ಇಂಫಾಲ್‌: ಮಣಿಪುರದಲ್ಲಿ 2023ರಲ್ಲಿ ಭುಗಿಲೆದ್ದ ಅಶಾಂತಿಯಿಂದ ಎರಡು ವರ್ಷಗಳ ನಂತರ, ಪ್ರಧಾನಿ ನರೇಂದ್ರ ಮೋದಿ ಅವರು ಶನಿವಾರ ಮೊದಲ ಬಾರಿಗೆ ಚುರಚಂದಪುರಕ್ಕೆ ಭೇಟಿ ನೀಡಿ ಜನಾಂಗೀಯ ಹಿಂಸಾಚಾರದ ಸಂತ್ರಸ್ತರನ್ನು ಭೇಟಿಯಾದರು. ಈ ಸಂದರ್ಭ ರಾಜ್ಯದ ಅಭಿವೃದ್ಧಿ ಮತ್ತು ಪುನರ್‌ನಿರ್ಮಾಣಕ್ಕೆ ಸಂಬಂಧಿಸಿದ ಹಲವಾರು ಪ್ರಮುಖ ಯೋಜನೆಗಳನ್ನು ಅವರು ಉದ್ಘಾಟಿಸಿದರು.
ಚುರಚಂದಪುರದಲ್ಲಿ ಪ್ರಧಾನಿ ಮೋದಿ ಅವರು ಮಕ್ಕಳೊಂದಿಗೆ ಸ್ನೇಹಭಾವದಿಂದ ಸಂವಾದ ನಡೆಸಿ, ಮಕ್ಕಳಿಂದ ಹೂಗುಚ್ಛ ಹಾಗೂ ವರ್ಣಚಿತ್ರಗಳನ್ನು ಸ್ವೀಕರಿಸಿದರು. ಅಲ್ಲದೆ, ಮಕ್ಕಳೊಬ್ಬರು ನೀಡಿದ ಸಾಂಪ್ರದಾಯಿಕ ಗರಿಗಳ ಟೋಪಿಯನ್ನು ಧರಿಸಿ ಆತ್ಮೀಯತೆ ಪ್ರದರ್ಶಿಸಿದರು.
₹7,300 ಕೋಟಿ ಮೌಲ್ಯದ ಯೋಜನೆಗಳ ಉದ್ಘಾಟನೆ
ಮಣಿಪುರದ ಅಭಿವೃದ್ಧಿ ಹಾದಿ ಬಲಪಡಿಸಲು ಪ್ರಧಾನಿ ಮೋದಿ ಒಟ್ಟು ₹7,300 ಕೋಟಿ ಮೌಲ್ಯದ ಯೋಜನೆಗಳಿಗೆ ಶಂಕುಸ್ಥಾಪನೆ ನೆರವೇರಿಸಿದರು.
₹3,600 ಕೋಟಿ ಮೌಲ್ಯದ ನಗರ ರಸ್ತೆ, ಒಳಚರಂಡಿ ಮತ್ತು ಆಸ್ತಿ ನಿರ್ವಹಣಾ ಸುಧಾರಣಾ ಯೋಜನೆ,
₹2,500 ಕೋಟಿ ಮೌಲ್ಯದ ಐದು ರಾಷ್ಟ್ರೀಯ ಹೆದ್ದಾರಿ ಯೋಜನೆಗಳು,
ಮಣಿಪುರ ಇನ್ಫೋಟೆಕ್ ಅಭಿವೃದ್ಧಿ (MIND) ಯೋಜನೆ,
ಒಂಬತ್ತು ಸ್ಥಳಗಳಲ್ಲಿ ಮಹಿಳೆಯರ ಹಾಸ್ಟೆಲ್‌ ನಿರ್ಮಾಣ ಯೋಜನೆಗಳನ್ನು ಆರಂಭಿಸಲಾಯಿತು.
“ಮಣಿಪುರ – ಧೈರ್ಯ ಮತ್ತು ದೃಢಸಂಕಲ್ಪದ ಭೂಮಿ”
ಸಾರ್ವಜನಿಕ ಸಭೆಯನ್ನುದ್ದೇಶಿಸಿ ಮಾತನಾಡಿದ ಮೋದಿ,
“ಮಣಿಪುರವು ಧೈರ್ಯ ಮತ್ತು ದೃಢಸಂಕಲ್ಪದ ಭೂಮಿ. ಇಲ್ಲಿನ ಬೆಟ್ಟಗಳು ಪ್ರಕೃತಿಯ ಅಮೂಲ್ಯ ಕೊಡುಗೆ ಮಾತ್ರವಲ್ಲ, ಜನರ ಕಠಿಣ ಪರಿಶ್ರಮದ ಪ್ರತಿಬಿಂಬವೂ ಆಗಿವೆ. ‘ಮಣಿ’ ಅಂದರೆ ಅಮೂಲ್ಯ ರತ್ನ – ಮಣಿಪುರವು ಆ ರತ್ನದ ಅರ್ಥವನ್ನು ತೋರಿಸುತ್ತದೆ. ಈ ರತ್ನ ಇಡೀ ಈಶಾನ್ಯವನ್ನು ಬೆಳಗಲಿದೆ,” ಎಂದು ಹೇಳಿದರು.
ಸಂಪರ್ಕ ಮತ್ತು ಮೂಲಸೌಕರ್ಯಕ್ಕೆ ಒತ್ತು
2014ರಿಂದ ಮಣಿಪುರದಲ್ಲಿ ರೈಲ್ವೆ, ವಾಯು ಹಾಗೂ ರಸ್ತೆ ಸಂಪರ್ಕ ಸುಧಾರಣೆಗೆ ಸರ್ಕಾರ ನಿರಂತರ ಬದ್ಧತೆಯಿಂದ ಕೆಲಸ ಮಾಡುತ್ತಿದೆ ಎಂದು ಪ್ರಧಾನಿ ನೆನಪಿಸಿದರು.
ಹವಾಮಾನ ವೈಪರಿತ್ಯದ ಕಾರಣ ರಸ್ತೆಯ ಮೂಲಕ ಪ್ರಯಾಣ ಮಾಡಬೇಕಾದ ಸಂದರ್ಭ ಎದುರಾಗಿದೆ. ಆದರೆ ಮಾರ್ಗದುದ್ದಕ್ಕೂ ಜನರು ತೋರಿಸಿದ ಪ್ರೀತಿ-ಆತ್ಮೀಯತೆ ಮನಸ್ಸಿಗೆ ಹತ್ತಿರವಾಯಿತು ಎಂದು ಮೋದಿ ಭಾವುಕರಾದರು.
ಪ್ರಧಾನಿ ಮೋದಿ ಅವರ ಈ ಭೇಟಿಯಿಂದ ಮಣಿಪುರದ ಶಾಂತಿ-ಅಭಿವೃದ್ಧಿ ಕಾರ್ಯಚಟುವಟಿಕೆಗೆ ಹೊಸ ವೇಗ ಸಿಗಲಿದೆ ಎಂಬ ನಿರೀಕ್ಷೆ ವ್ಯಕ್ತವಾಗಿದೆ.
