ನವದೆಹಲಿ: ಕೇಂದ್ರದ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು 2026–27ನೇ ಸಾಲಿನ ಕೇಂದ್ರ ಬಜೆಟ್ ಅನ್ನು ಸಂಸತ್ತಿನಲ್ಲಿ ಮಂಡಿಸಿದ್ದಾರೆ. ಈ ಬಾರಿ ಬಜೆಟ್ನಲ್ಲಿ ತಕ್ಷಣ ಜನಮನ ಸೆಳೆಯುವಂತಹ ದೊಡ್ಡ ಜನಪ್ರಿಯ ಘೋಷಣೆಗಳು ಇಲ್ಲದಿದ್ದರೂ, ದೀರ್ಘಾವಧಿಯ ಆರ್ಥಿಕ ಸ್ಥಿರತೆ, ಮೂಲಸೌಕರ್ಯ ಅಭಿವೃದ್ಧಿ ಹಾಗೂ ತಂತ್ರಜ್ಞಾನಾಧಾರಿತ ಬೆಳವಣಿಗೆಯತ್ತ ಸರ್ಕಾರದ ಸ್ಪಷ್ಟ ದೃಷ್ಟಿಕೋನ ಪ್ರತಿಬಿಂಬಿಸಿದೆ.
ವಿಶೇಷವಾಗಿ ಮಧ್ಯಮ ಹಾಗೂ ಆದಾಯ ಗಳಿಸುವ ವರ್ಗದವರಿಗೆ ಹೊಸ ತೆರಿಗೆ ವಿನಾಯಿತಿಗಳ ನಿರೀಕ್ಷೆ ಇದ್ದರೂ, ಅದರಲ್ಲಿ ಯಾವುದೇ ಬದಲಾವಣೆ ಮಾಡಿಲ್ಲ. ಕಳೆದ ವರ್ಷ ಘೋಷಿಸಲಾದ ವಾರ್ಷಿಕ ₹12.75 ಲಕ್ಷದವರೆಗಿನ ಸಂಪೂರ್ಣ ಆದಾಯ ತೆರಿಗೆ ವಿನಾಯಿತಿಯನ್ನು ಈ ಬಜೆಟ್ನಲ್ಲೂ ಮುಂದುವರಿಸಲಾಗಿದೆ. ಹೊಸ ವಿನಾಯಿತಿ ಮಿತಿಯನ್ನು ಏರಿಸುವ ಗೋಜಿಗೆ ಸರ್ಕಾರ ಹೋಗಿಲ್ಲ.
ಆದರೆ, ಬಜೆಟ್ನೊಳಗೆ ಅಡಗಿರುವ ಹಲವು ಪ್ರಮುಖ ನಿರ್ಧಾರಗಳು ದೇಶದ ಆರ್ಥಿಕ, ಶೈಕ್ಷಣಿಕ, ಆರೋಗ್ಯ ಹಾಗೂ ಮೂಲಸೌಕರ್ಯ ಕ್ಷೇತ್ರಗಳಿಗೆ ದೀರ್ಘಕಾಲೀನ ಲಾಭ ತರುವ ಸಾಧ್ಯತೆ ಇದೆ. ಈ ಬಜೆಟ್ನ ಪ್ರಮುಖ ಹೈಲೈಟ್ಸ್ಗಳು ಹೀಗಿವೆ:
🔹 ಬಂಡವಾಳ ವೆಚ್ಚಕ್ಕೆ ಭಾರೀ ಉತ್ತೇಜನ
ದೇಶದ ಮೂಲಸೌಕರ್ಯ ಅಭಿವೃದ್ಧಿಗೆ ಬಲ ನೀಡುವ ಉದ್ದೇಶದಿಂದ ಬಂಡವಾಳ ವೆಚ್ಚವನ್ನು ₹12.2 ಲಕ್ಷ ಕೋಟಿ ರೂಪಾಯಿಗೆ ಹೆಚ್ಚಿಸಲಾಗಿದೆ. ಕಳೆದ ಹಣಕಾಸು ವರ್ಷದಲ್ಲಿ ಇದು ₹11.1 ಲಕ್ಷ ಕೋಟಿ ಆಗಿತ್ತು. ಈ ಹೆಚ್ಚಳದಿಂದ ರಸ್ತೆ, ರೈಲು, ಬಂದರು, ನಗರಾಭಿವೃದ್ಧಿ ಹಾಗೂ ಇತರ ಮೂಲಸೌಕರ್ಯ ಯೋಜನೆಗಳಿಗೆ ವೇಗ ಸಿಗಲಿದೆ.
