ಬೆಂಗಳೂರು: ಒಂದೆಡೆ ಜಾಗತಿಕ ಮಟ್ಟದಲ್ಲಿ ಬಸವತತ್ವದ ಘನತೆ ಹೆಮ್ಮರವಾಗಿ ಬೆಳೆಯುತ್ತಿದ್ದರೆ, ಮತ್ತೊಂದೆಡೆ ಶರಣರ ಕರಳುನೆಲದಲ್ಲೇ ವ್ಯಕ್ತಿಪೂಜೆಯ ವೈಪರೀತ್ಯದಿಂದಾಗಿ ಶರಣ ಸಂಸ್ಕೃತಿಯ ಮೂಲ ಆಶಯಕ್ಕೆ ಧಕ್ಕೆಯಾಗುತ್ತಿರುವುದು ಈಗ ಬಸವ ಭಕ್ತರ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
“ವ್ಯಕ್ತಿಯಲ್ಲ, ತತ್ವವೇ ಶ್ರೇಷ್ಠ—ಯುರೋಪಿನ ನೆಲದಲ್ಲಿ ವಿಶ್ವಮಾನವೀಯ ಬಸವತತ್ವದ ಭವ್ಯ ಪಯಣ.”
ಯುರೋಪಿನ ನೆಲದಲ್ಲಿ ಪೂಜ್ಯರೊಬ್ಬರು ಜಗಜ್ಯೋತಿ ಬಸವಣ್ಣ ಹಾಗೂ ಬಸವಾದಿ ಶರಣರ ವಿಶ್ವಮಾನವೀಯ ಚಿಂತನೆಯನ್ನು ಗಡಿಗಳಾಚೆಗೆ ಕೊಂಡೊಯ್ಯುವ ಮಹತ್ವದ ಸಾಂಸ್ಕೃತಿಕ ಕಾಯಕದಲ್ಲಿ ನಿರತರಾಗಿದ್ದಾರೆ. ಜರ್ಮನಿ, ಆಸ್ಟ್ರಿಯಾ ಸೇರಿದಂತೆ ಯುರೋಪಿನ ವಿವಿಧ ರಾಷ್ಟ್ರಗಳಲ್ಲಿ ವಚನ ಸಾಹಿತ್ಯ, ಬಸವತತ್ವ, ಸಮಾನತೆ, ಕಾಯಕ, ದಾಸೋಹ ಹಾಗೂ ಮಾನವೀಯ ಮೌಲ್ಯಗಳನ್ನು ಆಧುನಿಕ ತಂತ್ರಜ್ಞಾನದ ಮೂಲಕ ವಿಶ್ವದಾದ್ಯಂತ ಪರಿಚಯಿಸುವ ಕಾರ್ಯ ನಿರಂತರವಾಗಿ ನಡೆಯುತ್ತಿದೆ.
22 ಸಾವಿರಕ್ಕೂ ಅಧಿಕ ಬಸವಾದಿ ಶರಣರ ವಚನಗಳನ್ನು ವಿವಿಧ ಭಾಷೆಗಳಿಗೆ ಅನುವಾದಿಸಿ, ಭಾವಾರ್ಥದೊಂದಿಗೆ ಡಿಜಿಟಲ್ ರೂಪದಲ್ಲಿ ಜಗತ್ತಿಗೆ ತಲುಪಿಸುವ ಅಪೂರ್ವ ಯೋಜನೆ ಯಶಸ್ವಿಯಾಗಿ ಸಾಗುತ್ತಿದೆ. ವಚನಗಾಯನ, ವೈಚಾರಿಕ ಸಂವಾದ, ಯುವಜನರಲ್ಲಿ ಮೌಲ್ಯ ಶಿಕ್ಷಣ ಹಾಗೂ ವಲಸೆ ಕನ್ನಡಿಗರೊಂದಿಗೆ ಸಾಂಸ್ಕೃತಿಕ ಬೆಸುಗೆಯ ಮೂಲಕ ಬಸವತತ್ವವನ್ನು ವಿಶ್ವಮಾನವೀಯ ಜ್ಞಾನಸಂಪತ್ತಾಗಿ ರೂಪಿಸುವ ಮಹತ್ತರ ಪ್ರಯತ್ನ ಅಲ್ಲಿ ನಡೆಯುತ್ತಿದೆ.
