ವಿದ್ಯಾರ್ಥಿಗಳ ಮನದಲ್ಲಿ ನೆಲೆಸಿದ ಶಿಕ್ಷಕನಿಗೆ ಗೌರವ: ಆನವೇರಿ ಸರ್ಕಾರಿ ಶಾಲೆಯ ಶಿಕ್ಷಕ ಮಂಜುನಾಥ್ ರವರಿಗೆ ಹೃದಯಸ್ಪರ್ಶಿ ಬೀಳ್ಕೊಡುಗೆ

ಭದ್ರಾವತಿ/ಆನವೇರಿ: ಆನವೇರಿ ಸರ್ಕಾರಿ ಮಾದರಿ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ಹಲವು ವರ್ಷಗಳ ಕಾಲ ಸೇವೆ ಸಲ್ಲಿಸಿ, ಮಕ್ಕಳ ಮನಸ್ಸಿನಲ್ಲಿ ಅಚ್ಚಳಿಯದ ಸ್ಥಾನ ಪಡೆದ ಶಿಕ್ಷಕ ಮಂಜುನಾಥ್ ಎನ್. ಡಿ. ಅವರಿಗೆ ಶಾಲೆಯ ವತಿಯಿಂದ ಭಾವುಕ ಬೀಳ್ಕೊಡುಗೆ ಹಾಗೂ ಸನ್ಮಾನ ಸಮಾರಂಭವನ್ನು ಆಯೋಜಿಸಲಾಯಿತು.

ಈ ಸಂದರ್ಭದಲ್ಲಿ ಶಾಲೆಯ ಮುಖ್ಯ ಶಿಕ್ಷಕರು, ಸಹಶಿಕ್ಷಕರು, ಎಸ್‌ಡಿಎಂಸಿ ಅಧ್ಯಕ್ಷರು ಹಾಗೂ ಪದಾಧಿಕಾರಿಗಳು, ಪೋಷಕರು, ಅಡುಗೆ ಸಿಬ್ಬಂದಿ, ವಿದ್ಯಾರ್ಥಿಗಳು ಮತ್ತು ಗ್ರಾಮಸ್ಥರು ಉಪಸ್ಥಿತರಿದ್ದು, ತಮ್ಮ ನೆಚ್ಚಿನ ಶಿಕ್ಷಕರಿಗೆ ಗೌರವ ಸಲ್ಲಿಸಿದರು. ಸಮಾರಂಭವು ಪ್ರೀತಿ, ವಿಶ್ವಾಸ ಮತ್ತು ಕೃತಜ್ಞತೆಯ ವಾತಾವರಣದಲ್ಲಿ ನಡೆಯಿತು.

ಬೀಳ್ಕೊಡುಗೆ ಸಮಾರಂಭದಲ್ಲಿ ಮಾತನಾಡಿದ ಮಂಜುನಾಥ್ ಎನ್. ಡಿ.,“ಆನವೇರಿ ಶಾಲೆ, ಇಲ್ಲಿನ ಮಕ್ಕಳು, ಪೋಷಕರು, ಸಹಶಿಕ್ಷಕರು ಮತ್ತು ಗ್ರಾಮಸ್ಥರು ನನಗೆ ಕುಟುಂಬದಂತೆ ಇದ್ದಾರೆ. ನಿಮ್ಮ ಪ್ರೀತಿ, ಗೌರವ ಮತ್ತು ವಿಶ್ವಾಸ ನನ್ನ ಜೀವನದ ಅಮೂಲ್ಯ ಸಂಪತ್ತಾಗಿದೆ. ಈ ದಿನವನ್ನು ನಾನು ಎಂದಿಗೂ ಮರೆಯಲಾಗದು,” ಎಂದು ಭಾವುಕರಾಗಿ ಹೇಳಿದರು

ಶಿಕ್ಷಕ ಮಂಜುನಾಥ್ ಎನ್. ಡಿ. ಅವರು ಆನವೇರಿ ಸರ್ಕಾರಿ ಶಾಲೆಯಲ್ಲಿ ಸೇವೆ ಸಲ್ಲಿಸಿದ ಅವಧಿಯಲ್ಲಿ ಕೇವಲ ಪಾಠ ಬೋಧನೆಗೆ ಮಾತ್ರ ಸೀಮಿತರಾಗದೆ, ವಿದ್ಯಾರ್ಥಿಗಳ ಶೈಕ್ಷಣಿಕ, ನೈತಿಕ ಹಾಗೂ ಸಾಮಾಜಿಕ ಬೆಳವಣಿಗೆಗೆ ಮಹತ್ವದ ಕೊಡುಗೆ ನೀಡಿದ್ದಾರೆ. ಮಕ್ಕಳೊಂದಿಗೆ ತಂದೆಸಮಾನ ಪ್ರೀತಿ ಮತ್ತು ಸ್ನೇಹಭಾವದಿಂದ ವರ್ತಿಸಿ, ಶಿಸ್ತು ಹಾಗೂ ಮೌಲ್ಯಗಳನ್ನು ಜೀವನಪಾಠಗಳಾಗಿ ಕಲಿಸಿದ್ದವರು ಅವರು.

