“ಆರ್‌ಸಿಬಿ ದುರಂತದ ನೆನಪಿನಲ್ಲಿ ಕೊಹ್ಲಿಯ ಹೃದಯಸ್ಪರ್ಶಿ ಸಂದೇಶ”

ಬೆಂಗಳೂರು: ಐಪಿಎಲ್ 2025ರ ಐತಿಹಾಸಿಕ ಜಯೋತ್ಸವವನ್ನು ಸಂಭ್ರಮಿಸಲು ಸೇರಿದ್ದ ಅಭಿಮಾನಿಗಳ ಹರ್ಷೋದ್ಗಾರ ದುಃಖದ ದುರಂತವಾಗಿ ತಿರುಗಿತ್ತು. ಜೂನ್ 4ರಂದು ಬೆಂಗಳೂರಿನಲ್ಲಿ ನಡೆದ ಕಾಲ್ತುಳಿತದ ದುರಂತವು ನೂರಾರು ಜನರನ್ನು ಬಾಧಿಸಿತು. ಕೆಲವರು ಜೀವ ಕಳೆದುಕೊಂಡರು, ಅನೇಕರಿಗೆ ಗಂಭೀರ ಗಾಯಗಳಾದವು. ಈ ಘಟನೆ ಬಳಿಕ ದೇಶದಾದ್ಯಂತ ಆಕ್ರೋಶ, ದುಃಖ ಮತ್ತು ಅಭಿಮಾನಿಗಳ ಕಣ್ಣೀರು ವ್ಯಕ್ತವಾಯಿತು.

ಘಟನೆ ನಂತರದ ಮೂರು ತಿಂಗಳ ಮೌನವನ್ನು ಮುರಿದ ತಂಡದ ಸ್ಟಾರ್ ಆಟಗಾರ ವಿರಾಟ್ ಕೊಹ್ಲಿ, ಸಾಮಾಜಿಕ ಜಾಲತಾಣ ಮತ್ತು ಆರ್‌ಸಿಬಿ ಹಂಚಿಕೊಂಡ ಹೇಳಿಕೆಯಲ್ಲಿ ಹೃದಯಸ್ಪರ್ಶಿ ಪ್ರತಿಕ್ರಿಯೆ ನೀಡಿದ್ದಾರೆ. “ಜೂನ್ 4ರ ಘಟನೆ ಮರೆಯಲು ಅಸಾಧ್ಯ. ನಮ್ಮ ಫ್ರಾಂಚೈಸಿಯ ಇತಿಹಾಸದಲ್ಲಿ ಅತ್ಯಂತ ಸಂತೋಷದಾಯಕ ಕ್ಷಣವಾಗಿರಬೇಕಾಗಿದ್ದದ್ದು ದುರಂತವಾಗಿ ಮಾರ್ಪಟ್ಟಿತು. ನಾವು ಕಳೆದುಕೊಂಡವರ ಕುಟುಂಬಗಳು ಹಾಗೂ ಗಾಯಗೊಂಡ ನಮ್ಮ ಅಭಿಮಾನಿಗಳಿಗಾಗಿ ನಾನು ಯೋಚಿಸುತ್ತಿದ್ದೇನೆ ಮತ್ತು ಪ್ರಾರ್ಥಿಸುತ್ತಿದ್ದೇನೆ. ನಿಮ್ಮ ನಷ್ಟವು ಈಗ ನಮ್ಮ ಕಥೆಯ ಭಾಗವಾಗಿದೆ. ಒಟ್ಟಾಗಿ, ನಾವು ಕಾಳಜಿ, ಗೌರವ ಮತ್ತು ಜವಾಬ್ದಾರಿಯೊಂದಿಗೆ ಮುಂದುವರಿಯುತ್ತೇವೆ” ಎಂದು ಕೊಹ್ಲಿ ಭಾವುಕರಾಗಿ ಹೇಳಿದ್ದಾರೆ.

ಪರಿಹಾರ ಹಾಗೂ ಜವಾಬ್ದಾರಿತನ

ಘಟನೆ ಬಳಿಕ ಆರ್‌ಸಿಬಿ ಫ್ರಾಂಚೈಸಿ ಮೃತರ ಕುಟುಂಬಗಳಿಗೆ ತಲಾ ₹25 ಲಕ್ಷ ಪರಿಹಾರವನ್ನು ಘೋಷಿಸಿತ್ತು. ಜೊತೆಗೆ ಗಾಯಗೊಂಡವರಿಗೆ ಸೂಕ್ತ ನೆರವು ನೀಡುವ ಭರವಸೆ ನೀಡಿತ್ತು. ಕೇವಲ ಆರ್ಥಿಕ ನೆರವಲ್ಲ, ಭವಿಷ್ಯದಲ್ಲಿ ಇಂತಹ ಘಟನೆಗಳು ಮರುಕಳಿಸದಂತೆ ನೋಡಿಕೊಳ್ಳುವುದಾಗಿ ತಂಡ ಭರವಸೆ ನೀಡಿದೆ.

ಈ ನಿಟ್ಟಿನಲ್ಲಿ ‘ಆರ್‌ಸಿಬಿ ಕೇರ್ಸ್’ ಎಂಬ ಯೋಜನೆಯಡಿ ಫ್ರಾಂಚೈಸಿಯು ಆರು ಅಂಶಗಳ ಸಮಗ್ರ ಪ್ರಣಾಳಿಕೆಯನ್ನು ಪ್ರಕಟಿಸಿದೆ. ಆದರೆ ಸರ್ಕಾರದ ಅನುಮತಿ ಪಡೆದ ಬಳಿಕವೇ ಅವುಗಳನ್ನು ಜಾರಿಗೆ ತರುವುದಾಗಿ ಸ್ಪಷ್ಟಪಡಿಸಿದೆ.

