​🚩 1893ರಲ್ಲಿ ಸ್ವಾಮಿ ವಿವೇಕಾನಂದರು ಸಾರಿದ ವಿಶ್ವಬಂಧುತ್ವಕ್ಕೆ, 2026ರ ಅಮೆರಿಕದಲ್ಲಿ ತರಳಬಾಳು ಶ್ರೀಗಳ ವೈಚಾರಿಕ ಮುದ್ರೆ!

ಅದು ಸೆಪ್ಟೆಂಬರ್ 1893.!, ಚಿಕಾಗೋದ ಕಲಾ ಸಂಸ್ಥೆಯ ವಿಶಾಲ ಸಭಾಂಗಣದಲ್ಲಿ ಧಾರ್ಮಿಕ ಚೌಕಟ್ಟುಗಳನ್ನು ಮೀರಿ ಧ್ವನಿಸಿದ “ಅಮೆರಿಕದ ನನ್ನ ಪ್ರೀತಿಯ ಸಹೋದರ ಸಹೋದರಿಯರೇ…” ಎಂಬ ಗಂಭೀರ ಸ್ವರ ವಿಶ್ವಸಮುದಾಯದ ಹೃದಯಗಳನ್ನು ತಟ್ಟಿತ್ತು. ಭಾರತೀಯ ಸನಾತನ ಪ್ರಜ್ಞೆಯನ್ನು, ಧಾರ್ಮಿಕ ಸಹಿಷ್ಣುತೆ ಮತ್ತು ವಿಶ್ವಮಾನವತೆಯ ಮಹಾಸಂದೇಶವನ್ನು ಸ್ವಾಮಿ ವಿವೇಕಾನಂದರು ಅಂದು ಧರೆಗಿಳಿಸಿದ ಕ್ಷಣವದು. ಕಾಲದ ಚಕ್ರ ಉರುಳಿದೆ, 133 ವರ್ಷಗಳ ನಂತರ, ಅದೇ ಚಿಕಾಗೋದ ಲೆಮಾಂಟ್‌ನಲ್ಲಿರುವ ವಿವೇಕಾನಂದ ಸ್ಪಿರಿಚುವಲ್ ಸೆಂಟರ್‌ನಲ್ಲಿ ಮತ್ತೊಂದು ಆಧ್ಯಾತ್ಮಿಕದ ಐತಿಹಾಸಿಕ ಪರ್ವ ಅನಾವರಣಗೊಂಡಿದೆ! ಇಂದು ಜಗತ್ತು ಧರ್ಮದ ಹೆಸರಿನಲ್ಲಿ, ಗಡಿಗಳ ನೆರಳಿನಲ್ಲಿ ಸಂಘರ್ಷದ ಅಶಾಂತಿಯ ಬೆಂಕಿಗೆ ಸಿಲುಕಿ ಶಾಂತಿಗಾಗಿ ತಡಕಾಡುತ್ತಿರುವಾಗ, ಶ್ರೀ ಡಾ. ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳು ಪ್ರತಿಪಾದಿಸಿದ ಶ್ರೀವಾಣಿ ಸಭಾಂಗಣದಲ್ಲಿ ಹೊಸ ಬೆಳಕಿನ ರಶ್ಮಿಯಂತೆ ಪ್ರವಹಿಸಿತು.

“ಹೊರಗಿನ ಶತ್ರುವನ್ನಲ್ಲ, ಒಳಗಿನ ಅರಿಷಡ್ವರ್ಗಗಳನ್ನು ಜಯಿಸಿ!”

“ಧರ್ಮಗಳು ಹಲವು; ಆಧ್ಯಾತ್ಮಿಕತೆ ಒಂದೇ!”

ಸ್ವಾಮಿ ವಿವೇಕಾನಂದ ವಿಶ್ವಮಾನವತೆಯ ಚಿಂತನೆಗೆ ತರಳಬಾಳು ಶ್ರೀಗಳ ವೈಚಾರಿಕ ಸ್ಪರ್ಶ!

ಈ ಐತಿಹಾಸಿಕ ಸಮಾಗಮದಲ್ಲಿ ಶ್ರೀ ತರಳಬಾಳು ಜಗದ್ಗುರುಗಳು ಸ್ವಾಮಿ ವಿವೇಕಾನಂದರ ವಿಶಾಲ ವಿಶ್ವಪ್ರಜ್ಞೆಗೆ ವಚನ ಸಾಹಿತ್ಯ ಹಾಗೂ ಭಗವದ್ಗೀತೆಯ ಮಹಾಚಿಂತನೆಗಳನ್ನು ಸುಂದರವಾಗಿ ಸಂಯೋಜಿಸಿದರು. ವಿವೇಕಾನಂದರು ಹೊರಗಿನ ಜಗತ್ತಿಗೆ ಧಾರ್ಮಿಕ ಸಹಬಾಳ್ವೆಯನ್ನು ಬೋಧಿಸಿದರೆ, ಜಗದ್ಗುರುಗಳು “ಮನುಷ್ಯನ ನಿಜವಾದ ಶತ್ರು ಹೊರಗಿಲ್ಲ, ಅವನೊಳಗಿನ ಅರಿಷಡ್ವರ್ಗಗಳಲ್ಲಿದ್ದಾನೆ” ಎಂದು ಆಂತರಿಕ ಸಮರವನ್ನು ಜಯಿಸುವ ದಾರಿ ತೋರಿಸಿದರು. ಭಗವದ್ಗೀತೆಯ “ಆತ್ಮೈವ ಆತ್ಮನೋ ಬಂಧುಃ” ಎಂಬ ಮಹಾವಾಕ್ಯದೊಂದಿಗೆ, ಅಲ್ಲಮಪ್ರಭುಗಳ ವೈಚಾರಿಕ ಪ್ರಹಾರ ಹಾಗೂ ಅಕ್ಕಮಹಾದೇವಿಯರ “ಹಾವಿನ ಬಾಯ ಹಲ್ಲ ಕಳೆದು ಹಾವನಾಡಿಸಬಲ್ಲಡೆ…” ಎಂಬ ಅಧ್ಯಾತ್ಮದ ಸಂಗಮವನ್ನು ಉಣಬಡಿಸಿದರು. “ಧರ್ಮಗಳು ಹಲವು, ಆಧ್ಯಾತ್ಮಿಕತೆ ಒಂದೇ; ಉದ್ಯಾನವನದಲ್ಲಿನ ಪ್ರತಿಯೊಂದು ಹೂವಿಗೂ ತನ್ನದೇ ಸೌಂದರ್ಯವಿರುವಂತೆ ಪ್ರತಿಯೊಂದು ಧರ್ಮಕ್ಕೂ ತನ್ನದೇ ವೈಶಿಷ್ಟ್ಯವಿದೆ” ಎಂದು ಸಾರಿದ ಈ ಅಪೂರ್ವ ಸಂದೇಶ, ಸ್ವಾಮಿ ವಿವೇಕಾನಂದರ ಜಾಗತಿಕ ಸಹೋದರತ್ವದ ವಾಣಿಗೆ ಭಾರತೀಯ ಆಧ್ಯಾತ್ಮಿಕ ಪರಂಪರೆಯಿಂದ ದೊರೆತ ದಿವ್ಯವಾದ, ಕಾಲಾತೀತವಾದ ಉತ್ತರವಾಗಿ ಇತಿಹಾಸದ ಪುಟಗಳಲ್ಲಿ ದಾಖಲಾಯಿತು.

