ಪಾಟ್ನಾ: ಬಿಹಾರದ ಬೋಧ್ ಗಯಾದಲ್ಲಿ ಪ್ರಧಾನಿ ನರೇಂದ್ರ ಮೋದಿ 13 ಸಾವಿರ ಕೋಟಿ ರೂ. ಮೌಲ್ಯದ ರೈಲು, ರಸ್ತೆ, ವಿದ್ಯುತ್, ವಸತಿ, ನೀರು ಸರಬರಾಜು ಮತ್ತು ಆರೋಗ್ಯ ಸಂಬಂಧಿತ ಅನೇಕ ಅಭಿವೃದ್ಧಿ ಯೋಜನೆಗಳಿಗೆ ಶಂಕುಸ್ಥಾಪನೆ ಮತ್ತು ಉದ್ಘಾಟನೆ ನೆರವೇರಿಸಿದರು. ಮಗಧ ವಿಶ್ವವಿದ್ಯಾಲಯ ಮೈದಾನದಲ್ಲಿ ನಡೆದ ಸಮಾರಂಭದಲ್ಲಿ ಹಲವು ಯೋಜನೆಗಳನ್ನು ಉದ್ಘಾಟಿಸಿದ ಬಳಿಕ, ಸಾರ್ವಜನಿಕ ಸಭೆಯನ್ನು ಉದ್ದೇಶಿಸಿ ಮಾತನಾಡಿದರು.
ಬಿಹಾರವನ್ನು “ಚಂದ್ರಗುಪ್ತ ಮೌರ್ಯ ಮತ್ತು ಚಾಣಕ್ಯನ ನಾಡು” ಎಂದು ಕರೆದ ಮೋದಿ, ಇಲ್ಲಿ ತೆಗೆದುಕೊಳ್ಳುವ ನಿರ್ಣಯಗಳು ಎಂದಿಗೂ ವ್ಯರ್ಥವಾಗುವುದಿಲ್ಲ ಎಂದು ಹೇಳಿದರು. “ಕಾಶ್ಮೀರದ ಪಹಲ್ಗಾಮ್ನಲ್ಲಿ ನಡೆದ ಭಯೋತ್ಪಾದಕ ದಾಳಿಯ ಬಳಿಕ ಬಿಹಾರದ ನೆಲದಿಂದ ಭಯೋತ್ಪಾದನೆ ನಿರ್ಮೂಲನೆ ಮಾಡುವ ಪ್ರತಿಜ್ಞೆ ಮಾಡಿದ್ದೆ. ಇಂದು ಜಗತ್ತು ಆ ನಿರ್ಣಯದ ಫಲವನ್ನು ನೋಡುತ್ತಿದೆ” ಎಂದು ನೆನಪಿಸಿದರು.
ಕಾಂಗ್ರೆಸ್-ಆರ್ಜೆಡಿ ವಿರುದ್ಧ ವಾಗ್ದಾಳಿ
ಕಾಂಗ್ರೆಸ್ ಹಾಗೂ ಆರ್ಜೆಡಿ ಬಿಹಾರದ ಜನರಿಗೆ ಶಿಕ್ಷಣ, ಉದ್ಯೋಗ ಒದಗಿಸದೆ, ಅವರನ್ನು ವಲಸೆಗೆ ತಳ್ಳಿದವು ಎಂದು ಮೋದಿ ಆರೋಪಿಸಿದರು. “ಆರ್ಜೆಡಿ ಆಳ್ವಿಕೆಯ ಲಾಟೀನು ದಶಕದಲ್ಲಿ ಬಿಹಾರವು ಕೆಂಪು ಭಯೋತ್ಪಾದನೆಗೆ ಗುರಿಯಾಯಿತು. ಜನರನ್ನು ಮತಬ್ಯಾಂಕ್ ಎಂದು ಮಾತ್ರ ನೋಡಿದರು, ಅವರ ಬದುಕು-ಗೌರವದ ಬಗ್ಗೆ ಕಾಳಜಿ ವಹಿಸಲಿಲ್ಲ” ಎಂದು ಆಕ್ಷೇಪಿಸಿದರು.
ಹಳೆಯ ಸರ್ಕಾರಗಳು ಯೋಜನೆಗಳನ್ನು ವರ್ಷಗಳವರೆಗೆ ವಿಳಂಬಗೊಳಿಸಿ, ಜನರ ಹಣವನ್ನು ತಮ್ಮ ಖಜಾನೆಗೆ ಹರಿಸುತ್ತಿದ್ದವು. “ಇಂದು ಎನ್ಡಿಎ ಸರ್ಕಾರ ಕೆಲಸಗಳನ್ನು ಶೀಘ್ರ ಪೂರ್ಣಗೊಳಿಸುವತ್ತ ಬದ್ಧವಾಗಿದೆ. ಇಂದಿನ ಕಾರ್ಯಕ್ರಮವೇ ಅದಕ್ಕೆ ಸಾಕ್ಷಿ” ಎಂದು ಮೋದಿ ಹೇಳಿದರು.