ಅಲ್ಲಿ ವ್ಯಕ್ತಿಗಳ ವೈಭವಕ್ಕಿಂತ ಬಸವತತ್ವದ ವೈಭವಕ್ಕೇ ಮೊದಲ ಆದ್ಯತೆ ನೀಡಲಾಗುತ್ತಿದೆ; ವ್ಯಕ್ತಿಗಳಿಗಿಂತ ತತ್ವವೇ ಶ್ರೇಷ್ಠ ಎಂಬ ಶರಣ ಸಂಸ್ಕೃತಿಯ ಮೂಲ ಆಶಯವನ್ನು ಕಾರ್ಯರೂಪದಲ್ಲಿ ಸಾಕಾರಗೊಳಿಸಲಾಗುತ್ತಿದೆ.
ಶರಣರ ಚಿತ್ರಗಳಿಗೆ ಕೆಳ ಸ್ಥಾನ: ಬಸವ ಭಕ್ತರಿಂದ ತೀವ್ರ ಆಕ್ಷೇಪ ಮತ್ತು ಖಂಡನೆ
ಆದರೆ, ಬಸವಣ್ಣನವರ ಹೆಸರಿನಲ್ಲಿಯೇ ನಡೆಯುವ ಕಾರ್ಯಕ್ರಮಗಳ ಬ್ಯಾನರ್ಗಳಲ್ಲಿ ಕಂಡುಬರುತ್ತಿರುವ ವಿನ್ಯಾಸಗಳು ಶರಣ ಸಂಸ್ಕೃತಿಯನ್ನೇ ಅಣಕಿಸುವಂತಿವೆ. ಇತ್ತೀಚೆಗೆ ಶರಣ ಸಾಹಿತ್ಯ ಪರಿಷತ್ತಿನ ಕಾರ್ಯಕ್ರಮವೊಂದರ ಬ್ಯಾನರ್ನಲ್ಲಿ ಜಗಜ್ಯೋತಿ ಬಸವಣ್ಣ ಮತ್ತು ಅಕ್ಕಮಹಾದೇವಿಯವರ ಭಾವಚಿತ್ರಗಳನ್ನು ಅತ್ಯಂತ ಕೆಳಭಾಗಕ್ಕೆ ತಳ್ಳಿ, ಕೆಳ ಸ್ಥಾನ ನೀಡಿರುವುದು ಮತ್ತು ಮೇಲ್ಭಾಗದಲ್ಲಿ ಸಮಕಾಲೀನ ವ್ಯಕ್ತಿಗಳ ಚಿತ್ರಗಳಿಗೆ ರಾಜಾರೋಷವಾಗಿ ಹೆಚ್ಚಿನ ಪ್ರಾಮುಖ್ಯತೆ ನೀಡಿರುವುದು ಬೆಳಕಿಗೆ ಬಂದಿದೆ. ಈ ದೃಶ್ಯ ವಿನ್ಯಾಸವು ಬಸವ ಭಕ್ತರ ವಲಯದಲ್ಲಿ ತೀವ್ರ ಅಸಮಾಧಾನ ಹಾಗೂ ಆಕ್ರೋಶವನ್ನು ಬುಗಿಲೇಳಿಸಿದೆ. ಶರಣರಿಗಿಂತ ಸಮಕಾಲೀನ ವ್ಯಕ್ತಿಗಳೇ ದೊಡ್ಡವರೇ? ಎಂಬ ಪ್ರಶ್ನೆ ಈಗ ಸಾರ್ವಜನಿಕವಾಗಿ ಕೇಳಿಬರುತ್ತಿದ್ದು, ಈ ನಡೆಯನ್ನು ಬಸವ ಭಕ್ತರು ಕಟು ಶಬ್ದಗಳಲ್ಲಿ ಖಂಡಿಸಿದ್ದಾರೆ.