ಚಿಕಾಗೋದಲ್ಲಿ ಮೊಳಗಿದ ತರಳಬಾಳು ಜಗದ್ಗುರುಗಳ ವಿಶ್ವಮಾನವತೆಯ ಶ್ರೀವಾಣಿ

ಅರಿಷಡ್ವರ್ಗಗಳ ಮೇಲೆ ಆತ್ಮವಿಜಯವೇ ನಿಜವಾದ ಸಾಧನೆ: ಗೀತೆ, ವಚನ ಮತ್ತು ವಿವೇಕಾನಂದರ ಚಿಂತನೆಗಳ ಸಮನ್ವಯ

ಲೆಮಾಂಟ್, ಇಲಿನಾಯ್, ಅಮೇರಿಕಾ:
ಧರ್ಮದ ಹೆಸರಿನಲ್ಲಿ ಸಂಘರ್ಷ, ಮತಾಂಧತೆ, ಅಸಹಿಷ್ಣುತೆ ಹಾಗೂ ಹಿಂಸಾಚಾರಗಳು ಜಗತ್ತಿನ ವಿವಿಧ ಭಾಗಗಳಲ್ಲಿ ಆತಂಕದ ವಾತಾವರಣ ಸೃಷ್ಟಿಸುತ್ತಿರುವ ಸಂದರ್ಭದಲ್ಲಿ, ಧರ್ಮಗಳ ವೈವಿಧ್ಯತೆಯೊಳಗಿನ ಆಧ್ಯಾತ್ಮಿಕ ಏಕತೆ, ಮಾನವೀಯತೆ ಮತ್ತು ವಿಶ್ವಶಾಂತಿಯ ಮಹತ್ವವನ್ನು ಪ್ರತಿಪಾದಿಸಿದ ಶ್ರೀ ತರಳಬಾಳು ಜಗದ್ಗುರು ಡಾ. ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳವರ ಅರ್ಥಪೂರ್ಣ ಶ್ರೀವಾಣಿ ಅಮೆರಿಕದ ಲೆಮಾಂಟ್‌ನಲ್ಲಿ ಮೊಳಗಿತು.

ದಿ ಹಿಂದೂ ಟೆಂಪಲ್ ಆಫ್ ಗ್ರೇಟರ್ ಚಿಕಾಗೋದ ವಿವೇಕಾನಂದ ಸ್ಪಿರಿಚುವಲ್ ಸೆಂಟರ್ ವತಿಯಿಂದ ಆಯೋಜಿಸಲಾಗಿದ್ದ “Religious Conflicts in the Present World” ಕಾರ್ಯಕ್ರಮದಲ್ಲಿ ಆಶೀರ್ವಚನ ನೀಡಿದ ಶ್ರೀ ತರಳಬಾಳು ಜಗದ್ಗುರುಗಳು, ಇಂದಿನ ಜಗತ್ತಿನಲ್ಲಿ ಧಾರ್ಮಿಕ ಸಂಘರ್ಷಗಳು ಏಕೆ ಉಂಟಾಗುತ್ತಿವೆ, ಅವುಗಳ ಹಿಂದೆ ಇರುವ ಮಾನಸಿಕ ಕಾರಣಗಳೇನು ಮತ್ತು ಶಾಂತಿಯುತ ಸಮಾಜ ನಿರ್ಮಾಣಕ್ಕೆ ಮನುಷ್ಯ ಯಾವ ರೀತಿಯ ಆಂತರಿಕ ಪರಿವರ್ತನೆ ಹೊಂದಬೇಕು ಎಂಬುದರ ಕುರಿತು ಆಳವಾದ ಚಿಂತನೆಯನ್ನು ಹಂಚಿಕೊಂಡರು.

ಧರ್ಮದ ಹೆಸರಿನಲ್ಲಿ ನಡೆಯುವ ಸಂಘರ್ಷಗಳಿಗೆ ಧರ್ಮವೇ ಕಾರಣವಲ್ಲ, ಮನುಷ್ಯನೊಳಗಿನ ಅಹಂಕಾರ, ಆಸೆ, ದ್ವೇಷ, ಅಸಹಿಷ್ಣುತೆ ಮತ್ತು ಸ್ವಾರ್ಥದ ಮನೋಭಾವಗಳೇ ಅನೇಕ ಸಂಘರ್ಷಗಳಿಗೆ ಮೂಲ ಕಾರಣವಾಗುತ್ತವೆ ಎಂಬ ಸಂದೇಶವನ್ನು ಅವರು ನೀಡಿದರು.

