ಮಡಿಕೆಚೀಲೂರಿನಲ್ಲಿ ತರಳಬಾಳು ಶ್ರೀ ಶಿವಕುಮಾರ ಶಿವಾಚಾರ್ಯ ಮಹಾಗುರುವಿಗೆ ಭಕ್ತಿ ಸಮರ್ಪಣೆ

ಮಡಿಕೆಚೀಲೂರಿನಲ್ಲಿ ನಡೆದ ಭಕ್ತಿ ಸಮರ್ಪಣೆ ಕಾರ್ಯಕ್ರಮವು ಕೇವಲ ಧಾರ್ಮಿಕ ಆಚರಣೆ ಮಾತ್ರವಲ್ಲದೆ, ದಾಸೋಹ–ಭಕ್ತಿ–ಸಾಮಾಜಿಕ ಸಂದೇಶಗಳ ಸಮ್ಮಿಲನವಾಗಿ ಮೂಡಿಬಂದಿತು. ಈ ಭಕ್ತಿ ಸಮರ್ಪಣೆ ಕಾರ್ಯಕ್ರಮವು ಧಾರ್ಮಿಕತೆಯೊಂದಿಗೆ ಸಮಾಜಮುಖಿ ಕಾರ್ಯಗಳ ಮಹತ್ವವನ್ನು ಒಟ್ಟುಗೂಡಿಸಿದ ಅರ್ಥಪೂರ್ಣ ವೇದಿಕೆಯಾಗಿ ಪರಿಣಮಿಸಿತು. ಪರಮಪೂಜ್ಯರ ಸಂದೇಶವು ಭಕ್ತಾಧಿಗಳ ಮನಸ್ಸನ್ನು ಸ್ಪರ್ಶಿಸಿ, “ಭಕ್ತಿ ಎಂದರೆ ಕೇವಲ ಪೂಜೆ ಅಲ್ಲ; ಸಮಾಜಮುಖಿ ಸೇವೆಯೇ ನಿಜವಾದ ಪೂಜೆ” ಎಂಬ ಭಾವನೆಗೆ ಜೀವ ತುಂಬಿತು.

ಮಡಿಕೆಚೀಲೂರು (ಶಿವಮೊಗ್ಗ ತಾಲೂಕು): ನಾಡಿನ ಧಾರ್ಮಿಕ, ಶೈಕ್ಷಣಿಕ, ಸಾಮಾಜಿಕ, ಸಾಂಸ್ಕೃತಿಕ ಹಾಗೂ ಸಾಹಿತ್ಯಿಕ ಕ್ಷೇತ್ರಗಳಲ್ಲಿ ಮಹತ್ತರ ಸೇವೆ ಸಲ್ಲಿಸಿ “ಮಹಾದಾಸೋಹಿ” ಎಂದೇ ಖ್ಯಾತಿ ಪಡೆದಿದ್ದ ಲಿಂಗೈಕ್ಯ ಪರಮಪೂಜ್ಯ ಶ್ರೀ ತರಳಬಾಳು ಜಗದ್ಗುರು ಶ್ರೀ 1108 ಶಿವಕುಮಾರ ಶಿವಾಚಾರ್ಯ ಮಹಾಸ್ವಾಮಿಗಳವರ 33ನೇ ಶ್ರದ್ಧಾಂಜಲಿ ಕಾರ್ಯಕ್ರಮದ ಅಂಗವಾಗಿ ಮಡಿಕಡಚೀಲೂರಿನಲ್ಲಿ ಭಕ್ತಿ–ಭಾವದಿಂದ, ಅರ್ಥಪೂರ್ಣವಾಗಿ ಆಚರಿಸಲಾಯಿತು.

ಈ ಮಹೋತ್ಸವದಲ್ಲಿ ಶ್ರೀ ತರಳಬಾಳು ಜಗದ್ಗುರು ಬೃಹನ್ಮಠ, ಸಿರಿಗೆರೆಯ ಸದ್ಧರ್ಮಸಿಂಹಾಸನಾಧೀಶ ಶ್ರೀ 1108 ಡಾ. ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳವರು ದಿವ್ಯ ಸಾನಿಧ್ಯ ವಹಿಸಿ ಸಮಾರಂಭಕ್ಕೆ ಆಧ್ಯಾತ್ಮಿಕ ಮಹಿಮೆ ತುಂಬಿದರು.

