದಿನದ ಈ ಶುಭ ಸಂದರ್ಭದಲ್ಲಿ, ಇನ್ನೂ ದೀರ್ಘ ಆಯುಷ್ಯ, ಉತ್ತಮ ಆರೋಗ್ಯ ಮತ್ತು ಸಮಾಜಕ್ಕಾಗಿ ಇನ್ನಷ್ಟು ಮಹತ್ವದ ಸೇವೆ ಸಲ್ಲಿಸುವ ಶಕ್ತಿ ದೊರಕಲಿ ಎಂದು ಡಿಟೆಕ್ಟಿವ್ ನ್ಯೂಸ್24 ಸುದ್ದಿಸಂಸ್ಥೆಯ ವತಿಯಿಂದ ಹುಟ್ಟುಹಬ್ಬದ ಶುಭಾಶಯಗಳನ್ನು ಅರ್ಪಿಸುತ್ತೇವೆ.