ವಿವೇಕಾನಂದರ ಚಿಕಾಗೋ ವಾಣಿಯಿಂದ ವಿಶ್ವಮಾನವತೆಯ ಚಿಂತನೆಯವರೆಗೆ

ಸ್ವಾಮಿ ವಿವೇಕಾನಂದರು ಚಿಕಾಗೋದಲ್ಲಿ “My dear Brothers and Sisters of America” ಎಂದು ಜಗತ್ತನ್ನು ಉದ್ದೇಶಿಸಿ ಮಾತನಾಡಿದ ಐತಿಹಾಸಿಕ ಸಂದರ್ಭವನ್ನು ಸ್ಮರಿಸಿದ ಶ್ರೀ ಜಗದ್ಗುರುಗಳು, ಆ ಸಂಬೋಧನೆಯಲ್ಲಿದ್ದ ಆತ್ಮೀಯತೆ, ಸಹೋದರತ್ವ ಮತ್ತು ವಿಶ್ವಮಾನವತೆಯ ಆಶಯವನ್ನು ವಿವರಿಸಿದರು.

ವಿವೇಕಾನಂದರು ಚಿಕಾಗೋದಲ್ಲಿ ನೀಡಿದ ಸಂದೇಶ ಕೇವಲ ಒಂದು ಧಾರ್ಮಿಕ ಭಾಷಣವಾಗಿರಲಿಲ್ಲ. ಅದು ಮನುಷ್ಯರನ್ನು ಧರ್ಮ, ಜಾತಿ, ದೇಶ ಮತ್ತು ಭೌಗೋಳಿಕ ಗಡಿಗಳನ್ನು ಮೀರಿ ಒಂದೇ ಮಾನವ ಕುಟುಂಬದ ಸದಸ್ಯರನ್ನಾಗಿ ನೋಡುವ ವಿಶಾಲ ದೃಷ್ಟಿಕೋನವಾಗಿತ್ತು. ಮತಾಂಧತೆ, ಸಂಕುಚಿತ ಧಾರ್ಮಿಕ ಮನೋಭಾವ ಮತ್ತು ಹಿಂಸೆಯ ವಿರುದ್ಧ ಅವರು ನೀಡಿದ್ದ ಎಚ್ಚರಿಕೆ ಇಂದಿನ ಜಗತ್ತಿನಲ್ಲಿಯೂ ಪ್ರಸ್ತುತವಾಗಿದೆ ಎಂದು ಶ್ರೀ ತರಳಬಾಳು ಜಗದ್ಗುರುಗಳು ಅಭಿಪ್ರಾಯಪಟ್ಟರು.

ವಿವೇಕಾನಂದರ ಚಿಂತನೆಯ ನೆಲೆಯಾದ ಚಿಕಾಗೋದಲ್ಲಿಯೇ ಧರ್ಮಸಮನ್ವಯ, ಆಧ್ಯಾತ್ಮಿಕ ಏಕತೆ ಮತ್ತು ವಿಶ್ವಶಾಂತಿಯ ಕುರಿತು ಮತ್ತೊಮ್ಮೆ ಚಿಂತನೆ ನಡೆದಿರುವುದು ಅರ್ಥಪೂರ್ಣ ಸಂಗತಿ ಎಂದು ಅವರು ಹೇಳಿದರು.

ಮನುಷ್ಯನ ನಿಜವಾದ ಶತ್ರು ಹೊರಗಿಲ್ಲ; ಅವನೊಳಗೇ ಇದ್ದಾನೆ

ಭಗವದ್ಗೀತೆಯ “ಆತ್ಮೈವ ಆತ್ಮನೋ ಬಂಧುಃ, ಆತ್ಮೈವ ರಿಪುರಾತ್ಮನಃ” ಎಂಬ ಸಂದೇಶವನ್ನು ಆಧಾರವಾಗಿಸಿಕೊಂಡು ಮಾತನಾಡಿದ ಶ್ರೀ ಜಗದ್ಗುರುಗಳು, ಮನುಷ್ಯನಿಗೆ ಅತ್ಯಂತ ದೊಡ್ಡ ಸ್ನೇಹಿತನೂ ಅವನೇ, ಅತ್ಯಂತ ದೊಡ್ಡ ಶತ್ರುವೂ ಅವನೇ ಎಂಬುದನ್ನು ವಿವರಿಸಿದರು.

ಮನುಷ್ಯನೊಳಗಿನ ಕಾಮ, ಕ್ರೋಧ, ಲೋಭ, ಮೋಹ, ಮದ ಮತ್ತು ಮಾತ್ಸರ್ಯಗಳು ಅವನ ವ್ಯಕ್ತಿತ್ವವನ್ನು ದುರ್ಬಲಗೊಳಿಸುವ ಅರಿಷಡ್ವರ್ಗಗಳಾಗಿವೆ. ಹೊರಗಿನ ಶತ್ರುವನ್ನು ಗೆಲ್ಲುವುದಕ್ಕಿಂತ ಮೊದಲು ತನ್ನೊಳಗಿನ ದುರ್ಬಲತೆಗಳನ್ನು ಗೆಲ್ಲುವುದು ಮುಖ್ಯ. ತನ್ನ ಮನಸ್ಸಿನ ಮೇಲೆ ನಿಯಂತ್ರಣ ಸಾಧಿಸಿದ ವ್ಯಕ್ತಿಗೆ ಹೊರಗಿನ ಅನೇಕ ಸಂಘರ್ಷಗಳನ್ನು ಸಮರ್ಥವಾಗಿ ಎದುರಿಸುವ ಶಕ್ತಿ ದೊರೆಯುತ್ತದೆ ಎಂದು ಅವರು ಹೇಳಿದರು.