🔹 ಆರೋಗ್ಯ ಮತ್ತು ಶಿಕ್ಷಣ ಕ್ಷೇತ್ರಕ್ಕೆ ವಿಸ್ತರಣೆ
ದೇಶದಲ್ಲಿ 3 ಹೊಸ ಏಮ್ಸ್ (AIIMS) ಆಸ್ಪತ್ರೆಗಳು ಸ್ಥಾಪನೆಯ ಘೋಷಣೆ ಮಾಡಲಾಗಿದೆ. ಜೊತೆಗೆ 5 ಯೂನಿವರ್ಸಿಟಿ ಟೌನ್ಶಿಪ್ಗಳು ಮತ್ತು 3 ಆಯುರ್ವೇದ ಇನ್ಸ್ಟಿಟ್ಯೂಟ್ಗಳು ಆರಂಭವಾಗಲಿವೆ. ಇದರಿಂದ ಆರೋಗ್ಯ ಸೇವೆ ಮತ್ತು ಉನ್ನತ ಶಿಕ್ಷಣಕ್ಕೆ ಗ್ರಾಮೀಣ ಹಾಗೂ ಹಿಂದುಳಿದ ಪ್ರದೇಶಗಳಲ್ಲೂ ಹೆಚ್ಚಿನ ಪ್ರವೇಶ ಸಾಧ್ಯವಾಗಲಿದೆ.
🔹 ಅಪರೂಪದ ಖನಿಜ ಕಾರಿಡಾರ್
ಭಾರತದ ತಂತ್ರಜ್ಞಾನ ಮತ್ತು ರಕ್ಷಣಾ ಕ್ಷೇತ್ರಗಳಿಗೆ ಅಗತ್ಯವಿರುವ ಅಪರೂಪದ ಖನಿಜಗಳ ಲಭ್ಯತೆಯನ್ನು ಬಲಪಡಿಸಲು ತಮಿಳುನಾಡು, ಕೇರಳ, ಒಡಿಶಾ ಮತ್ತು ಆಂಧ್ರಪ್ರದೇಶ ಸೇರಿ 4 ರಾಜ್ಯಗಳಲ್ಲಿ ಅಪರೂಪದ ಖನಿಜ ಕಾರಿಡಾರ್ಗಳನ್ನು ಸ್ಥಾಪಿಸುವ ಯೋಜನೆ ಘೋಷಿಸಲಾಗಿದೆ.
🔹 ಹೈ ಸ್ಪೀಡ್ ರೈಲು ಜಾಲ ವಿಸ್ತರಣೆ
ದೇಶದ ಸಾರಿಗೆ ವ್ಯವಸ್ಥೆಯಲ್ಲಿ ಕ್ರಾಂತಿಕಾರಿ ಬದಲಾವಣೆ ತರುವ ಉದ್ದೇಶದಿಂದ 7 ಹೊಸ ಹೈ ಸ್ಪೀಡ್ ರೈಲು ಕಾರಿಡಾರ್ಗಳು ಘೋಷಿಸಲಾಗಿದೆ. ಇದರಲ್ಲಿ ಬೆಂಗಳೂರು–ಹೈದರಾಬಾದ್, ಬೆಂಗಳೂರು–ಚೆನ್ನೈ ಸೇರಿದಂತೆ ಪ್ರಮುಖ ಮಾರ್ಗಗಳು ಸೇರಿವೆ. ಇದರಿಂದ ವ್ಯಾಪಾರ, ಉದ್ಯೋಗ ಮತ್ತು ಪ್ರಯಾಣಿಕರ ಸೌಲಭ್ಯ ಹೆಚ್ಚಾಗಲಿದೆ.
