ಲಿಂಗಧಾರಣೆ ಕೇವಲ ಆಚರಣೆ ಅಲ್ಲ, ಅದು ಅರಿವಿನ ಸಾಧನ : ಕಾಶಿ ಜಗದ್ಗುರು ಡಾ. ಚಂದ್ರಶೇಖರ ಶಿವಾಚಾರ್ಯ ಭಗವತ್ಪಾದರು

ಶಿವಮೊಗ್ಗ: ನಗರದ ಅಂಬೇಡ್ಕರ್ ಭವನದಲ್ಲಿ ಶ್ರೀ ಶಿವಕುಮಾರ ಸ್ವಾಮೀಜಿಗಳ ನೌಕರರ ಸಂಘ ಹಾಗೂ ಶ್ರೀ ಬಸವೇಶ್ವರ ವೀರಶೈವ ಲಿಂಗಾಯತ ಸಮಾಜದ ಆಶ್ರಯದಲ್ಲಿ ಆಯೋಜಿಸಲಾಗಿದ್ದ ‘ಲಿಂಗತತ್ವದರ್ಶನ’ ಆಧ್ಯಾತ್ಮಿಕ ಪ್ರವಚನ ಕಾರ್ಯಕ್ರಮದ ಎರಡನೇ ದಿನ ಕಾಶಿಯ ಜಂಗಮವಾಡಿ ಮಠದ ಶ್ರೀ ಮತ್ ಕಾಶಿ ಜ್ಞಾನ ಸಿಂಹಾಸನಾಧೀಶ್ವರರಾದ ಶ್ರೀ ಶ್ರೀ ಶ್ರೀ 1008 ಜಗದ್ಗುರು ವಿದ್ಯಾವಾಚಸ್ಪತಿ ಡಾ. ಚಂದ್ರಶೇಖರ ಶಿವಾಚಾರ್ಯ ಭಗವತ್ಪಾದರು ವೀರಶೈವ ಲಿಂಗಾಯತ ಧರ್ಮದ ತಾತ್ವಿಕ ಆಳ, ಆಚರಣೆಗಳ ಅರ್ಥ ಮತ್ತು ಮುಂದಿನ ಪೀಳಿಗೆಗೆ ಅದರ ಹೊಣೆಗಾರಿಕೆಯನ್ನು ವಿವರವಾಗಿ ಪ್ರತಿಪಾದಿಸಿದರು.

ಲಿಂಗ ಧಾರಣೆ ಕೇವಲ ದೇಹದ ಮೇಲಿನ ಆಚರಣೆ ಮಾತ್ರವಲ್ಲ, ಅದು ಆತ್ಮಜ್ಞಾನಕ್ಕೆ ದಾರಿ ಮಾಡಿಕೊಡುವ ಮಹತ್ವದ ಪ್ರಕ್ರಿಯೆ ಎಂದು ಅವರು ತಿಳಿಸಿದರು. “ಮನುಷ್ಯ ತಿಳಿದು ತಿಳಿಯದೆ ಅನೇಕ ತಪ್ಪುಗಳನ್ನು ಮಾಡುತ್ತಾನೆ. ಆದರೆ ದೇವರು ಕೊರಳಲ್ಲಿ ಇದ್ದರೆ, ಹಣೆಯಲ್ಲಿ ಭಸ್ಮ ಇದ್ದರೆ, ಮನಸ್ಸಿನಲ್ಲಿ ಭಯಕ್ಕೆ ಜಾಗವಿರುವುದಿಲ್ಲ” ಎಂದು ಅವರು ಹೇಳಿದರು.