ಭಗವದ್ಗೀತೆಯ 2.62–63ನೇ ಶ್ಲೋಕಗಳ ಆಶಯವನ್ನು ವಿವರಿಸಿದ ಅವರು, ವಿಷಯಗಳ ನಿರಂತರ ಚಿಂತನೆಯಿಂದ ಆಸಕ್ತಿ, ಆಸಕ್ತಿಯಿಂದ ಕಾಮನೆ, ಕಾಮನೆ ಈಡೇರದಾಗ ಕ್ರೋಧ, ಕ್ರೋಧದಿಂದ ಸಂಮೋಹ, ಸಂಮೋಹದಿಂದ ಸ್ಮೃತಿಭ್ರಂಶ, ಸ್ಮೃತಿಭ್ರಂಶದಿಂದ ಬುದ್ಧಿನಾಶ ಹಾಗೂ ಅಂತಿಮವಾಗಿ ಮನುಷ್ಯನ ಪತನವಾಗುತ್ತದೆ ಎಂಬ ಕ್ರಮವನ್ನು ವಿವರಿಸಿದರು.

ಆದ್ದರಿಂದ ವಿಶ್ವಶಾಂತಿಯ ಚರ್ಚೆ ಆರಂಭವಾಗಬೇಕಾದದ್ದು ರಾಷ್ಟ್ರಗಳ ಗಡಿಗಳಲ್ಲಿ ಅಲ್ಲ, ಪ್ರತಿಯೊಬ್ಬ ವ್ಯಕ್ತಿಯ ಮನಸ್ಸಿನೊಳಗಿನಿಂದ ಎಂಬ ಸಂದೇಶವನ್ನು ಅವರು ನೀಡಿದರು.

ಅರಿಷಡ್ವರ್ಗಗಳನ್ನು ದಮನಿಸುವುದಕ್ಕಿಂತ ಪಳಗಿಸುವುದು ಮುಖ್ಯ

ಮನುಷ್ಯನ ಭಾವನೆಗಳನ್ನು ಸಂಪೂರ್ಣವಾಗಿ ನಾಶಪಡಿಸುವುದು ಸಾಧ್ಯವಿಲ್ಲ. ಆದರೆ ಅವುಗಳಿಗೆ ಸೂಕ್ತ ದಿಕ್ಕು ನೀಡುವುದು ಸಾಧ್ಯ. ಕೋಪ, ಆಸೆ, ಅಹಂಕಾರ ಮತ್ತು ಸ್ಪರ್ಧೆಯ ಮನೋಭಾವಗಳನ್ನು ಸಕಾರಾತ್ಮಕ ಶಕ್ತಿಯನ್ನಾಗಿ ಪರಿವರ್ತಿಸಿಕೊಳ್ಳುವ ಸಾಮರ್ಥ್ಯವೇ ವ್ಯಕ್ತಿಯ ಆತ್ಮವಿಕಾಸಕ್ಕೆ ಮುಖ್ಯ ಎಂದು ಶ್ರೀ ತರಳಬಾಳು ಜಗದ್ಗುರುಗಳು ಪ್ರತಿಪಾದಿಸಿದರು.

ಈ ಸಂದರ್ಭದಲ್ಲಿ “Action and reaction are equal and opposite” ಎಂಬ ನ್ಯೂಟನ್ನನ ನಿಯಮವನ್ನು ಉಲ್ಲೇಖಿಸಿದ ಅವರು, ಭೌತಶಾಸ್ತ್ರದ ಈ ನಿಯಮವನ್ನು ಮಾನವ ಮನಸ್ಸಿನ ಕ್ರಿಯೆ–ಪ್ರತಿಕ್ರಿಯೆಗಳಿಗೆ ಅದೇ ರೀತಿಯಲ್ಲಿ ಅನ್ವಯಿಸಲು ಸಾಧ್ಯವಿಲ್ಲ ಎಂದರು.

ಮನುಷ್ಯನ ಮಾತು, ವರ್ತನೆ ಮತ್ತು ಭಾವನೆಗಳಿಗೆ ಮತ್ತೊಬ್ಬ ವ್ಯಕ್ತಿ ನೀಡುವ ಪ್ರತಿಕ್ರಿಯೆ ಯಾವಾಗಲೂ ಸಮಾನ ಪ್ರಮಾಣದಲ್ಲಿರಬೇಕೆಂದಿಲ್ಲ. ಒಂದು ಸಣ್ಣ ಕೋಪದ ಮಾತು ದೊಡ್ಡ ಸಂಘರ್ಷಕ್ಕೆ ಕಾರಣವಾಗಬಹುದು. ಅದೇ ರೀತಿ, ಒಂದು ಸಣ್ಣ ಕ್ಷಮೆಯ ಮಾತು ದೊಡ್ಡ ವಿವಾದವನ್ನೇ ಶಮನಗೊಳಿಸಬಹುದು ಎಂದು ಅವರು ವಿವರಿಸಿದರು.

ಅರಿಷಡ್ವರ್ಗಗಳನ್ನು ದಮನಿಸುವುದಕ್ಕಿಂತ ಅವುಗಳನ್ನು ಪಳಗಿಸಿ, ಸರಿಯಾದ ದಿಕ್ಕಿನಲ್ಲಿ ಬಳಸಿಕೊಳ್ಳುವುದೇ ಬದುಕಿನ ಜಾಣ್ಮೆ ಎಂಬುದನ್ನು ವೀರವಿರಾಗಿಣಿ ಅಕ್ಕಮಹಾದೇವಿಯವರ ವಚನದ ಮೂಲಕ ಅವರು ಮನವರಿಕೆ ಮಾಡಿಕೊಟ್ಟರು.

