ಬೆಂಗಳೂರು: “ವೀರಶೈವ ಧರ್ಮವು ನಿನ್ನೆ ಹುಟ್ಟಿ, ಇಂದು ಬೆಳೆದು, ನಾಳೆ ಕಣ್ಮರೆಯಾಗುವ ಧರ್ಮವಲ್ಲ. ಈ ಸಂಸ್ಕೃತಿಯ ಮೇಲೆ ಇತಿಹಾಸದುದ್ದಕ್ಕೂ ಅನೇಕ ಆಘಾತಗಳು ಎದುರಾಗಿದ್ದರೂ, ಇದನ್ನು ನಾಶ ಮಾಡಲು ಅಥವಾ ಕಲುಷಿತಗೊಳಿಸಲು ಯಾರಿಂದಲೂ ಸಾಧ್ಯವಾಗಿಲ್ಲ, ಮುಂದೆಯೂ ಸಾಧ್ಯವಿಲ್ಲ” ಎಂದು ಬಾಳೆಹೊನ್ನೂರು ಶ್ರೀಮದ್ ರಂಭಾಪುರಿ ಡಾ. ವೀರಸೋಮೇಶ್ವರ ಜಗದ್ಗುರುಗಳು ಹೇಳಿದರು.
ಬೆಂಗಳೂರಿನ ಶ್ರೀ ಬಸವೇಶ್ವರ ಸುಜ್ಞಾನ ಮಂಟಪದಲ್ಲಿ ಆಯೋಜಿಸಲಾಗಿದ್ದ 24ನೇ ವರ್ಷದ ಇಷ್ಟಲಿಂಗ ಮಹಾಪೂಜೆ ಮತ್ತು ಜನಜಾಗೃತಿ ಧರ್ಮ ಸಮಾರಂಭದ ದಿವ್ಯ ಸಾನಿಧ್ಯ ವಹಿಸಿ ಅವರು ಆಶೀರ್ವಚನ ನೀಡಿದರು.
“ಸುಳ್ಳು ಎಷ್ಟೇ ಬಾರಿ ಹೇಳಿದರೂ ಸತ್ಯವಾಗುವುದಿಲ್ಲ; ವೀರಶೈವ ಧರ್ಮದ ಸತ್ಯವನ್ನು ಯಾರೂ ಮರೆಮಾಚಲು ಸಾಧ್ಯವಿಲ್ಲ”: ಶ್ರೀ ರಂಭಾಪುರಿ ಜಗದ್ಗುರುಗಳು
“ಸುಳ್ಳನ್ನು ನೂರು ಬಾರಿ ಪುನರಾವರ್ತಿಸಿದರೆ ಅದು ಸತ್ಯವಾಗುತ್ತದೆ ಎಂಬ ಭ್ರಮೆಯಲ್ಲಿ ಕೆಲವರಿದ್ದಾರೆ. ಆದರೆ ಸುಳ್ಳನ್ನು ನೂರು ಬಾರಿಯಲ್ಲ, ಸಾವಿರ ಬಾರಿ ಹೇಳಿದರೂ ಅದು ಸುಳ್ಳೇ. ಸತ್ಯವು ಎಂದಿಗೂ ಸ್ವಯಂಪ್ರಕಾಶಿತ ಹಾಗೂ ಅಚಲ.”
ಈ ಸತ್ಯಕ್ಕೆ ಪೂರಕವಾಗಿ ಜಗದ್ಗುರುಗಳು ಒಂದು ಸ್ವಾರಸ್ಯಕರ ಪ್ರಸಂಗವನ್ನು ನೆನಪಿಸಿದರು: “ಹುಡುಗನೊಬ್ಬ ತನ್ನ ಜೀವಮಾನದಲ್ಲಿ ದೇವಸ್ಥಾನದ ಕಡೆ ಮುಖ ಮಾಡದವನು, ಒಂದು ದಿನ ದೇವರ ಮುಂದೆ ನಿಂತು ಅತ್ಯಂತ ಭಕ್ತಿಯಿಂದ ಕೈಮುಗಿದು ಪ್ರಾರ್ಥಿಸುತ್ತಿದ್ದ. ತಾಯಿ ಕುತೂಹಲದಿಂದ ಗೋಡೆಗೆ ಕಿವಿಗೊಟ್ಟು ಕೇಳಿದಾಗ, ಆತ ‘ದೇವರೇ, ಭಾರತದ ರಾಜಧಾನಿಯನ್ನು ಬೆಂಗಳೂರನ್ನಾಗಿ ಮಾಡಿ ದೇವರೇ’ ಎಂದು ಬೇಡುತ್ತಿದ್ದ! ತಾಯಿ ಆಶ್ಚರ್ಯದಿಂದ, ‘ಮಗನೇ, ದೇಶದ ರಾಜಧಾನಿ ದೆಹಲಿ ಇರಬೇಕಾದರೆ ಇಂತಹ ಪ್ರಾರ್ಥನೆ ಏಕೆ?’ ಎಂದು ಕೇಳಿದಾಗ, ಮಗ ‘ಅದಲ್ಲ ಅಮ್ಮ, ನಿನ್ನೆ ಪರೀಕ್ಷೆಯಲ್ಲಿ ನಾನು ಭಾರತದ ರಾಜಧಾನಿ ಬೆಂಗಳೂರು ಎಂದು ತಪ್ಪು ಬರೆದು ಬಂದಿದ್ದೇನೆ. ನಾನು ಬರೆದದ್ದು ಸತ್ಯವಾಗಲಿ ಎಂದು ದೇವರಲ್ಲಿ ಕೇಳುತ್ತಿದ್ದೇನೆ!’ ಎಂದನಂತೆ.”
“ಆ ಹುಡುಗ ಬೇಡಿದ ತಕ್ಷಣ ಭೌಗೋಳಿಕ ಸತ್ಯ ಬದಲಾಗಲು ಹೇಗೆ ಸಾಧ್ಯವಿಲ್ಲವೋ, ಹಾಗೆಯೇ ವೀರಶೈವ ಧರ್ಮದ ಇತಿಹಾಸದ ವಿಚಾರದಲ್ಲೂ ಸತ್ಯವನ್ನು ಮರೆಮಾಚಲು ಸಾಧ್ಯವಿಲ್ಲ. ಹರಶಿವನ ಆದೇಶದಂತೆ ಭೂಮಿಗೆ ಅವತರಿಸಿದ ಶ್ರೀ ಜಗದ್ಗುರು ರೇಣುಕಾದಿ ಪಂಚಾಚಾರ್ಯರು, ಸಕಲ ಮಾನವಕುಲದ ಶ್ರೇಯಸ್ಸಿಗಾಗಿ ಸ್ಥಾಪಿಸಿದ ವೀರಶೈವ ಮತ ಸಿದ್ಧಾಂತ ಮತ್ತು ಇತಿಹಾಸವನ್ನು ಯಾರೂ ಎಂದಿಗೂ ಬದಲಾಯಿಸಲು ಸಾಧ್ಯವಿಲ್ಲ” ಎಂದು ಹೇಳಿದರು.