ಲಿಂಗ ಧಾರಣೆ – ಅರಿವಿನೊಂದಿಗೆ ಆಗಬೇಕಾದ ಆಧ್ಯಾತ್ಮಿಕ ವಿಧಿ

ಪ್ರತಿಯೊಬ್ಬ ವೀರಶೈವ ಲಿಂಗಾಯತನು ಲಿಂಗವನ್ನು ಧರಿಸಬೇಕು ಮಾತ್ರವಲ್ಲದೆ, ಕನಿಷ್ಠ ದಿನಕ್ಕೆ ಒಂದು ಬಾರಿ ಇಷ್ಟಲಿಂಗ ಪೂಜೆ ಮಾಡಬೇಕು ಎಂಬುದು ಧರ್ಮದ ಆಧಾರಶಿಲೆ ಎಂದು ಜಗದ್ಗುರುಗಳು ಸ್ಪಷ್ಟಪಡಿಸಿದರು. “ಲಿಂಗ ಧಾರಣೆ ಕೇವಲ ಕೊರಳಿಗೆ ಕಟ್ಟಿಕೊಳ್ಳುವ ಕ್ರಿಯೆಯಲ್ಲ. ಅದು ದೇವರನ್ನು ಸದಾ ಸ್ಮರಿಸುವ ಸಂಕೇತ. ಲಿಂಗ ಧರಿಸಿಕೊಂಡು ದಿನನಿತ್ಯ ಪೂಜೆ ಮಾಡದೇ ಇದ್ದರೆ ಅದು ಧರ್ಮದ ಆತ್ಮವನ್ನೇ ಕಳೆದುಕೊಳ್ಳುವಂತೆ ಆಗುತ್ತದೆ” ಎಂದು ಹೇಳಿದರು.

“ಕೊರಳಿನ ಲಿಂಗ ತೆಗೆಯಲಾಗದ ಸ್ಥಿತಿಯೇ ಸಾಕ್ಷಿ: ಜಗದ್ಗುರುಗಳ ಕಠಿಣ ಎಚ್ಚರಿಕೆ”

ವೀರಶೈವ ಲಿಂಗಾಯತ ಧರ್ಮದಲ್ಲಿ ಪ್ರತಿಯೊಬ್ಬರೂ ಲಿಂಗವನ್ನು ಧರಿಸಬೇಕು ಮಾತ್ರವಲ್ಲದೆ, ಕನಿಷ್ಠ ದಿನಕ್ಕೆ ಒಂದು ಬಾರಿ ಇಷ್ಟಲಿಂಗ ಪೂಜೆ ಮಾಡಬೇಕು ಎಂಬುದು ಅನಿವಾರ್ಯ ಎಂದು ತಿಳಿಸಿದ ಜಗದ್ಗುರುಗಳು, “ಬಹಳಷ್ಟು ಬಾರಿ ನಾವು ಪೀಠಾಧಿಪತಿಗಳು ಮನೆಗಳಿಗೆ ಬಂದಾಗ, ಕೆಲವರು ಕೊರಳಿನಲ್ಲಿರುವ ಲಿಂಗವನ್ನು ತೆಗೆಯಲು ಸಾಧ್ಯವಾಗುವುದಿಲ್ಲ. ನಂತರ ಹೆಂಡತಿ ಅಥವಾ ಮಗಳು ಬಂದು ಅದನ್ನು ತೆಗೆಯುತ್ತಾರೆ. ಇದರಿಂದ ಅವರು ದಿನನಿತ್ಯ ಲಿಂಗ ಪೂಜೆ ಮಾಡುತ್ತಿಲ್ಲ ಎಂಬುದು ನಮಗೆ ಸ್ಪಷ್ಟವಾಗುತ್ತದೆ” ಎಂದು ಕಠಿಣವಾಗಿ ಹೇಳಿದರು.

ಶರಣ ವಚನ – ಕಠಿಣ ಪ್ರಶ್ನೆಗಳ ಮೂಲಕ ತತ್ತ್ವದ ಬೋಧನೆ

ಈ ಸಂದರ್ಭದಲ್ಲಿ ಅಲ್ಲಮಪ್ರಭುಗಳ ಶರಣ ವಚನವನ್ನು ಉದಾಹರಿಸಿ ಜಗದ್ಗುರುಗಳು ಅದರ ಆಂತರಾರ್ಥವನ್ನು ವಿವರಿಸಿದರು:

ಹೊಟ್ಟೆಯ ಮೇಲೆ ಕಟ್ಟೋಗರದ ಮೊಟ್ಟೆಯ ಕಟ್ಟಿದಡೇನು?
ಹಸಿವು ಹೋಗುದೆ?
ಅಂಗದ ಮೇಲೆ ಲಿಂಗಸ್ವಾಯತವಾಡೇನು?
ಭಕ್ತನಾಗಬಲ್ಲನೆ?