“ಹಾವಿನ ಬಾಯ ಹಲ್ಲ ಕಳೆದು ಹಾವನಾಡಿಸಬಲ್ಲಡೆ
ಹಾವಿನ ಸಂಗವೇ ಲೇಸು ಕಂಡಯ್ಯ!”

ಎಂಬ ಅಕ್ಕಮಹಾದೇವಿಯವರ ವಚನವನ್ನು ಉಲ್ಲೇಖಿಸಿದ ಅವರು, ಅಪಾಯಕಾರಿ ಶಕ್ತಿಯನ್ನು ನಿಯಂತ್ರಣಕ್ಕೆ ತಂದು ಸದುಪಯೋಗಪಡಿಸಿಕೊಳ್ಳುವ ಸಾಮರ್ಥ್ಯವೇ ನಿಜವಾದ ಸಾಧನೆ ಎಂಬ ಆಶಯವನ್ನು ವಿವರಿಸಿದರು.

ಧರ್ಮಗಳು ಹಲವು; ಆಧ್ಯಾತ್ಮಿಕತೆ ಮಾತ್ರ ಒಂದು

ಶ್ರೀ ತರಳಬಾಳು ಜಗದ್ಗುರುಗಳವರ ಆಶೀರ್ವಚನದ ಪ್ರಮುಖ ವಿಚಾರ ಧಾರ್ಮಿಕ ಸಮನ್ವಯ ಮತ್ತು ಆಧ್ಯಾತ್ಮಿಕ ಏಕತೆಯಾಗಿತ್ತು.

“ಈ ಜಗತ್ತಿಗೆ ದೇವರೊಬ್ಬ; ಅವನ ಹೆಸರು ಅನೇಕ. ಅವನನ್ನು ಅರಿಯಲು ಅನೇಕ ಮಾರ್ಗಗಳಿವೆ. ಅವೇ ವಿವಿಧ ಧರ್ಮಗಳು. ಧರ್ಮಗಳು ವಿಭಿನ್ನವಾದರೂ ಆಧ್ಯಾತ್ಮಿಕತೆ ಮಾತ್ರ ಒಂದು” ಎಂಬ ಚಿಂತನೆಯನ್ನು ಅವರು ಪ್ರತಿಪಾದಿಸಿದರು.

ವಿಶ್ವದ ವಿವಿಧ ಧರ್ಮಗಳು ತಮ್ಮದೇ ಆದ ಆಚರಣೆ, ಪರಂಪರೆ, ತತ್ವ ಮತ್ತು ಆರಾಧನಾ ವಿಧಾನಗಳನ್ನು ಹೊಂದಿವೆ. ಆದರೆ ಅವುಗಳ ಅಂತಿಮ ಗುರಿ ಮನುಷ್ಯನನ್ನು ಉತ್ತಮ ವ್ಯಕ್ತಿಯನ್ನಾಗಿ ರೂಪಿಸುವುದು, ಒಳಗಿನ ಶಾಂತಿಯನ್ನು ಕಂಡುಕೊಳ್ಳುವಂತೆ ಮಾಡುವುದು ಮತ್ತು ಮಾನವೀಯ ಮೌಲ್ಯಗಳನ್ನು ಬೆಳೆಸುವುದೇ ಆಗಿದೆ ಎಂಬುದನ್ನು ಅವರು ವಿವರಿಸಿದರು.

ವಿವಿಧ ಧರ್ಮಗಳನ್ನು ಸುಂದರ ಉದ್ಯಾನವನದಲ್ಲಿರುವ ವಿವಿಧ ಹೂಗಳಿಗೆ ಹೋಲಿಸಿದ ಶ್ರೀ ತರಳಬಾಳು ಜಗದ್ಗುರುಗಳು, ಪ್ರತಿಯೊಂದು ಹೂವಿಗೂ ತನ್ನದೇ ಆದ ಬಣ್ಣ, ಸುವಾಸನೆ ಮತ್ತು ಸೌಂದರ್ಯವಿರುವಂತೆ ಪ್ರತಿಯೊಂದು ಧರ್ಮಕ್ಕೂ ತನ್ನದೇ ಆದ ವೈಶಿಷ್ಟ್ಯವಿದೆ ಎಂದರು.

ತಾನು ಇಷ್ಟಪಟ್ಟ ಹೂವನ್ನು ಪ್ರೀತಿಸುವುದು ತಪ್ಪಲ್ಲ. ಆದರೆ ಅದಕ್ಕಾಗಿ ಮತ್ತೊಂದು ಹೂವನ್ನು ನಾಶಪಡಿಸುವುದು ಸರಿಯಲ್ಲ. ಅದೇ ರೀತಿ ತನ್ನ ಧರ್ಮದ ಮೇಲೆ ನಂಬಿಕೆ ಹೊಂದಿರುವುದರ ಜೊತೆಗೆ ಮತ್ತೊಬ್ಬರ ಧರ್ಮವನ್ನೂ ಗೌರವಿಸುವ ಮನೋಭಾವ ಬೆಳೆಸಿಕೊಳ್ಳಬೇಕು. ಧಾರ್ಮಿಕ ಸಹಬಾಳ್ವೆಯ ಮೂಲತತ್ತ್ವ ಇದೇ ಎಂದು ಅವರು ಹೇಳಿದರು.

ಅಲ್ಲಮಪ್ರಭುಗಳ ವಚನದಲ್ಲಿ ಧರ್ಮದ ಹೆಸರಿನ ಹಿಂಸೆಗೆ ಉತ್ತರ

ಧರ್ಮದ ಹೆಸರಿನಲ್ಲಿ ನಡೆಯುವ ಹಿಂಸಾಚಾರವನ್ನು ಖಂಡಿಸಿದ ಶ್ರೀ ತರಳಬಾಳು ಜಗದ್ಗುರುಗಳು, ಅಲ್ಲಮಪ್ರಭುಗಳವರ ವಚನವನ್ನು ಉಲ್ಲೇಖಿಸುವ ಮೂಲಕ ಧರ್ಮದ ನಿಜವಾದ ಅರ್ಥವನ್ನು ವಿವರಿಸಿದರು.