🔹 ತೆಂಗು ಬೆಳೆಗಾರರಿಗೆ ಹೊಸ ಉಸಿರು
ಕೇಂದ್ರ ಸರ್ಕಾರ ತೆಂಗು ಪ್ರೋತ್ಸಾಹ ಯೋಜನೆ (Coconut Promotion Scheme) ಜಾರಿಗೆ ತರಲು ನಿರ್ಧರಿಸಿದೆ. ತೆಂಗು ಬೆಳೆ ಉತ್ತೇಜನ, ವಿದೇಶಿ ರಫ್ತು, ಹೊಸ ತೋಟಗಳ ಸ್ಥಾಪನೆ ಹಾಗೂ ಹಳೆಯ ಗಿಡಗಳನ್ನು ತೆಗೆದು ಹೊಸ ಗಿಡ ನೆಡುವುದಕ್ಕೆ ರೈತರಿಗೆ ಪ್ರೋತ್ಸಾಹ ನೀಡಲಾಗುತ್ತದೆ.
🔹 ರಾಜ್ಯಗಳಿಗೆ ಆದಾಯ ಹಂಚಿಕೆ
16ನೇ ಹಣಕಾಸು ಆಯೋಗದ ಶಿಫಾರಸ್ಸುಗಳನ್ನು ಕೇಂದ್ರ ಸರ್ಕಾರ ಒಪ್ಪಿಕೊಂಡಿದ್ದು, ಕೇಂದ್ರದ ಆದಾಯದಲ್ಲಿ ಶೇ.41ರಷ್ಟು ರಾಜ್ಯಗಳಿಗೆ ಹಂಚಿಕೆ ಮಾಡುವುದಕ್ಕೆ ಒಪ್ಪಿಗೆ ನೀಡಲಾಗಿದೆ. ಈ ಮೂಲಕ ರಾಜ್ಯಗಳಿಗೆ ಒಟ್ಟಾರೆ ₹1.4 ಲಕ್ಷ ಕೋಟಿ ರೂಪಾಯಿ ಅನುದಾನ ಲಭಿಸಲಿದೆ.
🔹 ಡಾಟಾ ಸೆಂಟರ್ಗಳಿಗೆ ದೀರ್ಘಾವಧಿ ತೆರಿಗೆ ರಜೆ
ಭಾರತವನ್ನು ಜಾಗತಿಕ ಡಿಜಿಟಲ್ ಹಬ್ ಆಗಿ ರೂಪಿಸುವ ನಿಟ್ಟಿನಲ್ಲಿ, ಡಾಟಾ ಸೆಂಟರ್ ಸ್ಥಾಪನೆ ಮತ್ತು ಕ್ಲೌಡ್ ಸೇವೆ ಒದಗಿಸುವ ವಿದೇಶಿ ಕಂಪನಿಗಳಿಗೆ 2047ರವರೆಗೆ ತೆರಿಗೆ ರಜೆ ಘೋಷಿಸಲಾಗಿದೆ. ಇದರಿಂದ ಭಾರೀ ಹೂಡಿಕೆ ಮತ್ತು ಉದ್ಯೋಗ ಸೃಷ್ಟಿಗೆ ಅವಕಾಶವಿದೆ.
🔹 ಕಾರ್ಪೊರೇಟ್ ತೆರಿಗೆ ಸುಧಾರಣೆ
ಮಿನಿಮಮ್ ಆಲ್ಟರ್ನೇಟ್ ಟ್ಯಾಕ್ಸ್ (MAT) ಅನ್ನು ಅಂತಿಮ ತೆರಿಗೆಯಾಗಿ ಘೋಷಿಸಿ, ಶೇ.14ರಷ್ಟು ದರವನ್ನು ಜಾರಿ ಮಾಡಲಾಗಿದೆ. ಇದು ಉದ್ಯಮಿಗಳಿಗೆ ತೆರಿಗೆ ವ್ಯವಸ್ಥೆಯಲ್ಲಿ ಸ್ಪಷ್ಟತೆ ನೀಡಲಿದೆ.