ಹಸಿದವನ ಹೊಟ್ಟೆಯ ಮೇಲೆ ತಿಂಡಿಗಳನ್ನು ಗಂಟು ಮಾಡಿ ಕಟ್ಟಿದರೆ ಹಸಿವು ಹೋಗುವುದಿಲ್ಲ. ಹಾಗೆಯೇ ದೇಹದ ಮೇಲೆ ಲಿಂಗವನ್ನು ಧರಿಸಿದರೆ ಮಾತ್ರ ಭಕ್ತಿ ಬರುತ್ತದೆ ಎಂದು ಭ್ರಮಿಸಬಾರದು. ಲಿಂಗದ ಹಿಂದೆ ಅಡಗಿರುವ ತತ್ತ್ವ, ಅದರ ಮಹತ್ವ ಮತ್ತು ಲಿಂಗ ನೀಡಿದ ಗುರುವಿನ ಕುರಿತು ಗೌರವ ಇದ್ದಾಗ ಮಾತ್ರ ನಿಜವಾದ ಭಕ್ತಿ ಬೆಳೆಯುತ್ತದೆ ಎಂದು ಜಗದ್ಗುರುಗಳು ವಿವರಿಸಿದರು.

ಲಿಂಗ ಪೂಜೆ – ವೀರಶೈವ ಜೀವನದ ಹೃದಯ

ಲಿಂಗ ಪೂಜೆಯೇ ವೀರಶೈವ ಧರ್ಮದ ಕೇಂದ್ರಬಿಂದು ಎಂದು ಜಗದ್ಗುರುಗಳು ಸ್ಪಷ್ಟಪಡಿಸಿದರು. “ಲಿಂಗ ಪೂಜೆಗಿಂತ ಶ್ರೇಷ್ಠವಾದ ಪೂಜೆ ಮತ್ತೊಂದು ಇಲ್ಲ. ಲಿಂಗ ಪೂಜೆ ಮಾಡುವ ಭಾಗ್ಯ ಎಲ್ಲರಿಗೂ ಸಿಗುವುದಿಲ್ಲ. ಸದಾ ಲಿಂಗವನ್ನು ಕೊರಳಲ್ಲಿ ಧರಿಸಿಕೊಂಡು ಪೂಜೆ ಮಾಡುವ ವೀರಶೈವ ಲಿಂಗಾಯತರು ಅತ್ಯಂತ ಭಾಗ್ಯಶಾಲಿಗಳು” ಎಂದು ಹೇಳಿದರು.

ಸಂಪತ್ತು ಎಂದರೇನು? – ವಚನಕಾರರ ದೃಷ್ಟಿಯಲ್ಲಿ

ಸಿದ್ಧಾಂತ ಶಿಖಾಮಣಿಯಲ್ಲಿ ಹೇಳಿರುವ ಸಂಪತ್ತಿನ ತತ್ತ್ವವನ್ನು ವಿವರಿಸಿದ ಜಗದ್ಗುರುಗಳು, “ವೀರಶೈವರು ಮೂರು ವಿಧದ ಸಂಪತ್ತುಗಳನ್ನು ಹೊಂದಿರುವವರು. ಆದರೆ ಅವು ಹೊಲ–ಮನೆ, ಗದ್ದೆ, ಬಂಗಾರ, ಹಣವಲ್ಲ” ಎಂದು ತಿಳಿಸಿದರು. ಅಲ್ಲಮಪ್ರಭುಗಳ ವಚನವನ್ನು ಉಲ್ಲೇಖಿಸಿ,

ಭೂಮಿ ನಿನ್ನದಲ್ಲ, ಹೇಮ ನಿನ್ನದಲ್ಲ,
ಕಾಮಿನಿ ನಿನ್ನವಳಲ್ಲ
ಅವು ಜಗಕ್ಕಿಕ್ಕಿದ ವಿಧಿ.
ನಿನ್ನ ಒಡವೆ ಎಂಬುದು ಜ್ಞಾನರತ್ನ. ಅಂತಪ್ಪದಿವ್ಯರತ್ನವ ಕೆಡಗುಡದೆ
ಆ ರತ್ನವ ನೀನು ಅಲಂಕರಿಸಿದೆಯಾದಡೆ
ನಮ್ಮ ಗುಹೇಶ್ವರಲಿಂಗದಲ್ಲಿ
ನಿನ್ನಿಂದ ಬಿಟ್ಟು ಸಿರಿವಂತರಿಲ್ಲ
ಕಾಣಾ ಎಲೆ ಮನವೆ.      
             