ಪೋಷಕರೊಂದಿಗೆ ಉತ್ತಮ ಬಾಂಧವ್ಯವನ್ನು ಕಟ್ಟಿಕೊಂಡಿದ್ದ ಶಿಕ್ಷಕ ಮಂಜುನಾಥ್ , ಮಕ್ಕಳ ಶಿಕ್ಷಣದ ಬಗ್ಗೆ ಸದಾ ಸಂವಾದ ನಡೆಸಿ, ಪೋಷಕರ ವಿಶ್ವಾಸ ಗಳಿಸಿದ್ದರು. ಇದರಿಂದ ಶಾಲೆ–ಮನೆ ನಡುವಿನ ಸಂಬಂಧ ಮತ್ತಷ್ಟು ಬಲಗೊಂಡಿತು. ಗ್ರಾಮಸ್ಥರ ದೃಷ್ಟಿಯಲ್ಲಿ ಅವರು ಶಾಲೆಯ ಶಿಕ್ಷಕರಷ್ಟೇ ಅಲ್ಲದೆ, ಸಮಾಜದ ಮಾರ್ಗದರ್ಶಕರಾಗಿಯೂ ಗುರುತಿಸಿಕೊಂಡಿದ್ದರು.

ಪ್ರಸ್ತುತ ಪ್ರಭಾರಿ ಮುಖ್ಯ ಶಿಕ್ಷಕರಾಗಿ ಕಾರ್ಯನಿರ್ವಹಿಸಿದ ಅವಧಿಯಲ್ಲಿ ಶಾಲೆಯ ಶೈಕ್ಷಣಿಕ ಗುಣಮಟ್ಟ, ಶಿಸ್ತು, ಸಹಪಾಠ್ಯ ಚಟುವಟಿಕೆಗಳು ಹಾಗೂ ಆಡಳಿತ ವ್ಯವಸ್ಥೆಗೆ ಹೊಸ ಚೈತನ್ಯ ತುಂಬಿದರು. ಸಹಶಿಕ್ಷಕರೊಂದಿಗೆ ಸಹಕಾರ ಮತ್ತು ತಂಡ ಭಾವನೆಯಿಂದ ಕೆಲಸ ಮಾಡಿ, ಶಾಲೆಯನ್ನು ಒಂದು ಕುಟುಂಬದಂತೆಯೇ ಮುನ್ನಡೆಸಿದ ಶ್ಲಾಘನೆ ಅವರಿಗೆ ಸಲ್ಲುತ್ತದೆ.

ಇದೀಗ ಅವರು ಅದೇ ಭದ್ರಾವತಿ ತಾಲ್ಲೂಕಿನ ಆದ್ರಿಹಳ್ಳಿ ಸರ್ಕಾರಿ ಶಾಲೆಗೆ ವರ್ಗಾವಣೆಗೊಂಡಿದ್ದಾರೆ. ಆನವೇರಿ ಶಾಲೆಗೆ ಇದು ಭಾವನಾತ್ಮಕ ವಿದಾಯವಾದರೂ, ಆದ್ರಿಹಳ್ಳಿ ಶಾಲೆಗೆ ಒಬ್ಬ ಅನುಭವಸಂಪನ್ನ, ಸಮರ್ಪಿತ ಶಿಕ್ಷಕ ದೊರಕಿರುವುದು ಖಂಡಿತ ಲಾಭಕರವೆಂದು ಶಿಕ್ಷಕರು ಮತ್ತು ಗ್ರಾಮಸ್ಥರು ಅಭಿಪ್ರಾಯ ವ್ಯಕ್ತಪಡಿಸಿದರು.

ಆನವೇರಿ ಸರ್ಕಾರಿ ಶಾಲೆಯ ಶಿಕ್ಷಕರು, ವಿದ್ಯಾರ್ಥಿಗಳು, ಪೋಷಕರು ಹಾಗೂ ಗ್ರಾಮಸ್ಥರು, ಮಂಜುನಾಥ್ ಎನ್. ಡಿ. ಅವರು ಹೊಸ ಶಾಲೆಯಲ್ಲೂ ತಮ್ಮ ಪರಿಶ್ರಮ, ಶಿಸ್ತು ಮತ್ತು ಸೇವಾ ಮನೋಭಾವದಿಂದ ಮಕ್ಕಳ ಬದುಕಿಗೆ ಬೆಳಕಾಗಲಿ ಎಂದು ಹಾರೈಸಿದರು.

ಶಿಕ್ಷಕ ಮಂಜುನಾಥ್ ಎನ್.ಡಿ. ಅವರು ಮುಂದಿನ ಶಾಲೆಯಲ್ಲೂ ತಮ್ಮ ಸೇವಾ ಸಮರ್ಪಣೆ, ಶಿಸ್ತು ಮತ್ತು ಮಕ್ಕಳ ಮೇಲಿನ ಪ್ರೀತಿಯಿಂದ ಶೈಕ್ಷಣಿಕ ಕ್ಷೇತ್ರಕ್ಕೆ ಇನ್ನಷ್ಟು ಕೊಡುಗೆ ನೀಡಲಿ. ಅವರ ಮುಂದಿನ ಸೇವಾ ಜೀವನ ಯಶಸ್ವಿಯಾಗಲಿ, ಉತ್ತಮ ಆರೋಗ್ಯ ಹಾಗೂ ಗೌರವ ಸದಾ ಜೊತೆಗಿರಲಿ ಎಂದು ನಮ್ಮ ಡಿಟೆಕ್ಟಿವ್ ನ್ಯೂಸ್24 ಮಾಧ್ಯಮದ ವತಿಯಿಂದ ಶುಭ ಹಾರೈಕೆಗಳು.