“ದೃಷ್ಟಿ ಬದಲಾದರೆ ಸಮಾಜ ಬದಲಾಗುತ್ತದೆ; ಸಮಾಜ ಬದಲಾದರೆ ದೇಶದ ಭವಿಷ್ಯ ಉಜ್ವಲವಾಗುತ್ತದೆ”: ಶ್ರೀ ರಂಭಾಪುರಿ ಜಗದ್ಗುರುಗಳು
“ಇಂದು ನಾವು ಹೆಸರಿಗಷ್ಟೇ ‘ಜಾತ್ಯತೀತ ರಾಷ್ಟ್ರ’ ಎಂದು ಹೆಮ್ಮೆಪಡುತ್ತೇವೆ. ಆದರೆ, ಪ್ರಾಯೋಗಿಕವಾಗಿ ಅನೇಕ ರಾಜಕೀಯ ನಿರ್ಧಾರಗಳು ಜಾತಿಯ ಆಧಾರದ ಮೇಲೆಯೇ ನಡೆಯುತ್ತಿರುವುದು ವಿಷಾದನೀಯ. ವಾಸ್ತವದಲ್ಲಿ ಪ್ರತಿಯೊಂದು ಜಾತಿ ಹಾಗೂ ಸಮುದಾಯದಲ್ಲೂ ಆರ್ಥಿಕವಾಗಿ ಹಿಂದುಳಿದವರಿದ್ದಾರೆ. ಉನ್ನತ ಕುಲದಲ್ಲಿ ಜನಿಸಿದ ಮಾತ್ರಕ್ಕೆ ಯಾರಿಗೂ ಹಸಿವು ಅಥವಾ ಬಡತನ ಇರುವುದಿಲ್ಲ ಎನ್ನಲು ಸಾಧ್ಯವಿಲ್ಲ.”
“ಆದ್ದರಿಂದ ರಾಜಕಾರಣಿಗಳು ಮತ್ತು ಸಮಾಜದ ಮುಖಂಡರು ಜಾತಿ-ಧರ್ಮದ ಭೇದವಿಲ್ಲದೆ ಆರ್ಥಿಕವಾಗಿ ದುರ್ಬಲವಾಗಿರುವ ಎಲ್ಲ ವರ್ಗದ ಜನರನ್ನು ಮೇಲಕ್ಕೆತ್ತುವ ಹಾಗೂ ಪ್ರೋತ್ಸಾಹಿಸುವ ಪ್ರಾಮಾಣಿಕ ಪ್ರಯತ್ನ ಮಾಡಬೇಕು. ಆರ್ಥಿಕ ಸಮಾನತೆ ಸಾಧನೆಯಾದಾಗ ಮಾತ್ರ ಜಾತಿ ಸಂಘರ್ಷಗಳು ಹಾಗೂ ಧರ್ಮದ ಹೆಸರಿನಲ್ಲಿ ನಡೆಯುವ ಕಲಹಗಳಿಗೆ ಶಾಶ್ವತ ಪರಿಹಾರ ಕಂಡುಕೊಳ್ಳಲು ಸಾಧ್ಯ” ಎಂದು ಶ್ರೀಗಳು ಹೇಳಿದರು.
ಮಹಾಭಾರತದ ಪ್ರಸಂಗವನ್ನು ಉಲ್ಲೇಖಿಸಿದ ಅವರು, “ನಮ್ಮ ದೃಷ್ಟಿಕೋನ ಬದಲಾಗಬೇಕು. ಧರ್ಮರಾಯನು ಜಗತ್ತನ್ನೆಲ್ಲ ಹುಡುಕಿದರೂ ಒಬ್ಬನೇ ಒಬ್ಬ ಕೆಟ್ಟ ವ್ಯಕ್ತಿ ಕಾಣಲಿಲ್ಲ; ಏಕೆಂದರೆ ಅವನ ದೃಷ್ಟಿ ಸಕಾರಾತ್ಮಕವಾಗಿತ್ತು. ಆದರೆ, ಅದೇ ಜಗತ್ತಿನಲ್ಲಿ ಹುಡುಕಿದ ದುರ್ಯೋಧನನಿಗೆ ಎಲ್ಲರೂ ಕೆಟ್ಟವರಾಗಿಯೇ ಕಂಡರು. ನಮ್ಮ ದೃಷ್ಟಿ ಪರಿವರ್ತನೆಯಾದರೆ ಸಮಾಜ, ಧರ್ಮ ಮತ್ತು ದೇಶಕ್ಕೆ ಉಜ್ವಲ ಭವಿಷ್ಯ ನಿರ್ಮಾಣವಾಗುತ್ತದೆ” ಎಂದು ಹೇಳಿದರು.
ಅಸ್ಪೃಶ್ಯೋದ್ಧಾರಕ್ಕೆ ನಾಂದಿ ಹಾಡಿದ ಆದಿ ಜಗದ್ಗುರು ರೇಣುಕಾಚಾರ್ಯರು
“ಜಗದ್ಗುರು ರೇಣುಕಾದಿ ಪಂಚಾಚಾರ್ಯರು ಸಮಾಜವನ್ನು ಜಾತಿ ಅಥವಾ ಭೇದಭಾವದ ದೃಷ್ಟಿಯಿಂದ ನೋಡಿದವರಲ್ಲ. ಅವರು ಮನುಷ್ಯನಲ್ಲಿರುವ ಗುರುಭಕ್ತಿ, ಧರ್ಮನಿಷ್ಠೆ ಹಾಗೂ ಆಧ್ಯಾತ್ಮಿಕ ಅರ್ಹತೆಯನ್ನೇ ಮುಖ್ಯವಾಗಿ ಪರಿಗಣಿಸಿ ಆಶೀರ್ವದಿಸಿದರು.”
ಇತಿಹಾಸದ ಪುಟಗಳನ್ನು ಅವಲೋಕಿಸಿದರೆ, ಕದಳಿಮಲದ ಅಗಸ್ತ್ಯ ಮಹರ್ಷಿಗಳಿಗೆ ಜಗದ್ಗುರು ರೇಣುಕಾಚಾರ್ಯರು ಮೊದಲ ಬಾರಿಗೆ ಶಿವಾದ್ವೈತ ಸಿದ್ಧಾಂತವನ್ನು ಬೋಧಿಸುವ ಮೂಲಕ ಅಸ್ಪೃಶ್ಯೋದ್ಧಾರದ ಸಂದೇಶವನ್ನು ಸಾರಿದ ಮಹತ್ವದ ಉದಾಹರಣೆ ಕಂಡುಬರುತ್ತದೆ. ಈ ಮೂಲಕ ಸಮಾಜದಲ್ಲಿ ಸಮಾನತೆಯ ಚಿಂತನೆಗೆ ಅವರು ನಾಂದಿ ಹಾಡಿದರು ಎಂದು ಶ್ರೀಗಳು ಹೇಳಿದರು.