ಶರಣ ಸಾಹಿತ್ಯ ಪರಿಷತ್ತಿನ ಅಧ್ಯಕ್ಷ ಸೋಮಶೇಖರ್ ಅವರಿಗೆ ಬಸವ ಭಕ್ತರ ನೇರ ಪ್ರಶ್ನೆಗಳು:
ಈ ಸಾಂಸ್ಕೃತಿಕ ಅಪಚಾರದ ಹಿನ್ನೆಲೆಯಲ್ಲಿ ಶರಣ ಸಾಹಿತ್ಯ ಪರಿಷತ್ತಿನ ಅಧ್ಯಕ್ಷರಾದ ಶ್ರೀ ಸೋಮಶೇಖರ್ ಅವರ ನಡೆಗೆ ಬಸವ ಭಕ್ತರು ಹಾಗೂ ವಿಚಾರವಂತರು ಕೆಲವು ತೀಕ್ಷ್ಣ ಪ್ರಶ್ನೆಗಳನ್ನು ಮಾಡಿದ್ದಾರೆ:
ಆತ್ಮಾವಲೋಕನದ ಅಗತ್ಯವಿದೆ
ಇದು ಯಾವುದೇ ವ್ಯಕ್ತಿಗಳ ವಿರುದ್ಧದ ವೈಯಕ್ತಿಕ ಟೀಕೆಯಲ್ಲ. ಶರಣ ಸಾಹಿತ್ಯ ಪರಿಷತ್ತಿನಂತಹ ಜವಾಬ್ದಾರಿಯುತ ಸಂಸ್ಥೆಗಳು ತಮ್ಮ ಕಾರ್ಯಕ್ರಮಗಳಲ್ಲಿ ಶರಣರನ್ನೇ ಕೇಂದ್ರಬಿಂದುವಾಗಿರಿಸುವ ನೈತಿಕ ಹೊಣೆಗಾರಿಕೆಯನ್ನು ನೆನಪಿಸುವ ಎಚ್ಚರಿಕೆಯಾಗಿದೆ.
ಯುರೋಪಿನ ನೆಲದಲ್ಲಿ ಶ್ರೀಗಳು ಬಸವತತ್ವವನ್ನು ವಿಶ್ವಮಾನವೀಯ ಮೌಲ್ಯವಾಗಿ ಪ್ರತಿಷ್ಠಾಪಿಸಲು ಶ್ರಮಿಸುತ್ತಿರುವಾಗ, ನಮ್ಮ ಕಾರ್ಯಕ್ರಮಗಳ ದೃಶ್ಯಭಾಷೆಯೂ ಅದೇ ಮೌಲ್ಯವನ್ನು ಪ್ರತಿಬಿಂಬಿಸಬೇಕು. ಶರಣರಿಗಿಂತ ವ್ಯಕ್ತಿಗಳು ದೊಡ್ಡವರಾಗಿ ಕಾಣುವ ಇಂತಹ ಅಹಂಕಾರದ ವಿನ್ಯಾಸಗಳು ಬಸವತತ್ವದ ಮೂಲ ಸಂದೇಶವನ್ನೇ ದುರ್ಬಲಗೊಳಿಸುತ್ತವೆ.
ಬಸವತತ್ವದ ನಿಜವಾದ ಗೌರವವು ಕೇವಲ ಭವ್ಯ ಬ್ಯಾನರ್ಗಳನ್ನು ಹಾಕಿಕೊಳ್ಳುವುದರಲ್ಲಿ ಇಲ್ಲ, ಬಸವಣ್ಣ ಮತ್ತು ಬಸವಾದಿ ಶರಣರಿಗೆ ಸಲ್ಲಬೇಕಾದ ಅತ್ಯುನ್ನತ ಸ್ಥಾನವನ್ನು ನಮ್ಮ ಚಿಂತನೆ, ಆಚರಣೆ ಮತ್ತು ಸಾರ್ವಜನಿಕ ನಿರೂಪಣೆಯಲ್ಲಿ ನೀಡಬೇಕಾಗಿದೆ. ಬಸವಣ್ಣನವರ ಹೆಸರಿನಲ್ಲಿ ನಡೆಯುವ ಕಾರ್ಯಕ್ರಮಗಳಲ್ಲಿ ಮೊದಲ ಗೌರವ ಮತ್ತು ಪ್ರಮುಖ ಸ್ಥಾನ ಬಸವಣ್ಣನವರಿಗೇ ಸಲ್ಲಬೇಕು. ಇದೇ ಶರಣ ಸಂಸ್ಕೃತಿಯ ಆತ್ಮ ಮತ್ತು ಬಸವತತ್ವದ ನಿಜವಾದ ಘನತೆಯಾಗಿದೆ ಎಂದು ಬಸವ ಭಕ್ತರು ಒಕ್ಕೊರಲಿನಿಂದ ಆಗ್ರಹಿಸಿದ್ದಾರೆ.