 – ಅಲ್ಲಮಪ್ರಭುದೇವರು

ಎಂದು ಹೇಳುತ್ತಾ, ಈ ಜಗತ್ತಿನ ಎಲ್ಲ ವಸ್ತುಗಳು ದೇವರ ಸೃಷ್ಟಿಯೇ ಆಗಿರುವುದರಿಂದ ಆತ್ಮಿಕವಾಗಿ ಅವು ಎಲ್ಲರಿಗೂ ಸೇರಿವೆ. ಆದರೆ ಭೌತಿಕವಾಗಿ ಯಾವುದೂ ನಮ್ಮದೇ ಅಲ್ಲ. ಸತ್ತ ಮೇಲೆ ನಮ್ಮ ದೇಹವೂ ನಮ್ಮ ಜೊತೆ ಬರುವುದಿಲ್ಲ. ಹೀಗಿದ್ದರೂ ಹೊನ್ನು–ಹೆಣ್ಣು–ಮಣ್ಣುಗಳನ್ನು ಸಂಪತ್ತು ಎಂದು ಭ್ರಮಿಸುವುದು ಮಾನವನ ದೊಡ್ಡ ಅಜ್ಞಾನ ಎಂದು ಹೇಳಿದರು.

ಮನದ ಮುಂದಣ ಆಸೆಯೇ ಮಾಯೆ ಎಂದು ಅಲ್ಲಮಪ್ರಭುಗಳು ಹೇಳಿದ್ದಾರೆ. ಈ ಆಸೆಯನ್ನು ಮೀರಿಸಿ ಜ್ಞಾನವನ್ನು ಅರಿತವನೇ ನಿಜವಾದ ಶ್ರೀಮಂತ. ಈ ಜ್ಞಾನವೇ ದಿವ್ಯಜ್ಞಾನರತ್ನ. ಅದನ್ನು ಕಾಪಾಡಿಕೊಂಡು ಅನುಭಾವದ ಲೋಕದಲ್ಲಿ ನಡೆಯುವವರು ಎಲ್ಲರಿಗಿಂತ ಶ್ರೀಮಂತರು ಎಂದು ಜಗದ್ಗುರುಗಳು ಹೇಳಿದರು.

ಗುರು–ಲಿಂಗ–ಜಂಗಮ: ವೀರಶೈವ ಲಿಂಗಾಯತರ ನಿಜವಾದ ಸಂಪತ್ತು

ವೀರಶೈವ ಲಿಂಗಾಯತ ಧರ್ಮದಲ್ಲಿ ಮೂರು ಮಹಾಸಂಪತ್ತುಗಳಿವೆ ಎಂದು ತಿಳಿಸಿದ ಜಗದ್ಗುರುಗಳು, “ಗುರು, ಲಿಂಗ, ಜಂಗಮ – ಇವೇ ನಮ್ಮ ಸಂಪತ್ತುಗಳು. ಇವುಗಳನ್ನು ಯಾರು ಗೌರವಿಸುತ್ತಾರೋ, ಪಾಲಿಸುತ್ತಾರೋ, ತೃಪ್ತಿಪಡಿಸುತ್ತಾರೋ ಅವರೇ ನಿಜವಾದ ಶ್ರೀಮಂತರು” ಎಂದು ಹೇಳಿದರು.

ವಿಪತ್ತು ಮತ್ತು ಸಂಪತ್ತು – ಹನುಮಂತನ ಬೋಧನೆ

ಹನುಮಂತ ಮತ್ತು ರಾಮನ ಸಂಭಾಷಣೆಯನ್ನು ಉದಾಹರಿಸಿದ ಅವರು, “ದೇವರನ್ನು ಮರೆಯುವುದೇ ವಿಪತ್ತು, ದೇವರನ್ನು ಸ್ಮರಿಸುವುದೇ ಸಂಪತ್ತು ಎಂದು ಹನುಮಂತನು ಹೇಳುತ್ತಾನೆ. ವೀರಶೈವ ಲಿಂಗಾಯತರಿಗೆ ಮನೆ ಇಲ್ಲದಿರಬಹುದು, ಅನ್ನ ಇಲ್ಲದಿರಬಹುದು, ಬಟ್ಟೆ ಇಲ್ಲದಿರಬಹುದು. ಆದರೆ ಕೊರಳಲ್ಲಿ ಲಿಂಗ ಇದ್ದರೆ, ಗುರುವಿನಲ್ಲಿ ಭಕ್ತಿ ಇದ್ದರೆ, ಜಂಗಮರಿಗೆ ಗೌರವ ಇದ್ದರೆ ಅವರಷ್ಟು ಶ್ರೀಮಂತರು ಯಾರು ಇಲ್ಲ” ಎಂದು ಹೇಳಿದರು.