ಸಾಮಾಜಿಕ ಸಮಾನತೆಯ ಪರಿಕಲ್ಪನೆಯನ್ನು ಕಾರ್ಯರೂಪಕ್ಕೆ ತಂದ ಮೊದಲ ಶ್ರೇಯಸ್ಸು ಜಗದ್ಗುರು ರೇಣುಕಾಚಾರ್ಯರಿಗೆ ಸಲ್ಲುತ್ತದೆ ಎಂದು ಅವರು ಅಭಿಪ್ರಾಯಪಟ್ಟರು. “ಮನುಷ್ಯನು ತನ್ನ ಆಧ್ಯಾತ್ಮಿಕ ಸಾಧನೆ, ಧರ್ಮಾಚರಣೆ ಮತ್ತು ಸದ್ಗುಣಗಳ ಮೂಲಕವೇ ಶ್ರೇಯಸ್ಸನ್ನು ಹೊಂದಬೇಕು; ಕೇವಲ ಜಾತಿಯ ಆಧಾರದ ಮೇಲೆ ವ್ಯಕ್ತಿಯ ಮೌಲ್ಯವನ್ನು ನಿರ್ಧರಿಸಬಾರದು ಎಂಬುದೇ ವೀರಶೈವ ಸಿದ್ಧಾಂತದ ಮೂಲ ಸಂದೇಶವಾಗಿದೆ” ಎಂದು ಜಗದ್ಗುರುಗಳು ತಿಳಿಸಿದರು.
“ಬಾಲ್ಯದಲ್ಲಿ ಸಂಸ್ಕಾರ, ಯೌವನದಲ್ಲಿ ಸ್ನೇಹದ ಮಾರ್ಗದರ್ಶನ—ಇದೇ ಆದರ್ಶ ಪೋಷಕರ ನಿಜವಾದ ಹೊಣೆಗಾರಿಕೆ”
“ಇಂದಿನ ಪೀಳಿಗೆಯಲ್ಲಿ ಸಂಸ್ಕಾರಗಳ ಕೊರತೆ ಕಾಣಿಸುತ್ತಿದೆ. ಹೆತ್ತವರು ಮಕ್ಕಳಿಗೆ ಬಾಲ್ಯದಲ್ಲಿಯೇ ಸೂಕ್ತ ಮಾರ್ಗದರ್ಶನ ಮತ್ತು ಉತ್ತಮ ಸಂಸ್ಕಾರಗಳನ್ನು ನೀಡದಿದ್ದರೆ, ಸಮಾಜ ಹಾಗೂ ಧರ್ಮ-ಸಂಸ್ಕೃತಿಗಳು ಅವನತಿಯತ್ತ ಸಾಗುವ ಅಪಾಯವಿದೆ” ಎಂದು ರಂಭಾಪುರಿ ಶ್ರೀಗಳು ಕಳಕಳಿ ವ್ಯಕ್ತಪಡಿಸಿದರು. ಈ ಸಂದರ್ಭದಲ್ಲಿ ಅವರು ಸುಭಾಷಿತದಲ್ಲಿರುವ ಪ್ರಸಿದ್ಧ ಶ್ಲೋಕವನ್ನು ಉಲ್ಲೇಖಿಸಿದರು:
ಪಂಚ ವರ್ಷಾಣಿ ಲಾಲಯೇತ್ ದಶ ವರ್ಷಾಣಿ ತಾಡಯೇತ್ ।
ಪ್ರಾಪ್ತೇ ತು ಷೋಡಶೇ ವರ್ಷೇ ಪುತ್ರಂ ಮಿತ್ರವದಾಚರೇತ್ ॥
ಈ ಶ್ಲೋಕದ ಅರ್ಥವನ್ನು ವಿವರಿಸಿದ ಅವರು, “ಮಗುವಿಗೆ ಐದು ವರ್ಷ ತುಂಬುವವರೆಗೆ ಹೂವಿನಂತೆ ಮಮತೆಯಿಂದ ಸಾಕಬೇಕು. ಐದರಿಂದ ಹದಿನೈದು ವರ್ಷಗಳವರೆಗೆ ಶಿಸ್ತು, ಸಂಸ್ಕಾರ ಮತ್ತು ಮೌಲ್ಯಗಳನ್ನು ಕಲಿಸಬೇಕು. ಮಗು ತಪ್ಪು ದಾರಿಯಲ್ಲಿ ಸಾಗಿದರೆ ಪ್ರೀತಿಯಿಂದ ತಿದ್ದಿ ಸರಿದಾರಿಗೆ ತರಬೇಕು. ಈ ವಯಸ್ಸಿನಲ್ಲಿ ಬೆಳೆಸುವ ಸಂಸ್ಕಾರವೇ ಜೀವನಪರ್ಯಂತ ರಕ್ಷಣಾ ಕವಚವಾಗಿರುತ್ತದೆ. ಹದಿನಾರನೇ ವರ್ಷಕ್ಕೆ ಕಾಲಿಟ್ಟ ಬಳಿಕ ಮಕ್ಕಳನ್ನು ಹೊಡೆಯುವುದಾಗಲಿ, ಬೈಯುವುದಾಗಲಿ ಮಾಡದೆ, ಒಬ್ಬ ಆತ್ಮೀಯ ಸ್ನೇಹಿತನಂತೆ ಪ್ರೀತಿ, ವಿಶ್ವಾಸ ಮತ್ತು ಮಾರ್ಗದರ್ಶನದೊಂದಿಗೆ ಮುನ್ನಡೆಸಬೇಕು” ಎಂದು ಹೇಳಿದರು.
