ದಾವಣಗೆರೆ: ಒಂದು ವೇದಿಕೆ… ಮೂರು ಸಾವಿರಕ್ಕೂ ಹೆಚ್ಚು ಕಂಠಗಳು… ಎಲ್ಲರ ತುಟಿಗಳಲ್ಲೂ ಬಸವಣ್ಣನ ವಚನಗಳು… ಒಂದೇ ಧ್ವನಿಯಲ್ಲಿ ಮೊಳಗಲಿರುವ ವಚನಗಳ ನಾದಕ್ಕೆ ಇಡೀ ದಾವಣಗೆರೆ ನಗರವೇ ಸಾಕ್ಷಿಯಾಗಲಿದೆ. ಬಸವಣ್ಣನವರ ಚಿಂತನೆ, ಸಮಾನತೆಯ ಸಂದೇಶ ಮತ್ತು ಮಾನವೀಯ ಮೌಲ್ಯಗಳನ್ನು ಸಾವಿರಾರು ಕಂಠಗಳ ಮೂಲಕ ಮೊಳಗಿಸುವ ಅಪೂರ್ವ ‘ವಚನ ನಾದಲೋಕ’ ಕಾರ್ಯಕ್ರಮ ಸೆ.30ರಂದು ದಾವಣಗೆರೆಯಲ್ಲಿ ನಡೆಯಲಿದೆ.
ದಾವಣಗೆರೆ ನಗರದ ಜಿಲ್ಲಾ ಕ್ರೀಡಾಂಗಣದಲ್ಲಿ ಸೆಪ್ಟೆಂಬರ್ 30, ಬುಧವಾರ ಸಂಜೆ 6 ಗಂಟೆಗೆ ‘ವಚನ ನಾದಲೋಕ’ ಕಾರ್ಯಕ್ರಮ ಆಯೋಜಿಸಲಾಗಿದೆ. ಕಾರ್ಯಕ್ರಮದಲ್ಲಿ ಮೂರು ಸಾವಿರಕ್ಕೂ ಅಧಿಕ ಗಾಯಕರು ಬಸವಣ್ಣನವರ 33 ವಚನಗಳನ್ನು ಸಾಮೂಹಿಕವಾಗಿ ಗಾಯನ ಮಾಡುವ ಮೂಲಕ ವಚನ ಸಾಹಿತ್ಯದ ವೈಭವವನ್ನು ಅನಾವರಣಗೊಳಿಸಲಿದ್ದಾರೆ.
‘ಸಮಾನ ಮನಸ್ಸು, ಸಮಾನ ನುಡಿ! ಒಂದೇ ವೇದಿಕೆ, ಮೂರು ಸಾವಿರ ಕಂಠಗಳು, ಒಂದೇ ಧ್ವನಿ!’ ಎಂಬ ಆಶಯದೊಂದಿಗೆ ನಡೆಯಲಿರುವ ಈ ಕಾರ್ಯಕ್ರಮವು ಬಸವಣ್ಣನವರ ವಚನಗಳ ಸಂದೇಶವನ್ನು ಸಾಮೂಹಿಕ ಗಾಯನದ ಮೂಲಕ ಜನಮನಕ್ಕೆ ತಲುಪಿಸುವ ವಿಶಿಷ್ಟ ಪ್ರಯತ್ನವಾಗಿದೆ.
ವಚನಗಳ ಸಮೂಹ ಗಾಯನದ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಇಷ್ಟೊಂದು ದೊಡ್ಡ ಪ್ರಮಾಣದಲ್ಲಿ ಸಾವಿರಾರು ಕಂಠಗಳು ಒಂದೇ ವೇದಿಕೆಯಲ್ಲಿ ಬಸವಣ್ಣನವರ ವಚನಗಳನ್ನು ಹಾಡಲಿವೆ. ಹೀಗಾಗಿ ಈ ಕಾರ್ಯಕ್ರಮವು ವಚನ ಸಾಹಿತ್ಯ, ಸಂಗೀತ ಮತ್ತು ಬಸವತತ್ವದ ಸಂಗಮವಾಗಿ ಗಮನ ಸೆಳೆಯಲಿದೆ.