ಆರ್‌ಸಿಬಿಯ 6 ಸೂತ್ರಗಳು

ತ್ವರಿತ ಹಾಗೂ ಮಾನವೀಯ ನೆರವು – ಬಾಧಿತ ಕುಟುಂಬಗಳಿಗೆ ಪಾರದರ್ಶಕವಾಗಿ ಆರ್ಥಿಕ ಮತ್ತು ಸಾಮಾಜಿಕ ನೆರವು.

ಜನಸಂದಣಿ ನಿರ್ವಹಣಾ ಪ್ರೋಟೋಕಾಲ್ – ಬಿಸಿಸಿಐ ಹಾಗೂ ಕೆಎಸ್‌ಸಿಎ ಜೊತೆಗೂಡಿ ಜನಸಂದಣಿ ನಿಯಂತ್ರಣದ ನೂತನ ಮಾರ್ಗಸೂಚಿ ತಯಾರಿಕೆ.

ಗ್ರಾಮೀಣ ಅಭಿವೃದ್ಧಿ – ಕರ್ನಾಟಕದ ಹಿಂದುಳಿದ ಸಮುದಾಯಗಳಲ್ಲಿ, ವಿಶೇಷವಾಗಿ ಸಿದ್ದಿ ಸಮುದಾಯದಲ್ಲಿ ಅಭಿವೃದ್ಧಿ ಕಾರ್ಯಕ್ರಮಗಳು.

ಸೇಫ್ಟಿ ಆಡಿಟ್ ಮತ್ತು ತರಬೇತಿ – ಭವಿಷ್ಯದ ಕ್ರೀಡಾ ಈವೆಂಟ್‌ಗಳಲ್ಲಿ ಸ್ಥಳೀಯ ತಂಡಗಳಿಗೆ ಜನಸಂದಣಿ ನಿರ್ವಹಣೆ ಹಾಗೂ ತುರ್ತು ಪ್ರತಿಕ್ರಿಯೆ ಕುರಿತು ವಿಶೇಷ ತರಬೇತಿ.

ಸ್ಮಾರಕ ನಿರ್ಮಾಣ – ದುರಂತದಲ್ಲಿ ಬಲಿಯಾದ ಅಭಿಮಾನಿಗಳ ನೆನಪಿಗಾಗಿ ಬೆಂಗಳೂರಿನಲ್ಲಿ ಸ್ಮಾರಕ ನಿರ್ಮಾಣ.

ಕ್ರೀಡಾಂಗಣ ಉದ್ಯೋಗ ಮತ್ತು ಪ್ರತಿಭಾ ಬೆಂಬಲ – ಸ್ಥಳೀಯ ಯುವಕರಿಗೆ ಉದ್ಯೋಗಾವಕಾಶ ಹಾಗೂ ಪ್ರತಿಭಾವಂತ ಕ್ರೀಡಾಪಟುಗಳಿಗೆ ಬೆಂಬಲ.

ಅಭಿಮಾನಿಗಳ ಪ್ರತಿಕ್ರಿಯೆ

ಕೋಹ್ಲಿಯ ಭಾವುಕ ಹೇಳಿಕೆ ಹಾಗೂ ಫ್ರಾಂಚೈಸಿಯ ಕ್ರಮಗಳನ್ನು ಅಭಿಮಾನಿಗಳು ಸ್ವಾಗತಿಸಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ಅಭಿಮಾನಿಗಳು “ಈ ದುರಂತ ಮರೆಯಲು ಸಾಧ್ಯವಿಲ್ಲ. ಆದರೆ ಆರ್‌ಸಿಬಿ ತೋರಿಸುತ್ತಿರುವ ಜವಾಬ್ದಾರಿತನ ಶ್ಲಾಘನೀಯ” ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಬೆಂಗಳೂರಿನ ಕಾಲ್ತುಳಿತ ದುರಂತವು ಕ್ರೀಡೆಗೆ ಸಂಬಂಧಿಸಿದ ಸುರಕ್ಷತೆಯ ಅಗತ್ಯವನ್ನು ನೆನಪಿಸಿದೆ. ಕೇವಲ ಜಯೋತ್ಸವವಲ್ಲ, ಅಭಿಮಾನಿಗಳ ಜೀವ ಭದ್ರತೆ ಕೂಡಾ ಸಮಾನವಾಗಿ ಮುಖ್ಯ ಎಂಬುದನ್ನು ಈ ಘಟನೆ ತೋರಿಸಿಕೊಟ್ಟಿದೆ. ಆರ್‌ಸಿಬಿಯ ಈ ಆರು ಸೂತ್ರಗಳು ಕೇವಲ ಒಂದು ಫ್ರಾಂಚೈಸಿಯ ನಿರ್ಧಾರವಲ್ಲ, ಭಾರತದೆಲ್ಲೆಡೆ ಕ್ರೀಡಾ ಆಯೋಜನೆಗಳಲ್ಲಿ ಸುರಕ್ಷತೆಗೆ ಮಾದರಿಯಾಗುವ ನಿರೀಕ್ಷೆಯಿದೆ.