ವಿದೇಶಿ ಭಕ್ತರ ಅನನ್ಯ ಆಸಕ್ತಿ

ಸಮಾರಂಭದ ವಿಶೇಷ ಆಕರ್ಷಣೆಯೆಂದರೆ ಅಮೆರಿಕಾದಿಂದ ವಚನ ಸಾಹಿತ್ಯ ಅಧ್ಯಯನಕ್ಕಾಗಿ ಭಾರತಕ್ಕೆ ಬಂದ ಮಠದ ಭಕ್ತರು ಹಾಗೂ ಮೂಲತಃ ಇಸ್ರೇಲ್ ದೇಶದ ಭಕ್ತರು ಭಕ್ತಿ ಸಮರ್ಪಣೆಯಲ್ಲಿ ಪಾಲ್ಗೊಂಡು ಮಹಾಸ್ವಾಮಿಗಳ ಆಶೀರ್ವಾದ ಪಡೆದದ್ದು. ವಚನಗಳ ಮೇಲೆ ಅವರಿಗಿರುವ ಪ್ರೀತಿ, ಭಕ್ತಿ ಮತ್ತು ಅಧ್ಯಯನದ ಬಯಕೆ ಸ್ಥಳೀಯ ಭಕ್ತರಲ್ಲಿ ಅಪಾರ ಮೆಚ್ಚುಗೆಗೆ ಪಾತ್ರವಾಯಿತು.

ಪರಮಪೂಜ್ಯರ ಆಶೀರ್ವಚನ

ಮಡಿಕೆಚೀಲೂರಿನಲ್ಲಿ ನಡೆದ ಭಕ್ತಿ ಸಮರ್ಪಣೆಯ ಕಾರ್ಯಕ್ರಮದ ಅಂತಿಮ ಹಂತದಲ್ಲಿ ಶ್ರೀ ತರಳಬಾಳು ಜಗದ್ಗುರು ಬೃಹನ್ಮಠದ ಸದ್ಧರ್ಮಸಿಂಹಾಸನಾಧೀಶ ಶ್ರೀ 1108 ಡಾ. ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳು ತಮ್ಮ ಆಶೀರ್ವಚನ ನೀಡಿದರು.

ಅವರು ಭಕ್ತಾಧಿಗಳ ಅಪಾರ ಸಮಾಗಮ, ದಾಸೋಹ ಸೇವೆಯ ಶ್ರದ್ಧೆ ಹಾಗೂ ಸಮರ್ಪಣೆಯನ್ನು ಮೆಚ್ಚಿ ಮಾತನಾಡಿ –“ದಾಸೋಹವೇ ಧರ್ಮ. ಮಾನವ ಸೇವೆಯೇ ಮಹಾಸೇವೆಯಾಗಿದ್ದು, ಸಮಾಜಮುಖಿ ಕಾರ್ಯಗಳಲ್ಲಿ ಎಲ್ಲರೂ ಸಕ್ರಿಯವಾಗಿ ಪಾಲ್ಗೊಳ್ಳಬೇಕು. ಅಲ್ಲಿ ನಿಜವಾದ ಭಕ್ತಿ ಅಡಕವಾಗಿದೆ” ಎಂದು ಸಂದೇಶ ನೀಡಿದರು.