ಭ್ರಷ್ಟಾಚಾರ ವಿರೋಧಿ ಕಾನೂನು
ಸಂವಿಧಾನದ 130ನೇ ತಿದ್ದುಪಡಿ ಮಸೂದೆ ಹಾಗೂ ಕೇಂದ್ರಾಡಳಿತ ಪ್ರದೇಶ ತಿದ್ದುಪಡಿ ಮಸೂದೆಯ ಕುರಿತು ಪ್ರಸ್ತಾಪಿಸಿದ ಮೋದಿ, “ಜೈಲಿನಿಂದಲೇ ಸರ್ಕಾರಿ ಫೈಲ್‌ಗಳಿಗೆ ಸಹಿ ಹಾಕುವ ದಿನಗಳ ಕಾಲ ಮುಗಿದಿವೆ. ಈಗ ಹೊಸ ಕಾನೂನಿನ ಅಡಿಯಲ್ಲಿ, ಸಚಿವರು ಬಂಧನಕ್ಕೊಳಗಾದರೆ 30 ದಿನಗಳಲ್ಲಿ ಜಾಮೀನು ಪಡೆಯದಿದ್ದರೆ ತಮ್ಮ ಹುದ್ದೆ ಕಳೆದುಕೊಳ್ಳಬೇಕಾಗುತ್ತದೆ” ಎಂದು ಎಚ್ಚರಿಕೆ ನೀಡಿದರು.
ಒಳನುಸುಳುವಿಕೆ ಬಗ್ಗೆ ಎಚ್ಚರಿಕೆ
ಬಿಹಾರದ ಗಡಿ ಜಿಲ್ಲೆಗಳಲ್ಲಿ ಜನಸಂಖ್ಯಾ ಬದಲಾವಣೆ ಮತ್ತು ಒಳನುಸುಳುವಿಕೆ ಗಂಭೀರ ಸಮಸ್ಯೆಯಾಗಿದ್ದು, ಭಾರತೀಯರ ಹಕ್ಕುಗಳನ್ನು ಕಸಿದುಕೊಳ್ಳಲು ಒಳನುಸುಳುವವರಿಗೆ ಅವಕಾಶ ನೀಡುವುದಿಲ್ಲ ಎಂದು ಪ್ರಧಾನಿ ಸ್ಪಷ್ಟಪಡಿಸಿದರು. “ದೇಶದಿಂದ ಪ್ರತಿಯೊಬ್ಬ ಒಳನುಸುಳುವವರನ್ನು ಹೊರಹಾಕಲಾಗುತ್ತದೆ. ಕಾಂಗ್ರೆಸ್-ಆರ್ಜೆಡಿ ಬಡವರ ಹಕ್ಕುಗಳನ್ನು ಕಿತ್ತುಕೊಂಡು ಒಳನುಸುಳುವವರಿಗೆ ನೀಡಲು ಬಯಸುತ್ತಿವೆ” ಎಂದು ಮೋದಿ ಆರೋಪಿಸಿದರು.
ಪ್ರಮುಖ ಯೋಜನೆಗಳ ಉದ್ಘಾಟನೆ
ಆಂಟಾ-ಸಿಮಾರಿಯಾ ಸೇತುವೆ (ರಾಷ್ಟ್ರೀಯ ಹೆದ್ದಾರಿ-31): 8.15 ಕಿ.ಮೀ ಉದ್ದದ ಸೇತುವೆ, 1,870 ಕೋಟಿ ರೂ. ವೆಚ್ಚದಲ್ಲಿ ಗಂಗೆಯ ಮೇಲೆ ನಿರ್ಮಿಸಿದ 1.86 ಕಿ.ಮೀ ಉದ್ದದ ಆರು ಪಥದ ಸೇತುವೆ ಒಳಗೊಂಡಿದೆ.
ಅಮೃತ್ ಭಾರತ್ ಎಕ್ಸ್ಪ್ರೆಸ್ ರೈಲುಗಳು: ಗಯಾ-ದೆಹಲಿ ಎಕ್ಸ್ಪ್ರೆಸ್ ಹಾಗೂ ವೈಶಾಲಿ-ಕೊಡೆರ್ಮಾ ಬೌದ್ಧ ಸರ್ಕ್ಯೂಟ್ ರೈಲಿಗೆ ಹಸಿರು ನಿಶಾನೆ ತೋರಿಸಿದರು.
ವಸತಿ ಯೋಜನೆ: 12,000 ಬಡ ಕುಟುಂಬಗಳಿಗೆ ಮನೆಗಳ ಕೀಲಿಗಳನ್ನು ಹಸ್ತಾಂತರಿಸಿದರು.
ಬಕ್ಸಾರ್ ಉಷ್ಣ ವಿದ್ಯುತ್ ಸ್ಥಾವರ: 6,880 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣಗೊಂಡ ಈ ಘಟಕವು ರಾಜ್ಯದ ವಿದ್ಯುತ್ ಉತ್ಪಾದನೆ ಸಾಮರ್ಥ್ಯವನ್ನು ಹೆಚ್ಚಿಸುತ್ತದೆ.
ಮುಜಫರ್ಪುರ ಹೋಮಿ ಬಾಬಾ ಕ್ಯಾನ್ಸರ್ ಆಸ್ಪತ್ರೆ: ಆಧುನಿಕ ಸೌಲಭ್ಯಗಳೊಂದಿಗೆ ನಿರ್ಮಿಸಲಾದ ಈ ಕೇಂದ್ರದಿಂದ, ಬಿಹಾರದ ಜನರು ಕ್ಯಾನ್ಸರ್ ಚಿಕಿತ್ಸೆಗೆ ಮೆಟ್ರೋ ನಗರಗಳಿಗೆ ತೆರಳಬೇಕಾಗುವುದಿಲ್ಲ.