“ಅಗ್ನಿಗೆ ತಂಪುಂಟೆ? ವಿಷಕ್ಕೆ ರುಚಿಯುಂಟೇ ಹೇಳಾ?
ದಾಳಿಕಾರಂಗೆ ಧರ್ಮವುಂಟೆ? ಕನ್ನಗಳ್ಳಂಗೆ ಕರುಳುಂಟೆ? ಗುಹೇಶ್ವರಾ”

ಎಂಬ ಅಲ್ಲಮಪ್ರಭುಗಳವರ ವಚನವನ್ನು ಸ್ಮರಿಸಿದ ಅವರು, ಮನುಷ್ಯನ ಜೀವ, ಗೌರವ ಮತ್ತು ಮಾನವೀಯತೆಯನ್ನು ನಾಶಪಡಿಸುವ ಕೃತ್ಯಗಳಿಗೆ ಧರ್ಮದ ಹೆಸರನ್ನು ನೀಡಲು ಸಾಧ್ಯವಿಲ್ಲ ಎಂಬ ಆಶಯವನ್ನು ವ್ಯಕ್ತಪಡಿಸಿದರು.

ಧರ್ಮವು ಮನುಷ್ಯನನ್ನು ಮನುಷ್ಯನಿಂದ ದೂರ ಮಾಡುವ ಸಾಧನವಲ್ಲ. ಅದು ಮನುಷ್ಯನೊಳಗಿನ ಮಾನವೀಯತೆಯನ್ನು ಜಾಗೃತಗೊಳಿಸುವ ಮಾರ್ಗವಾಗಬೇಕು. ಪ್ರೀತಿ, ಕರುಣೆ, ಸಹನೆ, ಸಹಬಾಳ್ವೆ ಮತ್ತು ಪರಸ್ಪರ ಗೌರವವನ್ನು ಬೆಳೆಸುವುದೇ ಧರ್ಮದ ನಿಜವಾದ ಉದ್ದೇಶವಾಗಬೇಕು ಎಂದು ಅವರು ಹೇಳಿದರು.

ವಿಶ್ವಶಾಂತಿಗೆ ಬೇಕಾಗಿರುವುದು ಆಂತರಿಕ ಪರಿವರ್ತನೆ

ಇಂದಿನ ಜಗತ್ತಿನಲ್ಲಿ ರಾಷ್ಟ್ರಗಳ ನಡುವೆ, ಸಮುದಾಯಗಳ ನಡುವೆ ಮತ್ತು ವ್ಯಕ್ತಿಗಳ ನಡುವೆ ಸಂಘರ್ಷಗಳು ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ, ಕೇವಲ ಕಾನೂನು, ಶಕ್ತಿ ಅಥವಾ ರಾಜಕೀಯ ಒಪ್ಪಂದಗಳಿಂದ ಶಾಶ್ವತ ಶಾಂತಿ ಸಾಧ್ಯವಿಲ್ಲ. ಮನುಷ್ಯನ ಮನಸ್ಸಿನಲ್ಲಿ ಪರಿವರ್ತನೆ ಉಂಟಾಗಬೇಕು ಎಂದು ಶ್ರೀ ತರಳಬಾಳು ಜಗದ್ಗುರುಗಳು ಹೇಳಿದರು.

ಒಬ್ಬ ವ್ಯಕ್ತಿ ತನ್ನ ಕೋಪವನ್ನು ನಿಯಂತ್ರಿಸಿಕೊಂಡರೆ ಒಂದು ಕುಟುಂಬದಲ್ಲಿ ಸಂಘರ್ಷ ಕಡಿಮೆಯಾಗಬಹುದು. ಒಂದು ಕುಟುಂಬದಲ್ಲಿ ಪರಸ್ಪರ ಗೌರವ ಬೆಳೆದರೆ ಸಮಾಜದಲ್ಲಿ ಸಾಮರಸ್ಯ ಹೆಚ್ಚಬಹುದು. ಸಮಾಜದಲ್ಲಿ ಸಾಮರಸ್ಯ ಬೆಳೆದಾಗ ರಾಷ್ಟ್ರಗಳ ನಡುವೆಯೂ ಸಹಬಾಳ್ವೆಯ ವಾತಾವರಣ ನಿರ್ಮಾಣವಾಗಬಹುದು. ಹೀಗಾಗಿ ವಿಶ್ವಶಾಂತಿಯ ಆರಂಭ ವ್ಯಕ್ತಿಯ ಆಂತರಿಕ ಶಾಂತಿಯಿಂದಲೇ ಆಗಬೇಕು ಎಂಬ ಸಂದೇಶವನ್ನು ಅವರು ನೀಡಿದರು.

ಧರ್ಮಗಳ ನಡುವೆ ಶ್ರೇಷ್ಠತೆಯ ಸ್ಪರ್ಧೆ ನಡೆಯಬಾರದು. ಬದಲಾಗಿ ಧರ್ಮಗಳಲ್ಲಿರುವ ಮಾನವೀಯ ಮೌಲ್ಯಗಳನ್ನು ಗುರುತಿಸಿ ಪರಸ್ಪರ ಗೌರವಿಸುವ ವಾತಾವರಣ ನಿರ್ಮಾಣವಾಗಬೇಕು ಎಂದು ಅವರು ಕರೆ ನೀಡಿದರು.