ಪರಮಪೂಜ್ಯರು ತಮ್ಮ ಆಶೀರ್ವಚನದಲ್ಲಿ ದಾಸೋಹ ಪರಂಪರೆಯ ಮಹತ್ವವನ್ನು ವಿಶೇಷವಾಗಿ ವಿವರಿಸಿದರು. ಭೌತಿಕ ಸುಖ–ಸೌಕರ್ಯಗಳಲ್ಲಿ ಮುಳುಗದೇ, ಸಮಾಜದ ಹಿತದೃಷ್ಟಿಯಿಂದ ಬದುಕಿದಾಗ ಮಾತ್ರ ಜೀವನ ಅರ್ಥಪೂರ್ಣವಾಗುತ್ತದೆ ಎಂದು ತಿಳಿಸಿದರು. “ಭಕ್ತಿಯ ಅರ್ಥ ಕೇವಲ ಪೂಜೆ, ಮಂತ್ರ–ಜಪವಲ್ಲ. ಬಡವರ ಕಣ್ಣೀರನ್ನು ಒರೆಸುವುದು, ಹಸಿದವನಿಗೆ ಅನ್ನ ನೀಡುವುದು, ಜ್ಞಾನಕ್ಕೆ ಬಾಯಾರಿದವನಿಗೆ ವಿದ್ಯೆ ಪೂರೈಸುವುದು – ಇದೇ ನಿಜವಾದ ಭಕ್ತಿ” ಎಂದು ಅವರು ಸಾರಿದರು.

ಪರಮಪೂಜ್ಯರು ಯುವ ಪೀಳಿಗೆಗೆ ವಿಶೇಷವಾಗಿ ಉದ್ದೇಶಿಸಿ – “ಇಂದಿನ ಸಮಾಜದಲ್ಲಿ ನಿಜವಾದ ಬದಲಾವಣೆ ತರಬೇಕಾದ ಜವಾಬ್ದಾರಿ ಯುವಕರ ಮೇಲಿದೆ. ಅವರು ದಾಸೋಹ ತತ್ತ್ವವನ್ನು ತಮ್ಮ ಜೀವನ ಶೈಲಿಯ ಭಾಗವನ್ನಾಗಿಸಿಕೊಂಡರೆ, ಸಮಾಜದಲ್ಲಿ ಅಸಮಾನತೆ, ಅಜ್ಞಾನ, ಅಂಧಶ್ರದ್ಧೆ ಸ್ವಯಂ ಕರಗಿ ಹೋಗುತ್ತದೆ” ಎಂದು ಪ್ರೇರಣೆ ನೀಡಿದರು.

ಅವರು ರೈತರ ಹೋರಾಟ, ಮಹಿಳೆಯರ ಶಕ್ತಿ, ವಿದ್ಯಾರ್ಥಿಗಳ ಜ್ಞಾನ ಬಯಕೆ – ಇವೆಲ್ಲವೂ ದಾಸೋಹದ ಬೃಹತ್ ಪರಂಪರೆಯ ಭಾಗಗಳೇ ಎಂದು ವಿವರಿಸಿದರು. “ಒಬ್ಬನು ಸೇವೆ ಮಾಡಿದಾಗ ಅದು ವ್ಯಕ್ತಿಗಷ್ಟೇ ಸೀಮಿತ. ಆದರೆ ದಾಸೋಹದ ಪರಂಪರೆ ಒಟ್ಟಾಗಿ ಬಂದಾಗ ಅದು ಸಮಾಜವನ್ನು ಹೊಸ ದಾರಿಯಲ್ಲಿ ಮುನ್ನಡೆಸುತ್ತದೆ” ಎಂದು ಹೇಳಿದರು.

ಪರಮಪೂಜ್ಯರ ಈ ಆಶೀರ್ವಚನ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಭಕ್ತಾಧಿಗಳ ಮನಸ್ಸನ್ನು ಆಳವಾಗಿ ಸ್ಪರ್ಶಿಸಿತು.  ಮಡಿಕೆಚೀಲೂರಿನ ಈ ಭಕ್ತಿ ಸಮರ್ಪಣೆಯ ಅಂತ್ಯದಲ್ಲಿ ಪರಮಪೂಜ್ಯರು ನೀಡಿದ ಈ ಸಂದೇಶವು ಧಾರ್ಮಿಕತೆಗೂ, ಸಮಾಜಮುಖಿ ಕಾರ್ಯಗಳಿಗೂ ಸೇತುವೆಯಂತೆ ಪರಿಣಮಿಸಿ, ಭಕ್ತರಲ್ಲಿ ಹೊಸ ಮನೋಭಾವನೆಯನ್ನು ಹುಟ್ಟಿಸಿತು