“ವಿಭಜನೆಯಲ್ಲ, ವಿಶ್ವಬಂಧುತ್ವವೇ ಬಸವಣ್ಣನವರ ಸಂದೇಶ; ಸಮಾಜದಲ್ಲಿ ಒಗ್ಗಟ್ಟು ಮತ್ತು ಸೌಹಾರ್ದ ಬೆಳೆಸೋಣ” ಎಂದು ರಂಭಾಪುರಿ ಶ್ರೀಗಳು ಕರೆ
ಜಗದ್ಗುರು ರೇಣುಕಾದಿ ಪಂಚಾಚಾರ್ಯರು ಹಾಗೂ 12ನೇ ಶತಮಾನದ ಶಿವಶರಣರು ಇಡೀ ಸಮಾಜವನ್ನು ಪ್ರೀತಿ, ಸಮಾನತೆ ಮತ್ತು ಸೌಹಾರ್ದದ ತತ್ವಗಳ ಮೂಲಕ ಮುನ್ನಡೆಸಿದ ಮಹನೀಯರು. ಶಿವಶರಣರು ಸಮಾಜದಲ್ಲಿದ್ದ ಜಾತಿ ಭೇದ ಮತ್ತು ಅಸಮಾನತೆಯನ್ನು ದೂರ ಮಾಡಿ, ಮಾನವೀಯತೆ ಹಾಗೂ ಆದರ್ಶ ಗುಣಗಳನ್ನು ಬೆಳೆಸುವ ಸಂದೇಶವನ್ನು ಸಾರಿದರು. ಜಗಜ್ಯೋತಿ ಬಸವಣ್ಣನವರು ತಮ್ಮ ವಚನದಲ್ಲಿ,
“ಇವನಾರವ ಇವನಾರವ ನೆಂದೆನಿಸದಿರಯ್ಯ,
ಇವ ನಮ್ಮವ ಇವ ನಮ್ಮವ ನೆಂದೆನಿಸಯ್ಯ.
ಕೂಡಲಸಂಗಮದೇವಾ, ನಿಮ್ಮ ಮನೆಯ ಮಗನೆಂದೆನಿಸಯ್ಯ.”
ಎಂದು ವಿಶ್ವಬಂಧುತ್ವ, ಸಮಾನತೆ ಮತ್ತು ಮಾನವೀಯತೆಯ ಶಾಶ್ವತ ಸಂದೇಶವನ್ನು ನೀಡಿದ್ದಾರೆ ಎಂದು ಶ್ರೀಗಳು ಹೇಳಿದರು.
“ಇಂತಹ ವಿಶ್ವಮಾನವೀಯ ಸಂದೇಶ ನೀಡಿದ ಬಸವಣ್ಣನವರ ಹೆಸರನ್ನೇ ಹೇಳಿಕೊಳ್ಳುವ ಕೆಲವರು ಇಂದು ಸ್ವಾರ್ಥಕ್ಕಾಗಿ ‘ವೀರಶೈವ’ ಮತ್ತು ‘ಲಿಂಗಾಯತ’ ಎಂಬ ದ್ವಂದ್ವಗಳನ್ನು ಸೃಷ್ಟಿಸುತ್ತಿದ್ದಾರೆ. ಸಮಾಜದಲ್ಲಿ ಅನಗತ್ಯ ಗೊಂದಲ, ಭಿನ್ನಾಭಿಪ್ರಾಯ ಹಾಗೂ ಸಂಘರ್ಷಗಳನ್ನು ಹುಟ್ಟುಹಾಕುವುದು ಸಮಾಜದ ಹಿತದೃಷ್ಟಿಯಿಂದ ಎಂದಿಗೂ ಶ್ರೇಯಸ್ಕರವಲ್ಲ. ಒಗ್ಗಟ್ಟು, ಸೌಹಾರ್ದ ಮತ್ತು ಪರಸ್ಪರ ಗೌರವದ ಮೂಲಕವೇ ಸಮಾಜದ ಯಶಸ್ಸು ಸಾಧ್ಯ” ಎಂದು ರಂಭಾಪುರಿ ಶ್ರೀಗಳು ವಿಷಾದ ವ್ಯಕ್ತಪಡಿಸಿದರು.
‘ಹುಸಿಯ ನುಡಿಯಲು ಬೇಡ’ ಎಂಬ ಬಸವಣ್ಣನವರ ಒಂದೇ ಒಂದು ತತ್ವವನ್ನು ಪಾಲಿಸಿದರೂ ಸಮಾಜದಲ್ಲಿ ಸೌಹಾರ್ದ ಮತ್ತು ಶಾಂತಿ ನೆಲೆಸುತ್ತದೆ: ರಂಭಾಪುರಿ ಶ್ರೀಗಳು
ಜಗದ್ಗುರು ರೇಣುಕಾಚಾರ್ಯರು ಸಿದ್ಧಾಂತ ಶಿಖಾಮಣಿ ಗ್ರಂಥದಲ್ಲಿ ಅಹಿಂಸೆಯಿಂದ ಧ್ಯಾನದವರೆಗೆ ವ್ಯಾಪಿಸಿರುವ ದಶಧರ್ಮ ಸೂತ್ರಗಳನ್ನು ಮಾನವಕುಲಕ್ಕೆ ಬೋಧಿಸಿದ್ದಾರೆ. ಜಗತ್ತಿನ ಅನೇಕ ಧರ್ಮಗಳು ಈ ಸೂತ್ರಗಳಲ್ಲಿನ ಒಂದೊಂದು ತತ್ವವನ್ನು ಅಳವಡಿಸಿಕೊಂಡು ವಿಶ್ವವ್ಯಾಪಿ ಪ್ರಭಾವ ಬೀರಿವೆ. ಕೇವಲ ಅಹಿಂಸೆಯನ್ನು ಪರಮ ತತ್ವವಾಗಿಸಿಕೊಂಡು ಜೈನ ಮತ್ತು ಬೌದ್ಧ ಧರ್ಮಗಳು ಜಗತ್ತಿನಾದ್ಯಂತ ಪ್ರಸಿದ್ಧಿ ಪಡೆದವು. ಸತ್ಯ ಮತ್ತು ಅಹಿಂಸೆಯನ್ನು ಅಸ್ತ್ರವನ್ನಾಗಿಸಿಕೊಂಡು ಮಹಾತ್ಮಾ ಗಾಂಧೀಜಿಯವರು ದೇಶಕ್ಕೆ ಸ್ವಾತಂತ್ರ್ಯ ತಂದುಕೊಟ್ಟರು. ಸತ್ಯವನ್ನೇ ಜೀವನದ ಆದರ್ಶವನ್ನಾಗಿಸಿಕೊಂಡ ಹರಿಶ್ಚಂದ್ರನು ಇತಿಹಾಸದಲ್ಲಿ ಅಮರನಾದನು. ಒಂದು ಅಥವಾ ಎರಡು ತತ್ವಗಳ ಪಾಲನೆಯೇ ಇಷ್ಟೊಂದು ಪ್ರಭಾವ ಬೀರಬೇಕಾದರೆ, ಜಗದ್ಗುರು ರೇಣುಕಾಚಾರ್ಯರು ಬೋಧಿಸಿದ ದಶಧರ್ಮ ಸೂತ್ರಗಳನ್ನು ಜೀವನದಲ್ಲಿ ಅಳವಡಿಸಿಕೊಂಡರೆ ಸಮಾಜದ ಸರ್ವಾಂಗೀಣ ಅಭಿವೃದ್ಧಿ ಸಾಧ್ಯ ಎಂದು ಶ್ರೀಗಳು ಹೇಳಿದರು.