ವಿವೇಕಾನಂದರ ಚಿಂತನೆಗೆ ತರಳಬಾಳಿನ ವೈಚಾರಿಕ ಸೇರ್ಪಡೆ

ಚಿಕಾಗೋದಲ್ಲಿ ಸ್ವಾಮಿ ವಿವೇಕಾನಂದರು ವಿಶ್ವಬಂಧುತ್ವ ಮತ್ತು ಧಾರ್ಮಿಕ ಸಹಿಷ್ಣುತೆಯ ಸಂದೇಶ ನೀಡಿದ ಐತಿಹಾಸಿಕ ನೆನಪಿನ ಹಿನ್ನೆಲೆಯಲ್ಲಿ ನಡೆದ ಈ ಕಾರ್ಯಕ್ರಮ, ಆಧ್ಯಾತ್ಮಿಕ ಚಿಂತನೆಯ ದೃಷ್ಟಿಯಿಂದ ವಿಶೇಷ ಮಹತ್ವ ಪಡೆದುಕೊಂಡಿತು.

ವಿವೇಕಾನಂದರು ಬಿತ್ತಿದ ವಿಶ್ವಮಾನವತೆಯ ಚಿಂತನೆಗೆ, ಶ್ರೀ ತರಳಬಾಳು ಜಗದ್ಗುರುಗಳು ಗೀತೆ, ವಚನ ಸಾಹಿತ್ಯ ಮತ್ತು ಆಧುನಿಕ ಚಿಂತನೆಗಳ ಸಮನ್ವಯದ ಮೂಲಕ ಹೊಸ ಆಯಾಮವನ್ನು ನೀಡಿದರು.

ಧರ್ಮದ ವೈವಿಧ್ಯತೆಯನ್ನು ಸಂಘರ್ಷದ ಕಾರಣವನ್ನಾಗಿ ನೋಡದೆ, ಮಾನವೀಯತೆಯ ವಿವಿಧ ಅಭಿವ್ಯಕ್ತಿಗಳಾಗಿ ನೋಡುವ ದೃಷ್ಟಿಕೋನವನ್ನು ಅವರು ಮುಂದಿಟ್ಟರು. ಮನುಷ್ಯನೊಳಗಿನ ಅರಿಷಡ್ವರ್ಗಗಳನ್ನು ಜಯಿಸುವುದರಿಂದ ಆರಂಭವಾಗುವ ಆತ್ಮವಿಜಯವೇ ಸಮಾಜದ ಶಾಂತಿ ಮತ್ತು ವಿಶ್ವದ ಶಾಂತಿಗೆ ದಾರಿ ಮಾಡಿಕೊಡುತ್ತದೆ ಎಂಬ ಸಂದೇಶವನ್ನು ಅವರು ನೀಡಿದರು.

ಭಕ್ತಿ–ಗೌರವದಿಂದ ಶ್ರೀ ತರಳಬಾಳು ಜಗದ್ಗುರುಗಳಿಗೆ ಅಮೆರಿಕದ ಭಾರತೀಯರ ನಮನ

ಕಾರ್ಯಕ್ರಮಕ್ಕೆ ಆಗಮಿಸಿದ ದಿ ಹಿಂದೂ ಟೆಂಪಲ್ ಆಫ್ ಗ್ರೇಟರ್ ಚಿಕಾಗೋದ ವಿವೇಕಾನಂದ ಸ್ಪಿರಿಚುವಲ್ ಸೆಂಟರ್‌ನ ಆಯೋಜಕರು ಶ್ರೀ ತರಳಬಾಳು ಜಗದ್ಗುರುಗಳನ್ನು ಭಕ್ತಿ, ಗೌರವ ಮತ್ತು ಆತ್ಮೀಯತೆಯಿಂದ ಬರಮಾಡಿಕೊಂಡರು.

ಜಗದ್ಗುರುಗಳವರ ವೈಚಾರಿಕ ಪ್ರೌಢಿಮೆ, ಆಧ್ಯಾತ್ಮಿಕ ದೃಷ್ಟಿಕೋನ ಹಾಗೂ ಸಮಾಜಮುಖಿ ಸೇವಾ ಚಟುವಟಿಕೆಗಳ ಬಗ್ಗೆ ಹೊಂದಿರುವ ಗೌರವವನ್ನು ಆಯೋಜಕರು ಈ ಸಂದರ್ಭದಲ್ಲಿ ವ್ಯಕ್ತಪಡಿಸಿದರು.

ಅಮೆರಿಕದ ವಿವಿಧೆಡೆಯಿಂದ ಆಗಮಿಸಿದ್ದ ಭಾರತೀಯರು ಮತ್ತು ಕನ್ನಡಿಗರು ಶ್ರೀ ಜಗದ್ಗುರುಗಳವರ ದರ್ಶನ ಪಡೆದು ಆಶೀರ್ವಾದ ಸ್ವೀಕರಿಸಿದರು. ಜಗದ್ಗುರುಗಳವರ ಸಾನ್ನಿಧ್ಯವನ್ನು ಆಧ್ಯಾತ್ಮಿಕ ಭಾಗ್ಯವೆಂದು ಭಾವಿಸಿದ ಭಕ್ತರ ಭಾವಪೂರ್ಣ ಸ್ಪಂದನೆ ಕಾರ್ಯಕ್ರಮಕ್ಕೆ ವಿಶೇಷ ಮೆರುಗು ನೀಡಿತು.

ಅಮೆರಿಕದ ನೆಲದಲ್ಲಿ ಭಾರತೀಯ ಆಧ್ಯಾತ್ಮಿಕ ಪರಂಪರೆಯ ಸಂದೇಶವನ್ನು ಕೇಳಲು ವಿವಿಧೆಡೆಯಿಂದ ಜನರು ಆಗಮಿಸಿರುವುದು, ಸಾಗರದಾಚೆಯ ಭಾರತೀಯ ಸಮುದಾಯವು ತನ್ನ ಸಂಸ್ಕೃತಿ ಮತ್ತು ಆಧ್ಯಾತ್ಮಿಕ ಪರಂಪರೆಯೊಂದಿಗೆ ಹೊಂದಿರುವ ನಂಟಿಗೆ ಸಾಕ್ಷಿಯಾಯಿತು.