ಕಾರ್ಯಕ್ರಮಕ್ಕೆ ಶ್ರೀ ಪಂಡಿತಾರಾಧ್ಯ ಶಿವಾಚಾರ್ಯ ಸ್ವಾಮಿಗಳು, ಪಟ್ಟಾಧ್ಯಕ್ಷರು, ಶ್ರೀ ತರಳಬಾಳು ಜಗದ್ಗುರು ಶಾಖಾಮಠ, ಸಾಣೇಹಳ್ಳಿ ಅವರ ದಿವ್ಯ ಸಾನ್ನಿಧ್ಯ ಇರಲಿದೆ.
ಡಾ. ಶ್ರೀ ಬಸವ ಮರುಳಸಿದ್ದ ಸ್ವಾಮೀಜಿ, ಶ್ರೀ ಬಸವತತ್ವ ಪೀಠ, ಚಿಕ್ಕಮಗಳೂರು ಅವರು ಕಾರ್ಯಕ್ರಮದ ನೇತೃತ್ವ ವಹಿಸಲಿದ್ದಾರೆ.
ಡಾ. ಶ್ರೀ ಬಸವಕುಮಾರ ಸ್ವಾಮಿಗಳು, ಸದಸ್ಯರು, ಆಡಳಿತ ಮಂಡಳಿ, ಶ್ರೀ ಮುರುಘಾಮಠ, ಚಿತ್ರದುರ್ಗ; ಶ್ರೀ ಗುರುಬಸವ ಸ್ವಾಮಿಗಳು, ವಿರಕ್ತಮಠ, ಪಾಂಡೋಮಟ್ಟಿ-ಕಮ್ಮತ್ತಹಳ್ಳಿ ಹಾಗೂ ಡಾ. ಶ್ರೀ ಬಸವಪ್ರಭು ಸ್ವಾಮಿಗಳು, ವಿರಕ್ತಮಠ, ದಾವಣಗೆರೆ ಅವರು ಸಮ್ಮುಖ ವಹಿಸಲಿದ್ದಾರೆ.
ಕಾರ್ಯಕ್ರಮದಲ್ಲಿ ಜಿಲ್ಲೆಯ ಎಲ್ಲ ಗೌರವಾನ್ವಿತ ಹಾಲಿ ಹಾಗೂ ಮಾಜಿ ಜನಪ್ರತಿನಿಧಿಗಳು, ಹಿರಿಯ ಅಧಿಕಾರಿಗಳು, ವಿವಿಧ ಸಂಘ-ಸಂಸ್ಥೆಗಳ ಅಧ್ಯಕ್ಷರು ಮತ್ತು ಪದಾಧಿಕಾರಿಗಳು, ವಿವಿಧ ಸಮಾಜಗಳ ಮುಖಂಡರು ಹಾಗೂ ಅಪಾರ ಸಂಖ್ಯೆಯ ಬಸವಾಭಿಮಾನಿಗಳು ಭಾಗವಹಿಸಲಿದ್ದಾರೆ.
ಬಸವಣ್ಣನವರ ವಚನಗಳು ಕೇವಲ ಹಾಡಾಗದೆ, ಸಾವಿರಾರು ಕಂಠಗಳ ಮೂಲಕ ಒಂದೇ ಧ್ವನಿಯಾಗಿ ಮೊಳಗುವ ಈ ಅಪೂರ್ವ ಕ್ಷಣಕ್ಕೆ ದಾವಣಗೆರೆ ಸಾಕ್ಷಿಯಾಗಲಿದೆ. ಬಸವತತ್ವದ ಸಂದೇಶವನ್ನು ಸಾಮೂಹಿಕವಾಗಿ ಸಾರುವ ಈ ಐತಿಹಾಸಿಕ ಕಾರ್ಯಕ್ರಮದಲ್ಲಿ ಎಲ್ಲರೂ ಭಾಗವಹಿಸಿ ಸಾಕ್ಷಿಯಾಗಬೇಕು ಎಂದು ಚಿಕ್ಕಮಗಳೂರಿನ ಶ್ರೀ ಬಸವತತ್ವ ಪೀಠದ ಡಾ. ಶ್ರೀ ಬಸವ ಮರುಳಸಿದ್ದ ಸ್ವಾಮೀಜಿ ಅವರು ಮನವಿ ಮಾಡಿದ್ದಾರೆ.