ಮುಂದುವರಿದು, 12ನೇ ಶತಮಾನದಲ್ಲಿ ಭಕ್ತಿ ಭಂಡಾರಿ ಬಸವಣ್ಣನವರು ಇದೇ ಆಶಯವನ್ನು ತಮ್ಮ ಅಚ್ಚಗನ್ನಡದ ಸಪ್ತ ಸೂತ್ರಗಳ ಮೂಲಕ ಅತ್ಯಂತ ಸರಳವಾಗಿ ತಿಳಿಸಿರುವುದನ್ನು ಉಲ್ಲೇಖಿಸಿದರು:
“ಕಳಬೇಡ, ಕೊಲಬೇಡ, ಹುಸಿಯ ನುಡಿಯಲು ಬೇಡ,
ಮುನಿಯಬೇಡ, ಅನ್ಯರಿಗೆ ಅಸಹ್ಯ ಪಡಬೇಡ,
ತನ್ನ ಬಣ್ಣಿಸಬೇಡ, ಇದಿರು ಹಳಿಯಲು ಬೇಡ.
ಇದೇ ಅಂತರಂಗ ಶುದ್ಧಿ, ಇದೇ ಬಹಿರಂಗ ಶುದ್ಧಿ,
ಇದೇ ನಮ್ಮ ಕೂಡಲಸಂಗಮದೇವನೊಲಿಸುವ ಪರಿ.”
“ಇಂದಿನ ಜನರು ಬಸವಣ್ಣನವರ ಸಪ್ತ ಸೂತ್ರಗಳನ್ನೆಲ್ಲ ಪಾಲಿಸಬೇಕೆಂದು ನಾವು ಒತ್ತಾಯಿಸುತ್ತಿಲ್ಲ. ಆದರೆ, ಅವುಗಳಲ್ಲಿನ ಒಂದೇ ಒಂದು ತತ್ವವಾದ ‘ಹುಸಿಯ ನುಡಿಯಲು ಬೇಡ’ (ಸುಳ್ಳು ಹೇಳಬೇಡ) ಎಂಬ ಸಂದೇಶವನ್ನು ಪ್ರಾಮಾಣಿಕವಾಗಿ ಪಾಲಿಸಿದರೂ ಸಾಕು; ಸಮಾಜದಲ್ಲಿನ ಮತ್ತು ಧರ್ಮದಲ್ಲಿನ ಅನೇಕ ಸಂಘರ್ಷಗಳು ತಾವಾಗಿಯೇ ನಿವಾರಣೆಯಾಗುತ್ತವೆ” ಎಂದು ಶ್ರೀಗಳು ಅರ್ಥಪೂರ್ಣವಾಗಿ ಹೇಳಿದರು.
ಸಂಖ್ಯೆ ‘ಒಂದು’ ಮತ್ತು ‘ಸೊನ್ನೆ’ಯ ಗಣಿತೀಯ ತತ್ವದ ಮೂಲಕ ಧರ್ಮದ ಮೂಲ ಪರಂಪರೆಯ ಮಹತ್ವ
“ಸಂಖ್ಯೆ ‘ಒಂದು’ ಎಂಬ ಅಂಕಿಯ ಮುಂದೆ ಸೊನ್ನೆಗಳನ್ನು ಸೇರಿಸುತ್ತಾ ಹೋದಂತೆ ಅದರ ಮೌಲ್ಯ ಹತ್ತು, ನೂರು, ಸಾವಿರ, ಲಕ್ಷ ಎಂದು ಹೆಚ್ಚುತ್ತಾ ಹೋಗುತ್ತದೆ. ಆದರೆ ಆರಂಭದಲ್ಲಿರುವ ‘ಒಂದು’ ಎಂಬ ಅಂಕಿಯನ್ನೇ ತೆಗೆದುಹಾಕಿದರೆ, ಉಳಿದ ಸೊನ್ನೆಗಳಿಗೆ ಯಾವುದೇ ಮೌಲ್ಯ ಇರುವುದಿಲ್ಲ.”
ವ್ಯವಹಾರಸ್ಥರ ಉದಾಹರಣೆ ನೀಡುತ್ತಾ ಶ್ರೀಗಳು ಈ ಅರ್ಥಪೂರ್ಣ ತತ್ವವನ್ನು ವಿವರಿಸಿದರು.
“ಅದೇ ರೀತಿ, ವೀರಶೈವ ಧರ್ಮದಲ್ಲಿಯೂ ‘ಒಂದು’ ಎಂಬ ಅಂಕಿಯ ಸ್ಥಾನದಲ್ಲಿ ಜಗದ್ಗುರು ರೇಣುಕಾದಿ ಪಂಚಾಚಾರ್ಯರ ಮೂಲ ಪರಂಪರೆಯನ್ನು ನೆಲೆಗೊಳಿಸಿಕೊಂಡು, ಅದರೊಂದಿಗೆ 12ನೇ ಶತಮಾನದ ಶಿವಶರಣರ ತತ್ವ, ಆದರ್ಶ ಮತ್ತು ಸಂದೇಶಗಳನ್ನು ಸಮನ್ವಯಗೊಳಿಸಿಕೊಂಡು ಸಾಗಿದರೆ, ಆ ಧರ್ಮದ ಮೌಲ್ಯ ಮತ್ತು ವೈಶಿಷ್ಟ್ಯ ಇನ್ನಷ್ಟು ಉಜ್ವಲವಾಗುತ್ತದೆ. ಇಂತಹ ಸಮಗ್ರ ತತ್ವಸಂಪತ್ತನ್ನು ಹೊಂದಿರುವ ವೀರಶೈವ ಧರ್ಮಕ್ಕೆ ಜಗತ್ತಿನಲ್ಲಿ ಸರಿಸಾಟಿಯಾದ ಮತ್ತೊಂದು ಧರ್ಮ ಇಲ್ಲ” ಎಂದು ಶ್ರೀಗಳು ಅಭಿಪ್ರಾಯಪಟ್ಟರು.