ಪ್ರಮುಖರ ಉಪಸ್ಥಿತಿ

ಕಾರ್ಯಕ್ರಮದಲ್ಲಿ ಅಮೆರಿಕ ನಿವಾಸಿಗಳಾದ ಸದ್ಭಕ್ತರಾದ ಶ್ರೀ ಅಣ್ಣಾಪುರ ಶಿವಕುಮಾರ್, ಶ್ರೀಮತಿ ಅನಸೂಯಾ ಶಿವಕುಮಾರ್, ಶ್ರೀ ನಂದೀಶ್ ಧನಂಜಯ, ಡಾ. ಸುಧಾರಾವ್, ಡಾ. ಯು. ರೋಹಿಣಿ ಉಡುಪ ಸೇರಿದಂತೆ ಹಲವು ಪ್ರಮುಖರು, ಆಯೋಜಕರು, ಭಕ್ತರು ಹಾಗೂ ಅಮೆರಿಕದ ವಿವಿಧ ಭಾಗಗಳಿಂದ ಆಗಮಿಸಿದ್ದ ನೂರಾರು ಭಾರತೀಯರು ಉಪಸ್ಥಿತರಿದ್ದರು.

ವಿಶ್ವಶಾಂತಿಯ ದಾರಿಯಲ್ಲಿ ಮಾನವೀಯತೆಯೇ ಮೊದಲ ಹೆಜ್ಜೆ

ಧರ್ಮದ ಹೆಸರಿನಲ್ಲಿ ನಡೆಯುವ ಸಂಘರ್ಷಗಳ ಕುರಿತು ಚರ್ಚಿಸುವ ಸಂದರ್ಭದಲ್ಲಿ ಶ್ರೀ ತರಳಬಾಳು ಜಗದ್ಗುರುಗಳವರು ನೀಡಿದ ಸಂದೇಶದ ಸಾರ ಮನುಷ್ಯನನ್ನು ತನ್ನೊಳಗೆ ನೋಡಿಕೊಳ್ಳುವಂತೆ ಮಾಡುವುದಾಗಿತ್ತು.

ಧರ್ಮಗಳು ಬೇರೆಬೇರೆಯಾಗಿರಬಹುದು. ಆರಾಧನಾ ವಿಧಾನಗಳು ವಿಭಿನ್ನವಾಗಿರಬಹುದು. ಆಚರಣೆಗಳು ಮತ್ತು ಸಂಪ್ರದಾಯಗಳು ಬದಲಾಗಬಹುದು. ಆದರೆ ಮನುಷ್ಯನ ನೋವು, ಸಂತೋಷ, ಪ್ರೀತಿ, ಕರುಣೆ ಮತ್ತು ಶಾಂತಿಯ ಅಗತ್ಯ ಎಲ್ಲರಲ್ಲಿಯೂ ಒಂದೇ.

ಹೀಗಾಗಿ ಧರ್ಮಗಳ ನಡುವಿನ ಭಿನ್ನತೆಯನ್ನು ಸಂಘರ್ಷದ ಕಾರಣವನ್ನಾಗಿ ಮಾಡದೆ, ಪರಸ್ಪರ ಅರಿವು ಮತ್ತು ಗೌರವದ ಸೇತುವೆಯನ್ನಾಗಿ ರೂಪಿಸಬೇಕು. ಮತ್ತೊಬ್ಬರನ್ನು ಗೆಲ್ಲುವ ಮೊದಲು ತನ್ನೊಳಗಿನ ಕೋಪ, ದ್ವೇಷ, ಅಹಂಕಾರ ಮತ್ತು ಸ್ವಾರ್ಥವನ್ನು ಗೆಲ್ಲಬೇಕು. ಇದೇ ನಿಜವಾದ ಆತ್ಮವಿಜಯ, ಇದೇ ವಿಶ್ವಶಾಂತಿಯ ಮೊದಲ ಹೆಜ್ಜೆ ಎಂಬ ಸಂದೇಶವನ್ನು ಶ್ರೀ ಜಗದ್ಗುರುಗಳು ಸಾರಿದರು.

ಚಿಕಾಗೋದಲ್ಲಿ ಸ್ವಾಮಿ ವಿವೇಕಾನಂದರು ಮೊಳಗಿಸಿದ ವಿಶ್ವಬಂಧುತ್ವದ ವಾಣಿಯ ನೆನಪಿನೊಂದಿಗೆ ಆರಂಭವಾದ ಈ ವೈಚಾರಿಕ ಪಯಣ, ಲೆಮಾಂಟ್‌ನಲ್ಲಿ ಶ್ರೀ ತರಳಬಾಳು ಜಗದ್ಗುರುಗಳವರ ವಿಶ್ವಮಾನವತೆಯ ಶ್ರೀವಾಣಿಯಲ್ಲಿ ಮತ್ತಷ್ಟು ವಿಸ್ತಾರಗೊಂಡಿತು.

“ಧರ್ಮಗಳು ಹಲವು; ಆಧ್ಯಾತ್ಮಿಕತೆ ಮಾತ್ರ ಒಂದು” ಎಂಬ ಸಂದೇಶದೊಂದಿಗೆ, ಧಾರ್ಮಿಕ ಸಂಘರ್ಷಗಳಿಂದ ಬಳಲುತ್ತಿರುವ ಜಗತ್ತಿಗೆ ಪರಸ್ಪರ ಗೌರವ, ಆತ್ಮನಿಗ್ರಹ, ಮಾನವೀಯತೆ ಮತ್ತು ವಿಶ್ವಬಂಧುತ್ವದ ದಾರಿಯನ್ನು ತೋರಿಸಿದಂತಾಯಿತು.