🔹 ಶಿಕ್ಷಣದಲ್ಲಿ ಡಿಜಿಟಲ್ ಮತ್ತು ಕ್ರಿಯೇಟಿವ್ ಉತ್ತೇಜನ
ದೇಶದ 15,000 ಸೆಕೆಂಡರಿ ಶಾಲೆಗಳು ಮತ್ತು 500 ಕಾಲೇಜುಗಳಲ್ಲಿ AVGC (Animation, Visual Effects, Gaming, Comics) ಕಂಟೆಂಟ್ ಕ್ರಿಯೇಟರ್ಸ್ ಲ್ಯಾಬ್ಗಳನ್ನು ಸ್ಥಾಪನೆ ಮಾಡುವುದಾಗಿ ಸರ್ಕಾರ ಘೋಷಿಸಿದೆ. ಇದು ಯುವಕರಿಗೆ ಹೊಸ ತಂತ್ರಜ್ಞಾನಾಧಾರಿತ ಉದ್ಯೋಗಾವಕಾಶಗಳನ್ನು ತೆರೆಯಲಿದೆ.
🔹 ಜಲಮಾರ್ಗ ಮತ್ತು ಸರಕು ಸಾಗಣೆ ಕ್ರಾಂತಿ
ಮುಂದಿನ 5 ವರ್ಷಗಳಲ್ಲಿ 20 ರಾಷ್ಟ್ರೀಯ ಜಲಮಾರ್ಗಗಳ ಸ್ಥಾಪನೆ ಮಾಡುವ ಗುರಿ ಹೊಂದಲಾಗಿದೆ. ಜೊತೆಗೆ ಪಶ್ಚಿಮ ಬಂಗಾಳದ ದಂಗಾಕುಣಿ ರಿಂದ ಗುಜರಾತ್ನ ಸೂರತ್ವರೆಗಿನ ರೈಲು ಸರಕು ಸಾಗಣೆ ಕಾರಿಡಾರ್ ಘೋಷಣೆಯಾಗಿದೆ.
🔹 ಕೃತಕ ಬುದ್ಧಿಮತ್ತೆ ಮತ್ತು ಉದ್ಯೋಗ ಅಧ್ಯಯನ
ಆರ್ಟಿಫಿಷಿಯಲ್ ಇಂಟೆಲಿಜೆನ್ಸ್ ಸೇರಿದಂತೆ ಹೊಸ ತಂತ್ರಜ್ಞಾನಗಳು ಕಾರ್ಮಿಕ ಮಾರುಕಟ್ಟೆಯ ಮೇಲೆ ಬೀರುವ ಪರಿಣಾಮಗಳ ಅಧ್ಯಯನಕ್ಕಾಗಿ ‘ಎಜುಕೇಶನ್ ಟು ಎಂಪ್ಲಾಯಮೆಂಟ್’ ಮತ್ತು ಉದ್ಯಮ ಸಂಬಂಧಿತ ಉನ್ನತ ಸ್ಥಾಯಿ ಸಮಿತಿ ರಚನೆ ಮಾಡುವ ನಿರ್ಧಾರ ಕೈಗೊಳ್ಳಲಾಗಿದೆ.
✦ ಒಟ್ಟಾರೆ ವಿಶ್ಲೇಷಣೆ
2026–27ರ ಕೇಂದ್ರ ಬಜೆಟ್ ಜನಪ್ರಿಯ ಘೋಷಣೆಗಳ ಬದಲು, ಮೂಲಸೌಕರ್ಯ, ತಂತ್ರಜ್ಞಾನ, ಶಿಕ್ಷಣ, ಆರೋಗ್ಯ ಮತ್ತು ದೀರ್ಘಾವಧಿಯ ಆರ್ಥಿಕ ಬೆಳವಣಿಗೆಯ ಮೇಲೆ ಕೇಂದ್ರೀಕೃತವಾಗಿದೆ. ತಕ್ಷಣದ ಲಾಭಕ್ಕಿಂತ, ದೇಶವನ್ನು 2047ರ ಅಭಿವೃದ್ಧಿ ಗುರಿಯತ್ತ ಕರೆದೊಯ್ಯುವ ಬಜೆಟ್ ಎಂಬುದಾಗಿ ಇದನ್ನು ವಿಶ್ಲೇಷಿಸಬಹುದು.