ಒಳಗಿನ ಭಿನ್ನಾಭಿಪ್ರಾಯಗಳ ನಿವಾರಣೆ ಮತ್ತು ಪಂಚಪೀಠಗಳ ಸಾಮರಸ್ಯದ ಸಂದೇಶ
ವೀರಶೈವ ಧರ್ಮಕ್ಕೆ ಇತ್ತೀಚಿನ ದಿನಗಳಲ್ಲಿ ಹೊರಗಿನ ಸವಾಲುಗಳಿಗಿಂತ ಆಂತರಿಕ ಭಿನ್ನಾಭಿಪ್ರಾಯಗಳೇ ಹೆಚ್ಚು ಆತಂಕಕಾರಿ ಎಂದು ಜಗದ್ಗುರುಗಳು ಅಭಿಪ್ರಾಯಪಟ್ಟರು.
ಇಂತಹ ಸಂದರ್ಭಗಳಲ್ಲಿ ಭಿನ್ನಾಭಿಪ್ರಾಯ ಹೊಂದಿರುವವರನ್ನು ದ್ವೇಷದಿಂದಲ್ಲ, ಬದಲಾಗಿ ವಿವೇಕ, ಚಾಣಾಕ್ಷತೆ ಮತ್ತು ಸೈದ್ಧಾಂತಿಕ ಸ್ಪಷ್ಟತೆಯ ಮೂಲಕ ಮನವರಿಕೆ ಮಾಡಿ ಸನ್ಮಾರ್ಗದತ್ತ ಕೊಂಡೊಯ್ಯಬೇಕಾಗಿದೆ. ವಾಸ್ತವಿಕ ಸತ್ಯವನ್ನು ಅರಿತ ಭಕ್ತರ ಮುಂದೆ ಯಾವುದೇ ಕುತಂತ್ರ ಅಥವಾ ಅಪಪ್ರಚಾರ ಹೆಚ್ಚು ಕಾಲ ಯಶಸ್ವಿಯಾಗುವುದಿಲ್ಲ ಎಂದು ಅವರು ಹೇಳಿದರು.
“ಬೆಳಗುವ ಸೂರ್ಯನಿಗೆ ಮಣ್ಣು ಎರಚಲು ಯತ್ನಿಸಿದರೆ, ಆ ಮಣ್ಣು ಸೂರ್ಯನಿಗೆ ತಾಗುವುದಿಲ್ಲ; ಬದಲಿಗೆ ಎರಚಿದವನ ಕಣ್ಣಿಗೇ ಬೀಳುತ್ತದೆ. ಅದೇ ರೀತಿ ಪಂಚಪೀಠಗಳನ್ನು ಸಮಾಜದ ಮೂಲವಾಹಿನಿಯಿಂದ ದೂರವಿಡುವ ಅಥವಾ ಸಮಾಜದಲ್ಲಿ ಭಿನ್ನತೆ ಉಂಟುಮಾಡುವ ಯಾವುದೇ ಪ್ರಯತ್ನಗಳು ಯಶಸ್ವಿಯಾಗುವುದಿಲ್ಲ. ಇತ್ತೀಚಿನ ದಿನಗಳಲ್ಲಿ ಧರ್ಮವನ್ನು ಒಗ್ಗೂಡಿಸುವ ಪ್ರಯತ್ನಗಳು ನಡೆಯುತ್ತಿರುವುದು ಆಶಾದಾಯಕ ಬೆಳವಣಿಗೆಯಾಗಿದೆ. ಪಂಚಪೀಠಗಳ ಜಗದ್ಗುರುಗಳು ಹಾಗೂ ಶಾಖಾಮಠಗಳ ಮಠಾಧೀಶರು ಈ ಸಾಮರಸ್ಯದ ಮನೋಭಾವವನ್ನು ಸ್ವಾಗತಿಸುತ್ತಿದ್ದು, ಧರ್ಮ ಸಂರಕ್ಷಣೆ ಮತ್ತು ಸಮಾಜದ ಏಕತೆಗಾಗಿ ಯಾವುದೇ ತ್ಯಾಗಕ್ಕೂ ಸದಾ ಸಿದ್ಧರಾಗಿದ್ದಾರೆ” ಎಂದು ಹೇಳಿದರು.
ಶ್ರೀ ರಂಭಾಪುರಿ ಪೀಠ ಎಲ್ಲ ಮಠಗಳೊಂದಿಗೆ ಸಾಮರಸ್ಯದಿಂದ ಕಾರ್ಯನಿರ್ವಹಿಸುತ್ತದೆ
ಶ್ರೀ ರಂಭಾಪುರಿ ಜಗದ್ಗುರುಗಳು ಪಂಚಪೀಠಗಳ ಪರಂಪರೆಯನ್ನು ಗೌರವಿಸುವುದರ ಜೊತೆಗೆ ರಾಜ್ಯದ ಅನೇಕ ಮಠಾಧೀಶರೊಂದಿಗೆ ಉತ್ತಮ ಬಾಂಧವ್ಯ ಹೊಂದಿದ್ದಾರೆ. ಧಾರ್ಮಿಕ, ಸಾಮಾಜಿಕ ಹಾಗೂ ಶೈಕ್ಷಣಿಕ ಕ್ಷೇತ್ರಗಳಲ್ಲಿ ಎದುರಾಗುವ ಸವಾಲುಗಳ ಕುರಿತು ಸಮಾಲೋಚನೆ ನಡೆಸಿ ಸಮಾಜಕ್ಕೆ ಸೂಕ್ತ ಮಾರ್ಗದರ್ಶನ ನೀಡುವ ಕಾರ್ಯವನ್ನು ನಿರಂತರವಾಗಿ ಮಾಡುತ್ತಿದ್ದಾರೆ ಎಂದು ಹೇಳಿದರು.
ಧರ್ಮ ಮತ್ತು ಸಂಸ್ಕೃತಿಯ ಸಂರಕ್ಷಣೆಗೆ ಪೀಠಗಳು ತಮ್ಮದೇ ಆದ ತ್ಯಾಗ, ಬದ್ಧತೆ ಮತ್ತು ಉದಾರ ಮನೋಭಾವದಿಂದ ಸೇವೆ ಸಲ್ಲಿಸುತ್ತಿವೆ ಎಂದು ಅವರು ತಿಳಿಸಿದರು.