ಕಾರ್ಯಕ್ರಮದಲ್ಲಿ ವಿಧಾನ ಪರಿಷತ್ ಸದಸ್ಯ ಧನಂಜಯ ಸರ್ಜಿ, ಶಿವಮೊಗ್ಗ ಗ್ರಾಮಾಂತರ ತರಳಬಾಳು ಸೇವಾ ಸಮಿತಿಯ ಅಧ್ಯಕ್ಷ ಎಸ್.ಎಂ. ಷಣ್ಮುಖಪ್ಪ, ರಾಜ್ಯ ರೈತ ಸಂಘದ ಅಧ್ಯಕ್ಷ ಹೆಚ್.ಆರ್. ಬಸವರಾಜಪ್ಪ, ಶಿವಪ್ಪನಾಯಕ ಕೃಷಿ ವಿಶ್ವವಿದ್ಯಾಲಯದ ಉಪಕುಲಪತಿ ಆರ್.ಸಿ. ಜಗದೀಶ್, ಪ್ರಮುಖರಾದ ಎಂ.ಜಿ. ಈಶ್ವರಪ್ಪ, ಪರಮೇಶ್ವರಪ್ಪ, ಶ್ರೀಧರ್‌ ಪಾಟೀಲ್‌, ಮಂಜಪ್ಪ, ಮೋಹನ್‌ಗೌಡ, ಮಲ್ಲಿಕಾರ್ಜುನ್‌, ಪ್ರವೀಣ್‌ಕುಮಾರ್‌,  ಸತೀಶ್ , ಅರುಣ್‌, ಯೋಗೇಶ್‌, ನಂದೀಶ್‌,  ಸೇರಿ ಅನೇಕ ಗಣ್ಯರು ಹಾಜರಿದ್ದರು.

ಭಕ್ತರ ಅಪಾರ ಸಮಾಗಮ

ಮಡಿಕೆಚೀಲೂರು ಹಾಗೂ ಸುತ್ತಮುತ್ತಲಿನ ಹಳ್ಳಿಗಳಿಂದ ಬಂದ ಸಾವಿರಾರು ಭಕ್ತಾಧಿಗಳು, ರೈತರು, ಮಹಿಳೆಯರು ಮತ್ತು ಯುವಕರು ದಾಸೋಹ ಸೇವೆಯಲ್ಲಿ ತೊಡಗಿಕೊಂಡರು. ಭಕ್ತರ ಸಾನ್ನಿಧ್ಯದಲ್ಲಿ ಮಠದ ಸೇವಾ ಪರಂಪರೆ, ದಾಸೋಹ ಸಂಸ್ಕೃತಿ ಮತ್ತಷ್ಟು ಭಾವಪೂರ್ಣವಾಗಿ ಮೂಡಿಬಂದಿತು.

ಈ ಶ್ರದ್ಧಾಂಜಲಿ ಸಮಾರಂಭವು ಕೇವಲ ಧಾರ್ಮಿಕ ಆಚರಣೆಯಲ್ಲ, ಬದಲಿಗೆ ಭಕ್ತಿ, ದಾಸೋಹ, ಸಾಮಾಜಿಕ ಬದ್ಧತೆ ಹಾಗೂ ವಚನ ತತ್ತ್ವಗಳ ಅರಿವು ಮೂಡಿಸುವ ವೇದಿಕೆಯಾಗಿ ಪರಿಣಮಿಸಿತು.

ಮಡಿಕೆಚೀಲೂರಿನ ಈ ಸಮಾರಂಭವು “ತರಳಬಾಳು ಪರಂಪರೆ”ಯ ಮಹತ್ವವನ್ನು ಮತ್ತೊಮ್ಮೆ ನೆನಪಿಸಿ, ಭಕ್ತರಲ್ಲಿ ಹೊಸ ಉತ್ಸಾಹವನ್ನು ಹುಟ್ಟಿಸಿತು.