ಲಾಕರ್‌ನಲ್ಲಿರುವ ಲಿಂಗವಲ್ಲ, ಕೊರಳಲ್ಲಿ ಇರುವ ಲಿಂಗವೇ ಧರ್ಮ

ಇಷ್ಟಲಿಂಗವನ್ನು ಬ್ಯಾಂಕ್ ಲಾಕರ್‌ನಲ್ಲಿ ಇಡುವ ಪ್ರವೃತ್ತಿಯ ಬಗ್ಗೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ ಜಗದ್ಗುರುಗಳು, “ಲಿಂಗವನ್ನು ಬಂಗಾರದಲ್ಲಿ ಮಾಡಿಸಬೇಕು ಎಂದು ಎಲ್ಲಿಯೂ ಹೇಳಿಲ್ಲ. ಲಿಂಗವನ್ನು ಸದಾ ಧರಿಸಬೇಕು, ಪ್ರತಿದಿನ ಪೂಜೆ ಮಾಡಬೇಕು. ಲಾಕರ್‌ನಲ್ಲಿ ಇಡುವ ಲಿಂಗದಿಂದ ಆತ್ಮೋನ್ನತಿ ಸಾಧ್ಯವಿಲ್ಲ” ಎಂದು ಎಚ್ಚರಿಸಿದರು.

ಮುಂದಿನ ಪೀಳಿಗೆಗೆ ಹೊಣೆಗಾರಿಕೆ

ಮಕ್ಕಳು ಮತ್ತು ಯುವ ಪೀಳಿಗೆಗೆ ವೀರಶೈವ ಲಿಂಗಾಯತ ಪರಂಪರೆ, ಧಾರ್ಮಿಕ ವಿಧಿ–ವಿಧಾನಗಳು, ಇಷ್ಟಲಿಂಗ ಪೂಜೆಯ ಮಹತ್ವವನ್ನು ತಿಳಿಸುವ ಹೊಣೆ ಪ್ರತಿಯೊಬ್ಬ ವೀರಶೈವ ಲಿಂಗಾಯತನ ಮೇಲಿದೆ ಎಂದು ಜಗದ್ಗುರುಗಳು ಕರೆ ನೀಡಿದರು. “ಲಿಂಗತತ್ತ್ವವನ್ನು ಅರಿತು ಬದುಕಿನಲ್ಲಿ ಅಳವಡಿಸಿಕೊಂಡಾಗಲೇ ವೀರಶೈವ ಧರ್ಮ ಮುಂದಿನ ಪೀಳಿಗೆಗೂ ದೃಢವಾಗಿ ಸಾಗುತ್ತದೆ” ಎಂದು ಹೇಳಿದರು.

ಈ ಸಂದರ್ಭದಲ್ಲಿ ಹೊನ್ನಾಳಿ ಹಿರೇಕಲ್ಮಠದ ಶ್ರೀಗಳು, ಬಿಳಿಕಿ ಮಠದ ಶ್ರೀಗಳು, ಸಿ.ಎಸ್. ಷಡಾಕ್ಷರಿ, ಜ್ಯೋತಿಪ್ರಕಾಶ್, ಸಿ.ಎ. ಹೀರೆಮಠ್, ಬಳ್ಳೇಕೆರೆ ಸಂತೋಷ್, ಶಿವಯೋಗಿ ಯಾಲಿ, ಪರಮೇಶ್ವರಪ್ಪ, ರುದ್ರೇಶ್, ತಾರನಾಥ್, ರೇಣುಕಾರಾಧ್ಯ, ಶಾಂತ ಆನಂದ್, ರತ್ನಮ್ಮ ಮಂಜುನಾಥ್, ಮೋಹನ್ ಹಾಗೂ ಮಲ್ಲಿಕಾರ್ಜುನಸ್ವಾಮಿ ಉಪಸ್ಥಿತರಿದ್ದರು.