ಶಿವಮೊಗ್ಗದ ಪತ್ರಕರ್ತ ಕೆ.ಎಂ. ಸತೀಶ್ ಗೌಡ ಸೇರಿದಂತೆ ನಾಲ್ವರಿಗೆ ರಂಭಾಪುರಿ ಜಗದ್ಗುರುಗಳಿಂದ ಗೌರವ ಸಮರ್ಪಣೆ
ಸಮಾರಂಭದಲ್ಲಿ ಬಾಳೆಹೊನ್ನೂರು ಶ್ರೀ ರಂಭಾಪುರಿ ಪೀಠದ ಜಗದ್ಗುರು ಡಾ. ವೀರಸೋಮೇಶ್ವರ ಶಿವಾಚಾರ್ಯ ಮಹಾಸ್ವಾಮೀಜಿಗಳು, ಪತ್ರಿಕಾ ಹಾಗೂ ಸಾಮಾಜಿಕ ಕ್ಷೇತ್ರದಲ್ಲಿ ಸಲ್ಲಿಸುತ್ತಿರುವ ಸೇವೆಯನ್ನು ಗುರುತಿಸಿ, ಶಿವಮೊಗ್ಗದ ಪತ್ರಕರ್ತ ಕೆ.ಎಂ. ಸತೀಶ್ ಗೌಡ, ಎನ್.ಎಸ್. ಆಂಜನೇಯ (ನಿಂಬೇಗೊಂದಿ, ಬೆಂಗಳೂರು), ಹೆಚ್. ಈಶ್ವರ್ (ಬೆಂಗಳೂರು) ಹಾಗೂ ಶಿವಕುಮಾರ್ ಕೊಠ್ಠಾವಳೆ (ಬೆಳಗಾವಿ) ಅವರಿಗೆ ಗೌರವ ಸಮರ್ಪಣೆ ಮಾಡಿದರು. ಈ ಸಂದರ್ಭದಲ್ಲಿ ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ. ವಿಜಯೇಂದ್ರ, ಬೀದರ್ ದಕ್ಷಿಣ ಕ್ಷೇತ್ರದ ಶಾಸಕ ಡಾ. ಶೈಲೇಂದ್ರ ಬೆಲ್ದಾಳೆ, ಡಿ.ಎಸ್. ಮ್ಯಾಕ್ಸ್ ದಯಾನಂದ ಎಸ್. ಪಟ್ಟಣಶೆಟ್ಟಿ ಉಪಸ್ಥಿತರಿದ್ದು ಸನ್ಮಾನಿತರನ್ನು ಅಭಿನಂದಿಸಿ ಶುಭ ಹಾರೈಸಿದರು.
ಶಿವಗಂಗಾ ಶ್ರೀಗಳ ಉಪನ್ಯಾಸ ಸಕ್ಕರೆಯ ಸಿಹಿಯಂತೆ
ಶಿವಗಂಗಾ ಕ್ಷೇತ್ರದ ಡಾ. ಮಲಯ ಶಾಂತಮುನಿ ಶಿವಾಚಾರ್ಯ ಸ್ವಾಮೀಜಿಗಳು ವೀರಶೈವ ಧರ್ಮದ ಉಗಮ, ಪಂಚಪೀಠಗಳ ಮಹತ್ವ, ಆಧ್ಯಾತ್ಮಿಕ ಪರಂಪರೆ ಹಾಗೂ ಸಮಾಜ ನಿರ್ಮಾಣದಲ್ಲಿ ಗುರುಪೀಠಗಳ ಪಾತ್ರವನ್ನು ಅನೇಕ ಉದಾಹರಣೆಗಳ ಮೂಲಕ ವಿವರಿಸಿದ್ದನ್ನು ಸ್ಮರಿಸಿದ ಜಗದ್ಗುರುಗಳು, “ಅವರ ಉಪದೇಶಾಮೃತ ಸಕ್ಕರೆಯ ಸಿಹಿಯಂತೆ, ಬೆಲ್ಲದ ಅಚ್ಚಿನ ಮಧುರತೆಯಂತೆ ಪ್ರತಿಯೊಬ್ಬರ ಮನಸ್ಸಿನಲ್ಲಿ ಅಚ್ಚೊತ್ತುವಂತಿತ್ತು” ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.
ಪೂಜಾ ಸಮಿತಿ ಮತ್ತು ಸಂಘಟಕರ ಸೇವೆಗೆ ಪ್ರಶಂಸೆ
ಆಷಾಢ ಮಾಸದ ಪೂಜಾ ಸಮಿತಿ ಅಧ್ಯಕ್ಷ ಉಮಾಶಂಕರ್, ಆರ್.ಆರ್.ಹಿರೇಮಠ್ ಹಾಗೂ ಸಮಿತಿಯ ಎಲ್ಲ ಪದಾಧಿಕಾರಿಗಳು, ಸೇವಾದಾರರು ಮತ್ತು ಭಕ್ತರು ಸಮಾರಂಭವನ್ನು ಅತ್ಯಂತ ಶಿಸ್ತುಬದ್ಧವಾಗಿ ಹಾಗೂ ಭಕ್ತಿಭಾವದಿಂದ ನಡೆಸುತ್ತಿರುವುದಕ್ಕೆ ಜಗದ್ಗುರುಗಳು ಅಭಿನಂದನೆ ಸಲ್ಲಿಸಿದರು.
ಸಿದ್ದರಬೆಟ್ಟ ಕ್ಷೇತ್ರದ ಶ್ರೀ ವೀರಭದ್ರ ಶಿವಾಚಾರ್ಯ ಸ್ವಾಮೀಜಿಗಳು ಸಮಾರಂಭದ ಯಶಸ್ಸಿಗೆ ಮಾರ್ಗದರ್ಶನ ನೀಡುತ್ತಿರುವುದನ್ನು ವಿಶೇಷವಾಗಿ ಸ್ಮರಿಸಿ, ಅವರ ಸೇವೆಯನ್ನು ಮೆಚ್ಚಿದರು.
ಮಾಜಿ ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪ ಭಾಗವಹಿಸಲಿದ್ದಾರೆ
ಜುಲೈ 19ರಂದು ನಡೆಯಲಿರುವ ಸಮಾರೋಪ ಸಮಾರಂಭದಲ್ಲಿ ಮಾಜಿ ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪ ಭಾಗವಹಿಸಲಿದ್ದಾರೆ ಎಂದು ಜಗದ್ಗುರುಗಳು ತಿಳಿಸಿದರು. ಕಾರ್ಯಕ್ರಮದ ವೇಳಾಪಟ್ಟಿಯಲ್ಲಿ ಅವರ ಹೆಸರು ಇಲ್ಲದಿದ್ದರೂ, ದರ್ಶನಕ್ಕೆ ಬಂದ ಸಂದರ್ಭದಲ್ಲಿ ಸಮಾರಂಭದಲ್ಲಿ ಪಾಲ್ಗೊಳ್ಳುವಂತೆ ಮನವಿ ಮಾಡಿದಾಗ ಅವರು ಭಕ್ತಿಭಾವದಿಂದ ಆಹ್ವಾನವನ್ನು ಸ್ವೀಕರಿಸಿದ್ದಾರೆ ಎಂದು ಹೇಳಿದರು.
ಸಮಾರೋಪ ಸಮಾರಂಭಕ್ಕೆ ಹೆಚ್ಚಿನ ಸಂಖ್ಯೆಯಲ್ಲಿ ಭಕ್ತರು ಆಗಮಿಸಿ ಧರ್ಮಕಾರ್ಯವನ್ನು ಯಶಸ್ವಿಗೊಳಿಸಬೇಕೆಂದು ಅವರು ಮನವಿ ಮಾಡಿದರು.
ಸಮಾಜ ಸುಧಾರಣೆಗೆ ಗುರುಪೀಠಗಳ ಕೊಡುಗೆ ಅಪಾರ; ಮಠಾಧೀಶರ ಸೇವೆಗೆ ಜಗದ್ಗುರುಗಳ ಪ್ರಶಂಸೆ
ಸಮಾರಂಭದಲ್ಲಿ ದೇವಾಪುರದ ಶ್ರೀ ಶಿವಮೂರ್ತಿ ಶಿವಾಚಾರ್ಯ ಸ್ವಾಮೀಜಿಗಳು, ಯಾದಗಿರಿ ಜಿಲ್ಲೆಯ ಶ್ರೀಗಳು, ಸಂಗೊಳ್ಳಿ ರಾಯಣ್ಣನ ಊರಿನ ಹಿರೇಮಠದ ಶ್ರೀ ಗುರುಲಿಂಗ ಶಿವಾಚಾರ್ಯ ಸ್ವಾಮೀಜಿಗಳು, ಬೆಳ್ಳಾವಿ ಬೃಹನ್ಮಠದ ಶ್ರೀ ಮಹಾಂತ ಶಿವಾಚಾರ್ಯ ಸ್ವಾಮೀಜಿಗಳು, ಕಲ್ಲುಬಾಳು ಮಠದ ಶ್ರೀ ಷಡಕ್ಷರ ಶಿವಾನಂದ ಶಿವಾಚಾರ್ಯ ಸ್ವಾಮೀಜಿಗಳು ಹಾಗೂ ಶಿವಗಂಗಾ ಕ್ಷೇತ್ರದ ಶ್ರೀ ಡಾ. ಮಲಯ ಶಾಂತಮುನಿ ಶಿವಾಚಾರ್ಯ ಸ್ವಾಮೀಜಿಗಳ ಉಪಸ್ಥಿತಿ ಸಮಾರಂಭದ ಮೆರುಗು ಹೆಚ್ಚಿಸಿತು ಎಂದು ಜಗದ್ಗುರುಗಳು ಹೇಳಿದರು.
ಪ್ರತಿಯೊಬ್ಬ ಮಠಾಧೀಶರೂ ಧಾರ್ಮಿಕ, ಸಾಮಾಜಿಕ ಹಾಗೂ ಶೈಕ್ಷಣಿಕ ಕ್ಷೇತ್ರಗಳಲ್ಲಿ ಸಮಾಜವನ್ನು ಸನ್ಮಾರ್ಗದತ್ತ ಕೊಂಡೊಯ್ಯುವ ನಿಸ್ವಾರ್ಥ ಸೇವೆ ಸಲ್ಲಿಸುತ್ತಿದ್ದಾರೆ. ಸಮಾಜದ ಓರೆಕೋರೆಗಳನ್ನು ತಿದ್ದಿ, ಧಾರ್ಮಿಕ ಮೌಲ್ಯಗಳು, ಮಾನವೀಯತೆ ಮತ್ತು ಸಂಸ್ಕಾರಯುತ ಬದುಕಿನತ್ತ ಜನರನ್ನು ಮುನ್ನಡೆಸುವುದೇ ಗುರುಪೀಠಗಳ ಮೂಲ ಕರ್ತವ್ಯವಾಗಿದೆ ಎಂದು ಹೇಳಿದರು.
ಗುರುಗಳ ಆಶೀರ್ವಾದವೇ ಜೀವನದ ಶ್ರೇಷ್ಠ ಸಂಪತ್ತು
ಇಷ್ಟಲಿಂಗ ಮಹಾಪೂಜೆ, ಗುರುಭಕ್ತಿ ಮತ್ತು ಧರ್ಮಾಚರಣೆಯ ಮೂಲಕ ಭಕ್ತರು ತಮ್ಮ ಬದುಕನ್ನು ಸಾರ್ಥಕಗೊಳಿಸಬಹುದು ಎಂದು ಜಗದ್ಗುರುಗಳು ಹೇಳಿದರು. ಗುರುವಿನ ಆಶೀರ್ವಾದವು ಕೇವಲ ವ್ಯಕ್ತಿಯ ಜೀವನವನ್ನಷ್ಟೇ ಅಲ್ಲ, ಕುಟುಂಬ, ಸಮಾಜ ಮತ್ತು ರಾಷ್ಟ್ರದ ಒಳಿತಿಗೂ ಕಾರಣವಾಗುತ್ತದೆ. ಆದ್ದರಿಂದ ಪ್ರತಿಯೊಬ್ಬರೂ ಧರ್ಮ, ಸಂಸ್ಕಾರ ಮತ್ತು ಮಾನವೀಯ ಮೌಲ್ಯಗಳನ್ನು ಜೀವನದಲ್ಲಿ ಅಳವಡಿಸಿಕೊಳ್ಳಬೇಕು ಎಂದು ಕರೆ ನೀಡಿದರು.
ಆಯುಷ್ಯ, ಆರೋಗ್ಯ, ಐಶ್ವರ್ಯಕ್ಕಾಗಿ ಜಗದ್ಗುರುಗಳ ಆಶೀರ್ವಾದ
ತಮ್ಮ ಆಶೀರ್ವಚನದ ಸಮಾರೋಪದಲ್ಲಿ ಜಗದ್ಗುರುಗಳು, “ಪರಮದಯಾಳು ಪರಮೇಶ್ವರರು, ಜಗದಾದಿ ಜಗದ್ಗುರು ರೇಣುಕಾದಿ ಪಂಚಾಚಾರ್ಯರು, ಕ್ಷೇತ್ರದ ನಾಥ ವೀರಭದ್ರ ಸ್ವಾಮಿ ಹಾಗೂ ಹನ್ನೆರಡನೇ ಶತಮಾನದ ಬಸವಾದಿ ಶಿವಶರಣರ ಕೃಪಾಕಟಾಕ್ಷ ತಮ್ಮೆಲ್ಲರ ಮೇಲೂ ಸದಾ ಇರಲಿ. ಎಲ್ಲರಿಗೂ ಆಯುಷ್ಯ, ಆರೋಗ್ಯ, ಐಶ್ವರ್ಯ, ಸುಖ-ಸಂಪತ್ತು, ಧರ್ಮನಿಷ್ಠೆ ಮತ್ತು ಆತ್ಮಶಾಂತಿ ದೊರೆಯಲಿ” ಎಂದು ಸಮಸ್ತ ಭಕ್ತರಿಗೆ ಹಾರೈಸಿದರು.
